مشاهدة النسخة كاملة : ديوان الشاعر/ احمد الشربيني


جابر المصري
22-12-2005, 06:52 PM
هَـــــمْ يا جــــمل

الى صديقى الطيب
عم السعيد الشربينى
( أبويا )


****************


تقاطيع ملامحك فى الصباح
تقهر هموم شبح المسا
طلة عيونك ع البراح
و العتمة كاتمة مغلسة
زرقة عينيك الصافية كالبحر الكبير
مادة ايديك الوافية بالشىء القليل
فيض الحنان السلسبيل
من حضنك الممدود..
عرض اتساع قلبك
يا اغلى من حبنى
على قلب من حبك
مشتاق ودين النبى دقنك تشوكنى
وارجع لحضنك صبى
وايديك بتفركنى
وبوشى اغطس ف عبك
اهرب وتمسكنى
وتسمى لما اتعتر
وبلهفة تدركنى
وتقوللى
هم يا جمل
فيبان على الخجل
بصة عينيك بالعجل
تضحك وتشركنى
بحوار طويل موصول
يمتد بينا القول
تنضح عينيك بالقلق
شارد فى شىء مجهول
تخطفنا لحظة صمت
- على قد وعى - فهمت
الفقر كرباج زمن
على ضهر ايامك
والجلد رغم الجلد
بيسد قدامك
لا الصبر انبت فرج
ولا باعه شق طريق
كاس المرار
ع الريق
لا عرفت فين وجهتك
ولا منتهى الترحال
القهر ادمى العيون
ما شا فتش م الغر بال
من ايه تخاف على مين..
يا مساير الاحوال
حلمك مع حملك..
محصورفى لقمة عيش
والقرش الابيض ضنين
مع فحمة الايام
لا تنام عيون الجواعى,
ولا اللى خاف بينام
الوهن هز العصب
ادركت مغزى التعب
كنز القناعة اتعطب
يا واصل الارحام
بشويش يا نزف الخطا
ع اللى غناه فى النفس
لا تزيدى من محنته؟
ولا تجبريه ع اليأس
حمل الولاد صياد
يحرم عليه القنص
والحلم - رغم الفزع -
لازما يكون بالهمس
محتاج لبلة ريق
يا ابو حمل متعسر
امشى عدل تنعدل
دا الحلم متفسر
ولحين ما تتيسر
(على قد طول اللحاف )
الكل متقرفص
طيور لطشها الشبك
مش قادرة تتفلفص
خيال ويلمح خياللك..
ايه اللى بيتربص؟
فسر لى لغز ابتسامتك
ع الشفة بهتانة
واخترت فين موطنك
احكيلى بامانة
واشرحلى هزة دماغك
قبل الفراق ما يطول
يمكن حفيدك يوم
يحتاج فى مرة يقول:
يا ابويا دايما ليه
بنخاف من المجهول ؟




أحمد الشربينى

جابر المصري
22-12-2005, 06:53 PM
ســـحر الخجـــل
إ لى /الشاعرة التى ألهمت هذه الكلمات
من ذا الذى..
أهدى القلوب سبيلها,
صوب التصافح بالأمل؟
أومن أحال..
المستحيل..
الى يقين محتمل؟
من ياتراه..بوصله,
خطت سطورالعشق..
فى رحم المقل؟
وبوشوشات الطير..
عبرالها تف..
حلو الكلآم على المسامع..
كا لقبل ؟
قمراضاء بفتنة..
ياويح قلبى..
من بهاء مكتمل؟
رنت العيون هنيهة..
فتعاظمت..
فى القلب نار تشتعل.
وتوردت بالوجد..
وجنات الحبيب,
وبالحياء توشحت..
أواااااه من سحر الخجل
عند اللقاء الأول..
ماد الفؤاد,ولم يزل!
ما كان قلبى هكذا,
بل كان أرسخ من جبل
فتحورت نبضاته..
عمن سواه..
فلم يسل.
فخشيت من شرك الجنون..
لممت روحى..من وجل.
وعن الصحاب..
كتمت سرى خشية..
عين الرقيب,بحسرة..
لغواية..قد تفتعل.
آآآه..أيا قلب الجريح
من الهوى,
هيهات جرحك يندمل؟
أهواللقاء,أم الفراق,
أم السراب,
فالوقت
يمضى فى عجل!
وغد يطل بصبحه..
واذا الحبيب قدارتحل.
فقرأت ما خطت يداه,
وبكيت من سحر الجمل.
( نسافرفى أمانينا )
رباه ما أحلى ألأمل ؟
نطق الفؤاد..
برعشة,
وحسبته..
قدمات من فعل الملل!

أحمد الشربينى

جابر المصري
22-12-2005, 06:54 PM
شـــــهـقه
لو طلبتى الروح..ياروحى,
اقول دى روحى
ماهيش كتير؟!
وان سمعت ف يوم نداكى,
- لجل اوصللك - اطير.
واللى يسأل:
يعنى ايه الحب,أقول:
الحب انتى,
- بس لما يكون كبير-
واللىيسأل:
رأيى ايه فى الغيره,
ردى:
ان قلبى لما حبك,
شيئ طبيعى لو يغير؟!
صدقينى,
لوباقيلى,فى الحياه,
(شهقه) يادوب
اتنفسك,
واتمنى اموت,
قبل الزفير

احمد الشربينى

جابر المصري
22-12-2005, 06:55 PM
ملاحظة) لم اقصد كتابة قصيدة, فعندما أكتب قصيدة عن شخص مثل جابر المصرى فلابد ان تكون اضافة للشعر,ولكنى كنت ممسكا بقلمى ,وتذكرت هذا الإنسان وإذا به
يحاول أن يكتب لجابر , ولم استطع كبح جماح هذا القلم ولقد كتبت هذه (الحاجة )
فى اقل من ربع الساعة
إبن البلد..ياولد
(اهداء للشاعر الإنسان)
جـــــــابر المـــــــصــــــرى
ابن البلد..ياولد
(جابر),لكين (مصرى),
بالحب - بين الناس -
زى الضيا .. يسرى.
مكسى بوشاح الأصل
لكن فى توب عصرى!
**********
شفتك مابين الناس.
انسان..
لسان..طاهر,
فى المحنه
- رغم الألم -
زى الجمل ..صابر.
يابو قلب أبيض..حليب,
لودق اى حبيب,
تفتح له ع الآخر!
لو رحت أى مكان..
ولمحت طيف إنسان,
- للجدعنه - عنوان..
يبقى انت..ياجابر؟!
*********
وان رحت فين..ماتروح,
قلبك كتاب مفــــتوح..
بالصدق فيه..بيبوح,
مكسى بجمال الروح,
تبكى وانا المجروح,
بالشعر ..ياشاعر؟!
*********
مااعرفشى..ليه شايفك,
- مع انى ماشــفتك -
وكأنى من ميت سنه,
قـــربت وعرفــــتك!
من يوم ماكلمتنى,
طلت رموز ..سمتك.
ألمح وضوح طــلتك,
وارسم كمان صورتك؟!
فى المعــــنى بتسافر,
يحميك لنا..ربنا,
يا (مصرى) يا (جابر)


أحمد الشربينى

جابر المصري
22-12-2005, 06:56 PM
المقامه الشربينيه

فى المسألة التعليميه

أفاد فشلان بن خيبان,
بمالديه من الأدلة والبرهان,
بصعوبة الإمكان,
فى حل شفرة الامتحان.
وانه يتحدى اى مسئول ..
ممن استنارت لديهم العقول,
فى ايجاد حل من الحلول,
يبدل الوضع المقلوب بوضع معدول؟!
من حيث تنفلت الاعصاب,
لمايسببه الامتحان من رعب وارهاب,
وانتظار المعلم لبقية الاتعاب ,
مما اصاب الآباء بالعقم وعدم الانجاب؟
وأحال معظمهم الى الذهول,
فاخذ ينشد ويقول:

ان المدارس للعــــــلوم تاسست,

وتزينت بزوى العقـــــول النيره

مال المدارس ارتأيها افــــلست,

وتحولت فـــيها العلوم لمسخره؟

وتقدمت بالعـــلم اصناف الامم,

وبعـلمنا دوما نسير الى الورا؟

فمن المدارس اولادنا يتخرجوا,

والرأس منهم بالجهالة عامره!

وبعد فترة من الصمت والاعياء,دلدل شفته بقرف واستياء, وهز رأسه ميسرة وميمنه,وهو فى غاية القرف والعكننه,ولمعت عيونه بالدموع,ثم قال بصوت مسموع:

سألونى رأيى وشعورى

اناقلت طبعا وضرورى

فيه كلمه محشوره ف زورى

محتاج اقولها عن التعليم
**********
انا عندى واد فى الاعدادى
بيقولو اشطر اولادى

واحلف بتربة اجدادى

اسمه لحد اللحظادى


مايكتبه ولا مره سليم


***********


فى مره امه بتكبر

بتقوللى ابنك يتبخر

دى شهادته حلوه وبتنور

انا قلت طيب قولى ياكريم



*********
بصيت لقيت اللى مدور
خمس دواير بالاحمر

اناشفت بعيونى المنظر

وقلت انت يارب عليم




***********
ايه بس اعما ياخواتى
بعد الدروس الخصوصيه

عربى انجليزى وجغرافيا

حتى الرياضه البدنيه

ولاعادش حيلتى ولا مليم

**********

فى شقه فيها كام اوضه
فتح المعلم سوق سوده
اصل الدروس صبحت موضه
ولواد اخيرا يبقى بهيم



ثم ارتعش وانتفض,
وتفتت منه العضد,
وكمن اصابه من الياس المرض,
ورفع راسه للسماء وقال :
عليه العوض ومنه العوض

أحمد الشربينى

جابر المصري
22-12-2005, 06:58 PM
من وحى (طيبه)



ياطيبه..ياطيبه,
يامشرفه ناسك.
لوتبقى - يوم - محراب,
أصبح أنا ناسك
ياإسم تاج للتاريخ,
نور بنبراسك,
قال التاريخ كلمته,
على متن كراسك.
وكتبت فيك غنوتى
من وحى احساسك

أحمد الشربينى

أحمد الشربينى
10-03-2006, 05:09 AM
مــن( وحى طـــيبه )

ياطيبه..ياطيبه,
يامشرفه ناسك.
لوتبقى - يوم - محراب,
أصبح أنا ناسك
ياإسم تاج للتاريخ,
نور بنبراسك,
قال التاريخ كلمته,
على متن كراسك.
وكتبت فيك غنوتى
من وحى احساسك



أحمد الشربينى








اخى العزيز وشاعرنا ا الكبير
جابر المصرى
اشكرك هلى هذا الجهد الكبير
فى تجميع بعض اعمالى نواة لتجميع بقية الاعمال
كما احيى الفكره الرائده بتجميع اعمال مبدعى المنتدى
ادام الله جهدكم من اجل رفعة منتدانا الحبيب
احمد الشربينى

حلمى عمر
24-04-2006, 04:38 PM
حبيبى جابر استاذى وحبيبى احمد الشربينى
اليوم بحق وقعت على كنز ..... عشت متعة اكاد اجزم انى لم اتذوق طعمها منذ زمن بعيد ... ماكل هذا الابداع... واين كان واين كنت انا .. يبدو ان كراهيتى للاجهزة وجهلى بالكومبيوتر ... اضاع منى فرص كثيرة للمتعة .. ياااااااااااااااه ياعم جابر وياعم احمد ياشربينى .
ظننت ان الشعر قد افلته الزمن الصعب من ايادينا ويبدو ان الشعراء المنقبين عن كل ماهو جميل ومبدع مايزالون يواصلون التنقيب والاكتشاف ... استمتعت حد الشبع ... واحتاج ان اصمت طويلا ...
هل تسمحوا لى بالصمت والتأمل .. كل تقديرى واحترامى وحبى .
حلمى عمر

سلوى نصار
29-04-2006, 06:11 PM
انا داخلة اسجل اعجابى

و اقرا فقط و استمتع

تسلم يا استاذ جابر ربنا يكرمك على هذا العمل

و الى الامام دائما يا بابا احمد

أحمد تمام
05-05-2006, 04:09 PM
أخى العزيز

الشاعر القدير

أحمد الشربينى

جئت أسجل حضورى

وأشرف بتواجدى

بين تلك الروائع

لعلى أتعلم منها الكثير

حيث كل حرف منها

ينبض بإحساس شعر رفيع

وفكر راق


فتقبل حبى وتحياتى وتقديرى

أحمد

أحمد الشربينى
13-05-2006, 10:38 AM
هو الليل جاء,قصيدة لأحمد الشربينى





هو الليل جاء

الى من ألهمتنى الكلمات


*******
هو الليل جاء
يُبيح الحكايا,
بوصل إنقطاعٍ لذاك المساء
مساءٌ تلظى بفيض الحنايا
بحرقة شوقٍ :
بوحى اشتهاءٍ .
وقد خِلت أنك وهم تولى,
فأيقنت أن القول ادعاء !
واجتاز كل حدود التوانى,
فأخطو , وأعدو,
أُسابق روحاً :
تتوق اللقاء
وأسمو بروحى
سعياً لذات,
تفوق الذوات
برؤيا العيون
فمالى اراكِ أبحت الظنون
بقصد العناء ,
وانشد فيكى حدود الكمال,
واقبل - رغماً
عنائى يبقى بغير انقضاء
فخِلتك شوقاً
يميد اشتياقى
وخِلتك عشقاً
يروم التلاقى
نذوب فنحيا اكتمال الفناء
لنُدرك بعض زمانٍ تولى
ونقطف زهراً ..
لقطفٍ تجلى
ونُحيى اشتهاءً ..
لحينٍ تخلى
عساه بوصلٍ يُفيض العطاء
فأكتب شعراً ..
يحاكى نِزار
ويأبى انتظاراً لفيض الضياء
وارسم سحراً
يضارع آىَ
ليوناردافنشى,
وأطويه سراً ,
فيا ويح قلبى ..
بسرك يفشى
كباقى الحكايا
بذاك المساء..!
*********
أحمد الشربينى

أحمد الشربينى
13-05-2006, 10:45 AM
حضن المرضعه..قصيده لاحمد الشربينى

حضــن المــرضـــعه
تاهت جهاتنا الاربعه,,
لما الوليد..
قسيت عليه المرضعه!
حضن الامومه صفحته
- قبل الميلاد - ..
متمزعه؟!
مارضعش من فيض صدرها..
طعم الامان,
ولاداق فى غفلة حضنها..
ندعة حنان؟!
ولاحس لحظه بقربها,
وقت اما ضاق..
بيه المكان؟!
- غير بالهوان -
بصة عنيه مااتكحلت,
شجرة براءته اتقلقلت..
- من جدرها - ..
قبل الاوان!
الفرع مال اتنسلت..
- بالغصب - اوصال الجدور,
ياارض ياام الخير
وفير,
لو طرح كان من غير حضور
اما اللى نبته كان اصيل,
م الحضن دايما ترفضيه,
وتبانى انك ارض بور؟!
فدادين هموم..
متشال نصيبه من الميراث,
ولافيش قيراط يطرح سرور؟!
تنشع عينيه بالغل,
يبلع حسرته,
ميل الميزان
توه خطاوى سكته,
حلمه البسيط اللى اتقتل,
فتت بواقى همته,
فى العتمه شبت بصته,,
وكانه صفحه بتتسرق,
منها السطور؟!
تاهت حروف الانتساب
هدمة خلاصه بتتنسج..
بخيوط سراب!
ضايعه خريطة وجهته,
يتخطى باب,
يلقى اتقفل,
فى الوش باب!
بين اهله داق اليتم والغربه,
وداق طعم الضياع,
يدخل صراع,من غير مايعرف,
مين غريمه فى الصراع؟
تايهه الملامح..
خلف زيف الاقنعه
وف عز خوفه,
يطوف بشوفه,
على الجهات الاربعه
كانت الغرابه ف بصته
لمح الغريم,
نايم فى حضن المرضعه؟!
احمـــد الشــربينى

أحمد الشربينى
13-05-2006, 10:49 AM
معانى..قصيده لاحمد الشربينى

مـعـانـى
=========
تسألينى عن الأمان؟
وف عنيكى..
شفت بحر من الحنان.
تسألينى عن اللى..كان؟
وانتى وياك ابتديت..
أحيا الزمان.
تسألينى عن المعانى؟
قلت .. لما باقولها ليكى,
يبقى ليها طعم تانى
تسألينى..عن اللقا..
بعد الفراق؟
وانتى عارفه..القلب داب..
م الاشتياق.
تسألينى:
الحب غايه, أو وسيله؟
لأ ياروحى..
الاجابه ع السؤال ده..
محتاجالها..ألف ليله.
========

أحمد الشربينى

أحمد الشربينى
15-05-2006, 08:12 AM
وحـــبـيـتــك



وحبيتك..
وغير حبك ماعندى بديل
وحبيتك وانا
‏‎–‎‏ حتى ‏‎–‎
فى حضن الليل..‏
فى ضحكة طفل حيرانه ‏
فى لهفة أم سهرانه ‏
بتتمنى,وتستنى..‏
يعود الفجر من تانى..‏
مع المواويل.‏
ياموالى ياغنوة ناى..‏
لكل الناس باغنيها,‏
ياكلمة حق تتردد ,‏
فتتجدد معانيها,‏
وحبيتك..‏
ياساقيه عشق تروينى,‏
ياصوت بالحب يشجينى ,‏
ولا غيرك ,‏
وغير حضنك..‏
يدفينى!‏
فى ليل البرد حبيتك
فى عز الشرد حبيتك
ونادينى ,تلاقينى..‏
فى وقت الشده لبيتك,‏
وحبيتك..‏
وترجع تانى ايامك,‏
تحقق صعب احلامك..‏
يهون الصعب ياغاليه,‏
تهمى وتصلبى عودك,‏
وتفضل كلمتك.. عاليه,‏
واحس بنفسى فى وجودك,‏
وحبيتك..‏
يازرع اخضر
بيتمخطر بازهاره
يانيل اسمر..
كما السكر فى مقداره
ومادنه عاليه بتكبر
تنادى قلوب بتستغفر
قلوب طاهره,,‏
تصير اطهر,‏
وحبيتك
يالقمة عيش وفيها الملح,‏
ياضله ف غيط..‏
يفيض بالقمح
واشوفك فرح ‏
فى وقت الجرح
يدوب الليل مع نهارك,‏
وتعلى ويعلا مقدارك
ولو ليلى يطول بى,‏
لابد اوصل لباب دارك
وحبيتك..‏
ياطلة شمس بتصبح
وبتصحصح..‏
جيران بيتك
يابستانى ياورد وفل
علينا يطل,‏
ولما يهل,,‏
اشوف طفلك بيتنطط,‏
ويتشعبط..‏
على حجرك,‏
ويغطس فى امان صدرك
ومن ريحتك..‏
بيتنفس..‏
نفس جامد ,‏
يقوم فارد د راعاته,‏
وينده ندهة لاخواته,‏
ودمك يجرى فى عروقه,,‏
كما صبحك,‏
وهو يطل بشروقه,‏
يطاطى لاجل يرضيكى,‏
وبعنيكى تشاوريله..‏
عشان يرفع ..‏
جبينه..لفوق,‏
ولايطاطى,‏
ولا يطاطى,‏
ولا يطاطى,‏
وحبيتك


أحمد الشربينى

أحمد الشربينى
15-05-2006, 08:27 AM
متاريــــــــــــــــس





عاشق لطينك وتينك,‏
يحرم على الجانى,‏
قاسمينى فى ضحكتى..‏
يانبع احزانى
.تصلينى
‏ نارك فى دارك,‏
والحسره فى الغربه
اطلق حنينى اليك..‏
يمكن يلوف بسماك
لكنه تاه ..فى (سماك)‏
شارد كسير الجناح..‏
من صهد ترحاله,‏
مين اللى اوحاله؟‏
يشرب عطش غربته..‏
يوهبها ليك تنهيد,‏
فكى القيود م الايد..‏
اغزل خيوط لهفتى,‏
والحضن مش دافى,‏
وانسج بايه ليكى..‏
ياكاسره حدافى؟
توبك بلى ,وابتلى ..‏
لحظة عدل نولك,‏
رايده لمين..نولك؟‏
الكدابين فى الفرح..‏
لحظة ماغنولك,‏
ولا اللى وقت الضنا..‏
شايل عنا قولك؟
تقسى واقول : دالزمن ..‏
هو اللى كان قاسى,‏
وتفصلى المتاريس..‏
دايما على مقاسى؟!‏
ياخايفه من كلمتى,‏
وبتكرهى صمتى..‏
فرحك..بصرحك..‏
‏ - غير جرحى ‏‎–‎‏
مين علاه؟‏
ملينى اكتب كتابك,‏
ونراجع الاملا,‏
وتلملمينى معانى,,‏
كل الحروف كامله.‏
حطى بحنينك ع الوجع..‏
تتجسد الجمله.‏
من ليلى ينبت نهارك..‏
ارجع امليكى,‏
ياحروف سنينى العصيه..‏
انا كل ماليكى.‏
لو تحنى هامتى قوليلى:‏
طب مين يعليكى؟!‏
دانا اللى مال,ليكى,‏
وانا اللى مال بيكى؟
أحمد الشربينى

أحمد الشربينى
15-05-2006, 08:34 AM
حبــال الصــبر



تغيب الضحكه وتلمح,
وهمك فى الحشا يدبح..
يشوفنى الحزن فى عيونك.
اسافر فى مدى كونك,
قدر مكتوب
وصبرى حبال..اخاف لاتدوب
يضيع منى الامان والحب
ومرسال الامل طول..
لا بتغير ولا اتحول
وتقسى ليه ياايامى ..
على المحبوب؟
على عهدك انا باقى ,
وشايل حمل اشواقى
ليوم ترجع غناويكى,
وترجع..
ضحكتك تانى,
تبدد طعم احزانى,
بحرف يوضح الكلمه ..
يضيفها لسطر عنوانى,
وجمله تفسر المعنى ..
لااقول ازاى ولا اشمعنى؟؟
وعبره تبان من الفكره,
تبددلى سراب بكره
وابص ف وشك القانى..
بكل وضوح
لا قلقانى هموم وجروح!
مااخافشى..لوتضمينى,
لو اغضب..برضه هدينى,
لو انعس..قومى صحينى,
اشاورك...
وانتى شاورينى
دانا رسمك..
على اسمك,
ياصوره عشقها فنانك,
انا عودك,
وانغامك,
وانا ليلك وايامك,
وقبل السهم مايصيبك,
اقدم عمرى قدامك
لبشرة خير..
يادوب طالله.,
مع حفنه من الغله,
وبعضش ميه م القله,
ونسمه من صباح نادى,
وكلمة حق مكتوبه..
تغير صوره مقلوبه..
تبان الطوبه ع الطوبه
وعن حبك ماعمرى اتوب.
احبك بكره وامبارح,
فى غنوة طيرك الشادى
واحبك نسر لوجارح,
واحبك زهره فى الوادى
واحبك طفل بيخطى,
وحكمه وعلم لولادى,
واحبك صوره وقصيده..
ياحته منى يابلادى,
ياحته منى يابلادى

أحمد الشربينى

أحمد الشربينى
19-05-2006, 10:02 AM
بلقيــــــــــــــس



بلقيس جاء ت..
ماشئت,ولكن..
هى شاء ت
لا هدهد..كان ولا عفريت,
وتدانت
أتفقد أطوار التفكير,
وأهادن..
مابين المخبر والمنظر
مابين الجوهر والمظهر
مابين الافق ومايظهر
مابين الكائن والمكنون
مابين الآن وفى غده..
ماسوف يكون
فاحتد الصمت لدى
للصمت ضجيج..
فى الاعماق!
يصرخ بالبوح,
وتوق لعناق
فى ليل الظمأ القابع..
فى النفس,
تهفو النفس إلى الاشراق,
إمرأة..
تجتاح حصونى
ويل من هول الاخفاق
وتفل الأبواب الموصدة..
لتذيب الثلج الراسخ..
فى الاعماق.
وبحطب الرغبة..
تصلينى,
وتعيد صياغة تكوينى
أتباعد خوفا..
تختال
- إاليها - فتدنينى..
لعيون تستل النصل,
فتنتزع..
من رحم الشك..
يقينى,
بشفاه.. خلقت كى تلثم
تتساقط اقنعة الرهبة..
من فيض الاغداق
تمطرنى عشقا..
تجعلنى أميرا للعشاق
هى انثى..
لا شيئ يشبهها
فى الافق تلوح بالاشواق
هى ذات..
تجتاح كيانى.
تنسل بشغف..
لقصى مكان فى الاعماق

أحمد الشربينى

سماح كمال
01-06-2006, 03:35 AM
بردية أوزوريس
إيزيس ولا تلملمى..
م الارض أشلا ئى
غايتى - فى كل مكان - ..
يبقالى شيئ باقى!
وبدمى لاتنقشى..
فوق الجدار..
اسرار
روح الحقيقه المضيئه
ماتحدهاش اسوار
وقت استكانة زمن..
تنطق بأوراقى

**********
لكن بدمى ارسمى..
- على قبرى - ..
ريشه ونصل ..
وقت اللقا الموعود,
مرصود بكلمة فصل..
تفصل مابين اشباه
لابسين رداء الاصل
ويدنسو ردائى؟!

**********
وف قبرى ضمى كلام,
قبل الأ وان..
قلته,
يمكن يطوله زمان..
يدرك خلود سيرته؟!
ويفك خيط الرموز,
يعلى البيان هامته
تنطق معانى البوح
يتخللى عن صمته
تتجللى أضوائى؟!

**********
إيزيس ياروح الخصوبه
يامؤونة المشوار
ياحصن ..
غصن انفعالى..
يابكارة الافكار
ياحمل وجع الليالى,
لويعصى ليلى نهار
و وحياته (حورس)..
إيزيس,
فى غياب..
(أولى الا لبا ب)
ماتردديش قولى,
خوفا من التدليس,
اوجهل بالاسباب؟!
فى حياتى عشت ومماتى,
كا ن اصل مأساتى..
رؤية ضنين معرفه..
عاجز عن الاخصاب,
ويضم قولى كتاب..
ملفوف فى توب كتان,
وكأنه موميائى


**********
وف ساحة الاقداس.
ماتدخليش كهان.!
الإدعاء شعوذه,
والخلق ليه برهان
مش راح يكون ..
- فى الكون -
كائن..
بلا امكان!
واوصيك بنبت أخضر
محتاج لضل امان
عسانى..
- بعد ممات –
ارجع فى شكل نبات,
ولا فى هيئة طير,
أونجم فى السموات.
ولا ف دموع الغيث..
على قبر أشلا ئى

**********


أحمد الشربينى

سماح كمال
01-06-2006, 03:37 AM
قصائد تنشر على النت لأول مره

مجدك سراب

صدقت نفسك..
وانطلقت ف درب ..
وافق رغبتك,
وقفلت بابك فى اتجاه..
انك تشوف!
فى عيون مرايتك..
لم رايت..
غير بس.. صورتك؟!
مسحوبه روحك من امان..
طينها اللى باقى ..
على الوشوش
من غير رتوش..
كانت بداية رحلتك,
مين اللى توه سكتك؟
صميت مسامعك..
غير لصوت جواك دفين!
إتأصلت فيك الملامح,
وجدورها رشقت..
فى السنين.
ملبوس بروح اتدنست..
فيها الخصال,
فسرت لغز الاحتمال..
فى مواجهته للمستحيل
الحلم كان للمحرومين..
ماوهبتهوش..
من دم ايامك مطر,
ولا كنت ليه الضله..
من صهد الهجير!
ولا تبقى حضن ..
يخاف عليه ويهدهده!
من خلف شوف اللى غرس
اخترت وحدك تحصده؟!
يكبر جنين الكدبه..
فى مهد العقول,
قبل المخاض اتغيبت,
عساها تنعم بالقبول.
يتجللى قبح القصد..
فى التوب الجميل
سكة جحيم ,
مفروشه بالقصد النبيل!
أسفاه لجيل..
صفحة كتابه تضمنا ,
والجيل ضليل؟!
كم قلب دست عليه..
فى سكة رغبتك؟!
كم من عيون..
تنزف دموع..
مع كل دبه ف خطوتك؟!
كم حلم دمه بيتسفح,
علشان ترسخ كدبتك ؟!
إفعل ماشئت مادمت..
رافض تستحى
طبع الدناوه مابين ملامحك..
قام صحى!
سيبت جوعك فانطلق..
وكانه غول!
عربد فى حلمك بالوصول؟!
غمضت عينك عن عذاب..
المحرومين,
ولارق قلبك من انين..
المجروحين!
وحفرت قبر دفنت فيه..
عشرة سنين.
وعشان عنيك مااطهرت..
- يوم – بالدموع,
عن اصله فرعك شت..
من بين الفروع,
ورتقت توبك يشتهى..
وهج السطوع,
حلمك شيطا ن استوطنك,
توه مسارك للرجوع,
فاخترت مجدك..
كان سراب,
ودفعت فيه ..
مهرك خضوع؟!

أحمد الشربينى

سماح كمال
01-06-2006, 03:39 AM
مش هااقول:انى باحبك

*********

مش هاقول:انى باحبك
,

كلمه غاليه..رخصوها.
مش هاقول:انى باحبك,
ضحكه صافيه عكروها.
مش هاقول:انى باحبك,
عمله نادره..زيفوها
عايز اقولك..
كلمه تانيه,
فيها معنى مش بسيط
نفسى ادور..
يمكن اقدر,
لو اغوص تحت المحيط
لو تكون فوق الجبال,
ولا تايهه فى الرمال
او فى نجمه,
ساكنه اعلى..
من حدود الاحتمال!
*********
نفسى الاقى معنى تانى
معنى اكبر م المعانى
معنى اطول
م الليالى.
معنى اكبر..
من خيالك,اوخيالى
معنى اقدر..
بيه افسر..
انى منك,
وانت لى ومخلوقالى.
**********
مش هاقول انى باحبك
حسى بيها بنبض قلبك
والكلام..
لوكان يعبر,
رايح ادور فى المعانى
اللىساكنه,
جوه احضان الأغانى
يمكن القى
كلمه تايهه
بيها انده احلى ندهه
زى غنوة..
طيرطير يزقزق
عند طلة شمس تشرق,
فى الجناين
فوق بساط فصل الربيع
زى ضحكه
صافيه دايمه
تمحى احزان الجميع
زى حنية امومه,
وقت ماتضم الرضيع
لما يتقابلو الحبايب
فى الشفق
وقت المغارب,
ولا لهفة شوق لعاشق,
لو حبيبه عنه غايب.
واما اتعب,
ولا اغلب..
مش هاقول:انى باحبك!
وان قدرتى,
او حاولتى تفهمينى,
تلقى صمتى..
راح يقولك:
الف ميت مليون باحبك
الف..*****
ميت مليون باحبك



احمد الشربينى

سماح كمال
01-06-2006, 03:41 AM
اوعى مرة تصدقينى


لما اقول انى:باحبك,
اوعى مره تصدقينى!
لو تحسى انى جنبك,

ولا ساكن..
جوه قلبك,
بصى تانى,
دورى..مش هاتلا قينى,
دى حقيقتى,
ياحبيبتى..صدقينى.
قلبى تاه ويا الليالى,
طير وطاير فى العلالى
سبته يسرح,
قلت يفرح,
عاش اسير شعرى وخيالى
طار يرفرف ع السواقى
ع الجناين
للربيع يشكى يغنى
كان بيبكى,لما يحكى,
كان يغنى وقصده يشكى,
م اللى قابله..
قبل منك,
- مش بايدى - لو كرهتك
اوعى تبكى ,او تلومى
خدت نايبى من همومى
والجواب,لو تسألينى:
لما اقول :انى باحبك,
اوعى مره تصدقينى؟!
بصى فى عنى الحزينه,
بصى تلقى ميت مدينه
والبحور,
صافيه,وغريقه,
دمعه نايمه..
نظره هايمه
دى الحقيقه,
آااه ياخوفى م الحقيقه,
بصى تانى هاتشوفيها,
نفسى انك تعرفيها
-جوه قلبى-
اللى عاش دايما يخبى,
أصله خايف,
م اللى شايفه ع الشفايف
ياما قالواحلى منه,
فى النهايه عرفت انه
كان لغيرى
مش لقلبى,
ليه يكون الذنب ذنبى,
اخدعك,او تخدعينى؟!
واما أقول:انى باحبك..
- ياحبيبتى -......
اوعى مره تصدقينى





احمد الشربينى

سماح كمال
01-06-2006, 03:45 AM
النص : (العشاء الأخير) للشاعر أحمد الشربينى



لما البساط.. انشد..

فى الجد تحت القدم

كان الخلاص بصاص,

لاح فى الخلا ... قناص

الحزن متن الرؤى ,

والبسمة ع الهامش

والضحكة صفرا , وكافره

بالكامن .......المكنون

أنا كنت بيك مفتون

فى العتمة شفتك .. عرفتك

متفبرك الاحساس.

وأنا قلبى بير مسكون

فيه باقى ريحة الناس

لو كنت تقدر : حبنى

مقدرتش إنى أكرهك

.... مين أكرهك .....؟

لحظة اّدان الديك

أناديك .. ولا تلبى

ياللى أنت قاصد تخبى ..

عن عنيك شوفى

وقت انشطار خوفى

وتخبى ظنك _ بظنك _

إن التاريخ ينعاد

دا لكل فعل ارتداده

والرد ليه أبعاد

شوفتك .. وصمتك .. بصمتك

فى المحنة كالمعتاد

أنا والسكات ضدين,

إزاى هانترادف ؟

ويا إختلاف القامات

م الصعب نتكاتف

خدعوك ( حوارى.. الحوارى )

طب مين يعمدهم .؟

مين كام سنة فى الغار

على وعد... بالاكليل

دم القتيل .. دمى

لكن الممات .( تأويل)

بالوهم ( شُبه لهم )

من وحى اّخر عشا

واللى انتشى .....,

بدد سحاب عهده ,

والكيد .. أكيد رده

وأنا فاكره كان غيرك

يا... بئس تفسيرك

لا نا " دنكشوت " الزمان

ولاانت تبقى " يسوع "

وإزاى تحس الوجع

وأنا اللى كان موجوع

دا السهم قال للوتر

بإيه يفيد الحذر

وأنا بالقدر مدفوع ؟

شرقانه عينى دموع

_ والنبع .. جفت .. ميته ..

والقبر .. عارف ... ميته.._

والديك فصيح اللسان

مين اللى قاصده .. يسكّته ؟

دم القتيل .... دمى

ميهمنيش مين موته

لكن اللى زاد همى

فارس نبيل فى الميدان

مين

اللى

يطلب

ديته....؟

احمد الشربيني

سماح كمال
01-06-2006, 03:47 AM
هزم الكلام الصمت قصيده لأحمد الشربينى


هزم الكلام الصمت

فى صميم..جدار الخوف,
خلق القلق.. طاقه,
قلبى ارتجف.. سهمت,
واحترت بين أمرين..
هزم الكلام.. الصمت.
أصفر ياوش القمر,
وطريقى متخفى,
بطل أنين ياليل..
د القلب مستكفى,
خايف ادوس ع الشوك..
أصل القدم حافى,
وانا حملى اصله تقيل..
بيزل ف كتافى!
مجروح ومتعافى,
لو انخ زى الجمل,
يمكن ساعتها ارتاح!
لكن بصيح الامل,
لمحلى بالمحتمل,
ورجعت ا تساند!
محتار مابين أمرين.
لاجرئ, ولا خايف!
أجرى وأجرى و كأنى..
من دهر فات واقف..
جوه حدود ضيقه,
تعصر شرايينى.
تمحى ملامحى العتيقه,
تنهك..ضيا عينى
تهتك براح طللتلى,
تعكس مسار رؤيتى,
تخنق وليد التجللى,
توئد.. تفانينى.
وأتوه مابين أمرين
بين الخطأ.. والصح!
وعجيبه يامسأله..
ا لجمع قبل الطرح!
و ا لجمع مين يقسمه..
من غير مايخلق جرح؟!
والحل مين يفهمه..
من غير دخول فى الشرح؟!
احمد الشربينى

سماح كمال
01-06-2006, 03:49 AM
نصوص قصيرة

ملامح
الى الأذاعيه الكبيرة الراحله العظيمه
عديله بشاره



عرضت قورتك .. فى صورتك ،
ورسمتها بايدى .
وضحت عطفك .. فى وصفك ،
حسب ما بتريدى
ظهرت شهامتك .. فى هامتك ،
بين نخلى وجريدى
وصلت حدك .. لحدك ،
واخترته يوم عيدى .
منظر طبيعـى .. وطبيعى،
ما يكونش سريالى
ولا هو تجريدى

اسئله
سألونى ايه رغبتك ؟
انا قلت اعيش انسان .
وقالولى ايه يبسطك ؟
قلت الوطن يتصان
وقالولى مين يظلمك ؟
انا قلت اى جبان
وقالولى ايه يئلمك ؟
قلت الصديق لوخان !

قرايــــه

لما الكلام ينكتب ..
يلزمله مين يقراه
واما الجمال بيسود
مفروض نقول الله،
وان حل بينا التعب ..
ــ م الصحبه ــ يا محـلاه
وان ذاد علينا الالم ..
بالغصب تيجى الآه
مشوار

لأعمل كلامى فرس ،
واوصل به للمشوار
دى الكلمه لو مخلصه..
بتفوت فى اى جدار,
وان هى متلونه..
بتتوة فى اى مسار
ويكون مصيرها الفشل,
وتفوت وراها العار

نسب
انا قلت جدى بنالى
بدل الهرم هرمين ,
وعمى احمس وخالى..
يبقى صلاح الدين ,
وعرابى ساكن قبالى ,
وف ريحى طه حسين..
أحرجنى واحد سألنى :
لكن انته تطلع مين ؟

صراع
الدنيا دنية صراع
والكل قصده يعيش
مليانه بالاوجاع
وملطشه تلطيش
فسألت مين مرتاح؟
الكل قاللى ما فيش
اصل اللى جاى بيروح
لكن اللى راح ميجيش!

غيره
واقفه النجوم متحسره
لحظة ما بان ضئ القمر
نورها يلألأ , لو أفل
حزن وكآبه , لو ظهر
عجبى عليك يادى النجوم
طبعك تمام طبع البشر
يبقى الضياء الاصل فيك
وتغيرى من كتلة حجر!

كلام
يا محيريين الكلام
بين الغلط والصح
فى كلمه تشفى عليل
وبكلمه نخلق جرح
وبكلمه تجرى دموع
وبغيرها ييجى الفرح
وبنظره تلقى حوار
ويطول معاة الشرح

حياه
الناس بتعشق موت
وانا عشقت الحياه
والخلق فى عشقهم
غاويين يقولوا الآه
وانا اللى دايب فيه
ما بقولش غير الله
العشق لو كان موت
ازاى يا ناس نحياه ؟

نظرة
بحب فيك ضحكتك
لما تكون صافيه
واعشق جمال نظرتك
اكمنها دافيــه
واحب من كلمتك
اللى.. بلا قافيه
واموت فى طبع البساطه ,
ودى وحدها تكفى
لكنى اكره موت
لو كان دليل قوتك
هو دليل ضعفى



توافق

فرحتى دى مش لأجل بحبك,
وما هيش حتى عشان فاكرانى
ولا علشان حنية قلبى ,
او علشانك عايشه عشانى
رعشة ايدى لما بقابلك
لها تفسير غير اى معانى
سر سعادتى انك جيتى ..
للدنيادى فى نفس زمانى

احمد الشربيني

سماح كمال
01-06-2006, 03:51 AM
أصول الشقشقه

طوبى لنا..
ولمن هلك
فاضت منابع منهلك!
ياحلم-فى غفة نهار-
مين اللى قاصد..
يقتلك؟!
تبت إيدين اللى انتهك..
حرمة بكارة فكرنا,
واللى خطا..
لما امتطى,
طيبة قلوبنا والضنا
واللى جنا..
ع اللى اتجنى,
من طرح نبضك ياقلم,
اللى فرد..واللى تنى,
طينة كلام الشعر..
تطق بالسنا!
مش بس انا..
ضهرى اتحنى,
من شيل حمول آيتى..
لغايتى..
المستحيلة..الممكنه؟!
فوق الجبين..خطين
مافيش بينهم لقا,
ياعمر متلون شقا
بين الضلوع قلبى اتسجن
ناح م الشجن,
وانا قلبى طير..
يفهم أصول الشقشقه!
عاشقين بكايا الخلق..
مين..
يقايضنى حزنه بفرحتى؟
من عهد أيام الصبا..
عاشق مواويل الصبا
م المهد..باتهجى الجراح!
أخضر حبا..
شارد كبا..تاه فى البراح,
لكنما,
شب, ونما
حصد المتاح
يامن غواه فعل النواح:
لايخدعك حلو الكلآم,
ولا تبكى إلا بعلتك.
دالسهم اللى مايقتلك..
من جرحه تظهر قوتك!

أحمد الشربينى

سماح كمال
01-06-2006, 03:52 AM
اللحن النشاز

خارج حدود النبض..
باللحن النشاز.
باسمع سريخ المنشدين..
جوه حوارى الأزمنه!
دمى المهجن..
– غصب عنى –
بالرضوخ ,
ضد أعراض الشموخ..
كسب المناعه الممكنهّ!
من رفضها..
لطقس تتويج السكات
الأرض مادت تحتنا,
لا انتى بقيتى, ولا أنا!
أقرب أكون للإنكسار,
وبقيتى أقرب للموات!
ونبشت فى تراب الوشوش..
على ملمحك,
لا فرق كان.. بين اللى صان,
أو جرحك.
مسفوح هدر..
دمى اللى متبعتر..
على دروب الشرود.
طهقان من الحبسه ف وريد الإنهزام
لافزعت من صمت القبور,
ولا سرنى طعم الكلام.
كان موتى.. ستره..
- لوقت عوزه - محوشه!
مش عايزه ليه الروح..
تفارق جتتى؟!
راح فين دليلى لسكتى؟
شوهتى ليه فى هويتى؟
يا ام البدع ..متصنفه
سيبى ايدى مكتفه,
دوسى بغلك ع الوجع
يمكن يفور الدم فى عروق البوار
يعرف دولاب العمر..
مغزى الانظار,
من رقدة الدود البليد
يقدر يدور تانى الزمن,
بعد استكانة الاحتضار,
ياما ا لزمن- من قبل - دار
وا نا قبرى دار,
مستنى تنهيدة حياه
تكسى بتوبها السندسى..
بستان جدب..
ناله التعب,
من طول ماباحلم ينجلى ..
ضى النهار.
لما الكلام اللى اتوأ د
ياخد مداه
تهمد طبول المنشدين..
جوه حوارى الأزمنه,
وانتى وانا..
نفضل هنا..
مستنظرين..
حمل السنين المحزنه..
يطرح جنين
دمه المهجن بالشموخ..
ضد اعراض الرضوخ..
كسب المناعه الممكنه!

أحمد ا لشربينى

سماح كمال
01-06-2006, 03:54 AM
وجـــع الســـنين

بمناسبة الديوان الخامس للشاعر


وهى على التوالى
1 باحلم لبلدى
2 وحى الكلام
3 لحظة ميلاد
4 مواسم الاحزان
5 وجع السنين

خمسين قصيده ..
بينزفو
( وجع السنين!)..(1)
وقصايد العمر اللى باقى..
بترتجف,
من حين.. لحين!
لساك ياعمر هاتحتمل
كرابيج عناد الازمنه..
تحييك معانى وتقتلك..
عسر الامانى الممكنه!
إيه لسه باقى تضييعه,
ويضيع لمين؟!
عودنى ليلى ان اسهره..
من قبل مااصبح..
طير سجين.
طواحين هموم تنهك خطاك
مين اصطفا ك..
تصبح مريد؟
فتشت ارحام الدروب..
عن بسمه" تحلم بالميلاد"
عن معنى يشبه..
تفصيلات المستحيل؟!
من طمى فيض الامتداد,
عن شيئ يفل.. الغل ..
قبل الا رتدا د.
مقهور ياطير الشعر..
تاهت سكتك,
مين سكتك؟!
لا قدرت بالا حزان تبوح,
ولا بانتظار وهم الخلاص..
تقدر توصل غنوتك!.
متهوم بعشق البوح,
وروح الشقشقه.؟!
محسوب على عشق البراح
راح تعمل ايه ..
لوتندهك..
نداهة م الزمن القبيح؟!
تدهس عنيك بصة معانى ملفقه,
تسقط جريح !
مرصود بفكره اتكونت..
من صلب ينضح بالبوار,
ينزف غليل!
ياايها الولد..(اللى كان)
أنا كنت ساكن..
جوه تكوينه الصبى,
مين فينا خان؟!
ياهل ترى..
لساك( بتحلم للبلد..)
زى الولاد؟ (2)
ولا ف زمان الا نكسار..
نداهة الزمن القبيح..
خطفت عنيك من سكتك؟
ام نزف جرحك..
أدركه ملح الملام؟!
كان باقى ..
(لحظه عن الميلاد)..(3)
فى اوان مابان..
(وحى الكلام)..(4)
كانت المواسم..
بالبشاير تبتسم.
• م القلب –
صوت الضحكه..
قبل ماتترسم,
مين اللى خلاها المواسم..
تنكسى بتوبها الحزين؟(5)
مين اللى اوحى للقصايد..
ترتجف..
من حين لحين؟!
ياايها الولد الحزين
• من بين تضاريس الصور –
انت الوحيد..
لسه اللى باقى ..
من مؤونة رحلتى.,
خمسين قصيده بينزفو..
عام بعد عام.
ولا كان بقصدى..
الخوف يعشش..
فى الوريد.
ياوحى ايام الصبا..
انت المراد,وانا المريد!
من بين تلال الاسئله..
- يمكن تلاقى الاجوبه -
فى قصيده باقيه من السنين
مااعرفشى ليه..
ماكتبتهاش؟

أحمد الشربينى

هوامش
1 اشارة لديوان وجع السنين
2 اشاره لديوان بااحلم لبلدى
3 اشاره لديوان لحظة ميلاد
4 اشاره لديوان وحى الكلام
5-اشاره لديوان مواسم الاحزان

سماح كمال
01-06-2006, 03:56 AM
تــــراتيــــــــــــــــ ـــل

الى من علمنى كيف تكتب الكلمه ؟

ويـــــا حروف الكـــــلام ..
علمتـــنى افــــــرح ,
وف زحمة الآحزان
شفــــت الآمــل مرسوم
*******
حسيـــت كلامــك دفــا ..
وقـــت ان يهــل البــــرد,
ف الغــدر كــان الوفا
ف الجــــد هـــو الجـــــد.
ف الوهن كان الشفا
ونسيم فى لحظة صهد !
**********
يا ابو الكلام قنطره..
توصــل لجــسر القلـــب .
والكلمه تحبل ضيا ..
تولــد فى وقت الصعـب
قلبك كبير يا جدع ..
شايــل همــوم الخـــلق
والفكره لم تنتهى ..
الا ان يبـــان الحــــــق ,
مارضيت تقول الاه
لحظــــــة مـاكانـــت لأ!
*********
سهم الكلام فى القوس ..
يرشـــق فى كبد الهم,
اكــوى الجراح يا طبيــــب..
غايتــى الجراح تتلـم ,
عمــر الجراح مــا تطيـــب..
لو فيه صديد فى الدم !
*********
شايـــل حمول شلتــها ..
لــم يوم تقـــول :كليــــــت,
والحمل لم يهزمك..
ينهـــــد..مـــا انهديـــــــت,
ماســـك فى ايدك قــلم ..
شايــــل فى قلـــبك ألم,
لا هبــت م اللىظــــلم,
ولا دست على انظــلم ,
شامخ شموخ الهـــرم ,
وسـط الهـــــدد ..عليــــت
*********
راضـــع نهود النيــــــل ..
فوق ضفتــه شبيت,
رتلـــت فيـــه ..ترتيـــل,
طلب الرحال..شديت
شقوا القميص م الضهر,
الشمــــس لحظـــة قـــهر,
نامــت فى عــز الظــــهر,
(يوسف)مين اللى رماك..
جـــوه ظلام الجــــب؟
يا سؤال وناقصه جواب,
الديب برئ م الذنـب
لكنــه مــش غضبـــــــان..
مــن اهــــله والخـــــلان,
د معــادش فـــى الامكان..
يكـــون فى قـــلبه مكـان ,
الا يـــدوب للحــــب !!

احمـــــد الشـــربيــــــنى

سماح كمال
01-06-2006, 03:58 AM
على عشق تعاهدنا

************
رجــوت الشــــعـر..أكـتـبه
أبث الشــــوق فى الحـــين
فغض ا لطرف عن سؤلى
فـمال ا لشــعـريعـصــينى ؟
ولى فى الحب معشـــــوق
تســـلل فى شـــــــرا يينى
بســـحرالـطيف قد حــــــل
وبالـوجـــدان تمكـــــــــين
أضـــــاء الروح بســـــناه
وأشـــــواق المحــــــــبين
وغرد فى حـــــناياهـــــــا
بعذب اللحــــن يشـــجينى
وأفـصــح عـن ملامحــــه
ورام.. إ لــيه يـــد نـــينى
وأقســـم بالهوى..صـدقا:
أ حـبك يا ابن شـــــربينى
ونــــار الوجــد تســــتعـر
بغير القصــد..تصــــلينى
شـــفاه .. مثلها الشــــهد
وورد الخــــد.. يد مــينى
فــإن شــــــاء ت مآ قــيه
بســــهم اللحـظ..تـرمينى
وإن شـــاء ت.. فتقتلنى
ومن مــوت.. فتحــــيينى
بفيض العشـــق تمطرنى
وبالتحـــــنان تــــــروينى
وتبعث شـــــوقها مـــددا
لطــــول العـمـــر يكفينى
ترنم قـــــــولها شـــــعرا
تـلاعب بالمـــــــــــوازين
فرحـــت أنقـب ا لقـــــول
وأبحـــث فيه.. تكـــوينى
فباح القـــول.. أفصــــاحا
بأن القـــــول.. يعــنــينى
خشـــيت عـليها..تعـقــيبا
فيفصــح عن مضــامينى
أغار عـليها مــن مــــدح
يـــؤ رقنى.. ويد مــــينى
على عشــق تعاهـــــــدنا
وهــبنا النفس فى الحـين
وقـلنا.. مـثـلمـا شــــــئـنا
كأقــــــوال المجــــــا نين
فيا شــــــعر..ألا ترحــــم
بـــوحى منك تهـــــد ينى
هى امـرأة وقـد خــــلقـت
لأســـكنها د وا ويــــــنى

أحمد الشربينى

سماح كمال
01-06-2006, 03:59 AM
إلام الشك سيدتى..؟

إلام الشك سيدتى..
فنار الشك تصلينى,؟!
يحار العقل فى الفهم..
بقصد ..منك يدنينى
ملكت القلب والعقل..
ملكت سر تكوينى,
ورمت الطير فى الأسر
فضاق الطير فى الحين
وشدو الطير فى القفص..
يؤرقنى.. ويدمينى
وصار اللحن..مرثية
كقعقعة الطواحين,
فعيش الطير تحليق
وتغريد الافانين
ومن لم يفهم الطير
بقتل منه..يحيني
أحمد الشربينى

سماح كمال
22-10-2006, 11:43 PM
غـــــــــــدر

الغـــدر شيئ موجـــــــود..
فى طبـــــــع بعض الناس,
وف ناس يكــــــون محدود..
وكتير فى ناس عن ناس,
ولناس يكــــــــون مردود..
حسب طبيعة النــــــــاس,
حتى ســــــاعات بيكون..
جــــــاى من أعز الناس؟!

احمد الشربينى

سماح كمال
22-10-2006, 11:44 PM
فرانكــــــو أراب

أنا جنتل مان فى غرامى
ماقدرش ف يوم أداريه
نو بروبلم.. لما تعاتب
تخاصمنى اقول أكيه

******

يعجبنى غرامك لاكن
بيحرك قلبى الساكن
وانا خايف يعمل.. أكشن
البمبى هايقلب داكن!
وساعتها أنا اعمل إيه
واقول إزاى أوكيه؟

******

أديك مواعيد وتقول:
دانا قلبى ياروحى اصمول.
واستنى يفوت التايم
أتاريك دايما مشغول
آه منك ياابن الإيه
برضك وأقول أوكيه

******

بتعذب قلبى كتير
وأقول: ماى لاف.. كام هير
واعمللك ريست فى قلبى
برضك ولافيش تأثير
تيجى انت وتقسى عليه
إكمنى باقول أوكيه

******
كام ليتر أبعته ليك؟
وتبص بطرف عنيك!
وان قلت: استوب بتغضب
وتبيعنى وبرضه شاريك
لو حتى أبوك كان بيه.
بطلت أقول أوكيه


احمد الشربينى

سماح كمال
22-10-2006, 11:45 PM
شــــــــــــرخ
القلب طير مدبـــــــوح..
والجـــــانى أقرب أخ,
شافه فى يوم مجروح..
وبســـرعه نصب الفخ,
إوعــاك ياقلبى تبــوح
ويبان مكان الشــــرخ
خللى الألم مدفـــــــون
أخاف عليك تنطــــــخ
أحمد الشربينى

سماح كمال
22-10-2006, 11:46 PM
غصـــب عنــــى


***********
مش هاسامح نفسى إلا..
لو تسامحى.
دابتسامتى.. ياحبيبتى..
فى بعادك,
شفتها فارقت ملامحى!
الألم بيدق بابى,
والعتاب بيزيد عذابى
دنيتى القاسيه بتاخدنى,
واترمى ف حضن اغترابى
البعاد..
شيئ غصب عنى
يبقى ليه حكم التجنى؟
وانتى عارفه ..
بدون ماقولها..
انك انتى حته منى!
وانتى معنى لاحلى غنوه
واما بتغيب المعانى
ياحبيبتى
مستحيل اقدر اغنى؟!

************
أحمد الشربينى

سماح كمال
22-10-2006, 11:49 PM
المشاعر هى .. هى

المشاعر لسه باقيه..
هيه هيه
واللى بيننا,
حتى لوهايهون عليكى,
عمره لحظه ماهان على
لو حقيقى عرفتى طبعى,
كان طبيعى تحسى بى,
بس ماقدرتيش تشوفى,
ان بعدى وسر خوفى,
كان رماد تحته المشاعر
قايده بتزيد اشتعالها,
بس بانت متداريه؟!
كنت باحكى,
وباستمد القوه منك
بس صمتى لما قلتى,
ان غايتى البعد عنك!
عمر صمتى ماكان سكات
صمتى مليان بحكايات,
صمتى صاحى,
ع اللى باقى من جراحى
بس عايش ..
عيشته اشبه بالممات,
صمت خايف ع الباقى,
واما بيزيد اشتياقى,
يبقى اكبر م اللى جى,
وم اللى فات!
مش هاقولك تانى سامحى,,
او تداوى, لى جرحى,
بكره هاتبان الحقيقه..
المتداريه
ان قلبى.. اللى انتى قلتى:
بأنه قاسى..
كان ضحيه !
وانه كان قادر يضحى.

احمد الشربينى
[SIZE="5"][COLOR="Navy"][CENTER]

سماح كمال
22-10-2006, 11:50 PM
لماتاه فى الحب دربك

لوصحيح انا حته منك
شيئ طبيعى ..
لو تسامحى!
تبقى ضله ف صهد عمرى,
تبقى بلسم يشفى جرحى!
واما ليل حزنى يطول
ضى قلبك.. يبقى فرحى
بس ماقدرتيش تسامحى
وتقوليلى ف ليل سكاتى:
كسرت قلبك؟!
آاه ياقلبك
لما وقت الصعب تقسى..
ع اللى حبك!
كلمة مش عارفه تقوليها,
لما تاه فى الحب دربك
عيشى وهمك,
سلمى الفكر لظنونك
بعدى عنك, لما قلبك
فسر ان اقدر اخونك؟!
مستحيل اقبل جنونك
بعد خوفى عليك تقولى:
معنى بعدى.. يعنى بايع
وانتى ناسيه,
ليه ياقاسيه,
بين عذابى, واغترابى,
وبين غرامك..
عمرى ضايع؟!
امسحينى من خطوط,
مرسومه كانت..
فوق جبينك,
وابعدينى بكل قسوه
عن سنينك!
حتى لو انكرتى حبى,
مش هادينك
بس عمرى ف يوم ماهانسى
اللى كان بينى وبينك


***************
احمد الشربينى

سماح كمال
23-10-2006, 03:03 PM
فى وش الريح
كتير مجاريح
بتتهجى
وتترجى
يكون الفعل رده فصيح
ياخويا ياللى من دمى
دالون همك
ملامح شايله لون همى
يافكره انهضى وهمى
ولمى
م الشتات حلمى
عساه من قسوة الحاصل
بسر الحب يتواصل
وندرك كل مافاتنا
فى وش الريح ولا نطاطى
ونوضع حد لثباتنا
يرجع لحن غنوتنا
نزيح خوفنا,
يبان شوفنا
ونرضع منه قوتنا
وعشق الضوء يقوتنا
ونخلق للشموخ معنى
يجمعنا
فى وش الريح

احمد الشربيني

سماح كمال
03-11-2006, 05:37 AM
وأمــا بعــــد


]*********

وأما بعد,
فانا اعلنت عليكى البعد
مع اعلانى,
- بكل كيانى -
ان القلب هايفضل دايما..
باقى ع العهد؟
وان كان حبك..
شيئ ولابد,
فانا مش هااقدر
اخلط - تانى -
مابين اللهو وبين الجد!
وبامكانى,
اعيد من تانى..
رسم مشاعرى,
علشان تبقى يادوب ع القد؟!
وارفض منك باستمرار
اعلان حبك
يبقى قرار,
قلبك ليل,ماباينله نهار
ظلمك دايما عدى الحد؟
غصبن عنى,
عقلى امرنى
من ورا قلبى يبعت رد
فانا اعلنت عليك البعد

أحمد الشربيني

سماح كمال
03-11-2006, 05:49 AM
الاشجار تموت واقفة


رواية من الادب العالمى
من عنوانها استلهمت
هذه القصيدة



أحـــلا م الشـــجر



أنا زى الشجر..
ضارب فى بطن الارض,
با اتنفس..
حنين الطين!
فروعى اصلها منه..
وفيه بيننا..
حكاوى سنين.
ومهما ان طا لت الغربه,
تاخدنى اصا لة التربه,
بضمة حضنها..
الدافى,
يقيد..
فيض المدد بيننا,
تبوحلى بسرها الوافى,
أفضى ف بطنها حملى,
تضم بشملها..
شملى!
أرا ود فكرتى عنها,
تكفرنى.. وتستغفر
وانا المطرود..
من الجنه,
جعان حافى,
شقايا..خيال بيتبعنى,
حمول ذنبى..
على كتافى
وكشف الستر..
مش هين,
وبيبين..
تباريحه..
على جبينى!
بورق التوت,
منين مانفوت,
بتسفحنا.. خطايانا,
وتخدعنا.. خطاوينا
وكيف نرجع لمأوانا؟
كما زرعة..
شجر طارح,
بشاير صبحها الاتى..
تبدد عتمة امبارح!
وانا واقف على حيلى,
تهون نفسى..
عشان غيرى,
كما الا شجار!
أعيش فى الطل..
وفروعى..
إيدين تدعى,
يقيد الحر فى ضلوعى,
ودا شرعى,
ندى سايل..
دموع تنعى,
كما ا لاشجار؟!
أشوف الطير..
بيتدارى.. وبيعشش,
على حاله..
ياخدنى معاه لترحاله,
صبيه عاشقه سهرانه..
بشوق تهمس,
لندهة..حلمها البكرى..
يتوه فكرى
بقصة كل من غنى,
ياخدنى معاه..
لمواله,
و م الحاصل..
حبال الود تتواصل.
قلوب خضرا..
بتتجلى ..
برسمتها على جزعى,
برعشة خوفى..
ع الرسمه,
يميل فرعى
تهل ولادة البسمه,
يسيل دمعى..
كما الاشجار!
وبدر يهل فى العالى,
وانا واقف,
ودا حا لى,
وبتامل جلال الليل!
وصوت ع الناى..
فى عز الصمت بيسبح..
يا نا يم..
وحد الدا يم,
وسبحانك..
بصوت كروان,
يقول:
الملك لك..
لك.. لك,
فى كل مكان,
واى زمان.
يهل الصبح.. ويشقشق,
وتصحى طيوره.. وتزقزق,
ورزق الناس.. بيتفرق,
واشوف الحلم.. يتحقق,
واموت واقف..
على حيلى..
كما الأشجار



أحمد الشربينى

سماح كمال
03-11-2006, 05:56 AM
الى الام.. كل ام
*********

الى رمز الامومه
هبــــــة الله

ومهما اكبر


ومهما أكبر..
ألاقى نفسى قدامك ..
أبان أصغر,
ومهما العقل بيفكر,
يروح لبعيد..
وبيسافر, ويتحير,
قصاد اسمك..
قصاد رسمك..
ماعمره ف يوم هايتغير
ومهما اديكى من حبى..
بتدينى..
حنان أكتر,

تشيلى هم أيامى..
وتغسل بسمتك عينى,
تشاركينى فى احلامى..
بأحضانك بتحمينى.
وتهدينى لطريق النور,
واتوه فى الدنيا لولاكى.
بفضل دعاكى ورضاكى..
تقوينى..
بسر الخير فى تكوينى,
ياأعظم أم..
يــــــــــوم عــــــيد ك
أبـــــوس إيــــــــــدك,
وأبدر عمرى قدامك
فى جــنه ..
تحـــت أقـــــــدامك
واتمنى..
يكون العمر ميت زهره..
تعطر كل أيامك.
ولو أقدر..
ماهاستخسر
ياخدنى نداكى.. بنداكى
لدنيا عطر بستانك
يابحر كبير..
وفيه الميه حنيه,
وانا فى البحر غرقانك
على شط الامان..
صدرك,
على مهد الحنان حجرك
أحس يا أمى بوجودى
يشب وينفرد عودى
بزهرة عمرك الفايحه
بصفو النيه بتجودى
فى عز طفولتى وصبايا
وفرحة قلبى ليك غايه
ودا يما.. عايشه جوا يا
ياخدنى قلبك الاخضر
لصوره ع الدوام ..
باقيه
مع الايام بتتكرر
ومهما ا كبر..
أبص لنفسى فى مرايتك
أ بان أصغر

*******
أحمد الشربينى

سماح كمال
03-11-2006, 05:58 AM
إلى الزميله الغالية
والكاتبة الاذاعية
ن... رمضان
اللتى اوحت بهذه القصيده



تشـــــــــــويش


..
! .. !! .. ؟!
كل المعانى اتشبكت..
فيه التباس.
تدخل جميع التسميات..
فى / بند ناس /..
ودا.. ( أفلاطون )
الفليسوف..
تحت الظروف,
بقى كل علمه..
بدون اساس.!
العقل حاس.
كل الامور( اتفلسفت) ..
خلقت صراع .
وانتى الحقيقه يامركبه..
من غير شراع.
والبحر فاير با لظنون.
ملاح ويائس م السكون!
من خلف سور الجمجمه..
كله استكان,
الاها فكره مشوشه,
كله استكان.
بالامس كانت شيئ محال,
اما النهارده..
فا حتمال!
مااعرفش بكره..
هاتبقى ايه؟!
وازاى وليه؟
محتاج لحد انده عليه!
لكنه مين؟
كل البشر متصنفين,
مابين شيطا ن,
أو بين ملاك,
أو بين وبين؟!
مايهمنيش..
انا ابقى مين؟
أو ايه رصيدى..
من الصفات؟
كل الحالات هاتكون خطأ,
فى الوقت صح,
منطق عجيب محتاج لشرح.
والعقل صوته انبح.. بح
( هاملت ) ياعاقل..
قول وعيد,
تانى من جديد:
الفرق ايه..
مابين أكون,
أو لا اكون؟
والعقل ليه نفس النسب..
نسب الجنون!
قد لاتكون.. وقت ان تكون..
محكوم بوجهات النظر,
بالفكر لحظة ماانشطر!
تخلقها ليه ( المعضله ) ؟
نرجع لاصل المساله,
واسمع انين الانتماء..
لا حياء!
كل العقول اتبرمجت!
مفاهيم كتيره..
اتحورت!
تقاليد جديده..
اتمررت!!
وتدنيات/ وقت انفلات / ..
ا تبررت!
مارس طقوس السفسطه,
واوجد علاقة الاجتهاد,
بجميع فروع الشعبطه,
او عيد صياغة..
كل شيئ.
آخر المسار,
هاتلاقى نفسك باختصار,
قدام قضيه..
ملخبطه؟
!


أحمد الشربينى

سماح كمال
03-11-2006, 06:01 AM
القلم صديقى



سبع سنين عشتهم ..
بين الجبال فى الطل,
وكان معايا القلم..
هو الصديق والخل,
لا مره منى اشتكى..
ولا قاللى انه مل,
ولما نلمح بشر..
نبعد بعيد ع التل!
======
أنعس أنا م..وينام,
ونومته فوق إيدى.
تتجدد الاحلام..
يسمع لتنهيدى,
وان زارنى وحى كلام..
يقوللى : ياسيدى,
أرمى صباحى عليه,
ويقول: صباح الفل!
======
أحدف هناك البصر..
ألمح سما صافيه,
والصوره تطرح فكر..
فيها العبر كافيه!
والوزن كان معتبر,
وينادى ع القافيه.
وقت ان يبان الشفق..
يقول: ياشاعر طل!
=====
ويهل وش القمر..
تتجدد الا شواق,
يحلو لينا السهر..
وكاننا عشاق.
نستنى منه الخبر,
مع انه غاوى فراق,
ويقول معايا القلم..
قرب ياشعر وهل!
=====
ولما فاتنا القمر,
والليل يجيله نهار,
والكلمه تصبح مطر..
فوق السطور انهار.
طوفان مامنه خطر,
وموج بحور اشعار.
يغسل قلوب البشر,
ويروى عطش الكل!
=====
ولما جينا الحضر..
تاه القلم .. منى!
حسيت بقلبى اتفطر..
مين غيره يفهمنى,
أتارى سنه ا نكسر..
يارب صبرنى,
بكيت بدمع الالم..
والفكر منى انشل
!


أحمد الشربينى

سماح كمال
03-11-2006, 06:07 AM
بالاطلاع على قسم
قصيدة وتصميم
وقد رايت تحفه رائعه
هى آية من ايات الابداع
بانامل الفنانه سماح
لقصيدتى
القلم صديقى
فلم استطع ان امنع صديقى القلم
من التعبيرعن اعجابه
بالفنانه اللتى عبرت عن ذاته
فاطلق هذه الكلمات



سبحانه من ألهمك

أنا كان صديقى القلم
أصبح صديق وحبيب
شفت الجمال منساب
أشكال بدون ترتيب
شفت العبر فى الصور
بالفن والتجريب
فيها الحياه والروح
والرؤيه لم بتغيب

سبحانه من ألهمك
بالفكر والابداع
وتصممى الكلمات
ونصيبنا الاستمتاع
والمعنى بان فى الصور
بيخاطب الاسماع
بأنامل الفنان
الوحى ليك ينطاع


تسلم ايديكى لنا
يابشيرة الافراح
ياام المعانى صور
فيها الهموم تنزاح
والريشه فى قبضتك
كما مشرط الجراح
ياجميلة الاحساس
يامبدعه ياسماح

أحمد الشربينى

آمال محمود كحيل
23-07-2007, 01:28 AM
إهداء إلى العقول التى أرهقت
من كثرة التفكير
فيما لايفكر فيه الآخرون
شـــــيزوفرينيا

واتخيلت بان أنا عاقل
وبدات افسر فى الاشياء..
على عكس ماكنت,
واتخيلت .. فهمت؟!
ولقيت نفسى ..
مطا لب - قدام نفسى -..
إن اتجرد من تاثير..
الزمن السالف؟!
وانا بطبيعتى ..
قبل مااجرب انى اتخيل,
احب اجازف.!
لايه دلوقتى ..
انا فعلا خايف؟!
ايه تبريرالخوف..
مش عارف؟!
كل الام الكون سا كنانى.
ليه محتار..
أنا ابقى العاقل..
ولا التا نى؟!
آه يانى,
وان كنت المجنى عليه,
طب مين الجانى؟!
وشعلت فتيل اللعبه,
ولمحت دروبها الصعبه ,
والخوف عشش..
فى كيانى.
لاقدرت ارتاح فى طريقى,
ولا قادر ارجع تانى.!!
مش قادر اخوض..
فى الشرح.
أو احدد..مغزى الجرح!!
ودا - نظريا - يثبت أن..
التجربه صح ؟!
تبقى الخطوه العملى..
الجايه..
قبل مااواصل -..
ان اجتاز الحد الفاصل!
بس الخوف..
من انى ابان..
لعيون اعوان..
(سيجموند فرويد)!!
والخوف من فشل اللعبه,
ورد الفعل الكامن..
والفرق مابين الشيئ..
ونقيضه,
ماهوش متباين!
يخرب عقلك ياانشتا ين
يظهر ان كلامك صح
ومافيش مطلق..
حسب الوارد فى النظريه!
والمسا له/ فعلا / نسبيه,
وياخدنى كلام المدعوق
(دا رويــــــن)
لامور خياليه؟!
وادخل متاهات..
عن كلمة فصل فى اصل..
النشأه,
والانسان..
كان كنيته إيه..
قبل مايترقى؟!
واستدعيت احداث..
الماضى
نفسى اصدق..
ومانيش راضى.
طفت بكل خيالى الشارد,
لكن جهدى..
طلع.. ع الفاضى!
والمجهول لو مش..
عارفينه؟!
طب والحاضر..
بوضوح شايفه,
وعشت سنينه!
فالمستقبل..
إيه هايكون؟
ومافيش شيئ..
اصبح مضمون!
وان كان عقل ..
البنى آدمين..
شوه شكل جمال الكون,
فاتخيرت بكل ارادتى:
إن الافضل..
اكون مجنون؟!!

أحمد الشربينى

آمال محمود كحيل
23-07-2007, 01:36 AM
إنكســــــــــار

خبى انكسارك واحتمل
تعب الوقوف
واطلق طيورك فى الفضا
لجلن تطوف
واتأمل الضى العفى..
لحظة مابيزيح الظلام
ويزف تبشيرة وضوح,
إزاى يبوح..
الطير فى سجن الإنهزام ؟

أحمد الشربينى

آمال محمود كحيل
23-07-2007, 01:41 AM
إهداء للغالية


الشاعرة المبدعه
دكتــــــورة
آمــــال كحيــــل

*****

نبـــــوءة بـــــوح

مابين الصورة والمعنى ..
تسمعنا.
نغم سرسب فى إحساسنا
أنين ينطق بأواجاعنا
أميره بسحر تتمايل
فى بستان الفصيح..
فايحه,
ولو رايحه .. على العامى
بتتمشى ف شوارعنا.
جنين قولها..
بطمى الشعر متخلق
ولو قالوا: آمال قالت,
بصدق الحس بنصدق
بسحر المعنى تجذبنا
تودينا , وبتجيبنا
تغرب بينا , وتشرق
كأن الشعر فى رحابها..
نبوءة بوح..
معانيها عبير بيفوح,
بكل جمال بيتحقق
أمــــــل وآمـــــال,
وطيـف وخيـــــال,
ضياء وظــــــــلال
كأن الصوره..
كائن حى واتخلق

أحمد الشربينى

آمال محمود كحيل
05-08-2007, 02:19 AM
الحلـــم اليتيــم

عايشه ف ملامحى..
قصتى.
تبدا فى لحظة ما انتهت
ما اعرف زمانى ان كان مضى,
أو لسه جى ؟
كل اللى ممكن اعرفه,
جوايا حلم مكونه..
خايف عليه زى الضنا
المهد كومه من حطب,
الحلم خايف يتولد,
جوايا شلته وبيه جريت,
لبعيد هناك ..
تحت السما,
شفت الحقيقه المؤلمه,
لما التقيت ..
نفس المكان اللى سبق ..
منه ابتديت ؟
حسيت بحلمى بينتحب,
وبينسحب ..
من مهجتى,
ضاع الطريق من رحلتى,
والرحله لازم تكتمل
وتعبت جرى ف مطرحى,
يازهرة الوهم الجميل ..
دبلانه ليه ,وبتجرحى؟
ما اجهلك..
ياللى عشقت الشمس..
فى ليل الضنا,
إلا أنا ..
لم حد يسمع صرختى
عطشان وعايز اشربه,
والحلم ليه ..
اصبح سراب ؟
يمكن احس بالارتياح,
لوعينى بتلبى البكا
والدمعه ليه متحجره ؟
والرحله مالها ..
قصيره ؟
انا حتى لو/ جدلا /..
بكيت,
من غير ياريت,
طب أبكى ع العمر اللى ضاع,
أو عمر لسه ..
راح يضيع,
ولا على الحلم ..
اللى اصبح كاليتيم,
من قبل مايصبح رضيع ؟
كل الحصاد ..
يا حلم فيك
الدايره لا زم تتصل,
والقصه لازم تكتمل,
بعد الشقا,
ما بقاش .. بقى
وحياتى بيك متعلقه,
سامع ادان ..
جرس الرحيل .
ترنيمة القصد النبيل,
بتنادى روحى المتعبه,
يدركنى قطر ملان قصص
تشبه ملامح قصتى,
ماشى فى عكس الاتجاه
محتاج امللى وصيتى
قرب رصيف ..
نبض الحياه
وباقيلى كلمه ف دنيتى,
رغم الجراح ..
ونطقتها,
جوه البراح , وطلقتها,
وياالرياح .. بعترتها,
لجلن ماتوصل للمدى,
قال الصدى:
سافر وفوت,
وادخل تابوت,
دا الحلم مش ممكن يموت
الحلم مش ممكن ..
يموت ؟
احمد الشربينى

سماح كمال
08-09-2007, 01:12 PM
ردا على قصيدة
كان ياماكان
التى تطاولت فيها الشاعرة
امال كحيل
على ذات الاهلى
بتحريض من الزميلة
الزمالكاوية العنيده
طيبه


ليه يا أمال؟
كنتى ف حالك.. ماشيه وعال.
ليه يا أمال؟
ياام لسان بينقط سكر,
دانتى اصيله وبنت حلال,
كده يا أمال؟
كان على مهلك,
لحظة لما يوزك عقلك
ويمشيكى ف سكه ضلال
والله عال؟
لأ والعيبه .. حبيبتك طيبه
رسمت خطه
لاجل تقولى كلام بطال.
عمرى ماكنت اصدق انك
إنتهازيه وتقبضى رشوه..
ألف ريال.
لاجل تقولى قصيده..
مكيده
فيها كلام عمره مايتقال
لأ وف مين؟
فى الذات العاليه,
فى سيدك الاهلى
أبو الابطال
قولى لطيبه وانتى معاها
فوقى ياشاطره
والزمى حدك
إياك فاكره بمساعدتها..
ماحدش قدك
لأه .. دابعدك
كده تفكيرك لعب عيال
فانا مش هاسمح ..
بقميص أبيض,
لا أسامه ولامدحت,
ولا سنباد.. يبقاله مجال.
لأ وان حكم الأمر فى طيبه
راح اخلصها من ستاتها؟
وتبقى جميع اعضاءها رجال
علشان طيبه ترتاح وامال
عيب ياأمال.
ووصل الامر وتتحدينى؟
اياك ناسيه مين الشربينى؟
فده بصراحه اسمه استهبال
والموضوع المليان غل
وكله شماته,
بأمر ادارى.. لازم يتشال

احمد الشربينى

صاحبة المقام الرفيع
الغالية طيبه
ساحرة البيان
الرائعه أمال
اشكركما على تلك الروح الطيبة والجميلة
التى تشيعانها فى ربوع المنتدى

سماح كمال
08-09-2007, 01:14 PM
إلى أمـــــال وطيبــــه

ياناس ياهــــوه إيه الأحــوال
الأخت طيبــــه والست أمــال
وناس كمان على دا المنوال
آخـــر الزمن بقـــو لعيبـــــه
آخرة صبــرى

أمــــــال بتكتب وتحــــاول
بمشاركه عملت بيها فاول
وطيبـــه من تحت تنـــاول
أما صحيح حاجه غريبـه
كان من بدرى

طيبه وأمال عملو عصابه
من جنس حوا بقــو ديابه
والمنتـــدى عملــوه غابه
ولســــه باقى التركيبــــه
يانا ياعمرى

الـــدم بكــــره لابــــد يســـــيل
وهاتبقى عركه تهــــد الحيـــل
من همهم بقى صبــرى قليـــل
ووفاء دى ناويه على مصيبه
بكره هاتجرى

لاتقـــول لاريا ولاســـكينه
تلقى الملامـــح مســـكينه
ولســـان شبيه بالســـكينه
ان كان امال او كان طيبه
فوق يابو قدرى

احمد الشربينى

آمال محمود كحيل
25-10-2007, 04:38 AM
ســــامحونى

ياكل اصحابى تســـامحونى
لو أطلب منـــكم تنســـونى
محتاج اتحاسب مع نفسى
تتبدد حيـــــرتى مع ظنونى
لو أرجـــــع تانى لأيامــــــى
وأشــــــوف أخطائى قدامى
واوعدكــــــم بعدها نتقابـــل
وساعتها بس تحاســـبونى

أحمد الشربيني

آمال محمود كحيل
27-11-2007, 11:53 AM
مــــــــوات..
إنشل باقى إحترامك..
من حطام الذكريا ت.
وارصد المعنى ف كلا مك..
ألا تغويه الغا يات
واحترس..
وانت ف مكانك,
تعشق الليل الطويل..
يسكنك شبح اللى فات
أحصر الماضى ..
ف سنينه,
واضرب الوهم..
ف عرينه,
صوب الكلمه اللى باقيه..
فى اتجاه كهف السكات
سخر القيمه لوجودك..
بالمعانى..
كما الأيات.
داللى من غير معنى ..
عايش,
حد أقصى..
للتدنى..
فى الموات

أحمد الشربينى

آمال محمود كحيل
27-11-2007, 11:55 AM
سلام برد إحراقى

أتيت إليك سيدتى
يضيئ الشوق أحداقى
فحبك غايتى الكبرى
إليه أبث إملاقى
وأشكو لوعة القلب
فوصل منك .. ترياقى
فلو رؤياك لى..قمر
فشمسك نبع إشراقى
أتيت أجدد العهد
فهل تبغين إخفاقى؟
ونار الوجد تصلينى
سلام برد إحراقى
لماء العشق ظمآن..
إلى رى بإغداق
بفيض رحيقك العذب..
( ألا تحنو يد الساقى )؟
فمن شعر إلى نثر
إلى بوح بأشواقى
فقد أعيانى الوصف..
وحارت فيه أوراقى
فدتك النفس.. يانفسى
فسكناك بأعماقى
أسير هواك سيدتى
وأخشى منه إعتاقى
وان يبقى لى شيئ,
- فدوما - حبك الباقى

احمد الشربينى

آمال محمود كحيل
29-12-2007, 08:56 AM
السكه ماشيه فى اتجاه..
ما فيهوش رجوع .
لا يفيد معاه طعم الندم
ولا يوقفه.. سيل الدموع
من بعد ما سقط القناع
ما أصعب الاحساس ..
فى مفرق سكتك ,
ياخدك طريقك للضياع
واللى اشتريته..
فى وقت عوزه للزمن ,
بالبخس باع ؟
سقط القناع
لما الظنون ..
تبقى المرادف للعتاب
لما تحس ف حضن ..
قاسمك نبضته..
بالاغتراب ؟
لما السؤال ..
من بين تلال الاسئله
يتردلك .. من غير جواب ,
لو حبك الموؤود يعود ..
مهزوم طريد الانتساب
ما أصعبك ..
يا مفردات اتكتلت ,
تكتب سطور معنى العذاب.
احساس ما يقدر يدركه
الا غريق اتمدله طوق النجاه
بخيوط سراب ؟
مستنى إيه..
من اللى ما يملكشى شيئ ..
فيه لسه باقى يخسره ؟
لما يشوف شبح اللى فات
شايل معاه طيف الألام
حبة كلام بيكرره ؟
أنا مش حزين
على حلم هربان م السنين
لو إنه ضاع
محتاج اشوف كل الظروف
من غير خداع
من طول ما باتجرع وجع
مابقتش حاسس بالألم
مش راح يفكر فى الشبع
غير اللى جاع
واما تشوف معنى الحروف
تقدر تقول
سقط القناع

أحمد الشربيني

آمال محمود كحيل
04-02-2008, 09:51 PM
أحـــلى طيبــة

الحياة فى البعد عنك..
عشتها قاسية وكئيبه.
يااااااااااه ياطيبة.
دانتى شيئ..
مخلوط فى دمى,
لحظة احسك زى بنتى,
ولحظة تانيه بتبقى أمى,
وكل لحظة انتى الحبيبة
مانتى أغلى,
وأحلى طيبة.
دانتى بستان المعانى
وانتى وحى لمعنى غالى,
زى نجم ف برج عالى,
وقت شوقى,
بدون - ماانادى - ..
لقيته جانى.
وانتى فرحى, وانتى جرحى,
وانتى صرحى,
حتى لو منك باعانى.
إنتى صحبة, وأحلى لمه,
وف رحابك.. نلقى بابك,
ينفتح مع احلى كلمه
واما بتنادى علينا,
جوة حضنك هاتلاقينا
بيكى عيشنا أحلى ضمه
داحنا منك,
وانتى لينا
وانتى ضى لبكره طارح
واحنا شايفينه بعنينا
وانتى لينا الشوق لعاشق
حتى لو حد ف ولادك,
سهمه كان ,
فى القلب راشق
برضه بيحن ف بعادك
ليكى يرجع بعد غيبه,
أصلك انتى يا طيبه أحلى,
وأغلى طيبه

احمد الشربينى

آمال محمود كحيل
15-02-2008, 04:43 PM
شـــرنقة

للحزن طعم الوجع ,
والوهم ضل الخوف .
جوايا بصة قلق
عنها الحجاب.. مكشوف
بينى وبين ضحكتى ..
م الحزن فيه ..
مسافات !
دارت سواقى الليل ,
ماسألت كام ..
مسا فات ؟
شرنقت خوفى بصمتى
يافكره ليه صمتى ..
عن شهقة الآهات ؟
ملح الحياه الاغتراب..
فتشت فى المجهول !,
سرسب نهار الصبا ..
مالمحت ضى وصول ,
موصول يا طول السفر
بالغربه والاحزان
ياصبح بكره..
- ان كان -
دبل جراح أمسى
أنا فرحى ملك الناس ,
والجرح مالكنى
يامين يشاركنى ..
- وقت الصفا – همسى
أنسى تاريخ غربتى ,
واتذكر الخلان
حضن الحبيبه.. وطن ,
ضل الصحاب..بستان.
فتان ياغيط الونس ..
ياواحه للقلقان ,
ياأدان لفجر اتخطف..
فى بكارة المشاوير
فرفط سنين البراءه..
فى عتامة التدبير
شبح الظنون.. هزنى ,
وعيونه بصالى !
روح العناد الصبى ..
تسرى فى أوصالى !
خيال .. خياله عنيد
ترمح مسافاته
يهزمنى صوت البكا,
تحيينى دمعاته.
مجنون .. أكون ..
بالفضا,
واعشق جموح الريح ,
يهتك حصار الشرنقه
وبأجمل الألوان
يطلق فراشــاته

أحمد الشربينى

http://www.tibason.com/vb/showthread.php?t=8311

آمال محمود كحيل
19-03-2008, 10:17 AM
ياااااه .. ياأمى
لما كان..
يضنينى همى
أترمى ف حضنك..
يا أمى,
واما انهنه جوه صدرك,
نبض قلبك..
كان يسمى,
والدفا يسرسب فى روحى,
والأمان يوصل لدمى
من شهيق اللهفه .. أدفى
ياااااااااااه
ياأمى .

احمد الشربينى

http://www.tibason.com/vb/showthread.php?t=8430 (http://www.tibason.com/vb/showthread.php?t=8430)

آمال محمود كحيل
19-03-2008, 10:19 AM
مصــــر التى..

( مصر التى..
فى خاطرى ),
ما تبيعش فى وتشترى
وان جيت فى يوم..
وعاتبتها.
ما تجبش لى العسكرى
وان كنت افضفض..
بالكلام.
راح يطبخو.. ميت اتهام,
واتحال أوام..
ع الظالم ابن المفترى
مصرالتاريخ
مصر الامان
صار ابنها من حبها
أكبر مدان
فيها العقول اتكبلت,
وجاهلها أكبر عبقرى.
يا ام البلاد..
بين العباد,
أصبحت باكره منظرى.
فيك اللصوص ..
حفظوا الطقوس,
وانتى يا دوب..
بتأشرى.
والمعتدين المجرمين
دخلوا رحابك آمنين
تستقبليهم بالقبل
وف وشى ليه بتكشرى؟
مين غيـــرك؟
مين اللى شوه منظرك ؟
ولحد امتى هاتصبرى ؟
ياهل ترى راح تقدرى..
تبقى التى ..
فى خاطرى

احمد الشربينى

http://www.tibason.com/vb/showthread.php?t=8578

آمال محمود كحيل
31-03-2008, 08:41 AM
غـــــــــل

يا خوفى م الاحساس
بالظلم بين الناس
يسرقنى من ذاتى
وبصهد أناتى ..
يزرعنى شتلة غل
تطرح وبال ع الكل
ما يهمهاش آتى
لو حتى مهما يكون
يعنينى ايه م الكون
وبفلسفة شمشون
بإديه – أكرملى –
أنهيها مأساتى
يا خوفى آآآآه..
يا خوف,
يفارقنى لحظه الخوف
ما ابقيش ولا اخللى
أسقى الجميع م الكاس
يتجرعوا غللى
وحياة ابوك يا خوف
إوعاك تفارقنى
من منبع التكوين ..
إحساس بيسرقنى
ما بين بيبان الروح ..
مجروح وداخللى
- م الخوف - ..
طوفان الغل ..
تنهش حشاه ..
خللى
فين مبتدا فرعى
مين بعتره ضللى؟
محتاج اعود ليكى ..
اياكى لا تضللى ,
وان عودتى حب وكرامه,
- يا نفس – أفضللى

أحمد الشربينى


http://www.tibason.com/vb/showthread.php?t=8631 (http://www.tibason.com/vb/showthread.php?t=8631)

آمال محمود كحيل
10-04-2008, 04:53 PM
إذا كنت لاتعرف عدوك, فتلك مصيبه!
وان كنت تعرفه, وتعامله معاملة الأصدقاء
فالمصيبة أعظم!

العدو مين؟
*************
الأمريكان..
مافيش كلام ,
شى الله ياسيدى..
( العم سام )
دول أرقى نوع..
م الأصدقاء !
والرأى طبعا..
رأى عام.
مافيش ( بروبلم )
كده فى التمام,
وإيه حيلتنا.. غير الالتزام؟!
بنوع ( كواليتى )
م الأصدقاء !
************
وابن الصهاينه..
كائن مسالم,
مظلوم , ويكره..
لو يبقى ظالم؟!
( ميدى ) انجلا ندى..
ربيب أميركا,
والشرق أوسط..
عاملينه تركه
بيقولو: دموى,
أتاريه نباتى,
لا قال: دا نيلى..
ولا ده فراتى
يفطر بنابلس,
يتغدى غزه,
بالقدس يحبس,
والأقصى .. مزه
( شالوم ) ياجارنا..
خليك فى ريحنا,
وان خدت دارنا..
داشيئ يريحنا,
وف ( كامب ديفيد )
بالسر بحنا ,
طبعنا – طبعا –
وخلاص فرحنا,
ومادام ( جنحتم ) ..
- على طول - جنحنا..
قطيعه تقطع..
سيرة الخناق!
************
أما اخواننا..( الطلاينه )
والحقيقه - بجد باينه –
مش هاقوللك:
دول حبايب!
لو تنخور فى الحقيقه,
هاتلقيهم.. ناس قرايب,
واقدر اثبتلك بأنى..
رأيى - فعلا -
رأى صا يب!
بص فى كتاب التاريخ,
واقراه, وقوللى ..
تلقى ( جوهر )
جده كان - أصلا -
( صقللى ) ؟!
والجزيره علينا غاليه,
بس هى تبع إيطاليا؟!
على ضوء مايأتى,
واستنادا, لحيث جاء..
مافيش مابيننا..
أدنى أشكال العداء!
ضف لذلك:
دول بتوع الاسباكيتى,
فيها إيه لو ( موسيلينى )..
كان فاشيستى ؟!
إوعى تفتى..
عكس هذا الإ دعاء؟
*************
أما بالنسبه لبلاد..
( الهر.. هتلر )
هاتلاقيهم بيشيلولنا..
كم أكبر.. م الولاء!
بس فى هيئة تعالى,
واستياء؟!
يعنى إيه لو قالو ( روميل )
جه يحارب (مونتجمرى )
فى بلادنا,
واحنا مالناش فى القضيه؟!
لما زرعو الأرض..
بالملايين.. مصايب متداريه؟
مش قضيه!
إوعى تفهم - معنى ذلك –
إننا .. دايما هفيه!
فيه ياساده..
( حاله خاصه )
فوق نطاق المفهوميه!
إبن مصر بيعطى عمره,
- رغم علمه -
إن عمره ماليهش ديه!
دى القضيه؟!
************
إياك تقول:
( والإنجليز )؟
( بردون ) ياصاحبى,
وميت ( بليز )!
فى الحقيقه.. بدون رياء,
دول أصدقاء.. الأصدقاء!
وحياة سنين الاحتلال,
والشهدا..
فى شرق الكنال,
ماأشبهك..
ياللى اسمه( بلفور ),
ولا ( إيدن ),
أو بلير,
لو تشكك فى انتمائهم..
للعروبه,
يبقى ده عدم الضمير!
اللى فاكر أى ( فيتو )
أمريكانى,
خلف منه.. فيتو تانى,
إنجلاندى, ألعبانى,
للعدو.. الاستيطانى,
يبقى فكره.. أكيد شيطانى,
بس فيه فاضل سؤال,
سهل وبسيط,
شكله - يمكن - فى الملامح
يبقى سازج,
أو عبيط,
والمساحه مابين سطوره,
م الخليج.. حتى المحيط.
لما دول الأصدقاء..
طب قولولى العدو مين؟
( ياخير أمه أخرجت )
ضاع منكو فين..
الانتماء ؟!
( المعتصم ) ولى زمانه..
من سنين,
ولا عاد بيسمع, أو يشوف..
دم الضحايا ف دير ياسين!
ولا فى الضفه, وغزه,
أو فى بيت لحم.. الحزين!
يا أمه بتطاطى الجبين..
العدو مين؟
ياأمه معصوبة العنين..
العدو مين؟
ياأمه تاهت..
عن سراطها المستقيم,
العدو مين؟
مين يقوللى العدو مين؟
*************
أحمد الشربينى

آمال محمود كحيل
10-04-2008, 04:59 PM
ميلاد مازن
تهنئة متواضعة بيوم ميلاد
الشاعرالصديق
مازن دويكات
( م )
مكــــان فيـــــه مولـــدك
يـــــزف البشـــر فرحانا
ليعـلــــــن فيـه للـــكون
أوان الشـــعر قــــد حان
( ا )
أ تانا را ضــــع الشــــعر
يصــــــوغ القول الحانا
بتبيـــــــان, وتمكيـــــن
يشـــــــيد فيـــــه أركانا
( ز )
زمـــــــانك أنت منجـبه
ليعـلــن عـنك إعـلانــــا
بنســــــل من دويكـــات
يصك الســــحر برهــانا
( ن )
نهنئ فيـــك أنفســـــــنا
ففى الميـــــلاد بشــرانا
بعذب الحـرف يشــجينا
بفيض العشــــق أحيانا

أحمد الشربينى

آمال محمود كحيل
10-04-2008, 05:02 PM
فى المفترق

وكأ نها..
من غير نقط..
كل الحروف اللى انكتب..
بيها الحوار,
او باختصار,
كان غير كده..
لحظة بداية فكرته..
حلمى الكبير!
قصدى اللى كان فى الوقت ده..
اكبر كتير..
من تفصيلات الاحتمال؟!
ماقصدتهاش..
لما المعانى طلقتها..
جوه اللى جى,
يخدعها ضى
تاهت فى وادى الانتظار,
اتبعترت كل الجمل,
واتعثرت..لغة الحوار!
انا حلمى اشبه بالفراش,
بجناح رقيق,
يادوب عشان يقدر يطير..
قرب الضيا.
ماقصدتش انه هاينكوى..
بنار الدفا
فى الحلق حجر دمعتى ..
طعم المرار!
فرس الرهان
متربصاله كبوته قبل السبق؟!
طب اعمل ايه..
لو جه عليه الدور بدأ؟
اسال وفين رد السؤال؟
محتاج اجابه لما سبق
ونا اصلى دايما باتسند,
لبكره ع اللى زمان مضى,
جهدك قضا..
مين يفهمك..
يااللى انت ضليت الطريق؟
لو جيت فى يوم ودعيت عليك..
سامحنى يابا ف طربتك!
انا لو مشيت جنب الحيطان,
لو كان امان,
طب اعمل ايه فى المفترق؟
ادينى اهو فى المفترق
لوجانى ريح..
مش بااستريح,
لو حتى سديت البيبان.
كان نفسى يابا..لو اسالك:
حالنا اللى مال,ولا الزمان؟
ياحرقتى من معنى كان.
انا جيت فى يوم جبت الحروف,
حسب ا لاصول رتبتهم,
طلعت كلام.
ومن الكلام ظهرت جمل,
ومن الجمل..
خلقت حوار,
ومن الحوار..بانت ملامح رؤيته,
طلعت نهار!
تعرفشى يابا بعدها..
ايه اللى صار؟
وضع ( الالف)
بقى مختلف!
و(الميم) بتبكى وترتجف!
و( اللام) بترفض..تعترف!
صار الكلام..غير الكلام.
تاهت ملامح رؤيته,
وف لحظته,
اتبعترت كل الجمل,
مافضلش غير كلمة امل
وكانها من غير نقط..
كل الحروف اللى انكتب..
بيها الحوار؟!

احمد الشربينى

آمال محمود كحيل
10-04-2008, 05:07 PM
حبـــة تاريــخ

كام جيل .. قتيل,
عشق النهار.
واحنا بنتهجى التفاؤل..
بالضحى.
نلبد فى دول توب الخلاص
نسقط مابين..
شق الرحى !
ننعم بسكرة الاحتضار
يبلعنا هو .. مالوش قرار
لانطول قبور,
ولا أضرحه
خيط عنكبوت..
يفصل مابين سر الحياه,
والمنتهى!
مين اللى يقدر يدركه؟
من قبل مايسرسب ..
بصيص الضى ..
من شرخ النهار.
ياراضع الخوف من عيون ..
بتحوطك,
إكسب عوايدك..
من جموح الريح تزيح..
هوجة غمام,
م المهد تحجب رؤيتك!
على مفرق التواريخ ..
تبص على اللى باقى..
م التاريخ,
تسمع سريخ العقل ..
بالبرهان يئن!
خبى استكانتك..
بين متاهات السطور
ياخدك شرود الانفصام
تحلم بعصر من العصور
من يوم ماأدمنت الخضوع
وانت اختصار.. الانكسار
هانت عليك..
شيم الحضور
على صفحة( الاخشـــيد )..
تمر كما الكرام,
فدخلت فى مذهب( كافــــور)..
ولا فيش( جبــــــرتى ) يحفزك
يمكن فى يوم.. دمك يفور
تايه فى صفحات الشروق..
اللى انفلت
تجتر ماضيك المبجل بالمشيب
بهتانه شمسك..
فى الميلاد!
- قبل الميعاد – قصدت تغيب
من صلبك الضمران..
تجف الاورده,
طال المدى,
ولا فيش مدد
سنين عجاف طال حملها,
والرؤيه مين هايحلها..
لما النهار.. ليه ألف ليل؟!
الفيضه ليه..
- ياابن الأصول -
غابت يانيل؟
وف عز.. ماعز البديل,
جنى الرطب.. طاله العطب
والريح مابتهزش نخيل.
الوهن خيم ع البيوت
قبل مايحبى الطفل..
قايل للسقوط !
دبلانه يانهود البنات
مستنيين..
- بعد الغياب -
طلة قمر
يبعت بشايره (بالتبات)
ويبدد الحزن اللى عشش..
بين ضلوع الامهات؟!
يمكن فى يوم..
- على غير ميعاد -
نستنظره
يظهر قمر
يوصل مسافات..
اللى فات, ويحضره.
لكن القمر,
طل وأمر:
قبلن مانقرا فى التاريخ,
لازما بإيد نا نسطره

أحمد الشربينى

آمال محمود كحيل
10-04-2008, 05:10 PM
الى احب الاصدقاء
ورمز الوفاء
صديق العمر
الشاعر القدير
احمد ابراهيم

امانه ياللى هاتطبب
تحنن مشرطك حبه
فى ايدك قلب لسه اخضر
وفيه المأوى للصحبه
برغم اساوة العله
داقلب يبحتر الضله
فى مهده الود يتربى
ولما الخوف يحوطنا
فى كهف القلب نتخبى
فى حضنه الدنيا لو تقسى
بننسى اللحظه لو صعبه


احمد الشربينى

آمال محمود كحيل
10-04-2008, 05:19 PM
قصدت التدانى فقلت النوى

بهجر رميت , ومــــا فعلتى؟
سواها اقتراب .. إلى غايتى
قصدت التدانى, فقلت النوى
فمن يحتوينى من كبــوتى؟
فمن قــــال أن البعاد افتراق,
وطيفك يرفــــل فى مقلتى؟
وأكتب شـــعرا عساه ييسر..
عســـــر الطريق إلى بغيتى
فما من مداخــــــل أوصدتها,
ولا الهجر أصبح من شيمتى
فقلت نيران, ونار الجـــــــوى
بلحظ تدق حمـــــــــا قلعتى
فحسبى نار. هى المرتجى,
فنــار الحبيب.. بهـــــا جنتى
صدى الاهات , وأســمعتنى
ســــهام تصيب بها مهجتى
أبعت الهــــــوى, ومن ذايبيع
هواه ببخس؟ فوا دهشـتى ؟

أحمد الشربينى

آمال محمود كحيل
10-04-2008, 05:31 PM
المقامة الشربينية
فى المسألة الكهربائية

فى صباح يوم - كان الخميس -
الغريب بكل المقاييس,بأحداثه حامية الوطيس,
كنت بفعلها.. سأروح فطيس,
مما حول إسمى
من أحمد السعيد ..إلى احمد التعيس.
حيث فى هذا اليوم,شأنى شأن بقية القوم,
استيقظت كعادتى من النوم.
- وفى عجاله - تناولت الافطار,
وكوب الشاى أمامى ..
قد صار,
وأنبأتنى سيدة الدار:
بأن القهوة ..
على وشك الإحضار.
وبدلت سيجارتى الفانية, بغيرها ثانية,
تبعتها بثالثة قاضية
وبعد المسائل الاجرائية,حسب الطقوس اليوميه,
فأخذت وضع الاتكاز,منجعصا أمام الجهاز ,
بغية تحقيق إنجاز,
وكان المزاج شبه معدول,
بفعل الجبنة والفلافل والفول,
وبينى وبين نفسى.. رحت أقول:
الدنيا حلوه ورايقالك
الله عليك صاحى من بدرى
لما بتكتب بمزاجك
الوحى عندك ييجى يجرى
والشعر قافيته تحلالك
يقول اليك سلم أمرى
ياجميل فى كافة أحوالك
مافيش جمالك يابو قدرى
وبعد هذه الابيات, بغرض رفع المعنويات,
فتحت بعض المنتديات,لعمل الردود والمشاركات,
فحدث ماهو آت:
- من شرفتى - لمحت الأمطار,
وتأملتها بإعجاب وانبهار,وبين رعد وبرق ..
تحول المسار.حيث تصاعدت , وكأنها الإعصار,
وإذا بدوى الانفجار,
يعلن بأن الجهاز قد حل به الدمار.
وسمعت صوت النسوة فى الحاره,
يصرخن بشدة وحراره,وأنا لاأعرف ماهى العباره.
وكاد أن يتوقف القلب,من هول الخضة والرعب,
وسماع عبارات: يارب استر, أستر يارب.
ومع سماع صوت الدعاء,واذا بأسلاك الكهرباء,
محدثة فرقعة وضوضاء,تنبعث - بصخب -
فى كافة الارجاء,وألسنة النيران ..
ترفع الى عنان السماء,
وفى الحارة تكهربت الأجواء.
وفى محاولة لضبط النفس,
والخروج من الإحباط واليأس,
ومحاولة فهم هذات اللبس.
استنجدت بإحدى الزميلات,التمس السكينة,
ولملمة الاشتات,فحالى اقرب إلى الاموات,
وإذا بى ياحضرات, وقد تلعبكت منى الكلمات,
.فبدلا من تهدئتى,واعادتى إلى الثبات,
سمعت السخرية ,وتعالت صوت الضحكات,
والتعليق بالنكت والقفشات,
فكادت اعصابى على وشك الانفلات.
وبعد فترة من الصمت,
أحسبنى لفهمها قد فهمت,
ففى منتهى الغرابه,
وبرغم حالتى الموحية بالكآبه,
ظنت بأن روايتى نوعا من الدعابه,
وبعد ان أدركت الحقيقه, وفى اقل من دقيقه
أخذت تفتى , وتجيب,لتخفف من الغم والنحيب,
وتبدل من شكلى الكئيب,وأنا كالأخرس لاأجيب.
وبعد فترة من الذهول,أغلقت الجهاز المحمول,
وأخذت أنعى, وأولول وأقول:

واحسرتاه لكمبيوتر قد رحل
وبقربه لايقترب منى الملل
فبغيره.. يبقى المزاج كما الهباب
وتحيطنى كل الصنوف من العلل
ياحبيب القلب نسفت.. كيستك
ولقد جعلت الهارد فيك هو الأمل
والويندوز المسكين طار بلحظة
والقلب يعصره البكاء من الزعل
من ذا يخفف من صحابى كربتى؟
ماكنت أحسب قتله.. كده بالعجل
فدتك روحى.. ياأحب أحبتى
يالتنى كنت الذى .. قالوا رحل.
ملعون ابوه الشعر بعد رحيلك
فكيف اكتب فى الغرام , أو الغزل؟
وللعزاء.. فقد اقمت سرادقا,
والحزن يصبح صاحبى طول الأجل

أحمد الشربينى

آمال محمود كحيل
10-04-2008, 05:43 PM
بكل روح رياضيه
نشارك اخواننا الزمالكاويه احلامهم
بوجود المارد الساحر العبقرى العملاق
شـــــيكابــــــالا
الذى سيغير مجرى تاريخ الكره
فى الزمالك, ومصر وافريقيا
ويضع نهاية للإنتكاسات الزمالكاويه
وهايرجع زمن الفن والهندسه
كما نتمنى الا تكون اوهام
كتلك التى يطالعوننا بها مع مطلع كل موسوم
تحية ومشاغبة أهلاويه
اهداء
للزميل الزمالكاوى الاصيل
مدحت زيدان
والزميلة العنيده
طيبــــــــــه



شــيكا بــالا
ما خلاص الزمن اتغير
هانقول وهانحكى قواله
ولاعندنا خلاص هانفكر
وبقينا ف احسن حاله
وهانكسب أى بطوله
دمعانا خلاص شيكابالا

******

الدورى ده مش هانسيبة
والكاس برضك هانجيبه
والاهلى هانكشف عيبه
ويحس اننا رجاله
بوجود الواد شيكابالا

******
من بعد سنين الخيبه
راح نرجع بعد الغيبه
ماحناش عايزين لعيبه
نبعت للكل رساله
وكفايه علينا شيكابالا

*******
على طوكيو خلاص هانسافر
وهانبقى وحوش افريكا
وهناخد السوبر برضه
دفريقنا بقى مزيكا
م اليوم ده معادش رزاله
بوجود مستر شيكابالا

******
لاتقول لاتريكه ولامتعب
وجوزيه هايبطل يكدب
بركات وفلافيو وغيرهم
الكل لازم يتعذب
نغلبهم خمسه وسته
والحضرى لازم يتأدب
دول ناس دايما هواله
وزماننا زمن شيكابالا

احمد الشربينى

آمال محمود كحيل
10-04-2008, 06:04 PM
كبــــــــــــــــــوة


ردا على قصيدة
أنا اللى اموت واقفه
للمبدعة القديرة
دكتوره شيماء

وباسأل نفسى:
ليه جايز؟
أبات مهزوم وانا الفايز
يفور دم الكلام منى,
أتارى القول بيتتاخر
سمحت لحزنى ع الآخر
يفضفض..
باللى جواته
اتارى الحزن مش عايز
يبان الضعف متجرد
بواقى العمر تتشرد
وتتبحتر مسافته
ويطول ليل مشاويرى
تلف عبايته تفكيرى
نرج القلب دقاته,
وعزة نفسى تئلمنى
دموع الغصب تهزمنى
ومين يدرك..
بكا المهزوم
بدون مايعيش فى مأساته؟

احمد الشربينى

آمال محمود كحيل
10-04-2008, 06:07 PM
بمناسبة
ثــــــــــــــــورة
يوليـــــــ 23 ــــــــو
المجيـــــــــــــــدة
ثورة العزة والكرامة


ناصر فى القلب عايش
قفز التاريخ..
فى راسى,
وطلب يعمل مناوره!
من إيدى,- وباشتياقى -
رجعنى فى ابتدائى,
باللوح الأردواز..
والشورط.. وبالبشاوره.
أكتب, وارسم , وأشطب,
وارجع ..
من تانى أكتب,
واتمسك بالمحاوله..
كره.. من بعد كره!
وعشان الصوره توضح,
- بالغصب -
لقيتنى بامسح..
أكتر م ألف مره.
كان ( علم النفس ) لسه,
مادركتش منه لمسه..
بتقول:
انى بطبيعتى,
من يومى إبن ثوره
راضع بز السياسه,
متربى ع الحماسه..
وف ندهة الاستغاثه
أعشق روح المغامره
واعشق - م القلب -
ناصــــــــــــــــــــــ ـر
مقدار عشقه لبلاده
- على مصر -
ورثت غيرته,
ورثنى كمان عناده,
الوحده , والعروبه,
أحلام.. سكنت فؤاده
ابن ( حصار الفالوجا )
من كلمه..
غير مباشره,
علمنى بدون مايدرى
لو هبت ألف موجه,
أو - حتى - السكه عوجه!
مش ممكن..
يوم أطاطى,
لو قالو على : خاطى,
دى العزه والكرامه..
(أبجد هوز ) زعامه,
والراس العاليه.. غاليه,
لو فيه مليون مؤامره!
الثوره البيضه قامت,
ولا نقطة دم سالت,
والمبدأ - من يوميها -
لسنة سبعين.. وثابت
( بنعادى اللى يعادينا )
و( ونسالم مين يسالم )
وتشوف جوه ف عنينا..
عبارات.. واضحه المعالم!
ناصـــــــــــــــــــر..
فى القلب عايش,
وهايبقى ليوم مماتنا,
وكمان عايش مابيننا,
مع أعظم إنجازاتنا!
ونحس معاه بذاتنا
شايفه..( كالسد عالى ),
لحظة ( تأميم كنالى )
ع الخطب الإرتجالى..
الله.. يا ابو بشره سمره .
شايفه ف كسوة عيالى,
فى اللقمه.. المتداريه,
جوه فصول.. المدارس,
فى زمان المجانيه!
وباحس معاه بمعنى..
تجسيد الانسانيه
إن قال.. الكل يسمع,
وكأنه صوت سماوى..
يتسرسب جوه روحنا,
لو جرح .. القول يداوى
علمنا نقول غناوى..
ونفسر حلم بكره.

أحمد الشربينى

آمال محمود كحيل
10-04-2008, 08:41 PM
محتــاج أعيــش

مش لاجل اعيش ..
محتاج اعيش.
ولا قصدى عمرى اللى انقضى
وسنينه منى اتفرفطت,
ماتكفنيش.
محتاج أعيش
رغم الرضا.. باللى مضى,
لو حتى كانت زرعتى..
فيها الحصاد..
أصبح مافيش.
محتاج اعيش.
على شكل إيه,
وازاى هاكون؟
سوى كنت مارد
أوحتى زاهد ,
أهو كله وارد,
وان قالو شارد..
غرقان فى بحر من الجنون
مكسى بحرير,
أو لبسى خيش..
مايهمنيش,
محتاج أعيش.
غرقان ومحتاج طوق نجاه
أملى اللى باقى من الحياه
لو احس انى كتبتها,
حاضنه المشاعر كلها
كلمة صفا
نبع الوفا
تشرق دفا
تسكن قلوب كل البشر,
ولا تتنسيش.
زى الكتابه على الحجر..
بتفوت عليها الأزمنه ,
ولا تتمحيش .
وعشان كده..
محتاج أعيش

أحمد الشربينى

2 مارس 2007

آمال محمود كحيل
10-04-2008, 08:44 PM
مشــــــــــــوار

مين اللى خلى السكه..
تفقد الاتجاه؟
مين اللى بعتر الانتباه؟
مين اللى خلى الخوف ..
- فى غفله من الأمان -
جوه النفوس.. يبلغ مداه؟
لاقدرنا نحتمل الوقوف,
ولابالمسير..
باح الطريق عن منتهاه.
كان كل ذنبى..
الضعف من هول الفزع
الدهشه داست ع الوجع,
فاتسربت..
- بالغصب - آه
مع انى باسمع همستك ..
ماسمعتنيش
عطشان لندعه تبل ريق,
وشربت من بير السراب ..
فيض ميتك.
فيه لسه إيه .. نبكى عليه؟
بعد السكك مااتفرقت,
بقى كل واحد ..
فينا عارف سكته
أنا اللى أضنانى الطريق,
من بعد ماتاه الهدف.
وانت اللى ع البر اتحدف,
شوفى اختلف..
عن مفرداتك للقبول
اللى يعد الضرب..
غير اللى انضرب
واللى يعوم ع البر..
مايخاف الغرق
عمرى اتسرق
- بين القبايل -
بعترو دم السنين.
أنا كنت عارف ..
أبقى مين؟
دلوقتى ليه ماعرفتهوش؟
الصورة تايهة من الرتوش
ملمح رمادى ..
بتنكسى بيه الوشوش
مايهمنيش العيب فى مين؟
عيبك يعيبنى..
لو بقصدك تدفعه,
عيبى يعيبك,
لو هاتقدر.. فامنعه.
أما اللى ضاع..
مين فينا يقدر للحقيقه يرجعه؟
-أو بالقليل -
مين اللى كان - فى الأصل -
قاصده يضيعه؟

احمد الشربينى

آمال محمود كحيل
10-04-2008, 08:46 PM
مواساة للشاعرة القديرة
دكتورة آمال كحيل
عن حادثة الكباية

مابين جوعها وأوجاعها

نبأ مش حلو من جده
كهزة وليها توابعها
ماهيش كدبه ولا أشاعة
ولسه النشرة هانذيعها
بقولوأمال على غفله
بقت غرقانه فى دموعها
وهى داخله ع المطبخ
ترتب بعض أوضاعها
وهى ياعينى بتعانى
ومغلوله بسبب جوعها
وباستعجالها كان حالها
مافيش ولا شيئ يشجعها
نصيبها جه فى كبايه
غريبة الشكل من نوعها
لحد اللحظه ماتعرف
ما بين إيدها اللى فرقعها ؟
شظايا بسنها الحامى
وشكل الدم .. روعها
وفيها القوة منهاره..
ومش قادرة تجمعها
أتارى الجرح كان نافد
ومادد جوه فى صباعها
بلا حول ولا قوة,
بتبكى بحرقة.. أوجاعها
بسرعة لأى مستوصف
وأى فيزيتا .. تدفعها
ياعينى عليها مسكينه
ومين فينا هاينفعها ؟
ما بين نارين بتبكى العين
نست جوعها بأوجاعها
يارب اشفيها واعفيها
ولينا بسرعه رجعها

احمد الشربينى

آمال محمود كحيل
10-04-2008, 08:49 PM
الى الانسان, أو المعنى, أو الكيان
فى كل مكان وفى أى زمان,
ولو حتى , مالوش عنوان,
بشعر عامى,
والفصحى فى الامكان
او حتى كان بالنثر
وحلاوة البرهان
بكل الحب.. بعد التحية والسلام
مرسل بعلم الوصول



يصل ويسلم ليد/
أبناء طيبه
كل عام وانتم معانا,
كل عام, وانتو بسلام.
كل عام يا أهل طيبه,
واحنا اخوه على الدوام.
كل عام واحنا حبايب
واللى حاضر يلقى قلبه..
راح يدور ع اللى غايب
حتى لو نحتاج نعاتب,
العتاب .. يبقى ابتسام
************
الراسل
احمد الشربينى
ابو قدرى

آمال محمود كحيل
10-04-2008, 08:53 PM
هامش
هناك مايعرف (بالتجربة الشعورية)
وملخصها: عندما يقع الشاعر تحت سيطرة
مؤثر ما, ويستغرق فيه, وينفعل به لدرجة التوحد,
فيصيغ ذلك شعرا,
وبالفعل من خلال تلك اللقطة العبقرية
للزميل العزيز بلانكى,
وجدتنى منبهر بتلك اللقطه, واحسست بأن
القطه لديها ماتريد أن تقوله, فحاولت ان اتعرف عليه
وكانت هذه الكلمات , والتى لم تستغرق الحالة
بمجملها كثر من ربع ساعه, منذ رؤية الصورة
وحتى الانتهاء من هذه الكلمات من شدة الاحساس بالصورة


http://img403.imageshack.us/img403/3449/dsc00580ni0.jpg


من وحى قطة بلانكى

ماهيش غلطه


بلاش البصه دى ليا
وشوف الحيره ف عنيه
مانيش فايقه
ولا طايقه الملاغيه
شبعت كلام
ملان اوهام
وكدب ف شكل حنيه
تعيشنى بحرمانى
تعاتبنى تكدبنى
وبرضه تغيب وتنسانى
ومن شوقى,
وحس بيسرى فى عروقى
وهبتك نبض احضانى
خلاص ابعد
وانا هابعد
ونبع الحيره يتجدد
يجوز نرجع فى يوم تانى
وأنسى طعم حرمانى
وتتسكن, وتتمكن
وتملك عرش وجدانى
وأضمك جوه فى عيونى
وبرموشى هاتتغطى
واتوه وانسى
واحس بأنى مش قطه
ساعتها أقول
ماهيش غلطه
أحمد الشربينى

آمال محمود كحيل
10-04-2008, 08:58 PM
دموع على حجر الزمن

دمعه فى الأول

توجعنى ليه يا طبيب ؟
وانت اللى كان أعلم,
بالسهم لما يصيب..
لو م العدا أ كرم.
وتعرى ليه جتتى ؟
بالقصد.. للمخاليق
لو كنت خيرتنى..
بالموت.. لكان ارحم

دمعـه تانيــة

باعتب عليك يازمن
يامرخص الغالى
بالبخس ليه بتبيع
دا مقامى فى العالى
ياجاهل الاسعار
من مبدأ المشوار
علشان اعيش بشموخ
المر يحلالى

دمعه فى الآخر

ما بقاش مابيننا كلام
ولا ملام وعتاب
لما الوفاء والغش
الفرق بينهم داب
واما الصديق بيبيع
ما نعيبش ع الاغراب
صدقت بيك الزمن
طلع الزمن كداب
لما افتكرتك حقيقه
أتاريك طلعت سراب

احمد الشربينى

آمال محمود كحيل
10-04-2008, 09:24 PM
يا معنى كلمة حب

إهداء الى رفيق الدرب
وصديق العمر
الشاعر احمد ابراهيم

يامعنى كلمة حب
ياشخص كلك قلب,
ياتجينى بالبسمه..
ياتاخدنى للأوجاع
ياتسيبنى..
أخوض فى الصعب!
لسه الطريق..
يا صديق,
قدامى بحر غريق
العمر لو ولى..
إياك هاتتخللى
من حبك أتمللى..
محتاج لبلة ريق
ياروح..
وساكنه الروح,
منها الأمان بيفوح
لو يوم تقول اللآه..
وكأن أنا المجروح!
أوصيك بكل مافات..
وبأجمل الاوقات
لو كان كلامنا سكات
إن غبت يوم..
ما تغيب.
عن حضن اغلى حبيب
وتقرب المسافات

أحمد الشربينى

آمال محمود كحيل
22-04-2008, 10:34 PM
وأنــا الـــذى

وأنا الذى..
لما ابتلى بالحب..
- ليه -
دايما عليه تتعززى؟
وانتى اللتى ..
فى الحب جايبالى القلق،
وصابتنى حالة من الزهق
أصلك حقيقى.. تنرفزى
وانتى اللتى,
بين الخلايق, والبشر
على عرش قلبى اتربعت
وغرامها فى القلب اتحشر
من سحرها..
غار القمر,
وفضل يعيط , واتقهر
وعشانك انتى انا قلتله
دى حبيبتى دايما مخلصة,
فى الانتماء..
زى الوباء,
وغرامها فى الدم انتشر.
وانا الذى
قالوا عليك كل العبر,
متوحشه,
وخدودها حتى مكمرمشه,
وعيونها عامله, كما الحفر
وانا من عنادى اقوللهم..
لأ .. ميت فشر,
انتى التى..
اكلك بيتعب معدتى,
وانتى نصيبى من القدر
وانا الذى
لحظة ماباسمع ضحكتك
القلب احسه بينشطر

احمد الشربينى

آمال محمود كحيل
22-04-2008, 10:36 PM
أنـا الـــــذى

وأنا الذى..
فى العشق صرت مسيرا
بالشرح أو,
بالوصف ذاك الموجزِ
وهى التى..
من حسنها..
صيغت حروف هويتى,
وتجسدت بسماتها ..
- من ضالتى -
طوق النجاة , ومنقذى
من ثغرها..
شهد الكلام يهزنى,
- مستسلما -
ملكت زمام تحيزى.
ياكل من .. أحببتها
ولوصفها,
فتح المجال لرؤيتى
أنا قد نذرت مشاعري
لك فاهنئي يا منيتي

احمد الشربينى

آمال محمود كحيل
07-05-2008, 06:39 PM
ارخى الستار
****
لو حتى انتى هاتكرهى ,
شيئ مستحيل ان اكرهك.
حتى ان قدرتى تبعدى ,
فى البعد قلبى بيدهك
(قلبى اللى حبك من سنين)
من قبل حتى ما يعرفك
ولاحتى يعرف تبقى مين؟
رغم انه هان ,
ولاعمره خان ,
حتى اما ضاع منه الامان
ع الحب كان .. حارس أمين .
كل اللى فات ,
أصبح مجرد .. ذكريات ؟
(لملمتى قلبك م الشتات) ؟
يا قسوتك الشك توه سكتك.
والبعد .. بيه بتلمحى .
من غير ملام .. بتجرحى ,
لو كان بعادى بيسعدك ,
ياللا افرحى .
اجبرتى قلبى على الرحيل
من غير أسف ..
- لما اعتكف - ,
شوفه اختلف ,
لما ف هواك .. اصبح عليل
دلوقتى ممكن ترحلى ,
أو تاخدى حتى .. ميت قرار
ومافيش ضرورة تأجلى .
القلب داب م الانتظار
من غير دموع اطفى الشموع
وعلى اللى فات.. ارخى الستار

احمد الشربينى

آمال محمود كحيل
07-05-2008, 06:42 PM
معنى الوجــــع

لو تحس بأن قلبك ..
فى اللى فاكر إنه حبك ,
انه بالوهم اتخدع .
يبقى ده معنى الوجع
تبقى فاكره, لو فى بعده ,
بس هو بطبع عنده ,
تبقى جنبه وهو ناسى .
لو تحس فى عز ضعفك ,
ان اقرب شخص عارفك
بين جميع الخلق فيهم ,
بس هو يبقى قاسى ,
مين يواسى ؟
والعتاب لو يبقى غاية
والعذاب فى شريعته ..
آية ,
غصب عنك, غصب عنه ,
تنتهى فصول الرواية .
هو كان الحب امتى ..
زرعه يطرح ,
لو بنرويه بالملام؟
هو معنى الحب ممكن ..
نوصفه بحبة كلام؟
لما يبقى الشك مارد ..
ضله فارد ع القلوب
مهما تخلص فى المشاعر ,
الوفاء فى الحب يبقى ..
شكله أشبه بالذنوب .
يبقى خارج اختيارنا
اننا لازم نتوب


احمد الشربينى

آمال محمود كحيل
12-05-2008, 12:19 AM
مواساة لغفير طيبة العام
الغالية شحرورة
فى فقيدها ضرس العقل
وآه منك.. ياضرس العقل
*********
وأه منك ياضرس العقل
فراقك عندى مش بالسهل
ياأغلى عندى م الدنيا
ومن نفسى وجميع الاهل
ولا اسنانك, ولا نابك
يعوضلى اللى كان نابك.
ومن يجهل مقامك يوم
فيستاهل..
يعيش عمره فى ظلام الجهل
وايه الدنيا من غيرك..
وايه معنى طعامة الأكل؟
حبيب العمر ياغالى
نافعنى ف كل أحوالى
أجز عليك ..
فى لحظة غيظى, أوغلِّى
وفى الا زمات..
فى أى خناقة ماتخلى.
حلاوتك وانت متقمَّع,
فى بقى لما تتدلع
تلف اللقمة كام لفة
بسرعة تدوب وتتمزع
وفى الزحمه .. بلا رحمه
بتفرم فرم فى اللحمه
بدون ما اتعب ولا امضغ
كفاية يادوب.. على أبلع
ياضرس العقل ياغالى
حمايتك عندى زى الفرض
ياريت ترجعلى من تانى
ولو هامسح بلاط الارض
بتطلع عند كل الناس
بطول الفك..
وليه عندى..
الطلوع بالعرض ؟

احمد الشربينى

آمال محمود كحيل
09-06-2008, 09:15 PM
مشـــاوير

ياللى انت دارى.. بدارى,
وبجارى,..والجارى
سعيك لمين ياخى؟
فين القوالب .. فين؟
زاد الحصى فى الحى.
ابن الملوّح.. ينوّح..
على ليلى غير ليلاه
نهج النّعام ..أنعام,
وان عام نعوم وياه
نرمى الخطا مشاوير
محرومه م التفسير,
ولكل قصد مداه
ولكل والى موالى,
والبعض ليه مماليك
اهدرت دم انفعالى..
يابايعنى.. مين شاريك؟
من تحت سن القلم..
صوت الكلام بيئن.
لا الكلمة راضية تبوح,
ولاقلمى راضى يكن.
السن داب فى السن,
والبادى - كان - أرحم
فتشت وجه الرفاقة..
لم حد.. كان يعلم,
إن اللى فات هايفوت
بركان غضب.. موقوت
فكرنى باللى اتنسى..
لحظة شروق كداب.
(وانا طيرى لابد فى عنقى)
ولغيرى طيره اتساب
بين الطيور.. شارد
وقت احتضار النهار,
لاح فى الضباب.. مارد
فارد.. جناحه المهيب..
على وكر وهن , وزغب
خيم عليه التعب.
بالحزن متكبِّل,
ماقدرش يتقبِّل..
لغز الوجود م العدم
فاضت عيون الندم
من وطئة الأفكار
أنهار.. بطول المدى
ضاعت سدى.. الأنهار
لاتكونى (برد وسلام)
ولا سعير.. يانار,
ولحين حلول الحين,
مافيش فى شرعى مابين.
وبعرض صدرى البراح
فيه لسه باقى حنين,
ومعين يفيض أسرار
واللى يروم جنتى,
مفروض يخوض فى النار


احمد الشربينى

آمال محمود كحيل
18-06-2008, 03:22 PM
لكل شاعر في الطريق


كلام مباشر
يا كل شاعر
في الطريق كان لسَّه جيِّ
يا أحلي ضيِّ
أوعاك تفكر تبقي زيِّ
أو يوم يغرَّك اسم شاعر
قالوا عنه : ملوش مثيل
أو إن وزنه في المجال
من نوع تقيل
يا أبو فكر بكر
إنت الأصيل
******
الشعر عمره ما كان
كلام مرصوص ، وبسْ
ولا تهويمات بالتفعيلات
ولا هو متحف مفردات
للناس تبصْ
دا الشعر حسْ
الشعر شفرة لشيء بيجري
يمسْ نبض القلب مسْ
*****
ليه لأرتباك ؟
قول ما ف حشاك
بسجيتك قول كلمتك
واطلق معاني غنوتك
مبقاش مهم تكون بكا
أو زقزقه
لكن المهم في فكرتك
ماتكونش باهتة
ملقلقة

أحمد الشربيني

آمال محمود كحيل
09-07-2008, 09:48 PM
إهداء الى القيمة الغالية
سيدة القصر
الشيمــــــاء


يا حضن أم
القلب أوسع م البراح
والصبر من طول الالم
هزم الجراح.
ياهل ترى..
لساك ياحلم هاتتولد,
ولا اللى راح .. ياحلم راح؟
العمر متوزع مابين.
حلم الرجوع,
ومابين شتات المحرومين
النيل منابع نبتتك,
لكن امتدادك فى الفرات
ياجدر ضارب فى السنين
يتحدى أشباح الموات
أشهق يا جرح العمر سمع انتك
كسر توابيت السكات.
على طلة الحلم الجميل
طلع النهار,
على ضحكته,أنعس وابات.
شيماء ياطفله وحضنها,
تجسيد لأم..
يقدر يضم اللى شرد
ويلم أوصال اللى فات
شمعة بنورها بتنحرق
توهب ضيا للمحرومين
مع كل نبضة ف قلبها
تطرح جنين.
يا قسوتك.. يادى السنين.
وانا مش هالومك يازمن
دالقلب من شوقه اتعجن.
من بين تلال الغربة..
بالمح فيك وطن .
بيضم كل المشتاقين

احمد الشربينى

آمال محمود كحيل
07-09-2008, 01:24 AM
قمر الدنيا.. إهداء الى طفلتى الوحيدة / احمد الشربينى

كتبت هذه القصيدة لطفلتى الوحيدة
منذ مايقرب من العشرين سنة
كان عمرها ثلاث سنوات - تقريبا-
لم أنشرها فى اى مكان قط
كتبتها فقط واحتفظت بها فى كراستى
وتذكرتها هذه الايام فقط
واليوم يسعدنى بأن أهديها إليها
بمناسبة زفافها
الذى يحين بعد يومين
بمشيئة الله

قمـــر الدنيــا

مش مهم وجودها أمك ,
لما ابوسك ، أو اضمك .
لو تنامي جوه حضني ,
إوعى شيئ أبدًا يهمك !
واخده عقلي ..
يا شقية ,
ساكنة قلبي وف عنيه ,
كل يوم بيفوت عليكي ..
الغلاوة تزيد شوية .
لما تمشي يدق قلبي ..
كل خطوة بألف دقة ,
وابتسامتك ..
من طعامتك ,
لما اشوفها ..
زى عاشق شاف حبيبه ..
بعد فرقة.
من شفايفك الفراولة,
لما ادوقها ..
نفسى تانى أعيد واجرب
ميت محاولة .
عمرى ما انسى
أغلى لحظة ,
فيها شيلتك بين إيديه
يومها أمك حذرتني ,
وبعد ثانية ..
بان علىً .. يا شقية !
وبصراحة ..
قلبى كان له الحق يفرح ,
لما أصبح .. ليكي بيننا ..
أحلى مطرح .
يالله أوبًح .
بالفيونكة والضفيرة ,
ألف مرة ..
تبقى أحلى من الأميرة ,
ياللى اسمك من دعايا..
قبل ما يكون بالكتابه ,
زى قمر الدنيا لما ..
تختفي عنه السحابة ,
وانتى دايمًا
تسألينى ..
إنت رايح
فين يا بابا ؟!



أحمد الشربينى
1987

آمال محمود كحيل
08-10-2008, 08:01 AM
بردية أوزوريس

إيزيس ولا تلملمى..
م الارض أشلا ئى
غايتى - فى كل مكان - ..
يبقالى شيئ باقى!
وبدمى لاتنقشى..
فوق الجدار..
أســــــــــــرار
روح الحقيقه المضيئة
ماتحدهاش أسوار
وقت استكانة زمن..
تنطق بأوراقى

**********
لكن بدمى ارسمى..
- على قبرى - ..
ريشه ونصل ..
وقت اللقا الموعود,
مرصود بكلمة فصل..
تفصل مابين أشباه
لابسين رداء الأصل
ويدنسو ردائى؟!

**********
وف قبرى ضمى كلام,
قبل الأ وان..
قلته,
يمكن يطوله زمان..
يدرك خلود سيرته؟!
ويفك خيط الرموز,
يعلى البيان هامته
تنطق معانى البوح
يتخللى عن صمته
تتجللى أضوائى؟!

**********
إيزيس ياروح الخصوبه
يامؤونة المشوار
ياحصن ..
غصن انفعالى..
يابكارة الافكار
ياحمل وجع الليالى,
لويعصى ليلى نهار
وحياته (حورس)..
إيزيس,
فى غياب..
(أولى الا لبا ب)
ماتردديش قولى,
خوفا من التدليس,
أوجهل بالاسباب؟!
فى حياتى عشت ومماتى,
كا ن أصل مأساتى..
رؤية ضنين معرفه..
عاجز عن الإخصاب,
ويضم قولى كتاب..
ملفوف فى توب كتان,
وكأنه موميائى

**********
وف ساحة الأقداس.
ماتدخليش كهان.!
الإدعاء شعوذه,
والخلق ليه برهان
مش راح يكون ..
- فى الكون -
كائن..
بلا امكان!
واوصيك بنبت أخضر
محتاج لضل أمان
عسانى..
- بعد ممات –
أرجع فى شكل نبات,
ولا فى هيئة طير,
أونجم فى السموات.
ولا ف دموع الغيث..
على قبر أشلا ئى
**********
أحمد الشربينى

آمال محمود كحيل
23-02-2009, 10:06 AM
فى ظل التخاذل العربى (الرسمى) المهين
تجاة المجزرة الدائرة فى غزة
عروبـــــــــه
رغم علمى..
إنك انت حته منى,
رغم كونك..
/ كان / كأنى..
حتى صوتك.. هو صوتى,
لأودمك..نفس دمى!
ولا همك / فى الملا مح /..
كل من شافه يفكر..
إنه همى؟!
لو فى غفله وجيت نسيتك,
أو فى لحظة طيش..
رميتك!
لا تلومنى؟!
لما تتعب من سكوتك,
أو يهز الصمت صوتك,
لو هاتوهب لى حياتى..
والتمن ..
مرهون بموتك!
لو أفوتك..
يبقى جايز غصب عنى..
لا تلومنى؟!
شيئ مؤكد..
والجميع عارفينه عنى,
لك على, ووعد منى..
للى شايف,
واللى سامع,
إنى اجاملك فى الامك,
وافضل انعى .. معاك زمانك!
حتى اخللى لك دموعى..
ساقيه دايره..
ع اللى باقى ..
من حطامك؟!
بس إوعى تقوللى:
اعيش وياك ظروفك,
ولا تطلب..
إن اجيلك لاجل اشوفك,
إنت خايف..
ذنبى ايه أنا اعيش فى خوفك؟
إنت اخويا وضى عينى,
واما ابيعك..
برضه واجبك..
تشترينى؟!
بس ياشريكى ف مصيرى..
لاجل اراعى معاك ضميرى,
خد براحك ..
إلا إنى أعيش جراحك!
لو فى عز المحنه اسيبك,
مش هاتاخد..
غير نصيبك!
واما هاتفكر تلومنى..
تبقى برضه..
مش فاهمنى!
لاجل احس بنزف جرحك,
يبقى لازم قبل منها..
اللى صابك..
كان يصيبنى!
راح تقوللى والمبادئ,
ألف رحمه..
لأ دى راحت,
وياجملة ألف حاجه..
م اللى ضا عت؟!
المبادئ زى تاجر عنده..
سلعه ..
بده يربح او يقايض؟!
لما شاف السلعه بارت..
وتلاقيها / برضه /..
تايهه,
صوره باهته..
تحت عنوان الجرايد!
والعباره ماهيش شطاره,
ع العروبه..
ياميت خساره!
ياللا نعمل إستشاره.
أو تصللى ركعتين..
للإستخاره
بالمهانه ..
العزه هانت..
والحقيقه فصولها بانت,
بالإشاره.
خدها عبره..
م اللى بجرى,
ويا أطفال الحجاره؟!

أحمد الشربينى

آمال محمود كحيل
23-02-2009, 10:09 AM
بـــــــــراح

فاتح بيبان القلب براح
فارد بساط الود مشاع
وكان حصاد الود جراح
والسهم صابنى من الاتباع
تمتمت جرحى بسر دفين
مش راح يطيب..,
لو سرى اتذاع .

احمد الشربينى

آمال محمود كحيل
15-09-2009, 03:38 AM
إرتيــــــــــاح

بصيت فى يوم للسما..
ولقيتنى فيها سرحت,
ونجومها متبعترة..
وقمرها باصص تحت
فسألت مين رصها ؟
وبضى عينى لمحت
جواب..
بحجم الكون
صدرى انشرح , وارتحت

احمد الشربينى

آمال محمود كحيل
21-09-2009, 06:36 PM
يا ليلة العيد آنستينا
شعر
أحمد الشربيني



يا ليلة العيد آنستينا
بنستنى , ونتمنى ..
تطلى علينا وتجينا
ونفرح فيكى باللمة
نحس بفرحة الضمة
ونورك لحظة الازمة
لشط الحب يهدينا
ياليلة العيد آنستينا
ياليلة العيد ..
بدون مواعيد ,
بتقابل بأشواقنا
ومهما الغربة بيننا تزيد
مافيش حاجة تفرقنا
قلوب الحب ماليها
وصدق النبض يحييها
تبان للكل أضواءنا
تعود أجمل ليالينا
يا ليلة العيد آنستينا

آمال محمود كحيل
22-11-2009, 12:57 PM
نفسى اخاصمك
بقلم
أحمد الشربيني


نفسى اخاصمك..
لاجل اصالحك.
ياللى علمتينى اسامحك
بالمشاعر والمحبة..
حبة .. حبة..
أبنى صرحك,
واكتبك أجمل قصيدة
لما طاب للقلب مدحك
نفسى اكون..
فى سطور حياتك
أجمل العناوين لفرحك,
وبسنينى, وبحنينى
- حتى قبل ماهاتنادينى -
أبقى ضله ف وقت جرحك
ياللى تكوينى ف ملامحك
نفسى اخاصمك..
لاجل اصالحك
كل ذنبى..
إنى ماعرفتش أخبى
كنت تايه قبل منك
والتقيتك..
نور منور لى دربى
واما عن عينى تغيبى
ألتقيكى ساكنه قلبى
ساكنه عقلى,
وف كيانى
مهما أوصف معنى حبى
مش هاتسعفنى المعانى
دى المعانى ساكنه إسمك
والجمال .. من وحى رسمك
واما نتقابل ماباعرف
ليه يتوه..
كل الكلام من فوق لسانى
نفسى أبقى أمان لخوفك
لما تقسى عليك ظروفك
تحضنك باللهفه.. عينى
تستخبى جوه قلبى
لاجل انا.. بس اللى اشوفك.

آمال محمود كحيل
22-11-2009, 01:02 PM
كلامي مش كلام فارغ
بقلم
أحمد الشربيني

كلامى .. مش كلام فارغ
مليتى (الصورة بالألوان) ,
وفوق منها.. بأشلائى ..
كتبتى بقسوتك.. عنوان !
ولو كان (الكلام فارغ)..
من الزلات ,
وم النزوات ,
د معنى إنه مش فارغ ,
ومن قولك ..
دليل النفى بالبرهان ؟!
بحق الحب اللى جمعنا ,
أنا القيمة, وانا المعنى
وانا الصوت اللى بيردد ..
نشيد .. بيعيد فى أوجاعنا
وانا الشارى ,
فى يوم مانقول: خلاص بعنا
وانا صوت الأمل.. لما ,
يفيض الحزن بدموعنا .
(حبال الكدب) .. دى حبالك
وظنك .. لما أوحالك ,
صبح شوفك.. ظلام حالك .
ولو ترمينى بالقسوة ,
فصعب على أشوف.. حالك
نسيتى.. عهد مشوارى ,
وكنتى النبض للكلمة ,
ومنك وحى أشعارى .
وكنتى الضى لو تاهت ,
فى ليل المعنى .. أفكارى
وكنتى النظرة .. تملا الكون
ومن حبك ..
وكلمة نابعة من قلبك .
ولو قولك ماهوش موزون ,
وف عنيكى .. أشوف بيكى
جمال الشكل والمضمون .
على أمل اللقا .. تانى ..
هاموت , وأعيش .
ولو قلتى اللقا بيننا ..
نهايته .. مافيش ,
فقولك يبقى يا حبيبتى ..
كلام فارغ

آمال محمود كحيل
17-12-2009, 12:43 PM
تــــراتيـــــــــــل
بقلم
أحمد الشربيني


( إلى من علمنى كيف تكتب الكلمه ؟ )

ويـــــا حروف الكـــــلام ..
علمتـــنى افــــــرح ,
وف زحمة الآحزان
شفــــت الآمــل مرسوم
*******
حسيـــت كلامــك دفــا ..
وقـــت ان يهــل البــــرد,
ف الغــدر كــان الوفا
ف الجــــد هـــو الجـــــد.
ف الوهن كان الشفا
ونسيم فى لحظة صهد !
**********
يا ابو الكلام قنطره..
توصــل لجــسر القلـــب .
والكلمه تحبل ضيا ..
تولــد فى وقت الصعـب
قلبك كبير يا جدع ..
شايــل همــوم الخـــلق
والفكره لم تنتهى ..
الا ان يبـــان الحــــــق ,
ما رضيت تقول الاه
لحظــــــة مـاكانـــت لأ!
*********
سهم الكلام فى القوس ..
يرشـــق فى كبد الهم,
اكــوى الجراح يا طبيــــب..
غايتــى الجراح تتلـم ,
عمــر الجراح مــا تطيـــب..
لو فيه صديد فى الدم !
*********
شايـــل حمول شلتــها ..
لــم يوم تقـــول : كليــــــت,
والحمل لم يهزمك..
ينهـــــد..مـــا انهديـــــــت,
ماســـك فى ايدك قــلم ..
شايــــل فى قلـــبك ألم,
لا هبــت م اللى ظــــلم,
ولا دست على انظــلم ,
شامخ شموخ الهـــرم ,
وسـط الهـــــدد ..عليــــت
*********
راضـــع نهود النيــــــل ..
فوق ضفتــه شبيت,
رتلـــت فيـــه ..ترتيـــل,
طلب الرحال..شديت
شقوا القميص م الضهر,
الشمــــس لحظـــة قـــهر,
نامــت فى عــز الظــــهر,
(يوسف)مين اللى رماك..
جـــوه ظلام الجــــب؟
يا سؤال وناقصه جواب,
الديب برئ م الذنـب
لكنــه مــش غضبـــــــان..
مــن اهــــله والخـــــلان,
د معــادش فـــى الامكان..
يكـــون فى قـــلبه مكـان ,
الا يـــدوب للحــــب !!

آمال محمود كحيل
21-12-2009, 01:47 PM
دمعة على الصديق والحبيب الشربينى خطاب

يا نن عين شربين
بقلم
أحمد الشربيني


أنا قلت أبكى عليك,
فبكيت على حالى
شفت الكلام فى عنيك
بالشعر أوحالى
قطع الكلام مسافات
وصلنى للحالى
تاه الطريق ياصديق
ياضى ترحالى
يانن عين شربين
الضحكة ملو العين
أنا قلت أبكى عليك..
ضاع منى موالى.
***********
من حرقة الأشواق
بادعى عليك.. يافراق
يامين .. ينسينى؟
وانا بس هانسى إزاى
وانت فى يومى الجاى
ساكن فى تكوينى؟
ليه سبتنى أشلاء
كان نفسى أكون سباق
وانت اللى ترثينى
شربينى ياخطاب,
ياصفوة الأحباب
محتاج ترسينى
لو كنا نبقى اتنين
طب بص ع الإسمين
هاتلاقى شربينى

تغريد سامى
09-04-2010, 03:12 AM
مصر التى فى خاطرى


مصــــر اللتى..
( مصر اللتى..
فى خاطرى ),
ماتبيعش فيَّا وتشترى
وان جيت فى يوم..
وعاتبتها.
ماتجبش ليَّا العسكرى
وان كنت افضفض..
بالكلام.
مايطبَّخوش.. ميت اتهام,
واتحال أوام..
ع الظالم ابن المفترى
مصرالتاريخ
مصر الأمان
صار ابنها من حبها
أكبر مدان
فيها العقول اتكبِّلت,
وجاهلها أكبر عبقرى.
ياام البلاد..
بين العباد,
أصبحت باكره منظرى.
فيك اللصوص ..
حفظوا الطقوس,
وانتى يادوب..
بتأشَّرى.
والمعتدين المجرمين
دخلو رحابك آمنين
تستقبليهم بالقبل
وف وشى ليه بتكشَّرى؟
مين غيــَّـرك؟
مين اللى شوِّه منظرك؟
ولحد امتى هاتصبرى؟
ياهلترى راح تقدرى..
تبقى التى..
فى خاطرى

أحمد الشربينى

تغريد سامى
11-04-2010, 07:50 PM
هــو الســا مى


إحنا الا د نى..
وهو السامى,
يسرق ضوء نا..
كأى حرامى,!
ويبعدنا برغم عددنا..
علشان نفضل محض اسامى
إسمه يلعلع..
علشان / دايما /..
هو الانفع.
لدى اسياده يقول ويسمع,
قامو سمحوله..
يعطى ويمنع,
يعمل قاضى وهو الجانى,
وممكن برضه..
بيبقى محامى؟!
أى مصيبه..
تلاقيه فيها,
أى حقيقه قادريخفيها,
ويأديها بشكل درامى؟!
المأساه ..
يعملها كوميد يا,
والتفاهات..
تقلب تراجيديا!
اصل صا حبنا..
صبح /على غفله /..
(ألبير كامى)!
ركب الموجه..
ويا الهوجه,
بعد ماغير وضع الدفه.
لفه اندارت..
بعدها لفه,
صدق كد ب بتوع الزفه,
هيصه وزيطه,
وزيف اعلامى؟!
اخصى عليكى..
ياعين الحق,
لما ف وقت الزيف..
بتنامى!
قلت اتقدم..
لا جل اتكلم,
شدنى هو وجه قدامى,
علشان / دايما /..
يفضل سامى!!


أحمد الشربينى

تغريد سامى
31-05-2010, 08:07 PM
طلعنى بره دايرتك

من بين بواقى العمر,
وحطام السنين.
- من رقدته -
طل النهار.
يعلن ميلاد الحلم ..
فى مهد الأنين,
من بعد قهر الإنتظار.
بالحزن لما اتشرنقت..
تفاصيل معانى الأمنيات .
ياهلترى .. آن الأوان,
ولا الأوان .. من بدرى فات؟
ليه النهار..
لساه بيشهق بالخجل؟
لساه رهين الانكسار.
ليه الربيع..
فات الرضيع
لحظة وضوح الإختيار
لما الخريف..
وقت اشتياقه للعبير
فارد إيديه,
لساه بيحلم بالخضار.
ياغفلته ..
ياللى ماداق - بالقسوة يوم -
طعم المرار.
هربانه ياحروف الوجع
لما اتخدع.. قلبى العبيط
لساه بيبلع رعشته..
وقت اشتهاء .. حلمه الجنين
مستنى إيه..
بعد اما تاهت سكتك؟
واللى ارتجيت منها .. الحياة
ممكن فى لحظة تموتك
مستنى إيه..
بعد اما بان فصل البيان :
طلعنى بره دايرتك؟

احمد الشربينى

تغريد سامى
04-06-2010, 01:57 AM
هاخاصمه أول امبارح
إهداء ألى أخى وصديقى
الشاعر احمد ناجح
إثر تعرضه لحادث انزلاق
أدى الى وضح ساقه اليسرى فى الجبس
هاخاصمه أول امبارح

وغاب أيام..
وانا م الحيرة متوجس
وجانى شيطان..
فضل يدوى على ودانى
فى صدرى يلح ويوسوس
وقال صاحبك خلاص باعك
ماهوش حاسس بأوجاعك
بلاش قلبك.. يجيب سيرته
ولا بإسمه فى يوم تهمس
شيطان فعلا .. رجيم ملعون
لأن ف قوله.. كان فالح
نسيت إسمى,
عشان إسمه على إسمى
بدل شربينى .. كان ناجح
أصاحبه بكل أشواقى
وهو ف صحبتى جارح
ومن بكره أنا ناوى..
على خصامه,
وليه استنى ييجى بكره؟
هاخصمه .. أول امبارح
ولو خدنى الحنين عنده
هاقولله لأه .. مش رايح
مافيش بيننا كلام تانى
ولا نهزر ولا نألس
خلاص راية الوفاق بيننا
من اللحظادى .. تتنكس
وفجأه لمحته .. أون لاين
لقيت قلبى قفز منى
دا حبى ف قلبى متأسس
ندهت عليه بأشواقى
بعزم الندهة جه يجرى
وقع ع الأرض متكربس
لعنت شيطانى وسنينه
دابحر الحب كان صافى
فى لحظه كان هايتنجس
باسمى عليه ياكبد أمه ..
أتارى ياعينى متجبس
احمد الشربينى

تغريد سامى
26-04-2011, 09:14 PM
ياروعة الاحساس

أنا شفت شكل الفسيخ ,
العقل طار منى
ماتقولش أى طبيخ ,
فى الحال ده يعجبنى
لو حتى قال الطبيب
ممكن دا يتعبنى
راح أقولله بطل بقى
إبعد بقى وسيبنى
دى طحينه ويا البصل
والخس وياهم
وكمان خيار ولمون
إزاى راح انساهم ؟
نايمين على الجورنان
فى الصحبة .. محلاهم .
ياروعة الإحساس ..
فشر الخروف ياناس ؟
دى حكاية عايزه صراع
من غير مانتفاهم
احمد الشربينى

تغريد سامى
10-06-2011, 11:47 PM
وحى المـــعانى


حتى من غير ماتقوليها,
قلبى حاسس بيها اكتر.
نظره دافيه من عيونك..
قد ايه ممكن تعبر؟!
زى دمى مش كفايه,
زى عمرى,يمكن اكتر.
كلمتك مش اى كلمه
بين حروفها المعنى اكبر
من صداها احلى نسمه
من عبيرها العمر عطر,
كلمتك وحى المعانى,
لما بتشاغل..خيالى,
-قبل منها -
معنى تانى,
عمره مايخطر ببالى,
لو الف الكون بحاله,
او سهرت كتير ليالى,
دالحروف السهله,تحلى..
لما بتلامس شفايفك,
حتى وانتى مش معايا,
او اغمض,
بابقى شايفك؟
اى كلمه ياحبيبتى
هاتقوليها,
هاتلاقيها تقول باحبك

احمد الشربينى

تغريد سامى
13-06-2011, 11:07 PM
http://up.7cc.com/upfiles/Eye12530.jpg


ألبــوم صــور



من كام سنه , وانت هنا؟

مرتاح فى ألبوم الصور
ماهو كل واحد مننا ..
خادله اتجاه
مين اللى يعرف منتهاه؟
أو يبقى إيه دوره ..
فى مشوار الحياه؟
ياصورة من عمرى الى فات,
إنعم لوحدك .. فى حوارى الذكريات.
وسايبنى أكمل رحلتك
عاجبانى والله .. قًصتك.
على بالك ايه ؟
الله ياسيدى يبسطك .
الشعرلابيض .. يا أنا
مابقاش يليق على بصتك ..
شوف كنت إيه , وصبحت إيه؟
من ليا غيرك أشكى ليه؟
واحنا ف حياة ..
مليانه بصنوف العبر.
فيها الطريق مزروع ..
بشتلات الحفر.
فيها الصديق مابقاش صديق
ونسينا .. مفهوم البشر
واللى انت قاصده .. يوهبك,
طوق النجاه,
بقى هو مصدر للخطر
وعشان كده .. فى الوقت ده
محتاج لألبوم الصور


أحمد الشربينى
السبت
11 يونيه .. 11 مساء

تغريد سامى
08-07-2011, 11:13 PM
بـــــــــراح

فاتح بيبان القلب براح
فارد بساط الود مشاع

وكان حصاد الودجراح

والسهم صابنى من الاتباع
تمتمتجرحى بسر دفين
مش راح يطيب,

لوسرى اتذاع .احمدالشربينى

سعدالشرقاوى
10-03-2013, 01:58 AM
وتبقى كلماتكم
عنوانا للابداع
استاذنا الشربينى
عليكم رحمة من ربى