مشاهدة النسخة كاملة : ديوان الشاعر /أسامة علي (محب )


جابر المصري
23-12-2005, 09:57 PM
رحلتي لأرض مكة
كلمات : أسامة علي


أحلى رحله في دنيتي
خدتني ليها خطوتي
ما كَنِتْشِي في بلد السهارا
اللي ياما أتقال عليها
في وصفها
الناس حيارا
الريفيرا
قالوا فيها تشوف جَمَالْ
ملوش مثال
جنه إيه ولا في الخيال
والدنيا فتحالك إيديها
تطُبْ فيها
تشوف صبايا
بنات عرايا
تسِحْرْك
وزايده بردو في الدلال
والخمر يلعب بالعقول
والناس سكارا
ولا حتى في جزر الهواي
فيها جنة من الزهور
وآلاف قصور
لفه حواليها البحور
وطُرُقَها يحضنها الشجر
بساتين كتير
لما تسكنها تحس
إنك أمير
أحلى رحله وأحلى سِكَه
في عمري كانت
يوم زيارتي لأرض مَكْه
مهبط الوحي الأمين
قبلة صلاة المسلمين
بلد نبينا المصطفى
خاتم جميع الأنبياء
والمرسلين
لما شوق القلب زاد

وصار غرام
مشتاق يزور
بعُمْرَه للبيت الحرام
جوا مني
شئ شددني
واخدني ليه
محتاج إليه
زي الرضيع
لما يجوع
محتاج يضمو
صدر أُمو
بالرغم إن رحلتي
كانت ما بين كثبان رمال
طريقي كان
مابين سلاسل م الجبال
أحجار.... صخور
محتاجه مني أكون صبور
تنزل في وادي
وبعدها تطلع تلال
ولا فيه شجر
ما تشوف عنيك غير الْجِمَالْ
بس حاسس بالسعاده
رحلتي رحلة عباده
رحلتي المشي فيها لُه ثواب
كل خطوه فيها ببعد
عن جُهَنْم والعذاب
يوم لا تلقى حد جنبك
وأنت شايل كل ذنبك
يوم تلاقي الطفل شاب
واللي جَبْنِي
ليك يا ربي
هو حبي
وجاي ألَبٍي
وطول طريقي للحَرَمْ
نازله طوفان
دموع ندم
في رحمتك طمعان يارب
أغفرلي ضعفي وكل ذنب
طمعان في جودك والكرم
ياذا النعم
والكلام كان بالدموع
والقلب خاشع للي خلَقُه
وله ضريع
ملايين بشر
بميت لسان
من كل جنس وكل لون
لابسين بياض
بتطوف وتسعى..
طالبين رضاه ورحمتو
والرحمه واسعه
والقلوب متوجهه لرب العباد
دعاءها بيهز الجماد
يدعي لغفارالذنوب
أنا جاي لبيتك لجل أتوب
طالب القبول
حتى الحجر
الكل يغشاه الخشوع
إرمي هَمْكْ
تلقى رب كبير يضُمَكْ
ما في زيو في الوجود
حبو ليك ملوش حدود
أكتر.. كتير من ابوك وأمك
يا سلام
مهما أقول أو مهما هوصف
مش هيسعف
لو هقول كل الكلام
والصراحه
إني حاسس

جوا قلبي كتير براحه
إني راجع من جديد
مولود سعيد
ولو تشوف في دنيتك
أجمل قصور
أو تشوف من الجَمَالْ
شئ يخللي عقول تدور
هناك في جنة ربنا
من الدهب هتلاقي دور
مليانه حور
لا شوفتها في دنيتك
أو مرة طافت يوم عليك
قدام عنيك
تِحْلَمْ تنول
من غير م تتكلم تطول
أي شئ يخطر ببالك
أو خيالك
أو تفكر فيه عقول
للشايل الشهاده جوا قلبو
واللي صان عينو مَبَصشْ للحرام
واللي صلى ف نص ليل
والناس نيام
للي زكى وحج بيتو
واللي ضحى واللي صام
ويا بن آدم
أوعى تنسى
الدنيا فانيه
مهما هتطول السنين
عشت فيها عمر ميه ( 100)
أو متين ( 200)
هتلاقيها ف لحظة عدت
وقتها يدوب في ثانيه
فيه قيامه يبني آيمه
وأخرتك هيه اللي دايمه
أوعى تنسى إنك هنا
عايش غريب
دنيتك سكة سفر
والفراق منها قريب
خللي زادك مِنْهَا تقوى في القلوب
خللي طاعة ربنا قدام عنيك
تلقى جنة ربنا ويا الحبيب

جابر المصري
23-12-2005, 09:58 PM
إلعب يا أهلي إلعب

كلمات : أسامه علي



إلعب يا أهلي إلعب

ليلتنا فللي

إلعب ورينا فنك

وأتسلطن وأنجلي

رَفَعْتْ راس بلادك

عاليه بإيدين ولادك

ويا جماهير يا حلوة

للصبح صهللي

الكاس الأفريقيه

على ملعب الحربيه

بتقولك أنا ليك

وإنته كمان إِلِي

بالفن والرجوله

أحرزتلنا البطوله

والليله دي أحلا ليله

يا مصر هللي

لعيبه بدم حامي

إياكي ف يوم تنامي

تهجم ولا سونامي

في فرقة التوانسه

عماله بتنخلي

على واحدة ونص فات

متعب وأخوه بركات

وحزموا التوانسه

ورونا أحلا رقصه

ف إيديهم الصاجات

ويا فرقة طبلي

واسامه حسني العجيب

وأبو تريكه الرهيب

دكوا الحصون في ثانية

خلوها حاجه تانيه

وشباك كانت عزارا

لطمت بعد الخساره

إيه يختي بتعملي

يا فرقه إحكي ف بلادك

في الكوره دول سيادك

مش بالخناق بنكسب

بالفن جوه ملعب

ودا نادي القرن طبعا

وإياكي تزعلي

وآهو رجعم بالتلاته

مش كبر ولا شماته

أهداف ولا في الخيال

فن وآخر جمال

في النجم الساحلي

ويا فوكوياما ياما

الأهلي جاي حمامه

ممثل الأفارقه

مصري وآخر أيامه

بالكوره يقول أغاني

يفهمها الأمريكاني

والكوري و اليباني

ومودع بالسلامه

مش للعدد كماله

جاي يلعب للبطوله

قومي يلا أستقبلي

وانا للعبادي هاوي

بشجع الزمالك

ومن يومي زملكاوي

وبقدم التحية

للناس الأهلويه

من مصري وإبن مصري

أسامه بن علي

جابر المصري
30-12-2005, 03:19 PM
النهارده يوم ميلادي
كلمات : أسامة علي
يوم ميلادي !!!

جي وراجع ف الزحام !!

جي تقوللي عمري كام !!!

جاي تقوللي فات سنة

من عمرنا

عَمْال تِقَرًبْ للختام !!!

أيوه عارف

وإنت شايف

شِيبْ بيملا شعر راسي

والخطوط بانت ف وشي

من المآسي

عمري حَافْظُو بالتمام

أيوه عارف

إني بأرْكُضْ للنهاية

عَدًى عمري

من البدايه

زي لحظة

أيوة لحظة

وَمْضْ برق في سمايا

والسنين عدت قوام

لسه فاكر

لما كُنْتْ زمان صُغَيرْ

جوه مِنْيِ

فيه تَمَنٍي

والسؤال جوايا يسأل

إمتى هكبر

النهارده يا زماني

بدي لحظة من زمان

ترجعلي تاني

لحظة بس يدوب مش أكتر

لو هتقدر !!!

ليه بشوف يا يوم ميلادي

ناس كتير بيوم ميلادهم

فرحانين

يِطْفِي شَمْعُو

اللي نَوًرْ لو سنين

ناس تِوَدًعْ

عُمْر عدى

بالأغاني

والتهاني

طَبْل زَمْر مِهَيًصِينْ

وإنت قاعد ليه حزين ؟؟

يعني دول ناس مخدعوين!

ولا دا نوع م الجنون!

قول وفهمني الحكايه ؟؟

حاسس إني

عمري مِنْي

بيتسرق

حاسس إني

زي شمعه بتتحرق

والنهايه

جايه جايه

واللي فات من ذكرياتي

شايفو بس ع الورق

لأقدر أمسح فيها كلمة م الكلام

أو أغير فيها غلطه

فعل خاطئ أو حرام

فوق بقولها بعلو صوتي

فوق تعبت من سكوتي

النهايه صحيح بِتِقْرَبْ

ليه تخاف منها وتهرب

أو ما بين نفسك وبينك

يبقا دايما فيه خصام

عيد ميلادك ده ناقوس

صوت جرس

واللي فات فيه العِبَرْ

وكتير دروس

جي يقولك

مَرْ عام

أوعا يبقا يوم يِمُرْ والسلام

خللي فيه بينك وبين نفسك حساب

فيه عتاب

أو تِسَمْعًهَا الملام

صحح الأخطاء بغيرها من الصواب

أصحى فوق وبلاش نيام

يللا غَيًرْ من عاداتك

في اللي فاتك

خللي كل سنين حياتك

اللي عدت ليك علام

هو دا يا يوم ميلادي

بحق عيدي

يبقا عيدي على الدوام



29 من ديسمبر



كُتِبَتْ يوم الأحد الموافق 6 /12/2005م

جابر المصري
30-12-2005, 03:20 PM
كيد النسا

كلمات : أسامه علي



عايز أفهم يابن آدم

إحنا خاليين م العيوب

والعيوب في بنت حوا

كلها متكدسه

الكلام عنهم زياده

خليناها بينا عاده

واللي فيه قاعدين نعيد

كلو في كيد النسا

طب نقول في حقهم

كلمه حلوه كويسه

هو هَمْ جوه بيت

وللا غيط

وللا شغاله في حكومه

بيقولولها يا ريسه

وللا حَمْلْ تسع شعور

كل يوم جايه وراحه للعياده

في إنتظار يوم الولاده

مين بيتحمل ألمهم ده يا ساده

ماشيه آخر دهوسه

طب ودين الله تعالى

دول غلابه ف أي حاله

وإنت يا سيد الرجال

كل حبه يمين شمال

راح تهدد باليمين

اللي ربك شرعولنا

ف أحلا شرع وأحلا دين

وإحنا مبنشبع قواله

كل لحظة نقول نعيد

واليمين دا عند ربك

شئ بغيض

الخلاصه

إحنا ليه سايقين دلالنا في الرياسه

عايزه تسمع كلمه منك

آه بَحِبْك

عايزه ساعه تكون ف حضنك

شوقها جابها لنبض قلبك

ليه مبتقولهاش ياسيدي

والردود تبقا بغلاسه

حتى لو بتقول يا عيني كلمه حلوه

رد جوزها قوام عليها

بطلي شغل المياصه

جوه بيتها طول نهارها

تخدمك ويا الصغير والكبير

والصراحه مافي راحه

شغلها دايما كتير

حتى ليلها شايفه راحتك

لما بتنام ف السرير

كل دا قدام عيونك

وإنته شايف مش ضرير

ربنا قال ضلع أعوج

وإنته عايز تعدلو

العوج دا كلو رحمه

كان في آخر الضلع أو في أولو

ليه نسينا

لما قالو الخلع دا من حقهم

الرجال هاجت وماجت

فًوَرُولْهُمْ دمهم

م أنت طول عمرك تِطَلًقْ

فيه سبب

أو حتى كان من غير سبب

مافي واحده كات بتنطق منهم

طب قولولي خفتوا ليه

قوللي سمعني يا بيه

اللي خافوا دا نتيجة ظلمهم

اللي كات عندو ذليله

زي بيت الوقف واقفه

خلاص هتخلع منهم

لو تبص لواحده تانيه

تشوف رشاقه أو لياقه

لسه بنت صغيره آخر جراءه

والمحزق والملزق

خلت البنت ف عيونك

ظاهره ليك آخر عياقه

وأنته نازل بسبسه

والمدام أم العيال

م الخَلَفْ قل الجمال

وزنها عدى وزاد

قبل المعاد

وتناديلها يا جاموسه

هيه كانت زيهم بردك غزال

لما كات لسه عروسه

وللا إيه يابن الحلال

طب تصدق يابن آدم باللي خلقك

بنت حوا لما تبعد مرة عنك

أو تسيبك بالمزاج

أو يكون الذنب منك

بعدهم فيه سر قلقك

أنصفوا الستات يا عالم

أوعى يوم تبقالها ظالم

هيه أمي هيه أختي

هيه بنتي ولا زوجتي

هيه فعلا مدرسه

مش تقول كيد النسا


تنويه : هذه القصيدة كانت رد على أخي العزيز د/ حسام في قصيده له بنفس العنوان فله أوجه التحيه

جابر المصري
30-12-2005, 03:21 PM
لو ياخدنا الشوق معاه
كلمات : اسامه علي


لو يخدنا الشوق معاه
حلم وجرينا وراه
مش هنندم
لو هنحلم
بالسعاده ف منتهاه
بيكي هحلم
أيوا هحلم
طول م أنا فيا الحياه
واحضن الحلم الصُغَيرْ
حبه حبه
الحلم يكبر
يبقا بدر كبير منور
نور حقيقتو في سماه
قربي مني وتعالي
تلقي حالك زي حالي
قربي أكتر و أكتر
خللي قلبي ينول مناه
بصي شوفي
ومره طوفي
جوه مني صوت ينادي
من فؤادي
وأسألي قلبك يقولك
راح يدلك
لما بتحسي ف سلامك
رعشه ف كفوف الأيادي
مش طبيعي صوت كلامك
والكلام مني بيهرب
كل أملي ليك أقرب
لجل يتحقق مرادي
بس كان مانعني خوفي
وأما أشوف لحظة كسوفك
كان يزيد وياه كسوفي
جوه مني بقولها آه
داحنا لو بطلنا نحلم
راح يطول الإنتظار
نبقا عايشين وسط نار
واللي بيهون علينا
أن بكره جي لينا
جوه حلم حلمنا بيه
زي بلسم بيداوينا
وإنتي للعاشق دواه
وإنتي حلمي الغالي دايما
واللي بحلم بيه رضاه

جابر المصري
30-12-2005, 03:23 PM
عايز أفْتِلًٍكْ أمل

كلمات : أسامة علي



عايز أفْتِلًكْ أمل

مبروم تخين

عمرو ما يدوب ف الزمن

مهمن تقابلك فيه محن

يفضل معاك طول السنين

تعمل بو مطلع للعلالي

تطلع يا غالي

وتفك أسر المأسورين

جوه سجن الْهَمْ دايما

مسجونين

عايز أفتلك أمل

مبروم تخين

وتشد بيه

عطلان في سكة الحياة

حبل الأمل هو النجاة

للتعبانين والعطلانين

لجل تزرع بسمة حلوه

فوق شفايف محرومين

تبقا غنوة

تسعد القلب الحزين

تبقا إيد ممدوده تمسح

م الخدود دمع العنين

عايز أفتلك أمل

مبروم تخين

تربط حمولك كلها

على بعضها

ولا يوم يلين

وأمشي وأتوكل ع الله

بدون مذلة

وإنسى حبلك ينقطع

حبلك متين

عايز أفتلك أمل

مبروم تخين

صبر على حبة رضا

تبقا ويا الكسبانين

والصابرين

تبقا راضي بالمقدر

واللي قدر حكمو عادل

بين جميع المخلوقين

أصل حبلك دين محمد

أوعى عنو لحظة تبعد

هو حصنك في الحياة

والحصن دين



ملاحظة أفْتِلَكْ (من الفتل أي فتل الحبال لتصبح قويه)

جابر المصري
30-12-2005, 03:25 PM
سايق عليك النبي
كلمات : أسامه علي
سايق عليك النبي
تصلي وتزيدو
رطب لسانك بذكرو
وتقولو وتعيدو
دا خير خلق الله
هبو لتمجيدو
صلى عليه ربنا
وأمر بها عبيدو
و حبيبي ويا الله
وأنا قلبي بيريدو
ورسالتو للإنسان
يهديه لمعبودو
واللي يكون كسبان
يسمع كلام سيدو
ونفسي يوم القيامه
يسقيني من إيدو
واللي م يشفعلوش
إيه ال هيفيدو
لنور هداه وسنتو
يا مسلمين عودوا
كتروا علينا الأعادي
ولدينا بيكيدوا
إيد واحده تحموا العرين
وعن العرين زودوا
تبقا الرياده لنا
وللدنيا هتسودوا

جابر المصري
30-12-2005, 03:28 PM
بيقولو الحب كيميا

كلمات / أسامه علي



بيقولوا الحب كميا

وتفاعل بين قلوب

دي مراية الحب عاميه

من نظره قلوب تدوب

لا أختارنا في يوم حبيب

ولا قلبي كان بإيدي

لما بيجي النصيب

بستسلم لو يا سيدي

وبيمشي غصب عني

زي الدم ف وريدي

معرفشي إيه بيحصل

لما بتشوفو عيني

ولا بعرف أَلِمْ نفسي

لو صوتو جه نداني

تحمر قوام خدودي

وتتلخبط ردودي

وأفضل واقفه ف مكاني

وعيونو بصه فيا

مليانه بحور غرام

وتتوه منهم عيوني

وأغرأ فيهم أوام

وتقول من غير كلام

انا ليكي وإنتي ليا

وحبيبتي ونور عنيه

فجأه تغمض جفوني

وألاقي نفسي دايخه

والدنيا تلف بيا

وأتمنى أوام يجيني

يسكن م بين إيديا

وأدوب عشق ومحبه

ف حلاوة اللحظة ديه

ولا نوم ف الليل بشوفو

ولا أشوف غير بس طيفو

هو اللي تمللي جنبي

وليف عاشق وليفو

وف وشي تبان علامه

الضحكه والأبتسامه

والدنيا تبقا وردي

أنا فيها بس وحدي

طايره زي اليمامه

ولا شوفشي حد تاني

غيرو بس ف مكاني

وأسمع دقاتو قلبي
بيقولو الحب كيميا

كلمات / أسامه علي



بيقولوا الحب كميا

وتفاعل بين قلوب

دي مراية الحب عاميه

من نظره قلوب تدوب

لا أختارنا في يوم حبيب

ولا قلبي كان بإيدي

لما بيجي النصيب

بستسلم لو يا سيدي

وبيمشي غصب عني

زي الدم ف وريدي

معرفشي إيه بيحصل

لما بتشوفو عيني

ولا بعرف أَلِمْ نفسي

لو صوتو جه نداني

تحمر قوام خدودي

وتتلخبط ردودي

وأفضل واقفه ف مكاني

وعيونو بصه فيا

مليانه بحور غرام

وتتوه منهم عيوني

وأغرأ فيهم أوام

وتقول من غير كلام

انا ليكي وإنتي ليا

وحبيبتي ونور عنيه

فجأه تغمض جفوني

وألاقي نفسي دايخه

والدنيا تلف بيا

وأتمنى أوام يجيني

يسكن م بين إيديا

وأدوب عشق ومحبه

ف حلاوة اللحظة ديه

ولا نوم ف الليل بشوفو

ولا أشوف غير بس طيفو

هو اللي تمللي جنبي

وليف عاشق وليفو

وف وشي تبان علامه

الضحكه والأبتسامه

والدنيا تبقا وردي

أنا فيها بس وحدي

طايره زي اليمامه

ولا شوفشي حد تاني

غيرو بس ف مكاني

وأسمع دقاتو قلبي

وشعور غريب عجيب

مهو أصل الحب كيميا

وتفاعل بين قلوب


وشعور غريب عجيب

مهو أصل الحب كيميا

وتفاعل بين قلوب

جابر المصري
30-12-2005, 03:29 PM
العتاب بين الحبايب

كلمات : أسامه علي



لو عاتبتي

في يوم حبيبتي

مش راح أزعل

أو تقلتي

بعيد وغبتي

مش راح أتقل

دا العتاب بين الحبايب

يلا قولي وسمعيني

ريحي القلب اللي دايب

حتى لو قلتي كلام

فيه ملام

برد ينزل وبسلام

كاس محبه وقلبي شارب

وإن عاتبتي

مش هـ عاتب

دا إنتي أغلى الناس يا غاليه

وأغلى من كل القرايب

وأعرفي إنك ف بالي

ليك مقام في القلب عالي

إسم غالي ف قلبي كاتب

واللي بتمناه أنولو

وبدي أقولو

شاري ودك جاي وطالب

تقبليني

راح أشيلك جوه عيني

وراح تكوني

كل كُونِي

يلا قولي وفرحيني

رجعي الحب اللي غايب

وإن عاتبتي

مش راح أزعل

دا العتاب بين الحبايب

جابر المصري
30-12-2005, 03:30 PM
ولاد طــيبه

كلمات : أسامة علي



ويا كسوفي

يادي العيبه

ومتأخر كده دايما

لكني عذري ويايا

عترت ف سكتي بطوبه

وجاتني الدعوة متأخر

ودي غريبه

لاكن مقدر

عليك يابو حمزه وياجابر

أجاوبكم وأقول حاضر

لأغلا الناس على قلبي

ومني كتير قوي قريبه

ومن كل الصحاب دايما

وشخصياتكو محبوبه

وناس في الشعر عجباني

بتمتعني وتشجيني

ولَعِـــــيبَه

وعنوانكم وعنواني

على جبينكم

على جبيني

ولاد طيبه



أخي العزيز جابر أشكرك على دعوتك الكريمه التي وصلتني لأتشرف بمنتداكم الحبيب أنت وأخي أبو حمزة فإليكم أزف التهاني بهذا العمل الجميل فألف مبروك ولكم ولكل أعضاء منتداكم الغالي اقول كل عام وأنتم بخير ورمضان كريم

سماح كمال
25-06-2006, 03:07 PM
وأهون عليك
كلمات : أسامة علي
وأهون عليك!!
تبعديني عن حياتك
عن عنيك
لا مَتْرُوحِيشْ
دا أنا يا حبيبتي
لو ثواني
مرة غبتي
صعب أعيش
يعني بدك من حنانك تحرميني
ولاَّ عايزه دمعه تسكن تاني عيني
ردي جاوبي
طمنيني
متسكوتيش
مين راح أكتب لو كلامي
يحكي عني وعن غرامي
وأنسجو فستان وطرحه
جوه كوشه وناس وفرحه
متبعديش
خليكي جنبي
ف حضن قلبي
عايزه تمشي
وتسبيني الليل م نامشي
لأه تعالي متهربيش
بِدِّي نعشق بعضنا
نِرْوِي بحنانا حبنا
عطشان أنا
غير مَيِّتِكْ ما تِرْوِنِيشْ
يلاَّ نِكَمَِّل حلمنا
دا الحلم بكره يِضُمْنِا
بلاش نخلي الفرحه تهرب مننا
ف قلوبنا حب مينتهيش
والدنيا من غيرك جحيم
مقدرش أطيقها لو ليوم
عايزه تسبيني للعذاب
وللهموم
و مين يواسي وحدتي
وغربتي
في سكتي
غيرك مليش
قلبي اللي كُنْتِي تِسَهَّرِيه و يدُقِّلِكْ
وعيون ليلاتي كل لحظة تِبُصْلِكْ
عشقاك يا أجمل مِنْ مَلَكْ
تسهر لمين؟
إزاي وفين؟
مين يا حبيبتي زعلك؟
متزعليش
مين هَضُمٌّو ليَّا تاني
مين ما بين إيدو مكاني
لأ بلاش أرجوكي تمشي
جرح تاني م تجرحيش
وإن مشيتي
أو طاوعتي وهم جالك
غَيَّرْ الأحوال في حالك
وإن إسيتي
يبقا طير الهجر عشش جوه بيتي
وإسمعيني
يا نور عيوني
بعدك إنتي
يا حبيبتي
حب غيرك... لأ مفيش

02/06/2006م

سماح كمال
25-06-2006, 03:09 PM
تاني راجع
كلمات: اسامة علي

في الطريق
وياكي ببدأ خطوتي
النهارده يا حلم غالي
عاش سنين
عشش في بالي
يوم ميلادي
ويَّا أول خطوة لينا
سكه ياما حلمت بيها
وإنتي جنبي نبتديها
يا حلم عمري و دنيتي
مش هفارقك لحظه عمري
يا كل عمري
مش هخاف لاالوقت يجري
لسه بدري
طول م أنا ماشي معاكي
إمشي متبصيش وراكي
مش هنركع
أو هنخضع
مهما كات القوه طاغيه
يا حبيبتي
مش هفارق سكتي
متخافيشي من الصحاري
م الوحوش
حتى لو كان وحش ضاري
متخافيشي من الغيوم
لو جيوش
بكره تمشي
وف سمانا تبان نجوم
تصفا يوم
تاني يرجع لك نهاري
لسه فاكر
كان هنا أرضي وداري
كل حته فيها تشهد
والشوارع والحواري
لما كُنت زمان صُغَيَّرْ
كات جناين
والطرق وسط المداين
خَرَّجُونِي غصب عني
شيدوها بالحصون
دمروا غيط الزتون
والدمار في كل دار
ورغم سني
رحت حالف يومها إني
تاني راجع
هَجَّرُوني لِغُرْبِتي
شايفه أرضي بصه ليَّا بتناديلي
غَرَّقُوهَا في الضلام
صوتها سامعو بتشتكيلي
مَدَّه إيدها
خُدْ بإيدي
شِدِّنِي من بحر ليلي
مِدْ حَبْلَك
مشتقالك
بِدْ أقابلك
رَجَّعُولِي بَسْمِتِي
بينا يلَّا يا حبيبتي
يا سفينتي
عهد نبدأ بيه حياتنا
عهد يرجع
كل شئ في الدنيا فاتنا
إحضني إيدي بإيديكي
خللي نبضي يدق فيكي
بدي منك ألف عَيِّل
لأه أكتر
لجل غربتنا ما تِطْوَّلْ
لجل بينا الأرض تِعْمَرْ
وإنتي أرضي
وإنتي عرضي
هزرعك ورد وريحان
هبدرك أمن وأمان
حتى لو جفت سمانا
راح تِمَطَّرْ من جِبِينِي
وإن عيون المَيَّه نشفت
راح أصَفِّي فيها عيني
راح أخَضَّرْ تاني أرضك
بكره يرجع لينا وردك
بكره نملاها جناين
بيكي وإبني
فيها نِبنِي
بيتنا ونْعَمَّرْ مدينتي
وإنْ صحابي
مرة جولك
يوم قالولك
راح حبيبك
مات شهيد
دا حبيبتي
كل غايتي
أوعي تبكي
أو تسيبي لحد تاري
مش نهايتي
راح يواصل الرساله جيل جديد
بدي منك بعد موتي
إرفعي بالحق صوتك
يبقا صوتي
رَضَّعِي حُبْ الشهاده للوليد
كوني صامده ف شدتي
وإبعتيلي كام رساله
طمنيني ف أخرتي
ملاحظة هامة
هذه القصيدة كتبتها من فكرة مبتكره لسيدة الهدايا وسفيرة البسمة أختي سماح فلها أوجه التحية

سماح كمال
25-06-2006, 03:12 PM
زمن مقلوب
كلمات: أسامة علي

زَمَنَّا يا صاحبي ليه آسي
وحيد واقف
وفين ناسي
وفين أهل الوفا راحوا
و صاحب ليه صَبَحْ ناسي
سقاني المر والعلقم
سقيتو الحلو من كاسي
وضايع بين زمن عدا
مَلانْ بالحب وموده
شايلها ف سطر كُرَّاسِي
وبين بكره اللي جاي جارح
وفارد قلعو ليه وكاسي
لا يعرف فَضْل لإمبارح
ولا مين أشتراه منا
ولامين بالرخيص باعو
وفيه ليه الأسود بتجوع
وتشبع فيه كلاب وضباع
يقولوا زَمَنًّا دي طباعو
وقلبي حزين
ما بين لإتنين
وعايش في زمن مقلوب
ورجلي فين وفين راسي
و حاسس ليه ما بين أهلي
بإني غريب
وصعب أشوف قلوب صافيه
وآلاقي حبيب
ولا قلوب فيها حنيه
ولا بتراعي إحساسي
وكلمة حق فين هيه
يقولها أي فاعل خير
وفيها براءة النيه
عجيب والله
يا بكره عجيب
بقا الظالم في شرعك ليه
ملك غابه
وبالباطل بيتكلم
يقولوا وراه
ياسيدي الله
وماشي بزفة وعصابه
ولَوُّ حد أعترض م الظُلمْ
تلاقي كلابوا وديابه
بدون إحساس
بتنهش عضمو مع لحمو
يكون عبره لكل الناس
ويا دنيا أخدعي غيري
غَرُورَه إنتي وكدابه
أنا بالحق هتحصن
ونور الحق نبراسي
وزادي ف دنيتي تقوى
وتوب التقوى دا لباسي
ومهما تعبت فيك هصبر
ومش هكفر
وساعة الصبر بتواسي
ومهما الحظ كان مايل
منيش عايز نعيم زايل
وهَاكُلْ لُقْمِتِي بفاسي
وهزرع زرعتي بإيدي
وأشد ف أرضي محراثي
وهروي الأرض من عرقي
لآخر يوم في أنفاسي
لأن زمنا يا صاحبي
صَبَحْ آسي
16/03/2006م[/align]

سماح كمال
25-06-2006, 03:22 PM
آه يا قلبك
كلمات : أسامة علي



آه يا قلبك
بتقوليها كمان أهون
تنسي حبك
مهما تغلبك الظنون
مش مصدق
دي حبيبتي !!!
اللي دايما شاغله بالي
دي حبيبتي !!!
اللي كات جوايا ساكنه
برج عالي
دي حبيبتي !!!
اللي مهما غبت عنها
كات بتسهرلي الليالي
لأ مش إنتي
حد تاني
عمرك إنتي ف يوم ما هونتي
ولاَّ حد خد مكاني !!!
ياما قلت كتير بحبك
أيوه أنا مليون بحبك
وإنتظرت ليالي منك
ييجي ردك
إنتظرت تقولي كلمه
بيها كنتي تطمنيني
حتى كان يكفيني بسمه
ليه تضني يا نن عيني
كنت بنتظرك تحني
ياما كنت أشكيك لنفسي
القا نفسي معاكي ضدي
كنت ببني برج حبك
وإنتي بعنادك تِهِدِّي
وإما أقولك كلمه حلوه
أو أقَرَّبْ ليه تِصُدِّي
منتي عارفه
إنتي إيه بالنسبه ليَّا
إنتي روحي
إنتي بوحي
إنتي يومي
إنتي أمسي
إنتي فرحي
وإنتي همسي
ليه بتنسي يا نور عنيه
حتى وإنتي بعيد بشوفك
جوه مني
مش سايبني ف لحظة طيفك
والمحبه هيه هيه
والغريب
شئ عجيب
بردو مش عايزاني أَغِيرْ
لأ كتير
لما أشوف غيري معاكي
واللي شاغلو كمان هواكي
عقلي من راسي يطير
وتجبيلي كمان جنون
و تقوليها
آه تهون !!!07/06/2006م

سماح كمال
25-06-2006, 03:25 PM
بالقلب أنا رسمك
كلمات : أسامة علي



وهو أنا نسيتك
ولاَّ أقدر أنساكي
وإذا كنتي عايشه بعيد
أنا كلِّي وياكي
ولو ف آخر الكون
قلبي ف هواك مجنون
دايب أنا فيكي
روحي وروحك سوى
جمع م بينهم هوى
من غير معاد إلتقينا
والقلب صار ليكي
ولو تغيبي سنين
طيفك في نن العين
و العين بتهواكي
جايز يطول البعد
وجايز كمان لأه
لكن هعيش على وعد
أتلاقا يوم بيكي
ساعتها هنسى آلام
طالت سنين وأيام
وبنفسي أفديكي
ومهما يئسا الزمن
هدفع بصبري التمن
علشان أنول الرضا
لو ساعة وأرضيكي
يكفيني قبل النوم
بنسى هموم اليوم
لما بشوف صورتك
بالقلب أنا رسمك
موناليزا في الألبوم
وتجيني يا ملاكي
تاخديني من دنيتي
وأطير أنا معاكي
لِلْجَنَّة ولْفَرْحِتِي
وإيديا حضناكي
كاتبك أنا غنوة
دايما بغنيها
دا الدنيا بيك حلوه
عايش أنا فيها
وعْنَيَّا ف عنيكي
ورساله من قلبي
بيحسها قلبك
بيقولها صوت النبض
القلب بيحبك
وسعادتو ف إيديكي

سماح كمال
25-06-2006, 03:28 PM
الحلم تاه
كلمات : أسامة علي

آهين يا دنيا وألف آه
على حلم تاه
في سكتو
وف دنيتو
ولا لوش مكان وسط الحياه
ماشي وحيد
شاف الأمل جي من بعيد
وبيبتسم
الفرحه على حلمي لقيتها بتترسم
وحضنت إيدو وخدتها
ومشيت معاه
الحلم فارد خطوتو
م أقدرش أخالف كلمتو
ويجُرِّنِي ويقول خلاص
هصبح ياناس
أنا والأمل
هنعيش سوى
ساعات وتكمل فرحتي
وأخلص معاه من وحدتي
كان الأمل بدر ف سماه
فجأة أختفا
بعد الصفا
والخطوة رجعت من جديد
متكتفه
والبرد بان في رعشتو
معذور يا حلمي في لهفتك
كان يوم بيحلم بالدفا
معذور وطالت سكتك
سكة عذاب
وهم وسراب
وف براءة مشيت وراه
الحلم مِنِّي بيتسرق
عايز يسيبني ويفترق
طعم المرار
في الحلق مُرْ
ولافيش بديل للإنتحار
ناديت عليه
ليه تنتحر
دا كان قدر
وأنا راضي بيك
حلمي الوحيد
ونعيش حياتنا من جديد
لو جوه حلم
ولا تاني راح أطاوع هواه
وآهين يا دنيا وألف آه
ملحوظة هذه القصيده كانت ردا على قصيدة الأستاذ أحمد الشربيني الحلم اليتيم فله أوجه التحية

سماح كمال
25-06-2006, 03:46 PM
ياسي الجنيه فيه إيه
كلمات : أسامة علي



ياسي الجنيه فيه إيه
متقوللِّي إيه مالك
لا بقيت بتِمْلا الجيب
ولا كانشي دا حالك
لونك بقا مخطوف
أو ده خجل وكسوف
وكِتْرُوا عُزَّالك
فاكر زمان الشِلِنْ
والنِكْلَه والمليم
وبريزه تملا العين
والقرش صاغ بإتنين
تعريفه م المخروم
تِكَفِّي أتْخَنْ جَدَعْ
وتْشَبَّعْ المحروم
حتى كمان مظهرك
بين البشر معلوم
قيمة بعرض وطول
وكريم وإبن أصول
ولا حد في مثالك
ولا كان يهمك دولار
درهم ..ريال ودينار
ولا عُمْلَه على بالك
ومغرق الجيران
دايما بأفضالك
كنت إبن أصل وعز
تتغدى يوم بالبط
وعشاك كمان كان وز
وتقيل قوي و راسي
والوسط ما بيتهز
أما النهارده ليه
بيقولوا فيك يا جنيه
ملكش لازمه وطُظْ
فيه إيه بيجرالك
بقيت خواجه ليه
وقلعت ليه شالك
ولا حتى صاحب أمين
وياك في ترحالك
سبوك ف ليلة شتا
مكشوف بدون الغطا
والبرد يدخل فيك
لابِدْ في أوصالك
هيجيك منين الدفا
قُطْنَكْ خلاص أختفا
ولا هِدْمَه باقيه عليك
ولا حتى سروالك
دُرَه وسكر كمان
والقمح من بره
ودَهَبْنَا فين وَدُّوه
وكَسَّرُوا الْجَرَّه
ضَيَّعْتْ راس مالك
خَدُوا الفلوس وفاتوك
غرقان في أوحالك
ولا بَرْضُو نافع فيك
غازك وبترولك
وبغني ليك ظلموك
وأنعيك في موالك
إمتى يروق الحال
والجو يصفالك
معدشي باقي لنا
غير بس ندعيلك
الفَكَّه تِكْتَرْ فيك
وتربي في عيالك
ياسي الجنيه فيه إيه
متقوللي إيه مالك
02/04/2006م

سماح كمال
25-06-2006, 03:50 PM
أعود إليكم بهذه القصيده من الشعر الحلمنتيشي عمل قصدت به الترويح وإضفاء البسمة على وجه القارئ ليجد في الشعر أيضا ما يجعله يبتسم وخاصة أنني لا أرى مثل هذه الأعمال كثيرا



(أنا ال كنت فاكر نفسي عنتره )

كلمات: أسامة علي

مَرَّتْ صَبَِّيةُ مِنْ أَمَامِي سَائِرَهْ

بالبَرْفَانَاتِ وبالكولونيا مُعَطَّرَهْ

لا بِالْنَحِيفَةِ قَدْ تُصَوِرُ قَدَّهَا

ولا السَمِينَةُ في الْقَوَامِ مُبَعْجَرَه

طَويلَةِ مَمْشُوقَةِ كَغَزَالَةِ

في بَنْطَلُونِ الجينز كَانَتْ سَاحِرَه

فيها الإثارة والتحدي باديا

تطغى عليها أنوثة متفجره

والْشَعْرُ غَجَرِيُّ طَوِيلٌّ نَاعِمٌّ

وبِمِشْيَةِ الثعبان كانت مَاهِرَه

وكأن زِلْزَالٌ بأرضٍ تَحْتَهَا

تهتزٌ فيها مقدمة ومؤخره

تبدو الطراوة والحلاة منها

الجسم ملبن و الجمال سكره

وبِخُطْوَةٍّ مَجْنُونَةِ تَمْشِي بِهَا

وجِسْمُهَا م الخَلْفِ يَرْسُمُ دائره

بالبشرة البيضاء تبدو كالقمر

ولها عيون ساحراتٍ أخْضَرَه

أقسم بأنها لو مشت في ظُلْمةٍ

هتلاقي كل حتة فيها مِنَّوَرَة

قُلتُ يالَهْوِي ع الجمال المُحْتَرَمْ

فوجدت عَينَيهَا إليَّ نَاظِرة

فتبسمت ونغزتين بخدها

وجمالها في أحلا صوره مصوره

وأحترت من أين الكلام لوصفها

دا شئ لا شوفتو في كتاب ولا أنقرا

ناديت عليها يا جميل نمشي سوى

أفسحك وأكلك كوزين دٌرَه

فسمعت ضحكتها اللعوب تهزني

نزلت علي بالكلام نقوره

دره يبني إيه ال إنت جَيِّ تقول عليه

حرام عليك تعبت ليه الحنجره

لا يا غبي أريد موز م الأجنبي

وآكل حمام من الصنوف الفاخره

فرجعت من وراءها مترنح

وخيالها يحتل كل الذاكره

وطوال ليلي لم أنم من طيفها

متذكرا تلك الفتاة الآسره

وحلمت حلما ضمني في حضنها

وكأنها موجات حب هادره

قلت لنفسي أنها من قسمتي

وخليلتي وبالنصيب مقدره

وقصدت عمي كي نزور أهلها

بزيارة لبيتها في القاهره

وطلبتها وقلت إني قادم

وأسرتي لك في الطريق زائره

فقابلتنا في صالون بيتها

خرجت إلينا في ثياب سافره

ووجدت عمي لا تفارق عينه

عنها وعن تلك الكنوز النادره

متأملا جمالها وقوامها

من فوق لتحت بالعيون الماكره

فسألته هل أعجبتك عروستي ؟؟

فأتاني رَدٌّ ..كيف تخطب فاجره!!

دع عنك هَذِي البنت لا تصلح لك

خذ بنت عمك بالثياب الساتره

ليس المهم جمالها وشكلها

مؤدبه وطيبه ومن جذور طاهره

وذات يوم قابلتني في الطريق

وأخبرتني أنها لي شاكره

لهديتي التي لها أهديتها

هذا العريس ..وإني لست ناكره

وسنلتقي وأرد لك هذا الجميل

بس إنته إبقا إديني رنة صغيره

آخرتها يا عمي العزيز تَغُشٌّنِي

خَدَعْتَنِي وعَمَلْتَنِي لك قنطره

وظننت أنك لي معين وسند

فطعنتي بالظهر طعنه غادره

إشرب بقا ياعم من كأس الهوى

ودوق حلاوتو وآخرتو في المرمره

وحذاري أن تأتيني يوما باكيا

أو شاكيا من العروس الثائره

آل ويقولولي ويعيدولي أعقل يا واد

وأنا ال كنت فاكر نفسي عنتره

22/05/2006م

سماح كمال
25-06-2006, 03:58 PM
كفانا إفتراق


كلمات: أسامه علي


حبيبي أتعلم !!!

وما زلت أيضا لقلبي الحبيب

ورغم افتراقي

وشمسك آخذة في الغروب

ورغم التألم

ورغم اتخاذك درب الهروب

ورغم معاناة قلب أحبك

يعيش الحياة بحال كئيب

يسافر شوقي إليك كثيرا

يبحث عنك بكل الدروب

ويسأل عنك بكل الأماكن

يَشُمُ العبير

بقلب كسير

فمازال حبك بالقلب ساكن

يسافر حُلْمي

إليك بنومي

ويدعو لربي ألا يفيق

ليبقى طيفك مني قريب

وتهجرني الروح مني إليك

تنام كعصفورٍ في يديك

وتأتي إليك بحب وطيب

فروحي عليلة

لفقد الخليلة

وأنْتِ دواها وأنْتِ الطبيب

وأسمعها كل يوم تنادي

يشاركها الصوت نبض فؤادي

كفانا اغتراب

وطول العذاب

أسير بدربي وحيدا غريب

كفانا افتراق

فعندي اشتياق لصوت حنون

ورؤية نفسي بتلك العيون

وعندي اشتياق بأن تحتويني

وطال الشتاء

وما عُدْتُ أنتظر هذا المساء

ورجفة برد تغزو كياني

ما زال قلبي منها يعاني

فَكُنْتِ الزفير وكُنْتِ الشهيق

وكُنْتِ الحبيب وكٌنْتِ الصديق

وعندي اشتياق

لضم العناق ودفئٌ جفاني

وحضن الرفيق

فهل تسمعيني

وهل لندائي حبيبي تجيب

سماح كمال
25-06-2006, 04:02 PM
علمني حبك
كلمات : أسامة علي


علمني حبك أن أحيا
مسرور فرحان
أنسى معاناتي وآهاتي
أنسى الأحزان
علمني حبك سيدتي
وأنا بجوارك
الكون أمان
أنطلق سعيدا وأداعب
رمل الشطآن
أسبح في بحرك سيدتي
يحملني موجك بحنان
ويلف زراعك خاصرتي
تأويني بين الأحضان
تعزف أوتارك ألحاني
فأنا في حبك فنان
والصوت الشادي يسمعني
عذب الألحان
علمني حبك سيدتي
لا أشعر أبدا بالوحدة
يصحبني طيفك
في كل مكان
علمني حبك أن زمانك
بحياتي
لا يشبهه زمان
فالبسمة تعلو على وجهي
والحب هو العنوان
علمني حبك
أن بدون الحب
أبدا لا يحيا الإنسان

سماح كمال
30-06-2006, 05:25 PM
مش هرضى
كلمات: أسامة علي


مش هرضى أكونلك ضل وبس
وقت ما قلبك يهواني
بتجيني
وساعات بلاقيك تترجاني
بكلام وبهمس
وساعات بحتاجلك وأناديلك
وتنور ليلي بأناديلك
ما ترد بصوت وقطعت الخنس
وتسيبني لشوقي وحرماني
دايماً أعاني
ولا بسمع حِسْ
وكفايه كاسات من أوهامك
تسقيني الشهد ف أحلامك
لانا بسكر منها ولا بتروي
أبدا عطشان
ولا نسمة حُبَك بِتْطَفِي
نار الحَرَّانْ
عايزه أكون بدر في أيامك
وإنت تكون ضل بيتحس
حسسني بإنك محتاجلي
ولأجلي هتتحدى الدنيا
ولا غيري ف قلبك ناس تانيه
وتاخدني في حضنك وحنانك
محتاجه لحبك وأمانك
مش ساكت هُسْ
عايزاك دايما ساكن جنبي
وأسقيك حبي
وتكون لِيَّا
بالظبط تمام زي النفس
حِسِّنِي حَبَّه
شايلالك فِيََّا شوق ومحبه
طب طل وبُصْ

سماح كمال
23-01-2007, 11:32 PM
طفل صُغَيَّرْ
كلمات : أسامة علي


لما تبُصْ لطفل صُغَيَّرْ
وشُّو بيضحك
لو ستين قلبك موجوع
وعلى الخد بتجري دموع
تلقا الدنيا بضحكو تِنَوَّرْ
وبتمسح دمعك في ثواني
أصل الضحكه ياناس رَبَّانِي
تدخل فيك
وتبان في عنيك
تلقا ف قلبك ضحكه كبيره
تسعد قلبك
بالتسابيح بِتْسَبَّحْ ربك
وعلى لسانك الله أكبر
وف لحظة بيتْغَيَّرْ حالك
ولا على بالك
كل هموم الدنيا بتمشي
وبتصفالك
لحظة ضحكة طفل بريئة
طالعه حقيقه
وعلى ملامحك ضحكتو تِظْهَرْ
وأمَّا بِنِكْبَرْ
ليه جوانا
بِنِوّئِدْ فينا
روح الطفل الساكن فينا
وبنكتمها
غصبن عنها
وبنظهر بملامح قاسيه
تبان في عنينا
وحاجات فينا كتير تِتْغَيَّرْ
ليه بنخاف يظهر من تاني
بين الناس أو ناس شايفاني
ومتظهرشي طفولتي عَلَيَّا
إلاَّ وأنا قاعد وحداني
لكن بين الناس أنا عَنّترْ
ولْبِسْنَا قناع الأتيكيت
وسط طريق
أو ويا صديق
حتى كمان موجود في البيت
وما بين الخلق بِنِتْكَبَّرْ
نِفْسِي أعيش في الدنيا طبيعي
عايز أضحك
إيه يمنعني
وأحبس ضحكتي جوه ضلوعي
عايز أبكي
ليه بالغصب أمنع في دموعي
وف خلوتي أنا ياما بكيت
وأبان ليه بسلوك مِتْزَوَّرْ
إظهر فينا يا طفل وبان
راح تهرب قدامك ياما
كتير أحزان
راح ترجع ايامنا الحلوه
ما بين الصحبة والخللان
يلاَّ يا صحبي
رَجَّعْ تاني طفل زمان
صافي القلب وقلبو بيغفر
خَللِّي الباطن زي الظاهر
ليه بسلوك تاني بتتظاهر
لو مش قادر
أَكْشِفْ زِيفَكْ
إياك تنسى
رَبَّكْ يِقْدَرْ


17/01/2007م

سماح كمال
23-01-2007, 11:34 PM
أنا مصر اللي كل ولادها عاشقنها
كلمات : أسامة علي

أنا الأم اللي فتحه إيديها للضَمَّْه
وبشتاق ليكو يا ولادي وللًمَّْه
أنا حُضْن الدفا ليكو
ومهما تكون اراضيكوا
أراضيكوا
وتفضل أرضي وسمايا
بتسأل عنّكُوا فين هُمَّْا
تعالى جنبي وأحكيلي
وفَضْفَضْ لِيََّا بهمومك
ولو فيه شكوى تشكيلي
تعالى الراحه ف قدومك
تعالى إيِدَيَّا مفتوحه
أنا عَرْفَاك
بعيد عني مبتحسش
في يوم راحه
وإن الخطوه لو حُرََّه
بتعرف هيَّه فين راحه
تعالى وقوللِّي بصراحة
ومين هيقول لغير أُمُُّو
ومين غيري يشيل هَمُُّو
وعايزة إيديكو تِتْجَمًَّعْ
واقول للكون تعالى إسْمَعْ
وشوف بعنيك
ولادي رجعوا من تاني
لأحضاني
مَهُوَّا ابني
وعمرو في يوم ما هيسيبني
وراضع مَيٍَّه مِنْ نيلي
ووقت الشِدَّه بيجيلي
وأنا خيري يكفي شعوب
ولو منهوب
تعالى نِعْدِلْ المقلوب
قوام إرْجََّعْ
مَهُو إنت أصيل وإبن أصيل
وفيك العزة جيل ورا جيل
لا عمرك يوم
بتستسلم ولا تِرْكَعْ
وتبقوا حبايبي إيد واحده
ولا يفرقكوا يوم واحد ولا واحده
لأني أُمُُّكُمْ واحده
أنا مصر اللي كل ولادها عاشقنها
أنا مصر اللِّي محروسه
وجوه النن شايلنها
أنا الماضي
وسيرتي تاج على الْهَامَه
لأولادي
أنا الحاضر
وبيكوا تعود لِي أمجادي
أنا المستقبل الْبَاهِرْ
لأحفادي
وإسمي إسم مش عادي
بيتردد في كل مكان
و في القرآن
شرف لِيََّا بذكر إسمي
من الرحمن
ما انا الأم اللي رافعه راية الأمه
وأنا الأم اللي فتحه إيديها لِلْضَمْه

سماح كمال
23-01-2007, 11:36 PM
أغلا رحله لأرض مكة
كلمات : محب
أحلى رحله في دنيتي
خدتني ليها خطوتي
ما كَنِتْشِي في بلد السهارا
اللي ياما أتقال عليها
في وصفها
الناس حيارا
الريفيرا
قالوا فيها تشوف جَمَالْ
ملوش مثال
جنه إيه ولا في الخيال
والدنيا فتحالك إيديها
تطُبْ فيها
تشوف صبايا
بنات عرايا
تسِحْرْك
وزايده بردو في الدلال
والخمر يلعب بالعقول
والناس سكارا
ولا حتى في جزر الهواي
فيها جنة من الزهور
وآلاف قصور
لفه حواليها البحور
وطُرُقَها يحضنها الشجر
بساتين كتير
لما تسكنها تحس
إنك أمير
أحلى رحله
وأحلى سِكَه
في عمري كانت
يوم زيارتي
لأرض مَكْه
مهبط الوحي الأمين
قبلة صلاة المسلمين
بلد نبينا المصطفى
خاتم جميع الأنبياء
والمرسلين
لما شوق القلب زاد
وصار غرام
مشتاق يزور
ويحج للبيت الحرام
جوا مني
شئ شددني
واخدني ليه
محتاج إليه
زي الرضيع
لما يجوع
محتاج يِضُمُّو
صدر أُمُّو
بالرغم إن رحلتي
كانت ما بين كثبان رمال
طريقي كان
مابين سلاسل م الجبال
أحجار.... صخور
محتاجه مني
أكون صبور
تنزل في وادي
وبعدها تطلع تلال
ولا فيه شجر
ما تشوف عنيك
غير الْجِمَالْ
بس حاسس بالسعاده
رحلتي رحلة عباده
رحلتي المشي فيها
لُه ثواب
كل خطوه فيها ببعد
عن جُهَنْم والعذاب
يوم لا تلقى حد جنبك
وأنت شايل كل ذنبك
يوم تلاقي الطفل شاب
واللي جَبْنِي
ليك يا ربي
هو حبي
وجاي ألَبٍي
وطول طريقي للحَرَمْ
نازله طوفان
دموع ندم
في رحمتك طمعان يارب
أغفرلي ضعفي وكل ذنب
طمعان في جودك والكرم
ياذا النعم
والكلام كان بالدموع
والقلب خاشع للي خلَقُه
وله ضريع
ملايين بشر
بميت لسان
من كل جنس وكل لون
لابسين بياض
بتطوف وتسعى..
طالبين رضاه ورحمتو
والرحمه واسعه
والقلوب متوجهه لرب العباد
دعاءها بيهز الجماد
يدعي لغفار الذنوب
أنا جاي لبيتك لجل أتوب
طالب القبول
حتى الحجر
الكل يغشاه الخشوع
إرمي هَمْكْ
تلقى رب كبير يضُمََّكْ
ما في زيُّو في الوجود
حبو ليك ملوش حدود
أكتر.. كتير
من ابوك وأمك
يا سلام
مهما أقول
أو مهما هوصف
مش هيسعف
لو هقول كل الكلام
والصراحه
إني حاسس
جوا قلبي
كتير براحه
إني راجع من جديد
مولود سعيد
ولو تشوف في دنيتك
أجمل قصور
أو تشوف من الجَمَالْ
شئ يخللي عقول تدور
هناك في جنة ربنا
من الدهب هتلاقي دور
مليانه حور
لا شوفتها في دنيتك
أو مرة طافت يوم عليك
قدام عنيك
تِحْلَمْ تنول
من غير م تتكلم تطول
أي شئ يخطر ببالك
أو خيالك
أو تفكر فيه عقول
للشايل الشهاده جوا قلبو
واللي صان عينو مَبَصِّشْ للحرام
واللي صلى ف نص ليل
والناس نيام
للي زكى وحج بيتو
واللي ضحى واللي صام
ويا بن آدم
أوعى تنسى
الدنيا فانيه
مهما هتطول السنين
عشت فيها عمر ميه ( 100 )
أو متين ( 200)
كأنها مرت عليك
يدوب في ثانيه
فيه قيامه يبني آيمه
وأخرتك هِيَّه اللي دايمه
أوعى تنسى إنك هنا
عايش غريب
دنيتك سكة سفر
والفراق منها قريب
خللي زادك مِنْهَا تقوى في القلوب
خللي طاعة ربنا قدام عنيك
تلقى جنة ربنا ويا الحبيب

سماح كمال
23-01-2007, 11:37 PM
أنا مصري فلسطيني
كلمات : أسامة علي


أنا مصري فلسطيني
أنا عراقي ولبناني
أنا إبن البصرة والأنْبَار
وبعقوبه ..وفي تكريت
على المحتل شعلة نار
وفي بغداد تلاقيني
أنا ف صَيّدَا وفي بيروت
بقاوم أعْتَى قوة ظلم
بواجه كل لحظة الموت
أنا وإنته
عصب واحد
نسب واحد
وتحمل نفس تكويني
ودَمَّكْ يجري ف عروقي
و إخواتي وإخواني
عروبتنا مظلتنا
وإسلامك كمان ديني
ولا نْفَرَّقْ
ودا مبدأ
على الْمِلَّه
ما بين مسلم ونصراني
أنا إبن المسجد الأقصى
أنا ف حيفا
وفي يافا
بلاد العُرْبْ أوطاني
وف الْضَفَّه وفي غَزَّة
ديار الفخر والْعِزَّة
ميدان المجد ميداني
ودمي ساح على أَرْضِكْ
عشان وَرْدِكْ
يِزَهَّرْ تاني يا فلسطين
ودَمِّي يهون
عشان قُدْسِكْ
ليوم عرسك
يا أول قبلة للأمة
تعودي تاني لعريني
وراجعه راجعه يا بلادي
هيكبر فيكي أولادي
ومش ناسيين
ومهما الغُرْبَة هَتْطَوِّلْ
هتفضلي جوه في عيوني
هشيلك حلم ويايا
وطينك ريحتو جوايا
ولو طالت سنين وسنين
ودي التركة لأولادنا
لأحفادنا
مفيش غيرها نورثها
لجيل ورا جيل
وهَنْكَمِّلْ
ومهما نضحي ونعاني
هنرجع ليكي من تاني
وأنا مصري فلسطيني


كل عام وكل الأمة العربية والإسلامية بألف خير
وأدعو الله تعالى أن يأتي عيدنا القادم ونحن أفرادا
وأمة أفضل حالا من ذي قبل
تقبل الله تعالى من الحجيج حجهم
وأعادهم سالمين غانمين إلى ديارهم
وكل عام وأنتم بخير

سماح كمال
23-01-2007, 11:39 PM
آه يا بحر
كلمات : أسامة علي



جئت إلى الشاطئ يا بحر
أجلس بجوارك ساعات
ويطول جلوسي
يأخذني الوقت إلى الفجر
شاكية باكية لك
ساكبة فيك الدمعات
أسكب دمعاتي على حالٍ
أبكاني وأعياني العُمْر
لا تخشى أبدا من دمعي
فدموعي مثل مياهك
مالحة أيضا
أخبرني يا بحر
هل كل مياهك تلك دموع
سكبتها على مَرٍ الدهر جموع
من بشر مثلي
آه يا بحر
قد كنت أظن أنا وحدي
من تأت إليك
تجلس بين يديك
فالدنيا لا ترحم أحدا
شيخا أو ولدا
تسقيه المُرْ
فالدنيا كَبَدٌ وشقاء
وبلاءٌ يتلوه بلاء
وسعادتها دوما منقوصة
لا يخفى على أحد هذا الأمر
جئتك يا بحر
لأبثك أشجاني
لتخفف عني أحزاني
لا أحد يسمعني غيرك
فالكل تغير
إنسان زماني
تأخذه العزة بالأثم
فطغى وتَكَبْر
وكبير زماني يا بحر
يدوس على من دونه
بلا رحمة وبكل تَجَبُر
وكثيرا ما ينسى
أن هناك من هو أكبر
ويسير إليه طواعية
أو بالإكراه سيلقاه
وسيسكن في الأرض ويُقْبَرْ
فسنين العمر إذا قِيسَتْ
تُصبح لحظات
كوميض البرق الخاطف
من عمر الدنيا
أو حتى أصغر
كم زالت أمم من قبله
وابتلعت أرضك ومياهك
من يملك أكثر
وأسال فرعون وهامان
واسأل قارون
يتمثل فيهم جبروت الإنسان
وسيلحقهم
من سار على درب الطغيان
قََصَصٌ يُرْوَى في كل زمان
فلماذا لا يتعلم
أو يتفكر
مغرور جاهل
ويظن بِعَقل يٌشْقِيه
بالقوة يقدر
آه يا بحر
كم إني أتمنى
أن تبتلع طغاة العصر
كما رأيتك بالأمس
تبتلع الشمس
وتسربلها في ثوب النور
لتخبئها في القاع المسحور
ويظل الموج يُزَمْجِر
آه يا بحر
فهمومي لا يستوعبها أحد غيرك
دفنت في الصدر
تخرج زَفَرَاتْ
صرخات الكبت
ليس لها صوت
فأذان العالم قد صُمَتْ
إلا أنْت
وبراكين الغضب الثائر تحرقني
وسيوف الظلم
تسكن جسدي وتمزقني
قد نفذ الصبر
آه يا بحر
لو أعرف أنك لا تسمعني
أو تفهمني
ما كنت أتيت
لو أعرف أنك ستبوح بسري
ما كنت حكيت
لو أعرف أنك ستمل وجودي
ما كنت دنوت
فلتغمرني بماءك
كي تبرد ناري
ولتحفظ عندك أسراي
وسأعزف لحني
على قيثاري
فاللحن حزين
يبكيك ويبكيني
أحكي لك عن أخباري
والبحر أمين
فأنا أخشى أن يُفْشَى سِرْي
بسلاح الغدر
وأظل أرددها دوما
آه يا بحر

سماح كمال
23-01-2007, 11:40 PM
مِشْ بَحِبَّكْ !!!
كلمات : أسامة علي
مِشْ بَحِبَّكْ !!!
وبساطه بتقوليها
طَبْ دُمُوعِكْ نازله ليه؟
حَطَّه وشِّكْ بين إيديك
ليه يا روحي بتداريه؟
إنفعال لحظة غَضَبْ
من غير سبب
حُكْم باطل
كل شئ مقدور عليه
إلاَّ بُعْدِكْ
إلاَّ حُبِّكْ
لَوُّ يروح يِفْضَللِّي إيه
حُبِّي ليكي
زي كل شئ بِيمْرَضْ
ليه نسيبو يموت قصادنا
وبْعِنَادْنَا
مين دا غيرنا هيداويه
مش راح أزعل
أو راح أغضب بردو منك
لو تقولي ألف مرة
مش بحبك
مش هَصَدَّقْ
إنها من قلب قلبك
دي مجرد كلمة بس من لسانك
حتى قلبي
اللي عمرو ف يوم م خانك
مش بيسمع غير لنبضك
وإسأليه
أيوة قابل بيك ياروحي
مهما هتزيدي جروحي
تِبْقِي خِصْمِي والْحَكَمْ
بردو عادي
وإنْ حَكَمْتِي
وإن ظلمتي
قلبي راضي
م انتي عارفه
المشاعر عندي جارفه
لو بنارك تحرقيني
هتلاقيني
شمع دايب
فيكي يا أغلا الحبايب
يلِّلي نارك جنتي
وإن غِلِطْت
سامحي إنتي
مش حكايه
حتى لو في يوم غلطتي
راح أسامحك
ليه نخليها النهايه
مش حبيبك
وإنتي بردو كمان حبيبتي
ليه نسيتي حُبْ بِينَّا
كنت منك لما أَقَرَّبْ
نِنْ عينك كان يِغَرَّبْ
والكلام مِنِّي ومِنِّكْ
كان بيهرب
وإنتي تخديني ف حنانك
أيوه حَسِّكْ محتجاني
حضن دافي
تِهْرَبِي م الْقَسْوَة ِليَّا
ولحناني
والليالي الحلوه بِينَّا
لِسَّه جَايَه
واَمَّا هَتْبُصِّي ف عيوني
مهما كان بينك وبيني
راح تقولي بردو تاني
مش بحبك .. مش بحبك
وبإيديكي تضربيني
وإنتي نايمه فوق كِتَافِي
يا قلب صافي
بس من قلبك يا روحي
بتنصفيني
دا ال بِينَّا
ألف جِسْر من المحبه
لو وقِعْ جسرين تَلاتَه
وللاَّ أكتر
مش قََضِّيَه
أو نهاية الدنيا دِيَّا
خَلِّلي قَلْبِكْ بردو يغفر
نِبْنِي غيرهم
أو يزيد
حبك إنتي
دم ماشي في الوريد
عمرو يوم م بِيسْتَخَبَّه
يلَّلا عودي
وإرجعيلي
ضَوِّي أنوارك في ليلي
يلِّلي من غيرك حياتي
تبقا ضلمه
وف نهارها زي ليلها
راح أحس بإن نُورها
بردو عتمة
يَلَّلا إيدي مَفْتُوحَالِكْ
ليلي مُشْتَاقْ نور هلالك
مِدِّي وإِجْرِي
أفردي إيديكي وتعالي
وأحضنيني
أسْكُنِيني
جوه مني
بين إيدَيَّا
يا نور عِنَيَّا
ونن عيني
دا ال حَبِّكْ مش ناسيكي
طِيرْ وسَابِحْ في هواكي
كُلْ همُُّّو يكون بِقُرْبِكْ
يبقا جنبك
مش هصدق مره تاني
لو غِلِطِّتِي
في يوم وقُلْتِي
مش بَحِبَّكْ

سماح كمال
23-01-2007, 11:42 PM
الوطن مش ارض بس بتتسكن
كلمات: اسامه علي

لما كنت زمان صُغَيَّرْ
لسه طفل بقلب أخضر
قبل شَعْرِي يشيب وأكبر
لسه كان إحساس وليد
وإحنا في فصول الدراسه
كنت أحس بالوطن
بس ف نشيد
كان مدرس الرياضه
كل يوم الصبح عاده
كلنا ف نَفَسْ شديد
نقول تحية العلم
لمصرنا أم الأمم
وكْبِرتْ والأحساس كِبِرْ
وأتغيرت كل المعاني
والوطن مبقاش نشيد
حُبِي ليه بقا شكل تاني
كل يوم عن يوم يزيد
حته مني وف كياني
الوطن
مش أرض بس بتتسكن
الوطن دا كتاب حياتي
عمري كلو وذكرياتي
ذكريات أيام طفوله
ذكرى حلوة
وذكرى مره
من طفولتي للكهوله
الوطن
مش أرض بس بتتسكن
ناس تخاف على بعضها
لحظة ألم بِتْلِمَّهَا
الوطن عم ابراهيم
والأسطي بُرَعِي
والمعلم عب رحيم
وجارنا بطرس
والشيخ سليم
على أحلا أرض شوفتها
الوطن خالتي أم سيد
اللي بتبيع الخضار
اللي شقيانه تمللي ليل نهار
لجل م تربي ولادها ف حضنها
الوطن هما الغلابه الشقيانين
مقطف وفاس وشرشره
متسلحين
اللي عرقهم طول نهارهم ع الجبين
هُمَّ دول الفلاحين
في كل شبر بيزرعوا ومخضرين
أرضك جناين
في الغيطان طول الليالي سهرانين
تبص ف وشوشهم تشوف
صورة بلادي
والخشونه والرجوله في الأيادي
ضهرو محني ليك يا بلدي
يزرع الحبه في أرضك
والعمار في كل وادي
عشان نعيش في عزها
الوطن
مش بس أرض بتتسكن
الوطن تاريخ وسيره
وإحنا أحفاد الجدود
اللي أفضالهم كتيره
صانوا بالدم الحدود
واللي خَلُّو إسم بلدي
إسم عالي في الوجود
بنوا لبلدنا مجدها
الوطن مش بس أرض بتتسكن
الوطن
في قلب زوجه يِلِمِّنِي
بحنان وحب يضمني
وأحبها وتحبني
هو الولاد
الوطن
كل شئ فيه نبض ينبض
هُمَّا دول كل الوطن
والأرض جزء مِنٌهُمْ
سقوها مرة بالعرق
وسقوها مرة بدمهم
كتبوا التاريخ على أرضها
محفور عليها إسمهم
مهو دول ولادها وهِيَّه طبعا أمهم
وأُمِِّنَا مش أي أم
هيه أم الدنيا مصر
وإحنا ناسها وشعبها
وحٌبَّهَا
جوه العروق في دمنا
عاشقين ترابنا و أرضنا
حتى إبنك ..اللي سابك
عمر يوم ما كان في ظنو
إنو يبعد عن ترابك
بعدو عنك غصب عنو
بس حبك يا عظيمه
شايلو كنز جوه منو
شعبنا دايما ودود
ولما بيزورنا الغريب
في وسطنا
بيكون لنا
أخ وحبيب
وأحلى شئ فيكي يا بلدي
مش سياحه أو أثار
أحلى شئ ع الأرض ناسك
قلبهم دايما عمار
عمرو يوم ما كان حقود
لو في حاقد جاب في سيرتك
نبقا على أرضك أسود
وف سبيلك
بالنفيس عنك نزود
وإنتي إنتي يا أمنا
مهما شوفتي من المحن
هتفضلي في قلبنا
طول الزمن
أغلى وطن

سماح كمال
06-08-2007, 01:54 AM
في الأحلام
كلمات: أسامة علي



في الأحلام في الأحلام
في الأحلام يا بلدنا يا غاليه يلاَّ ننام
نومة الحلم بجد هنيه
نامي يا بلادي العربيه
ياما تعبنا وياما شقينا
ولا شوفناش راحه بعنينا
وحق علينا ننام بسلام
في الأحلام
في الأحلام
نحلم زي الخلق التانيه
ونخش ف أحلامنا الدنيا
طبعا دي مش عايزة كلام
في الأحلام
في الأحلام
يا شعوب قاست
ع الشوك داست
وكتير لاصت
حق عليكوا شوية تهيصوا
من فضلكوا خليكوا نيام
في الأحلام في الأحلام

سماح كمال
06-08-2007, 01:56 AM
سندس حبيبتي إضحكي
http://www.tibason.com/vb/attachment.php?attachmentid=55&stc=1&d=1182122714
http://www.tibason.com/vb/attachment.php?attachmentid=56&stc=1&d=1182122714
كلمات: أسامة علي
سندس حبيبتي إضحكي
يا أحلا ضحكه ف دنيتي
لما حبيبتي بتضحكي
من قلبي تطلع ضحكتي
ويرد من تاني صداها
جوه مني
صوت يغني
كل حتة بتبتسم
و بتترسم
خارطة سعاده فوق ملامحي
وبالإيدين الناعمه تمحي
كل هَمْ الدنيا أيوه بلمستك
بأنسى الزمان
وانسى المآسي
واللي صاير واللي كان
مع بسمتك
الله عليك
يا ضي عيني
لما تشوفيني تهفهفي
بإيديك ورجليك الجميله
ترفرفي
زي الفراشه ف فرشتك
وبشوق ولهفة بَحْضُنِكْ
قوي.. قوي
عطشان وعايز يرتوي
وبخاف عليك من ضَمِّتِي
وآه ولما تِعَيَّطِي
معرفشي إيه بيوجعك
وأتمنى تشكي وأسمعك
وأقول دا جايز وإحتمال
الجوع قرصها
وعايزه يمكن ترضعي
وأجرى على الببرونه أحضر رضعتك
وأَرَضَّعِكْ
قوام بسرعة تسكتي
عمرك شهور
لكن بتديني الأمل
وبتفرشيلي سكتي
ورد وزهور
والْضَلّمَه تهرب من دروبي بنظرتك
وتطل منها فرحتي
جيتي مليتي دنيتي بشعور جديد
فرحان أكيد
إمتى تناديني تقولي بابا وتلعبي
تجري وأنا بجري وراكي وتهربي
وأنا سعيد
وبغني بإسمك غنوتي
يارب سندس تكبري
وتنوري
دايما حياتنا بإبتسامتك
وبإيمانك نور يزينك
حامده ربك كل وقت وتشكري
وتبقي لي في الدنيا زاد
يوم المعاد
ودا يا سندس ثروتي
وتعيشي ليا يا ضنايا ومهجتي
وأما بشوفك تضحكي
دي أغلا لحظة ف دنيتي

05/03/2007م

سماح كمال
06-08-2007, 01:58 AM
لا تعتذر
كلمات : أسامة علي

لا تعتذر
إن فارقتك الأمنيات
وتراجعت أحلامنا
صارت فتات
فأصمد لأنواء الزمن
فلا تَلِنْ
وتَسْتَكِنْ
فتنكسر
لا تعتذر
فأنا وأنت وغيرنا
جُبِلَتْ طباعنا على
حب الْدُنَا
ونسير في دروبها
وفقا لمقدور قُدِرْ
لا تعتذر
ودع الهموم وما مضى
وأجعل من الماضي
دروسا وعبر
لا تعتذر
إن لم تحقق مبتغاك
في الحياة
وواجهتك صعابها
من البداية للممات
فجنان ربي لمن صبر
لا تعتذر
فالموت لن ينس أحد
ملكا ..
فقيرا ..
أو وغد
وطريقنا سينتهي
بعد السفر
لا تعتذر
فربنا رب كريم
هو الرحيم
هو العليم بحالنا
وبشكرنا
وبحمدنا
تجد السعادة في الرضا
وللذنوب قد غفر
لا تعتذر
فالمبتلون الأنبياء
ومن يلون مقامهم
من صالحين وأسوياء
من البشر
لا تعتذر
فاليائسون القانطون
همو وربي من خسر

سماح كمال
06-08-2007, 01:59 AM
ما بين بكرة وبين اليوم
كلمات : اسامة علي

ما بين بكرة وبين اليوم
حاجات ياما بتتغير
وبكره غيب
ومش معلوم
ومين على بكره دا يقدر
وذات نفسك بتيجي اليوم
تحب اللبس لون وردي
وبعد الضهر لون أبيض
وبكرة تلبس الأخضر
بييجي ناس
وتمشي ناس
وناس تانيه تعيش أكتر
وناس م الهم مخنوقه
وبكره تحلا أيامهم
تقول سكر
أنا إبن اليوم
بعيش يومي ف إطار معلوم
واخللي همي في اللحظة
وأقول يارب وأتوكل
ولا أسأل
ولا عن بكره أستفسر
ولا عايش مع الماضي
لأحزانك بتتذكر
مفيش في الكون دا شئ ثابت
ولا دايم
خلاف وجههو
إلهي الواحد القيوم
يقولوا اليوم مناخ بارد
وبكرة الجو هيحرر
صوابع الكف مش واحده
وأشكال البشر ألوان
ومش واحده
ودا أبيض ودا أسمر
وبردو حظوظنا مش واحده
في واحد حظو كان ضارب
وواحد م الهموم شارب
وأخ تشوفو في العالي
وأخ من أخوه يسخر
وواحد ماشي متواضع
وواحد تاني متكبر
متسألشي
ولا تغضب
لأن عيونا مش شايفه
مين اللي بعيد ومين أأقرب
ومين في أخرتو ماشي
ومين في الآخرة متعثر
ويا غضبان
ويا زعلان
ويا تعبان من الدنيا
شويه أصبر
دا ربك رب مش ظالم
وأرحم بيك من المخاليق
وبالأحوال أكيد عالم
بلاش تكفر
تلاقي الهم في الدنيا
وفي الآخره كمان تخسر
ومهما تطول لياليها
مليش فيها خلاف ساعة
وعنها أرحل
وجرب مرة يا خِلِّلي
في عز الهم قوم صَلِّلي
وللخالق كمان تشكر
تعيش مرتاح
مسا وصباح
وتلقا الهم من قلبك
كمان ينزاح
ودايما بسمة على وشك
ولا تْكَشَّرْ

12/07/2007

سماح كمال
06-08-2007, 02:00 AM
عبد العال ومراتو دلال

كلمات : أسامة علي

عبد العال
راجل طيب وإبن حلال
دوغري ف مَشْيُو
لا بتاع لف يمين وشمال
يسمع صوت الْمَدْنَه بتدن
يجري على الجامع في الحال
أصل الفرض مقدس عًنْدُو
سالك نهج أبوه مع جدو
حتى برغم غِنَاه متواضع
مش متعالي
ولا طالع أبدا في العالي
واللي يطاوع دايما رَبُّو
تلقا الناس كلها بتحبو
ماشيه حياتو عال العال
عبد العال
رَبَّك رزقو رزق كتير
بالقناطير
ولا عمرو في يوم م الأيام
مَدْ إيديه على رزق حرام
لكن مالو كللو حلال
ودا حال ال بيشكر رَبُّو
خيرو يزيد
وتمللي يفيض
والألوفات
تطلع صدقات
للمحتاج دايما بيساعد
ويطهر بزكاتو المال
عبد العال
بعد ما أَدَّى صلاة الفجر
رجع البيت بيصَحِّي مراتو
ست دلال
ساعه عَمَّال بيصحصح فيها
قومي إِمَّالْ
أحسن فرض الصبح يفوتك
لا تكون دِيَّة ساعة موتك
لما سمعت كلمة موتها
العفاريت لبست جتتها
قامت ردت زي صاروخ
يخربيتك
إكتم صوتك
محناش صُنْج يا عبد العال
إتكلم بالراحه شوية
فيه جنبنا هنا نايمه عيال
ست عَفِيَّه
مَ بْتِتْهَدِّشْ
وقت الجد بتنده ليها
تعمل صَنْجَه ولا بتردش
أصلها طول الليل سهرانه
مع ستات زيها تعبانه
أم جمال
اللي ما فيها أي جمال
وأم سعيد والست نوال
نازلين سوى في الخلق نميمه
ويقلدوا في بتوع السيما
عبد العال بيحايل فيها
ويِهَدِّيهَا
قومي يا ست دلال بس إهْدِي
إخزي شيطانك
قومي إتوضي
وصَلِّي الفرض
قبل الشمس ما نورها يِعَدِّي
بعد صلاتها
كانت فايقه
على وشها فيه بسمه ورايقه
قال الراجل فرصه أفاتحها
بكلام طيب وأسَمَّعْهَا
ست دلال ...
فكرة عظيمه
جاتلي ف راسي
هايله بجد عليها القيمه
أستثمر كده نُصْ فلوسي
ردت قالت بإستغراب
إيه يا هباب !!!
نص فلوسك !!!
أيوة يا ستي نص فلوسي
م احنا الحمدلله مستورة
عندنا ياما فلوس وكتيرة
طب والفايدة
قولت الفايدة كبيرة وزايده
ألف الميه ..عَشَرْ أمثال
ويمكن أكتر
قلعت من على راسها الطرحه
وبتتحزم علشان ترقص
كانت زايده عليها الفرحة
بعدين سألت
فين البنك ال هيدينا عشر أمثال
هوه الأهلي
ولاَّ المصري
ولاَّ بتاع بره يا عبعال
رد وقال
لادا ولا دا
لإستثمار في بنوك الله
اللي عطانا المال والجاه
يوم أخرتنا
وف وحدتنا
هوه دا بس ال هنلقاه
فجأة لقيتها أتغير حالها
رقعت بالصوت الحياني
صَحَّتْ كل الناس النايمه
حتى جيراني
لفت كل البيت في ثواني
تصحي عيالها
واد يا محمد
بت يا فله
واد يا طلال
آه يا مصيبتي
قوموا شوفو خيبتي
قول من تاني يا عبد العال
والله كبرت بقيت بتخرف
لازم تعرف
دي فلوسي وفلوس أولادي
وأنا مش هسكت ع الكلمادي
أنا هتصرف
يلاَّ بسرعه قوام ودوه
على أقرب مستشفى خدوه
يرتاح فيها يومين وهاتوه
أصل مزاجي أتعكر مِنُّو
قوي من زَنُّو
يمكن حبه يروق البال
ودي قصة ناس عايشه معانا
عبد العال ومراتو دلال

سماح كمال
06-08-2007, 02:01 AM
كلام في الحب

حوار شعري بين محمد سعيد وأسامة علي

محمد سعيد

ياريت اقدراطيب زيك
لااجوع لعنيكى ولا أحتاج
دوا ضيك
ياريت اقدر
اميزشكلى من غيرك
واتصورجمال الدنيا من غيرك
دا انا بعشق اكون طيرك
واتحجج بأى كلام
عشان اتغطى بعبيرك
وعمرما قلبى حب الاسر
هواه..
من سحر تأثيرك
اقولك إيه
وانااللى عشت ف الاول
دموع ادم
كأنه لسه عمنول
برغم الجنه وما فيها
بكى حبك
ونزلت دمعه من عينه
بتوصف نُص تكوينه
وضحكاته
وآناته
وآهاته
وتفانينه
هقولكايه؟
ياريت اقدراخِيب زيك
واقول خفيت


أسامة علي

ومين يقدر يطيب مِنُّو
ومِنُّو يقول أنا خَفِّيِتْ
ولَمَّا ف قلبنا يكلبش

ما بِيّخِفِّشْ
ولو سألوني إيه مالك
يرد القلب
أنا حبيت
ونتعذب ساعات لكن
مكانو في الفؤاد ساكن
وإذا كان داء
فَهُّوه السم والترياق
ولو يهرب ساعات ويروح
تروح الروح
وأنا منو خلاص جَنْيِتْ
ولو يغضب حبيبي ف يوم
يخاصمني في ليلي النوم
وأتمنى رضا قلبو
ويرجع تاني ليا يا ريت
ورحت للطبيب أشكي
داويني يا طبيب قلبي
يقوللي خلاص أنا حرمت
ويرجع تاني يغدر بي
وأنا ملليت
يقوللي بجد لَوّ عايز
تخف صحيح
هكون دوغري معاك وصريح
تشيل القلب من جواك
ونام في تابوت

سماح كمال
06-08-2007, 02:01 AM
محمد سعيد


بقولك ايه ياعم الحاج
لانا ناقصك
ولا ناقص جمال حرفك
ف كراسى
وانا اللى جايبك تواسى؟
تاريك مجروح
وفاض جرحك
تاريه راخر
وسيع قاسى
ياعم الحاج انا ف عرضك
انا مش حمل واواتك
وشداتك
وهمزاتك
ورعشة حرفك الملهوفه ع المعنى
ولا المغنى
اللى بيرقص حروفك رقص
دانا الغلبان وانت امير
لكين عارف
انااتشرفت بوجودك
ياصاحبى كتير

أسامة علي


محمد يا حبيب قلبي
أبوس راسك
تسيبني وسط كُرَّاسَكْ
في أحضان كلمتك بِدِّي
أشوف حبة وَنَسْ وياك
ونفسي معاك آخد وأَدِّي
ويرجع لِيَّا تاني دفاك
وجايلك عايز أحكيلك
وأشكيلك
على قلبي ال سهرني
في نص الليل يحيرني
ويحرمني أشوف النوم
عشق حَوَّا
وداب فيها
ومن شهدو بيسقيها
ويتمنى ساعات العمر
في أحضانها يقضيها
وتتدلل قوي هيه
وأنا اللي شايلها في قلبي
وفي عْنَيَّا
ومين غيرها بيسحرني
ومن نظرة
ومن كلمة بتأسرني
وأنا جايلك هنا يمكن
تِصَبَّرْنِي
تِدَبَّرْنِي بإحساسك
على هَدْيَك ونِبْرَاسَكْ
ولَوّ إنته شايفني أمير
أنا شايفك ملك ناسك
عشان خاطري
وأبوس راسك

تسيبني وسط كُرَّاسَكْ

سماح كمال
06-08-2007, 02:02 AM
محمد سعيد

حبيب قلبى الجميل سمسم
اناعارف من الاول
ومااطمنت لحظه ياشيخ
لاوجاعك
تعالى نحكى ونطول
وخدنى معاك
اكون واحد من اتباعك
صعيب جدا ياصاحبى الحب
وآه يانبض نبض القلب
صعيب اكتر
ما بين المر والسكر
بتحيينا
وبتعِشنا
وبنعيشك
وتتحكم ف خطاوينا
وتكتبنا حروف خايفه
ونكتبلك غناوينا
ومش بيدك
دا بأدينا
صعيب جدا ياصاحبى الحب
وآه يانبض نبض القلب

أسامة علي

وآآآآآآآآه لما تقولهالي
حبيب قلبي
بتطلع آهْتِي مِنْ جُوفي
تواسيني
تنسيني
سنين عدت من الحرمان
تشيل مِنِّي
شعور الضعف مع خوفي
صحيح قلبك جميل وأبيض
حليب صافي
وكلمة تقولها يا صاحبي
بصدق تجيني وتوافي
وأحس إن الكلام وياك
دوا شافي
أنا فعلا معاك برتاح
وقلبك زي أرض براح
يساعي الصحبه والْلمَّه
وأحس حنانو في الكِلْمَه
وبيخفف في قلبي جراح
ودا وحدو سبب كافي
يخليني أفضفضلك
وأحكيلك
غريبه بجد يا محمد
تِمِدْلّها الخطاوي ليه
تقوم تبعد
ولما أسأل
قوام تتقل
وأنا بردو كمان بعند
حرام يعني
تسمعني كلام دافي
بفكر فيها ليه دايما
وتنساني
وعارفه شعوري ناحيتها
وهجراني
وأخاف م النسمه تلمسها
وأحسسها
مفيش غيرها في وجداني
واحايلها
تعالي في يوم هنا طوفي
وحطي إيديكي في كفوفي
وأكونلك فرشه وتكوني
غطا يسترني ولحافي
ودا حالي
مع الغالي
عذابي ليه بيحلالو
وأشوف البسمه في شفايفو
بتحلالي
ودي القصه لآخرها
حكيتهالك في موالي
وبدي يا صاحبي تعذرني
كلامك جه على كيفي
وآآآآآآآآه لما تقولهالي
حبيب قلبي
بتطلع آهتي من جوفي

سماح كمال
06-08-2007, 02:04 AM
حكايتي ويا الكهربا
كلمات : أسامه علي

حكايتي ويا الكهربا
بتجيب ساعات العكننه
بفصول سخيفه مهببه
وصحيح مفيش عنها غنا
لكن حالات
بفضل ساعات
أَسِبْ ليها ولأبوها
عليها وأفتح مندبه
والكهربا
مع إني بفهم شغلها
وكتير عُقَدْهَا بَحِلَّهَا
لكن ساعات بِتْبُصِلِي
وعنيها بِتَّطَرْقَعْ شرار
جواها نار
تُرْفُسْ وتبقا مرعبه
ياما خَرَّبَتِلي كام جهاز
وساعات بتقطع نص ليل
وأقضي ساعات
على لَمْبَه جاز
ومفيش حاجات مترتبه
ويا عيني لما بتنقطع
وأنا جوه حتة مكركبه
كام هُضْر أخدهم كعبله
مسمار بيخرم جزمتي
وأزعق وحالتي مدهوله
ولا حد يسمع زعقتي
وكأني بَزْعَقْ في الخلا
ونفسي تبقا مَعَصَّبَه
وكللو كوم
وأما الفاتوره تجيني كوم
يِضْرَبْ جرس
أقولُّلو مين
يقول بتاع الكهربا
أزعق وأقول
هِيَّه الفاتورة كل يوم
مش يابني لِسَّه دفعلكم
كده من يومين
يقول يا عمو مش أنا
دي التلفونات
طَبْ يابني أمس جونا ناس
قروا كمان العدادات
وحصل خلاف
وقالولي تدفع من سكات
وفلوسنا نازله سرسبه
قال بردو دول مش كهربا
دول المجاري والمياه
يلعن أبو دِيَّة حياه
نهايتو قوللي عايز إيه؟
وبعين ونص بَصِّلِي
وبُصْبَاعِين شاورلي قال
ألفين جنيه
وزعقتلو .. ألفين جنيه ؟؟
يا مفتري
طب قُولِّلي ليه ؟
دا أنا عندي لمبه مدعمسه
تتقاد ساعات بعد المسا
ولمبه نايلون في الجلوس
بتقيد وتطفي لوحدها
وأسأل يقولوا مِنَفِّسَه
وأسبوعين
مقطوع علَيَّا الكهربا
من غير كلام
ولا سلام
قوم يلاَّ هات
وإدفع فلوسك من سكات
يا الدفع أو راح تنقطع
عَنَّكْ خطوط الكهربا
ودا شئ بسيط
من المحيط
ويوماتي بيرن الجرس
وأخرج لهم قاطع النفس
معرفشي دا تابع لمين
أو نصابين
وإن ما دفعتش أنحبس
وفي النهاية
نَفَّضُولِي المحلبه
فواتير يا خلق تجننك
من غير عدد وملهلبه
ودي قصتي
وحكايتي ويَّا الكهربا

تنويه : هذه القصيدة كتبتها وأنا أعد ردا على المقامة الشربينيه للشاعر الكبير أحمد الشربيني فله أوجه التحية




23/04/2007م

سماح كمال
06-08-2007, 02:05 AM
هُنَا المنصورة

كلمات : اسامة علي

منصوره يا أرضنا
يا حُبْ مِتْقَدَّرْ
غالية قوي ف قلبنا
يم الجمال يسحر
يا حلوة الحلوين
في الريف وف البندر
وأهلك الطيبين
في الأصل والجوهر
والجدعنة ف طبعهم
وقت اللزوم تظهر
فيك التاريخ إنكتب
بالمجد مِتْسَطَّرْ
و ابن لقمان إسألوه
هيقول وهيْفَسَّرْ
وجيش لويس التاسع
على أرضك أتْكَسَّرْ
وابنك في كل مكان
في الدنيا بِيعَمَّرْ
وبيبني في الأوطان
بسواعدوا ومْشَمَّرْ
يَلْ إنت غاوي الأصيل
على أرضنا دَوَّرْ
وجمال ولاد بلدي
سبحانو من صَوَّرْ
فيك الأدب والذوق
والعلم فيك نَوَّرْ
والراية عاليه لفوق
والفن ليك مَظْهَرْ
فيك المداين جناين
والجو مِتْعَطَّرْ
على شط نيلك يفوح
المسك والعنبر
م المنزله لميت غمر
الزرع فيك أخضر
قَمّحِكْ ورُزِّكْ دهب
وكمان قصب سُكَّرْ
والورد فيك ألوان
أبيض ولون أحمر
والزهر في البستان
أزرق على أصفر
وف جَمَصَه وقت الصيف
من جوها تِسْكَرْ
لو جيت في يوم بلدي

عمرك ما تتكدر
واللي يزورنا ف حينا
إخوان ياناس وأكْتَرْ

منصوره يا أرضنا
يا حُبْ مِتْقَدَّرْ

سماح كمال
06-08-2007, 02:05 AM
يوم ميلادك يا نبينا

كلمات : أسامة علي



المصطفى مين زيو مين

خاتم جميع الأنبياء والمرسلين

يوم مولدو

بنمجدوا

بالسير على نهجو المبين

دي سنتو هيه النجاة

هيه الحياة بعد الحياة

للي على دربو مشي والتابعين

وبظهورك

يوم ميلادك

هل نورك

للخلايق أجمعين

نور يزيح عتمة جهاله

م الغوايه والضلاله

نور هدايه

جيت لتبليغ الرساله

من إله العالمين

يوم ميلادك

فجر يظهر

كون يِكَبَّرْ

لإبن عبد الله محمد

كل خلق الله بتشهد

لما شافت البشاره

بالدعاء الله أكبر

إنس جن شاهدين

يوم ميلادك يا نبينا

ذكرى شايلنها ف عنينا

وأنت بلغت الأمانة

وأشهد إنك أسوة لينا

للعباد المؤمنين

يوم ميلاد ك

جاي بيحيي الذكرى فينا

فوقوا يللاَّ يا مسلمين

والنهادره ف يوم ميلادك

كلمة مني للحبايب

للحاضر واللي غايب

نتبع سنة نبينا

والصحابه الأولين

نحيي ذكراه بالعباده

والصلاة عليه والسلام

كل وقت وكل حين

سماح كمال
06-08-2007, 02:06 AM
عايزك تضحك كده من قلبك

كلمات : أسامة علي


لَوّ بَصِّيتْ في مراية تحِسْ الِعُمْر كبير
لكن مِنْ جُوَّاك إنْ إنته ما بَتكْبَرْشْ
قلب صُغَيَّرْ عمرو يدوبك بس شهور
ومن الخارج شعرك شايب وَيَّا الْكِرْشْ
حتى إنْ كان عُمْرَك عشرين
أو خمسين أو قول ستين
ما بْتِفْرِقْش
يعني تقابل شاب صُغَيَّرْ
لكن شكلو يقول دا عجوز
عاقد حاجبو وحالو مِكَدَّرْ
وتشوفو دايما ضارب بُوز
يلعن ويسِبْ ف أيامو وما بِيشْكُرْش
وتشوف واحد
عَاصِرْ فَحّتْ البحر ف عُمْرو
لكن تلقا الوش مِنَوَّرْ زي اللوز
دايما يضحك كده من قلبو
وف أحوالو تَمَلِّلي بيحمد رَبْ الْعَرْش
لو هتشيل الْهَمْ يا صاحبي الْهَمْ كتير
والأيام بتزيد في بلاها ما بْنِنْكِرْش
والمكتوب مافي مِنُّو هروب
ولا هَتْغَيَّرْ
في الْمِتْقَدَّرْ
كان غيرك أشطر و م تِقْدَرْش
خايف م الأيام الجايه
قلقان م المستقبل ليه وعاملها حكاية
وتجيك فكره وراها الفكره
إنت نسيت إن اليوم كان لإمبارح بُكْرَه
وآهو يوم عدا
ولا فيه شده
إنسى الهم وغم الدنيا ومَتْفَكَّرْش
إرمي حمولك ع اللي خلقنا
دا اللي رزقنا زمان يرزقنا
بكره وبعدو
عمرو ما يخلف أبدا وعدو
بعد العُسْر تلاقي اليُسْر
ليه بنعذب حالنا يا عالم ما بْنُصْبُرْش
عايزك تضحك كده من قلبك
حِبْ الناس
الناس هَتْحِبَّكْ
إوعا تروح للنوم زعلان من زيد وعبيد
وإفرح وإمرح ويا حبايبك
خللي الضحكه تداوي همومنا وماتْكَشَّرْش
من حواليك هتشوف الدنيا بجد جميله
ومن جواك العمر شباب على طول وصُغَيَّر
مابتكبرش



05/04/2007م

سماح كمال
06-08-2007, 02:07 AM
هذه القصيدة أهديها لروح الشهيد ملازم أول شرطة محمد إبن قرية البدرشين الذي قدم حياتهثمنا لإنقاذ ( مي ) فتاة أستغاثت به وهذا يؤكد أن مصر دائما بخير وستظلإن شاء الله تعالى دوما بخير طالما هناك من هو مثل محمد رمز للتضحية والفداء والكثرة مثل محمد والقليل هم الإستثناء


حضرة الظابط محمد
كلمات : أسامة علي

حضرة الظابط محمد
شهم يابني
ألف رحمة ونور عليك
يا شهيد
يوم شهادتك
دا ميلادك للخلود
وأتولدت لتاني مرة
في العلالي جُوَّه جَنَّة
إنت فيها اليوم وليد
من رضا ربك عليك
كل مصر بتدعي ليك
وإنت إسمك بالشهادة
في سجل الخالدين -
وفديت بلادك يا بطل
دم الوريد
وضربت للناس المثل -
في التضحيه
علشان حياة الآخرين
مش بس مَيّ بتشكرك
الشعب كللو مقدرك
وبيذكرك بالخير أكيد
ضحيت بنفسك -
لما شيلت الروح في كفك -
ضد كل النصابين -
والمحتالين
ضد الجشع
واللي بيحصل من قرف
ولصوص شرف
عايشين لشهوتهم عبيد
ضد الطمع
يرجع أمان المجتمع
والخير يسود
إنت عين للأمن تحرس
أمن أمة -
بكل همة
ضد خفافيش الظلام -
والناس نيام
وإنت أديت الرسالة -
بالتمام
والرجوله والشهامه
والمروءة والبطولة -
ليك علامة
دول يا مصر صحيح ولادك
دول سباعك
في النهار أو وسط ليلك
رضعو من أصلك ونيلك
من تاريخك المجيد
كنت أشوف السكة عتمة مضلمه
وبشوف بشر -
في السكه ماشيه مبلمه
خايفين ساعات
وسعات تكون مستسلمه
لكنك إنته يا بطل
قلبك جرئ
ضحيت بروحك لجل م تْنَوَّرْ لنا
تاني الطريق
صحصحتنا
فوقتنا
وزرعت من تاني الأمل
وتكون لنا غنوة ونشيد0
واللي طمن قلبي إنو
فيه طابور وراك طويل
والشباب أكبر رصيد
نفس طينتك
من عجينتك
في بلدنا بيتولد
جيل بعد جيل
والعزيمة من حديد
يا بلدنا إطَّمِنِي
ولا تحزني
طول ما فيه أمثال محمد
طول ما فيه أرحام بتولد
طول ما فيه رجاله بتربي
أسود
جيش وشرطه
عن حماك سهران يزود
دول رجالك يا بلدنا
لو في يوم تتمد إيد
جوه أرضك
أو في بحرك
أو على خطوط الحدود
في السلام والحرب هُمَّا
ليك جنود
مافي خوف في القلب أبدا
بأسهم صلب وشديد
حضرة الظابط محمد
طير ورفرف
في جنان الخالدين
وإنت عايش بالشهاده
بِينَّا أكتر
من كتير ناس موجودين
وأحسن ختام -
يابن الكرام -
في الجنة يبقا مطرحك -
فرحان سعيد
أيوه عارف كنت خاطب
م الحبايب
لكن اليوم يا عريسنا
جوه جنة
زي عصفور الكناري
طير وغني
يابن نسل الطيبين
الفرح وسط الملايكه
والعروسه دي حوريه
من بنات الحور وعين
زغرطي يم الشهيد
للعريس ليلة الفرح
والتحية والتهاني
من جموع المسلمين
خللو شمعو اليوم يئيد
خللو فرحتنا بمحمد
كل يوم عن يوم تزيد
روحنا من أجلك يا بلدي
ليك هدية
شئ زهيد
ألف رحمة ونور عليك
يا محمد يا شهيد



11/03/ 2007

سماح كمال
06-08-2007, 02:08 AM
وبتقوللِّي

كلمات : أسامة علي



وبتقوللِّي
سلام نتلاقى يوم تاني
ويُحْضُنْ كَفَّهَا كَفِّي
وعين بِتْبُصْ لعيوني
بشوق وحنان
وصَرْخَة طالعه جُوَّايَا
ومن غير صوت
بَحِبِّكْ مُوتْ
بلاش تمشي
أنا ف بُعْدِك
عيوني ف ليلي ما تنامشي
سِمِعْهَا قَلْبَهَا رَدِتْ
على عيني
تغيب عَنّهَا ولَوّ ثانيه
يا أغلا عَنْدِي م الدُنْيَا
وأغلا حتى من نفسي
وأنا زَيَّكْ بَحِبَّكْ مُوت
هَوَايَا إنته
وإنته القوت
وَلَوّ أعيش عُمْر مع عمري
معاك يا حبيبي ما يْكَفِّي
في لحظة يفوت
مهو إنته دنيتي وكوني
وإنت الراحه وسكوني
ونِسْمَة تِهِبْ م الْجَنَّة
تداوي جرحي وشجوني
وبتقوللِّي
خلاص هَمْشِي
بتسحب كَفَّهَا مِنْ كَفِّي وتسيبني
شعور قاسي
وإحساسي يِعَذِبْنِي
مع إيدها
بتسحب كل شئ مِنِّي
وحتى النظرة م الْنِنِّي
ودَقِّة قلبي وجعاني
وأعاني الوجد والأشواق
في وجداني
و روحي تروح في سكتها
وفايتاني
وبتقوللِّي
سلام نتلاقى يوم تاني




21/03/2007م

سماح كمال
06-08-2007, 02:09 AM
ست الحبايب.... وحشاني

كلمات : أسامه علي

وحشاني يا أمي
محتاجلك
مشتاقلك
تخديني في حضنك
وتضميني لصدرك
اللي سقاني
واللي رواني
واللي اداني سنين من عمرك
مهما كبرت يا أمي أنا ابنك
إدعيلي
من غيرك يحمل همي
إن كنت صغير ولاَّ كبير
من قلبك تتمنيلي الخير
وياما قاسيتي وضحيتي
علشاني كتير
من كل مخاطر تحميني
وبأغلى ما عندك تديني
وبكل حياتك تفديني
مين زيك في الدنيا يا امي
وحشاني يا أمي
محتاج لدعاك
بأتمنى رضاك
محتاج لو لحظة أكون وياك
زي زمان محتاجلك وأكتر
وأنا قدامك طفل صغير
مش هتغير
وعلى بعادك ما أقدرش أصبر
فاكره ياأمي؟؟
لما كنتي بتبعدي عني
ألقا حنانك لِيَّا واخدني
وأفضل ابكي لحد ما تيجي
ولما بتسمعي صوتي بتجري
وبتخديني ف حضنك دُغري
فاكره ياأمي
لما كنتي تنادي عَلَيَّا
واد يا أسامه
صوتك لسه معشش فِيَّه
أنا وحشاني الكلمه دَهِّيَا
طبعا فاكره
مين في الدنيا بينسى ضناه
ياما آسيتي مني الآه
ياما طيرت النوم من عينك
ياما عذبتك
ياما بَكِّيتك
مين هيكافأك غير الله
فاكره يا أمي يا أعظم أم
دايما كنتي تشيلي الهم
وياما شقيتي
وياما عانيتي
وياما سهرتك
أنا دلوقتي كتير محتاجلك
محتاج تدعيلي من قلبك
وأنتي يا غالية
حبك أكبر حب يا أمي
حبك جوه عروقي ف دمي
عمري ما شوفت حنان في حنانك
أو أحضان تشبه أحضانك
وأنا بين إيدك
حاسس كل الدنيا أمان
تعرفي يَمَّه
كل الدنيا عندي ف كفه
وإنتي لوحدك بس ف كفه
عمري ماهنسى تعبك يمه
من وأنا كنت رضيع في اللفَّه
وأنا من شوقي بحس بلهفه
ولما أقولك يَمَّه إدعيلي
كنتي تقولي
أنا من قلبي يا واد دعيالك
يكتر رزقك
يسترها وياك في طريقك
تلقا أهل الخير واقفينلك
لحظة ديقك
تتهنى وتربي عيالك
حتى لما بتيجي في خيالي
أو على بالي
القى دموعي
نزلت مني
غصبن عني
ماانتي يا امي أحب الناس
عايز ابوس الإيد والراس
أنا بتمنى تراب رجليك
وبعمري وحياتي أفديك
وكتير جدا مشتاق ليك
وأضُمِّك لِيَّا ف أحضاني
و انتي بجد كتير وحشاني

سماح كمال
06-08-2007, 02:09 AM
طفل صُغَيَّرْ

كلمات : أسامة علي


لما تبُصْ لطفل صُغَيَّرْ
وشُّو بيضحك
لو ستين قلبك موجوع
وعلى الخد بتجري دموع
تلقا الدنيا بضحكو تِنَوَّرْ
وبتمسح دمعك في ثواني
أصل الضحكه ياناس رَبَّانِي
تدخل فيك
وتبان في عنيك
تلقا ف قلبك ضحكه كبيره
تسعد قلبك
بالتسابيح بِتْسَبَّحْ ربك
وعلى لسانك الله أكبر
وف لحظة بيتْغَيَّرْ حالك
ولا على بالك
كل هموم الدنيا بتمشي
وبتصفالك
لحظة ضحكة طفل بريئة
طالعه حقيقه
وعلى ملامحك ضحكتو تِظْهَرْ
وأمَّا بِنِكْبَرْ
ليه جوانا
بِنِوّئِدْ فينا
روح الطفل الساكن فينا
وبنكتمها
غصبن عنها
وبنظهر بملامح قاسيه
تبان في عنينا
وحاجات فينا كتير تِتْغَيَّرْ
ليه بنخاف يظهر من تاني
بين الناس أو ناس شايفاني
ومتظهرشي طفولتي عَلَيَّا
إلاَّ وأنا قاعد وحداني
لكن بين الناس أنا عَنّترْ
ولْبِسْنَا قناع الأتيكيت
وسط طريق
أو ويا صديق
حتى كمان موجود في البيت
وما بين الخلق بِنِتْكَبَّرْ
نِفْسِي أعيش في الدنيا طبيعي
عايز أضحك
إيه يمنعني
وأحبس ضحكتي جوه ضلوعي
عايز أبكي
ليه بالغصب أمنع في دموعي
وف خلوتي أنا ياما بكيت
وأبان ليه بسلوك مِتْزَوَّرْ
إظهر فينا يا طفل وبان
راح تهرب قدامك ياما
كتير أحزان
راح ترجع ايامنا الحلوه
ما بين الصحبة والخللان
يلاَّ يا صحبي
رَجَّعْ تاني طفل زمان
صافي القلب وقلبو بيغفر
خَللِّي الباطن زي الظاهر
ليه بسلوك تاني بتتظاهر
لو مش قادر
أَكْشِفْ زِيفَكْ
إياك تنسى
رَبَّكْ يِقْدَرْ


17/01/2007م

سماح كمال
06-08-2007, 02:10 AM
ولِسَّه فيه كتير أحلام
كلمات : أسامة علي

ولسه فيه كتير ياما
كمان وكمان
وعقلي وفكري حَوَّامَه
وطاير بيه في كل مكان
ساعات الرحلة بِتْطَوِّلْ
وبتأمِّلْ
وأشوف ياما كتير ألوان
وأشوف واحد على الأسفلت مِتْكَعْبِلْ
وناس في الصخر بِتْكَمِّلْ
ودا في المفترق حيران
ولحظة بَحِسْ بحنيني
وشوق للذكرى بيجيني
وبِدِّي أهرب
وألاقي نفسي للماضي
هناك أقرب
وأفوق تاني
ودنيا بتجري شداني
ووخداني من التوهان
ولسه فيه كتير أحلام
مع الأيام
هتتحقق
وقوم إبدأ
وحَبَّه أُصْبُرْ
تلاقي الصورة تتغير
ويبقا زَمَنَّا أحلا زمان
ولو نسقط في دَوَّامَه
نعود من تاني للطيران

31/01/2007م



ملحوظة : هذه القصيدة كتبتها بعد قراءة قصيدة أخي أشرف فايز ( موعود ) الرائعة ( ولسه ) متواصلا معها فله أوجه التحية

سماح كمال
06-08-2007, 02:11 AM
مين اللِّي جَابِكْ سِكِّتِي !

كلمات: أسامة علي



لَمَسِتْنِي أيّوَه كِلْمِتِكْ
وبْلَمْسِتِكْ
حَرَّكْتِي تَانِي مُهْجِتِي
صَحِّيِتِي فِيَّا حاجات كتير
نامت سنين
رجعت تثور
نَوَّرْتِي سِكَّه مضلمه
بأحلا نور
مين اللِّي جَابِكْ سِكِّتِي !
مين اللي قَالِّك إن قلبي
من زمان بطل يِدُقْ
مِتْلَخْبَطَه فِيِه نَبْضِتِي!
بَايِن على وِشِّي بصحيح؟
قلبي الجريح
ولاّ إنتي سَاحْرَه
تدخلي قَلْبِّي بسهوله
وتعرفي كل اللي فيه
حتى الْمَخَبِّي بتعرفيه
وتشيلي أحزاني بإيديك
ومعاكي تعلا ضحكتي
تعالي جنبي
طَمِّنِيِنِي
وعَرَّفِيِنِي إِنِّكْ حقيقه
وإلمسيني
مش مجرد وهّمْ جَانِي
أو يكون عفريت لِبِسْنِي ف جِتْتِي
بحر الغرام
جُوَّايَا نَامْ
ولا موج يِحَرَّكْ مَيّتُو
ويِهِزْ قلبي من السكون
وبْطَلِّتِكْ
وبنظرة من أحلا العيون
رَمِيِتِي طوبة ف بِرْكِتِي
هَزِّيِتِي فِيَّا كُلْ شئ
زِلْزَال
طوفان
بركان وهادي من زمان
من تاني ثار
وأتحركت فيه الحمم
ولَّعْتِي جُّوَه ف قلبي نار
وأتغيرت بيك دُنّيِتِي
والنوم خاصمني ف ليلي ليه
عايز أعرف إنتي عملتي إيه
وعشان أنام
أسهر ساعات
ومَفِيشْ في بالي
ولا ف خيالي
غيرك حبيبتي ف وِحْدِتِي
بَسْأَّلْ سُؤَالْ
بتشوفي طيفي في الخيال ؟
بِيّسَهَّرِكْ؟
وشعور جديد ومْحَيَّرِكْ
والشوق بياخدك ناحيتي
وإن جيت في بالك
تلقي حالك
زَيّ طير طاير يغني في السما
على عزف لحني وغنوتي
وتْحِسِّي بَسْمَه جُوَّه قلبك
فوق شفايفك
في العيون
وتعيشي حاله من الجنون
رُدِّي عَلَيَّا اتكلمي ؟
ليه بْتُسْكُتِي ؟
ولاَّ السكوت يَعّنِي الرضا ؟
يمكن ساعات
وساعات بيبقا غير كده
لَكِنِّي عايز كلمتك
مع كلمتي
تِمّلا الفضا
والكون يردد بالصدا
وتزيد معاكي فرحتي
الله عليها رِقِّتِكْ
كُلِّكْ واخدني لِسِكِّتِكْ
وعليك بتجري خطوتي
وأشتاق إليك
والشوق مزود لهفتي
وبقيتي بَسْ
إنتي ف حياتي جَنِّتِي


24/02/2007م

سماح كمال
06-08-2007, 02:12 AM
http://www.tibason.com/vb/attachment.php?attachmentid=37&stc=1&d=1171402491
في عيد الحب

كلمات: أسامة علي

في عيد الحب بكتبلك
قصيدة حب بتقولك
بَحِبِّكْ أيّوَه من قلبي
ومغرم بيك
بَحِبِّكْ كلمة بكتبها
وبقراها في نِنْ عنيك
بكلمة حب مكتوبه
بتشجيني
بَحِبِّكْ والشعور جامح
ودايب فيك
بَحِبِّكْ حب أد الكون
بَحِبِّكْ أيوه حب جنون
بَحِبِّكْ وإنتي حبيني
دي لمسة حب
بالْحِنّيَه تحييني
وكان نفسي أقولهالك
بإحساسي
بأنفاسي
على كتفي تنام راسك
وعلى كتفك تنام راسي
وأضمك بالحنان لِيَّا
ما بين القلب وإدَيَّا
تحسي بنبضي جواكي
وأحس بنبضتك فِيَّا
نغيب عن دُنْيِة الأحزان
عن الأطماع
عن الأوجاع
ندوب بحنان
وترجع بِينَّا حالة الحب
زي زمان
وأكون خِلِّكْ
وأشوفك في العيون بستان
على خَدِّكْ
حَمَارْ ورّدِكْ
ومن قلبك بياض فُلِّك
ونبقا أنا وإنتي شئ واحد
ما يعرفوا ضِلِّلي مِنْ ضِلِّكْ

سماح كمال
06-08-2007, 02:13 AM
الجعان بيحلم في سوق العيش
كلمات : اسامة علي

كنت ف عزومة فرح
وعنيه ع الهبابير
وروحت بدري قوي
خايف من التأخير
لقيت مداعي أُمَمْ
والخلق واقفه كتير
عبدو إبن خالتي وعمر
وعبيد وزيد وسمير
لِبِدْت أنا أنا جنبهم
ووقفت في الطوابير
والأكل ريحتو مفحفحه
من شدة التحمير
دُخَّانها مالي المكان
وداخله في المناخير
ساعتين وأنا ف وقفتي
بعديها جاني الدور
وهتتعتق معدتي
م المش والجرجير
والفول وطعميتو
وكفايه بقا مسامير
يا معدتي زقطتي
وإتمتعي بالخير
إيشي حمام مع بط
ولحمة جوه فطير
ووز م المسكوفي
وفرخ رومي كبير
وكباب على بوفتيك
عقلي خلاص هيطير
على الصنيه وقفت
وشرعت في التشمير
جيت أمد إيدي ع الدكر
سمعت صوت تشخير
أتاريني كنت ف حلم
وأنا لسه فوق السرير

سماح كمال
06-08-2007, 02:13 AM
لا نملك إلاَّ أن نغضب أو نشجب

كلمات: أسامة علي



مُنْذ سنين
وطيور الْبُومْ
تهجر موطنها
لتعشش فوق بلادي
تبني الأعشاش
على أشجار الأمة
والأمة سَاكِنَةٌ
نَائِمَةٌ
ليس لها هِمِّة
كي تطرد هذا الْبُومْ الْعَادِ
إلاَّ أنْ تغضب
أنْ تشجب
عشرات المرات
يُنْتَهَكُ الأقصى
وتُدَاس الحرمات
تسقط دول
وتُقَسّمُ أخرى دُويلات
فنهيج هياج الموج الثائر
زَبَدَاً
يتبعثر عند الشطآن
ويعود حزينا لمكانه
ينسحب كجيش مهزوم
مكلوم
مجروح
يبحث عن ضَمَّادِ
وتعود الْكَرَّه
والمَرَّةُ تِلّوَ الْمَرَّة
لكن هيهات
كيف يغرد في القسر
الطير الشادي
كيف يقاوم هذا الزحف
بعض الأفراد
فالأمة متفرقة
إلى آحادِ
بين يمين ويسار
وتيار يلعن تيار
ننسى الأعداء
لكِنَّ على أنفسنا أشداء
لا نخجل أبدا من عار
هذا في واد
والآخر في وادي
فانهالت أكلة كل العالم
إلى قصعتنا
وبدون حياء
نتباهى بالكثرة
لكِنَّ
أصبحنا غثاء
وإذا ناديت
فلا مجيب لمن تنادي
سيضيع الصوت هباء
وقديما قالوا
أن العربي غيور
وجسور
لا يأبه للموت شعور
فكفانا تَغَنِ بالماضي
فاعتصموا يا أمة أحمد
بالحبل الممدود الأوحد
فسيبزغ فجر قادم
بالعزة يتجدد
وصحائف أمجادي


10/02/2007م

سماح كمال
06-08-2007, 02:16 AM
يارب يا كريم إشفي أحمد إبراهيم

دعواتي ودعواتكم جميعا




دعيتك يا كريم
يا ربي يا رحيم
تشفي أحمد أخويا
إبن عمي إبراهيم
***
إشفيه وأرؤف بحالو
يرجع تاني لعيالو
بخير وبكل صحة
والقلب يكون سليم
***
يرجع إبداعو تاني
يكتب أجمل معاني
وسط الأحباب معاهم
ويعيد مجدو القديم
***
يلاَّ يا أحلا صُحْبَه
صوت واحد يا أحِبَّه
في صلاتك وإنت ساجد
إدعي الشافي العليم
***
وقريب يابو الشهامه
نباركلك ع السلامه

وتعود من تاني لينا
دايما شاعر عظيم

سماح كمال
06-08-2007, 02:16 AM
أنا إنسان
كلمات : أسامة علي

أناإنسان
وإنته كمان
بنتشارك في نفس الطينه والبنيان
ولاد حوا
ولادآدم
وساكنة ف دَمِّنَا الأخطاء
وكل الخلق فيها سواء
وشئ لازم
ولو مره بكونمخطئ
بعود نادم
ودا طبعي وشئ عادي
ولو ما أندم بكون آثم
وأكون خسران
و أناإنسان
وليه منكونشي م الشجعان
وأخلاقنا كما الفارس
في ساعة الجدبيسامح
ولا يمكن يكون جارح
لا عمرو يخاف ولا يهادن
ولا كان مره عمروجبان
وأحيانا يكون غالب
وأحيانا يكون مغلوب
ما أنا إنسان
وفِيَّاعيوب
وعندي من الخطايا كتير
وكُلِّلي ذنوب
ألاقي الذنببكاني
وأرجع أتوب
ومن تاني
يعود الحب للخلان
و أنا إنسان
وتغلط فِيَّا وأتْحَمِّْل
وأغلط فيكوتِتْجَمِّل
وهيه دي حكايتي معاك
تِرُدْ السيرة م الأول
كتير بغلط
بدون ماأقصد
م أنا مخلوق من النسيان
بلاش تخاصمني على غلطي
ولازم تقبلالأعذار
بقلب محب
مش غدار
عشان إنته كتير غلطان
وأنا إنسان
وكَاتْحَبَّة
وكَبَّرْنَاها بعنادنا
بَقِتْ قُبَّة
شراره ولسه في الأول
نسيبها ليه ونِتْخَبَّا
وكان ممكن فيلحظة تزول
ونقلب حالها لِمَحَبَّه
لكنِّي يا صاحبي في الزحمة
بتبعد عننا الرحمة
وبتعاند
وأنا بعند
تروح لبعيد
وأنا ببعد
وبتضيع الحقيقه أكيد
وإيه هيفيد
عداوة تزيد
ويدخل ليه ما بينا شيطان
و أنا إنسان
لا إنته ملاك ولا معبود
في تكوينا الغلط موجود
ما راح يمشي
تلف.. تدور
وتهدا..تثور
هتلقى القلب يستناك
ويهديلك ورود وزهور
تعالى نبني بيناجسور
وبالإخلاص أنا وإنته
نِصَلَّحْ كل شئ مكسور
ومش هستغنى يوم عنك
ولاإنت كمان
ولو هزعل في يوم منك
هتيجي حاجات تجمعنا
ومَيّصَحِّشْ يكون فيخصام
يزيد حدو تلات تيام
ولو في السكه نتقابل
يا بختو الِّلي بدأبسلام
بلاش يدخل ما بِينَّا عزول
يِزَوِّدْ في القلوب أحزان
وارجع أقول وأعيدتاني
وف الآخر أنا إنسان

سماح كمال
06-08-2007, 02:17 AM
ولا يشبهك في الدنيا حَدْ
(هذا هو محمد رسولنا الكريم
كلمات : أسامة علي

ولا يشبهك في الدنيا حَدْ

ولا لِكْ ما بين الخلق نِدْ

مين أدبك

مين هذبك

سبحانو الواحد الأحد

يارسول الله يا أغلا

من حياتي والوجود

ذكر إسمك يا محمد لو الخلود

وإن حبك في قلوب المسلمين

حب ما يحدوش حدود

حب باقي للأبد

واللي مش عارفين مقامك

إنت مين !!

يكفي بس يكون كلامك

وحي نازل

من إله العالمين

مش رسول مبعوث لأمة

مافي بعدك تاني دين

جيت لكل الكون دا كلو

إنس جن موحدين

جيت في قلبك كل وِدْ

للغريب

والقريب

واللي سَبَّك

واللي حَبَّك

واللي هانك

واللي خانك

بالهداية تدعي ربك

للجميع بكل طيب

يا رؤوف بالناس رحيم

للقلوب إنت الطبيب

وف ميزاتك ما لها عد

مين في كل الكون دا ربو إسطفاه

يوم سرى بيك الإله

فوق براق مخلوق عشانك

لأم معجزات زمانك

من بيت الله الحرام

حتى أولى القبلتين

مسجد الأقصى الشريف

جوه منو الأنبياء واقفين صفوف

في إنتظارك للصلاه بيهم إمام

نادى جبريل الأمين

يا محمد

صلِّي بيهم ركعتين

قبل معراجك لِرَبَّكْ في عُلاه

حتى جبريل المَلَكْ

له مقام معلوم لكنك

في المقام ماليكشي حَدْ

إنته ترقا وتخترق

لكنو لو يرقا إحْتَرَقْ

في رحلتك

للواحد الفرد الصمد

إنت بين الخلق أَوحَدْ

يا نبينا يا محمد

من بداية الزمان

حتى آخر الزمان

مهما قالوا ومهما عادوا

ومهما تاني الحقد بان

بالكلام من شخص جاهل

أو غبي

لا يعرفوا حُرْمِة نَبِي

ولا بيصونوش لحد عهد

وإن أساءوا معاك أدب

اللي ناقصين الأدب

يبقا قَصَّرْنَا في حقك

كل أمة العرب

يوم م خلينا الرساله

كلمة بس في الخُطَبْ

وإحنا فين من سنتو

ليه نسينا إن هوه

قدوة لينا ف دعوتو

قومي يا أمة محمد

فوقي ثوري كفاية لعب

والأمانة خُدِيها جَدْ

يا بلاد المسلمين

زِيلُوا بينكم كل حَدْ

العدا متربصين

ليه ما بينا بنبني سَدْ

آن أوان الإتحاد

إيد في إيد يلا إِتْحِدْ

يلاّ عِدُّوا ما أستطعتم

لجل ما نقدر نُرُدْ

عَمَّر الأرض بحماسك

بينا نبني مش تِهِدْ

دوس على الصعب بمداسك

قوم يا مسلم يلاَّ مد

قوم وخللي الهمة تعلا

شد حيلك يلاَّ شد

فيه نهاية وفيه حساب

في إنتظارنا أحلا وعد

يوم م هنقابلك يا طه

والُّلقا ما في منو بُدْ

ولو أساءوا ليك نبينا

راح يكون الرد رعد





20/02/2006م

سماح كمال
06-08-2007, 02:18 AM
نصيحه
كلمات : أسامة علي

نصحتك يا جاهل
بقلبي نصيحه
إذا جيت تصاحب
تصاحب كريم
وتبعد بجلدك
عن إبن اللئيم
وصاحب مؤدب
وطيب حليم
هتسمع ودانك
لكلمة مريحه
وتمشي مع إبن الأصول المأصَّلْ
لا يقعد يِقَصَّصْ
ويقعد يِفَصَّلْ
لكن لو هتبعد
بجهلك وتعند
تخاوي ال فاسد
في طبعك هيفسد
لا توصل لغايتك
ولا شئ تِحَصَّلْ
وتعمل فضيحه
نصحتك تصاحب عفيف اللسان
وفاهم لدينه
يفيدك كمان
هياخدك في إيدو
لسكة أمان
يساعدك تواجه
شرور الزمان
لكنك يا جاهل
خلطت المسائل
وقاصر في فهمك
وإيه تاني فاضل
وكات النتيجه
بِرَدَّكْ عَلَيَّا
بكلمه قبيحه
لكني مسامحك
بقولها صريحه
ومحتاج حقيقي
بجد النصيحه

سماح كمال
06-08-2007, 02:19 AM
إحنا مش أحفاد فراعنة
كلمات : أسامة علي
لمن يريدون إحياء فرعونية شعب مصر

حورس يا حارس
ع المقابر والرفات
الزمان ده غير زمانك
وأنت جيت في غير أوانك
عصرك إنته راح وفات
جاي تصحي الحب فينا
وللَّا هَتْرَجََّعْ ماضينا
وال أصبح ذكريات
اللي هيقودنا في بكره
واللِّي جَيّ
شخص مِنَّا لسه حَيّ
عمرو م يكون شخص مات
مهما كان حورس عظيم
كان كبير عصرو القديم
بس عايش في ثُبَات
والحضارة
اللي كات على عصركم
والمهارة والشطاره
كلها غرقت معاكم كلكم
واللي باقي مِنُّكُمْ
الآثار ويا القبور
من حجر أو مومياوات
رمز يشهد للي جي من بعدكم
يبقا آية
فيه عظات
يبقا عِبْرَه لكل ظالم
لُه هدايه
مهما يكبر مهما يعلا
كل ظالم له نهايه
وأسألوها الأهرامات
وأسألوا فرعون وناسوا
ياما عاسوا
بالفساد والمنكرات
ياما داسوا
كل ركن من ديار المؤمنين
قَتًلُوا فيها البنين
وأسْتَحُيوا فيها البنات
بد أقول كلام لُه معنى
نفسي كل الكون معايا
يكون سَامِعْنَا
إحنا مش أحفاد فراعنة
وأقروا في القرآن آيات



بسم الله الرحمن الرحيم
{وَإِذْ فَرَقْنَا بِكُمُ الْبَحْرَ فَأَنجَيْنَاكُمْ وَأَغْرَقْنَا آلَ فِرْعَوْنَ وَأَنتُمْ تَنظُرُونَ }البقرة50
***************
{كَدَأْبِ آلِ فِرْعَوْنَ وَالَّذِينَ مِن قَبْلِهِمْ كَذَّبُواْ بآيَاتِ رَبِّهِمْ فَأَهْلَكْنَاهُم بِذُنُوبِهِمْ وَأَغْرَقْنَا آلَ فِرْعَونَ وَكُلٌّ كَانُواْ ظَالِمِينَ }الأنفال54
****************
{وَأَوْرَثْنَا الْقَوْمَ الَّذِينَ كَانُواْ يُسْتَضْعَفُونَ مَشَارِقَ الأَرْضِ وَمَغَارِبَهَا الَّتِي بَارَكْنَا فِيهَا وَتَمَّتْ كَلِمَتُ رَبِّكَ الْحُسْنَى عَلَى بَنِي إِسْرَائِيلَ بِمَا صَبَرُواْ وَدَمَّرْنَا مَا كَانَ يَصْنَعُ فِرْعَوْنُ وَقَوْمُهُ وَمَا كَانُواْ يَعْرِشُونَ }الأعراف137
*****************
{كَدَأْبِ آلِ فِرْعَوْنَ وَالَّذِينَ مِن قَبْلِهِمْ كَذَّبُواْ بآيَاتِ رَبِّهِمْ فَأَهْلَكْنَاهُم بِذُنُوبِهِمْ وَأَغْرَقْنَا آلَ فِرْعَونَ وَكُلٌّ كَانُواْ ظَالِمِينَ }الأنفال54

سماح كمال
06-08-2007, 02:20 AM
حبة فرفشة /ما تيجو نحلم سوا (أحلام ورديه 1 )
أحلام ورديه (1)
كلمات : أسامة علي


قولت أخرج م الفقر شويه
وأحلم أحلامي الورديه
وأحلم إني ملكت الكون
ومعايا كده يجي كام مليون
رحت مغمض عيني ونايم
وف أحلامي سرحت وهايم
وأعيش حبه ف دنيا هنيه
أول حاجه أفكر فيها
أنسى حياتي واللي جابوها
أنسى أصحابي
وأنسى أحبابي
وأقلع توبي وأغَيَّرْ حالي
وأنسى كمان حتى أم عيالي
وصوتها العالي
وأتجوز سوزي على بهيه
أصل بهيه لسانها طويل
وف عز الضهر توريني
نجوم الليل
ولا أشوف نوم
حتى هدومها بريحة التوم
صحة سليمة وست قويه
ولا تعرف حتى الأتيكيت
ولا بترتب عفش البيت
جوه المطبخ
دايما تطبخ
وطبيخها دايما بالزيت
وأنا بصراحة كده مليت
ولا تطبخ غير الملوخيه
وإن جيت مره ف يوم أدلعها
وكلامي الحلو أسمعها
فجأة بتطلع
زي المدفع
إيه دا يا عايب
بص لراسك
شعرك شايب
مش خايف لا ولادك تسمع
وأنا أتحايل إهدي شويه
إنما سوزي
آه يا سلام
حاجه باريزي
بجد مدام
ست رشيقه عليها قوام
لما تشوفها تحلم بيها جوه منام
وقوامها يغري البشريه
ولما بتتكلم ... يا خرابي
صوتها يجنن
بيرجعني قوام لشبابي
وأنسى سنيني
وصحة تجيني
وأرجع فارس
أصلها فرسه بجد عفيه
بتقول ليَّا أحلا كلام
بالعين والحاجب تتكلم
وتسمعني غرام في غرام
وف ضحكتها
يخربيتها
بتسيب ليها مفاصل رُكَبِي
من حلاوتها
وتاخدني معاها لدنيتها
ولا في مثالها في الحنيه
وتْحُطِّلي أجدع برفان
جاكومو وبيير كردان
صنع باريس
وتخليني بجد عريس
وف جنتها أغرق وأهيص
من بعد العشا للصبحيه
ومن النوم تيجي تصحيني
صحي النوم يا حبيبي وعيني
وألقا فطاري
وأنا ف سريري
وبرقتها تَمَلِّي تجيني
وتخليني معاها أمير وتكونلي حوريه
كم أسبوع وأتغير حالها
ولا عارف إيه اللي جرالها
قلبت لي ع الوش التاني
وأما أتكلم مش سمعاني
طول اليوم ماسكه التليفون
وبتتكلم قوي بدلاعه
وأنا بتزيد جويا ظنون
وتزيد وياها العصبيه
وأما بتخرج
لابسه محزق
قوي وملزق
والشعر السايح والنايح
م الهوا طايح
والبصه للجاي والرايح
وبتتعاجب قوي بجمالها
وبتعمللي يا خلق فضايح
وتْسَبَّبْلِي بجد أَزِّيَه
والمكياج على سنجة عشره
والبرفان جامد وشديد
قالبه الدنيا
والريحه فايحه
لو أسأل يا مدام فين رايحه
بتبصلي من طرف عنيها
وتبرألي
تفتح صوتها بعلو ما فيها
إيه يا روح أُمَّك
فوق على دمك
اتْلَمْ لأجيب حد يلِمَّكْ
والشعر السايح منكوش
ولا تشبه أبدا إنسيه
ولقيت نَفَسِي كمان محبوس
أستر يا ستار دا كابوس
فجأه صحيت من نومي لقيت
جنبي بهيه
ست البيت
ست اصيله
وبردو جميله
قولت بهيه كفايه عَلَيَّا
وأتوضيت شكر وصليت
على إن ال أنا شوفتو ف نومي
بس مجرد حلم غتيت
تاني تعود ريمه لطبيعتها
وأرجع لطبيخها أبو تقليه
ودا كان طبعا حلمي الأول
من أحلام آل إيه ورديه

سماح كمال
06-08-2007, 02:21 AM
إهداءإلى الأخت الغالية سماح التي قلما تجد أحد هنا في منتدانا الحبيب لم تقدم له بسمة جميله في صورة توقيع جميل أو صورة لقصيدته تجسدها في لوحة أو في مشاركاتها الدائبة كالنحلة التي لا تكل ولا تمل تسهر الساعات الطوال لتقدم لنا السعادة التي تخالط أفئدتنا عندما نرى هذا المجهود الكبير الذي تقدمه لنا بروح جميله محبة لإخواتها وإخوانها فلها أقدم هذه الكلمات ولا توفيها حقها
وأنا أدعوكم هنا لتحيتها


بقول الله على الإبداع
يا فنانة
قمر طالع
بنور ساطع
ونورو يعم في سمانا
بترسم بالقلم صوره
وصورة بجد شَدَّانَا
رموز اللوحة تتكلم
ومنها الفن نتعلم
وسمعه في السما عاليه
ورنانه
وللجنة ال رسماها
تاخدنا ف رحلة وياها
تنسينا
هموم فينا
تمتع روحنا وعنينا
وزي الساقي للعطشان
لفن جميل بتروينا
كلامنا وسط بروازك
يزيد في القدر والمقدار
وتطلع منك الأفكار
وترسمها معانينا
تزيد في حلاوة الأشعار
لعالم تاني وخدانا
أميرة إنتي يا ست سماح
وتاج الفن على راسك
بإحساسك
بتاخدينا لدنيا براح
وجانا ف أرضنا زرعك
حصادو البسمه والأفراح
وتهدي الكل أعمالك
وفرحانه
وبدعيلك
يطول عمرك
في صحة وخير
ومنصانه

سماح كمال
06-08-2007, 02:22 AM
غريبه
كلمات : أسامة علي

غريبه
ليه في أحوالك غريبة
بَتُوه كتير في سكتك
وتغربيني بغربتك
وتقوليلي إنك حبيبه
و الصديق
لو مشيت معاك طريق
ف النهاية تجرحيني
وأحس جوه ف قلبي ضيق
وتجيبيلي معاك مصيبه
كنت بأحلم زي كل الناس أعيش
في الحياة عيشه هنيه
حلمي ساكن جوه مني
والأمل زغلل عنيه
لما حلمي لقيتو صعب
قولت أسافر
بره اعافر
الفلوس هناك كتير
والأماني ممكنه
والحياة حلوه وجميله
بكل شئ متلونه
والمرتب بالزكيبه
سبت ناسي
وف دروبك روحت اآسي
عشت في الغربة وحيد
كللو بيقول يلا نفسي
لو في عيد
متلاقيش جنبك حبايبك
اللي بيهم يبقا عيد
تقضي طول اليوم في نوم
والهموم عليك تزيد
ولو مريض
مافي لك تتمد إيد
وإن قالولك في رسالة
حد مات
تلقا نفسك من سكات
عين بتبكي
وإنت بين أربع حيطان
مش هتلقى حد يمسح دمعتك
أو يحس بشكوتك
حتى حد من الجيران
والحياة صعبه ورهيبه
المهم أعمل رصيد
للي جاي وإبني الوليد
أمَّا أنا !!!
أنا فين أنا
فين دنيتي
فين صحبتي
والتمن بندفعوا من دمنا
والله عجيبه
إنتي إيه !!
شداني ليكي بمغنطيس
وف دروبك أعيش حبيس
وكل عمري فيك يدوبك كام سنة
عشت الشباب
أدخل في باب
وأطلع لباب
وأجري ورا حلمي السراب
السعاده فين ياناس يا طيبين
في القصور!!
عشت فيها
ومش لاقيها
في الفلوس !!
عندي منها أكبر رصيد
كل عام عن عام يزيد
لما أبص عليه بعيني
مش ماليها
وأما بطمع
مش راح اشبع
لو جابولي عمر تاني
أو جابولي مال قارون
أيوه عارف هو ذنبي
ليه ما طعتش أمر ربي
إني مش مخلوق عشانك
وإنتي مخلوقه عشاني
ليه نسيتو وأفتكرتك
مافي سيرة إلا سيرتك
ليه شيطاني
زَيَّنِكْ لِيَّا وغواني
وأعرف إنك
زي لحظة
زي ثانيه
وتسبيني وحدي أعاني
بعد م جريت طول حياتي
وتوعديني بالأماني
والأماني معاكي طالت
وأستحالت
وتفوتيني مرة تانيه
ليه يا دنيا ؟؟
عشت ليكي
وأنتظرتك تنصفيني
مش لاقيكي
كل يوم أقول كفاية
بتقوليلي لسه بكره
ييجي بكره
ترجعي وتقولي بكره
والنهايه
بكره جايه
وأبقا ذكرى
إمتى أفوق ؟
لما هـ تمر السنين!!!
لما ألاقي نفسي وحدي
والصحاب مش موجودين
والسؤال حيران في راسي
راحوا فين؟
وألقا عمري
قوام بيجري
والدموع ساكنة العينين
والنهاية
كل شئ يمشي ف ثواني
وألقا نفسي
وحدي بدفع الضريبه
وإنتي بردو زي م إنتي
أيوه يا دنيا غريبه



أعتذر مقدما لما قد تسببه كلماتي من ألم لبعض المغتربين
أعادكم الله تعالى سالمين غانمين لأهليكم و لوطنكم

سماح كمال
06-08-2007, 02:23 AM
نهاية حُمَارْ
كلمات: أسامة علي

كلام يِسمْ البَدَنْ
ويئيد في جِسمي النار
في الريف وحتى المُدُنْ
رخصت ليه يا حمار
طول النهار تشتغل
شايل بلاوي كتار
والبيه على البردعه
والضرب ليل ونهار
ومفيش في قلبو رحمة
في الجد أو في هظار
وبعد يوم العمل
مفيش علف في الدار
وإن غصب عنو أشتكا
بيحبسوك في مغار
وإن جيت في يوم فكرت
ولعبت الأفكار
ورَفَضْت عيشة الذُلْ
قالوا عميل مكار
عملوا عليك دايره
وبقيت في وسط حصار
والتهمة متلفقه
خاين حمار غدار
وف وسط أكبر ميدان
يِتْلَمُّوا خلق كتار
قالو يا بَغْل كِبِرْت
ويضربوك بالنار


07/11/2006م

ملحوظة : هذه القصيدة كتبتها بعد قرائتي قصيدة الشاعر الكبير الشربيني خطاب
فأوحت لي بهذا العمل فله أوجه التحية

سماح كمال
06-08-2007, 02:24 AM
مرعوووب ( صرخة قوية جدا إنتبهوا أيها الآباء والأبناء )
كلمات : أسامة علي


مرعوب
عايز أصْرُخْ
أشكي
أبكي
أَكَسَّرْ راسي بقالب طوب
مرعوب
والْرُعْب مكتفني
ومخوفني
من بكره واللي هيحصل فيه
أنا أَبْ وخايف
عندي عيال
ولا عارف أنام
مرتاح البال
أحلام ..أوهام
ودماغ شغال
وتجيني وساوس وهلاوس
أفكار مسكاني ومش قادر
لا أسيبها ولا هيه تسيبني
ولا منها هروب
مرعوب
لمَّا بفكر في إمبارح
كان خير طارح
ونفوس بتحب نفوس
والطيبه أساس
وشباب
كان كلُّلو شهامه ورجوله
وبيحمي بنات الناس
مُتَدِّين عارف ربو
حتى الهلَّاس !!!
كان يِتْدَارى ويِتْخَبَّا
عن عين الناس
علشان معيوب
واليوم
كلنا عارفين
إيه اللي بيحصل لولادنا
في بلدنا
محناش تايهين
عن حالهم إيه
مش عارف معنى الوسطيه
محتار
على أيّ أساس يختار
وبعصبيه
ييروح لشمال
ييروح ليمين
ويضيع في سكك ودروب
مرعوب
م ال بشوفوا بعيني ف قنوات
لشباب وبنات
وفضايح بتهز الدنيا
الواد قتل أُمُّو ف ليلة العيد
ألطف يا لطيف
محتاج لفلوس
علشان الكيف
والأخ مع أختو
بيشوفوا شرايط فاضحه
والوضع مخيف
دي حقيقه بدون تزييف
وحكاوي كتير
مش قادر أقولها ومكسوف
ومِحَنْ وكْرُوب
مرعوب
م البنت ال بتشرب شيشه
تايهه ..
مرووشه..
وإن قولت يا بنتي بلاش
كده عيب
بترد تقولك عايزه أعيش
متفوقنيش
ملعونه يا بنتي دي عيشه
عايشين في فراغ
بحجر وإتنين
أو بسجارة بانجو
وساعات بحشيش
رَوُّشَنَه
سَلْطَنَه
جوه النغاشيش
يعملوا في دماغ
وذنوب في ذنوب
مرعوب
وعيال وبنات مساطيل
متاويل
والضحكه لفوق
ولا تعرف مين البنت
أومين الواد
ماشيين مع بعض ف نص الليل
وحيارا سهارا ف ديسكو
أو في القهوة
يشربوا مشروب
مرعوب
وأنا خايف جدا
طب بكره هيحصل إيه
مش قادر أتصور
ولا افكر
والخوف عمَّال بداريه
خايف على بنتي وعلى ولدي
خايف على مستقبل بلدي
بلدي المحبوب
و بقينا ف غابه
حوالينا تعالب وديابه
بتخطط لينا ف ملعوب
وأنا مؤمن طبعا
مين يقدر يهرب م المكتوب
ويا ماما وبابا
صحصحوا لولادكوا ياناس
وإسألوا على فين رايحين
ومنين جايين
وإصحابهم مين
ونعالج أي عيوب
ودا كل ال اتمناه
منكم هو المطلوب

16/11/2006م


إلى الأخوات الكريمات والأخوة الكرام بصفتي كاتب هذه القصيده ومالك الحق في نشرها أفوض أي زميل أو زميله في وضع هذه القصيدة ونقلها إلى أي منتدى من المنتديات التي لا أتواجد بها بشرط عدم التعديل والتبديل في كلماتها أو مؤلفها لعل الله يجعل فيها خيرا وتنبه الغافلين لخدمة الوطن والدين
أخوكم / أسامة علي

سماح كمال
06-08-2007, 02:24 AM
مَخْلُوقْ بَغْلَطْ ودا تكويني
كلمات : أسامة علي


مَخْلُوقْ بَغْلَطْ ودا تكويني
مع إن الغلطة بِتِكْوِينِي
وأَحَاذِرْ من غَلَطِي وأحاول
بس الأيام بِتْنَسِّينِي
وغْلِطتْ كتير ياما وياما
وبَحَصَّلْ من غَلَطِي مَلامَه
وأعاتب نفسي وأكلمها
مش بس كفايا في خطايا
هي الأخطاء ليه عشقاني
ماشيه ورايا
فوق حبه يا صاحبي ولايِمْهَا
يلَّلا إتْعَلِّمْ
وأتحمل مهما هتتألم
لاكنِّ أنا بغلط من تاني
وأرجع اعاني
أصل أنا إنسان
وضعيف م أملك
غير بس لسان
فيه وحش بيسكن جوايا
ولا بيسبنيش أبدا أبدا
النفس الأمَّارَة بتخدع
ووراها شيطاني
يخدوني معاهم لطريقهم
وأنا أصدقهم
على فين ؟؟ يقولولي على الجنة
روح يلَّلا وبَرْطَعْ وإتمتع
فيها إتْهَنَّا
وأَوُّصَل ملقاش غير بس سراب
لو أسألهم
م يرُدِشْ حَدْ بأي جواب
تايه وحدي
وأفضل غرقان في ندم وعتاب
يمسكني الخوف
حيران تعبان
وبحاول إنِّي مَكُونْشِي ضعيف
مين هَيِّنَجِينِي ويحميني
محتاج لوسيلة تقويني
وأفكر!!!
ملاقيش غير ديني
غير التواب
يقبلني مهما عملت ذنوب
يغفر ويتوب
يفتحلي الباب
مين غيرو بيغفر عصياني
وأرجع من تاني لإيماني
أصل أنا إنسان
مَخْلُوقْ بَغْلَطْ ودا تكويني

14/11/2006م

سماح كمال
06-08-2007, 02:25 AM
أغنيه ( مبروك مبروك آهليييييي) بمناسبة فوز الأهلي
كلمات : أسامة علي


مبروك مبروك
آهلييييييي
ألفين مبروك
آهلييييييي

****

يا بلدنا إلبسي توبك لأحمر
فرحانة عروسة بتتغندر
زمرو قولو بيب
آهلييييي
بيب. بيب. بيب. بييييب
آهلييييي

****

والكاس الغاليه بقت لينا
رجعت لبلادنا وأراضينا
جبتولنا الكاس
آهلييي
ورفعتوا الراس
آهليييي

*****

ويا نادي القرن يا مزيكا
متعب والحضري وأبو تريكه
دول الأبطال
آهليييي
في اللعب رجال
آهليييي

****

يا تاريخ مليان بالبطولات
بكؤوس ودروع ومدليات
من نصر لنصر
آهلييي
ترفعوا راس مصر
آهلييي

*****

كتروا لبلادنا الأعياد
وأصنعوا لتاريخنا الأمجاد
ونقول مبروك
آهليييي
ألفين مبروك
آهليييي



الأغنية متلحنة وجاهزة وعايز مطربة صوتها جميل تغنيها

سماح كمال
06-08-2007, 02:26 AM
وحشني صوت الْوَأْوَأَه
كلمات : أسامة علي
من كام سنة
وحشني صوت الْوَأْوَأَه
بعد السنين
رَبَّكْ أمَرْ
ورزقني نونو تُقُول قَمَرْ
وعنين لها مِتْشَوَّقََه
أول م جات
ست البنات
وسْمِعْتْ صوت الزقزقه
الكل قال
يابو العيال
الله عليها ف حُسْنَهَا
تِشْبه لأبوها وأمها
محلاها آية من الجمال
خرجت خلاص م الْشَرْنَقَه
أجمل عيون
لِسَّه يا نُونُو صُغَيَّره
صَلُّوا على سيدنا النبي
آخر نبي
بيه المدينة مِنَوَّرَه
في اللَّفَه زَيّ الْسِمْسِمَه
بَصَّه لأبوها مِبَحْلَقَه
يا رَبِنَا
تكبر وتبقا أدِّنَا
طَوَّلْ لِنَا في عُمْرَها
واحفظها دايما مُؤْمِنَة
وتْأَدِّي فَرْضْ ربها
وبالإيمان متحصنة
وتسمعي كلام أبوك
ولو الودان مِطَرْطَأَه
سبحانو ربي اللي خلق
في أحلا صوره صَوَّرك
وإن شالله بكره يكَبَّرِكْ
ونْلَبَسِك أجمل حَلَقْ
ونْأَكَلِكْ بالمعلقه
سألوني قالوا الاسم إيه
(سُنْدُسْ) يا ناس
طَبْ يعني إيه
قُولتْ الحرير
ردُّوا وقالوا الله عليه
يجعلها ربي في الحرير مِتْزَوَّقَه
من النهارده بقول خلاص
من عيني هَيطِيرْ النعاس
الأم راحه المدرسه
وأنا هبقا داده كويسه
سندس حبيبتي بلاش عياط
لو تسمحي حبة سكات
وأصْرُخ ياناس
يقولولي بَطَّلْ زَمْزَأَه
هَشِّكْهَا قُوم
غَيَّرْ لها يلَّا الهدوم
والحَفَّضَاتْ
وأغْلِيلْهَا قَبْل الرضعه قُوم البَزَّازَاتْ
بَطَّلْ كَسَلْ
وتنام يا روحي في العسل
وأِحْمِلْ بَقَا



04/11/2006م

سماح كمال
06-08-2007, 02:27 AM
راحت عليكم يا توانسه
كلمات : أسامة علي


متقوللي إيه دا يابو تريكه
دي كوره وللا دي مزيكا
رفعتوا راس مصر بلدنا
لا تقوللي روما و بنفيكا
****
من النهارده خلاص إنسى
راحت عليكم يا توانسه
لا نجم ولا حتى صفاقسي
كللو هيركب في سبنسه
***
بعد التعادل ليه هاصوا
كتاكيت ولسه بيصاصوا
دا الأهلي نادي القرن ياناس
وف وسط ملعبهم لاصوا
***
ورايتنا عاليه ف ملعبهم
وقدرنا طبعا نكسبهم
دا ميعرفوش مين الأهلي
هوه اللي دايما يغلبهم
***
وف اليابان كلاكيت تاني
راح تفرحيبي يا أوطاني
أنا مصري رافع لعلمها
والدنيا كلها شايفاني
وإنشالله بكره ف أمريكا
وقوللي إيه دا يابو تريكه
دي كوره وللا دي مزيكا


11/11/2006م

سماح كمال
06-08-2007, 02:27 AM
متقولشي غير الحق

كلمات / أسامة علي
الحق هوه الحق
والحق إسم الله
لما تقول الحق
تبقى حبيب الله
وقولها وسِطْ الخلق
الحق بينهم تاه
خليها كلمة صدق
إن قولت لأ أو آه
لا تنافق الحكام
ولا حتى صاحب جاه
من أجل مالو وسُلْطِتٌه
وتُغْمُرك عطاياه
قولها لسلطان جائر
ميخوفكشي أذاه
لعندو نفعك وضرك
كلو بأمر الله
قُولها ولا تهتم
الصدق قُولُو نجاه
قولها في كل مكان
دايما لوجه الله
ومُبْتَغَاك بيكون
طالب من الله رضاه
قولها لظالم لأ
يمكن تكون لهُدَاهْ
وتُنْصُر المظلوم
بوقفتك وياه
وأبعد عن الكذاب
حذاري تمشي معاه
نهايتو خزي وعار
والنار أكيد مسواه
قولها لقريب وغريب
إياك تماشي هواه
وإن م أستجبشي إليك
حتى القريب إنساه
أجْرَكْ من الله كبير
في آخرتك تلقاه
العفو والمغفره
للعبد كل مُنَاه
والبُشْرى يوم الحساب
ظِلْكْ بعرش الله

سماح كمال
06-08-2007, 02:29 AM
قلبي اللي ياما دقلك
كلمات : أسامة علي
قلبي اللي ياما دَقِلِكْ
ضاع في الزحام
وعيون سهارى تُبُصِلكْ
بتقول كلام
عِشْقِتْ سهر
ويَّا القمر
وتدور معاكي في الفلك
عشقوا السفر
في سكتك
ولا درب غير دربك سَلَكْ
فاكره اللي كان
بينا زمان
بالحب كنت بدللك
نسهر سوى
وندوب سوى
وكلام محبة قولتلك
وإحنا ال كُنَّا قُرَيِّبِين
هانت عليك
عشرة سنين
قلبي اللي داق
وجع الأنين
قالك بحبك يا مَلَكْ
ومن سنين
مستنظرين
منك جواب
يرجع لنا
حبي اللي غاب
وعنين بتحلم باللقا
بعد الشقا
من دمعهم متجرحين
ولاَّ الأمل فينا أتخنق
وبحبل هجرك إتشنق
والشوق هَلَكْ
أهملتي ليه
قلبي ال عمرو ما أهملك ؟؟
رغم الآلام
والصمت كاتم ع الكلام
لكنو كان
على نفسو ياما فضلك
علشان كده
جاي أَسْأَلِكْ
أنسى اللي كان؟؟
أو حبي لسه مسلسلك؟؟

سماح كمال
06-08-2007, 02:30 AM
أحلا ألْفِيَّه
كلمات : أسامة علي
أنا جاي أهَنِّي وأقول
لحبيب قوي لِيَّا
وببارك المنتدى
واللي حَوَالَيَّه
أحمد يا سيد الأسامي
فَنَّك بيشجيني
شاعر قوي وفنان
والنقب شربيني
مطرك مِزَهَّرْ طيبه
بأحلا ألْفِيَّه
ألفيه لاكنها
بألف ألْفِيَّه
وكلام مِعَلِّمْ كبير
يسكن أوام فِيَّه
ناقد ونقدو جميل
بطريقه علميه
وقصايدو أحلا كلام
بالوزن مَبْنِيَّه
شجره ملانه ورق
بالشعر مَقْرِيَّه
إبداع على موهبة
بالفن مَرْوِيَّه
والجدر ضارب قوي
في أرض مصرية
راضع يا نيل مَيّتَك
ولا تشبهك مَيَّه
ياما عليك غَنَّى
وغناه بقا غِيَّه
تسمع غناه السواقي
تهتف مِلَالِيَّه
بَكِتْنِي يبني بكلامك
والدمع ف عنيه
معجون مَحَبْه وخير
ولامسها بإديَّا
ولافي عندو غرور
وف قلبو حنيه
ناصح أمين للغير
بسلامة الْنِيَّة
سلام مربع يا جدع
زغروطه يا صبيه
الليلة ليلة فرح
نسهر لصبحيه
يا شاعرنا زيك مين
ولا عشرة ولا مِيَّه
وجيت أبارك لأخويا
بأحلا ألفيه
تحية حب وتقدير لأخي أحمد الشربيني بمناسبة ألفيته الأولى فله جميعا نوجه التحية

سماح كمال
06-08-2007, 02:30 AM
هَِنيَّالنا بألفية لأعمالك
كلمات : أسامة علي

هَِنيَّالنا وهَِنيَّالك
بألفيه لأعمالك
بفن جميل بيروينا
بيسعد روحنا وعنينا
وفرحه لما نقرالك
صحيح أعمال
لا يشبها
ولا ليها
بجد مثال
في رقتها
ورشاقتها
وبين قصيدتها تتحرك
تقول دي غزال
ومن قلبك
تشد الآه
تقول الله
على الكلمه ال بتقولها
وتأثيرها ومفعولها
مفيش غيرها
أميرة الكلمه والإحساس
قلم واعد
وأنا شاهد
وببصم ليكو بالعشرة
وصوت واصل لكل الناس
وتغزل شِعْرِهَا موال
ومين غيرك يا ست آمال
كتيره ياما أفضالك
وفي الحوارات
تحاور فيها مهمن كان
أديب .. فنان
ولو كان حتى شاعر جِنْ
تقول ما تِوِنْ
وفن بفن
ودايما فَنَّهَا يغلب
بتعمل م الفسيخ شربات
وفي الفصحى أو العامي
رهيبه ف كل أحوالك
وياما كان
م بينا حوار
نقول أشعار
وكات تغلبني بالكلمة
وبالأفكار
وياما ف ردها كانت
تخليني بجد أحتار
لأن الرد فيه إبداع
وفيه إبهار
ومين زيك وفي مثالك
بتتمكن قوي خالص
من الكلمة
وتعجنها وتفردها
وبتشكلها بالفتحه
و بالضمه
ف صفحتها
تلاقي الكل حواليها
تلاقي الحب والَلمَّه
وأدبك في السما عالي
وتاج العفه راس مالك
وجينا ليكي بنبارك
في عيد الألف بنشارك
وبنقولك وندعيلك
يعينك ربي ويصونك
ف حلك أو في ترحالك
وبنهني
بألفيه لأعمالك



هذه القصيدة تهنئة خاصة إلى الدكتورة آمال كحيل وفاءا منا لعطاءها الكبير في منتدى طيبه
فلها جميعا نوجه التحية

سماح كمال
06-08-2007, 02:31 AM
إهداء : إلى الأخت الغالية سماح النحلة الدؤوبه في طيبه
بمناسبة بلوغها المشاركه الألف ( 1000) أهديها هذه القصيده

ألف رد
كلمات : أسامة علي

ألف رد!!!
حُبْ ..
ضحك ...
فن ...
وِدْ ...
مكتوبين بإيدين جميله
يا أصيله
يللي خيرك
راح لغيرك
وف جمايلك مالها عد
جيت أهني ف أحلا ليله
للنبيله
أصلها مش أي حد
أرضها أرض الكفاح
منبع الخير والصلاح
قدسنا والأقصى فيها
فوق مآذنها المؤذن
نادى حي على الفلاح
جيت بكلمة حب مني
لجل أهني
أختنا الغاليه سماح
مش غريبه
كنت أحس بيها أقرب م القريبه
لو تقرب ليها خطوه
كات بسرعه ليك تمد
أي حد يدق بابك
من صحابك
تلقا دايما لإبتسامه
فيك علامه
وف جوابك
مافي رفض
قالوا عنك
عالي فنك
موهبه من عند ربك
وللاَّ في الأفكار تجنن
ترسم اللوحة ..تفنن
والقلم ينقلها منك
بإقتدار دايما تسد
لقبوكي كتير أسامي
أصل طبعك طبع سامي
سيدة كل الهدايا
يا سفيرة البسمة إنتي
والفرح دايما معاكي
وين م كنتي
بدعي ليكي بكل سعد
وإقبلي مني هديه
ليك يا ورده أحلا ورد

سماح كمال
06-08-2007, 02:32 AM
يا عالم عجايب
كلمات : أسامة علي


غريبه وعجيبه
في شهر الصيام
بقينا يا ساده
بناكل كتير
وآخر بلاده
ودا رُكْن خامس
في صُلْبْ العباده
وأصبح حقيقي
دا شهر الطعام
صيامنا شَعِيرَه
بِحِكَمُو الكتيره
تِرَبِّي النفوس
يا صاحب الفلوس
وتُشْعُرْ بِجَارك
وناس تانيه غيرك
حالتها فقيره
وعايشه ف ضلام
تلاقي ال الصايم
من الصبح قايم
يجهز فطارو
وعامل ولايم
وكام صنف جايب
عشان العزايم
وآخر تمام
وسُفْرَه عريضه
بِتِمْلالو أوضه
عليها يا صاحبي
صنوف الأطايب
تكفي وتفيض
كتير م الحبايب
وناسي الفريضه
يا عالم حرام
وساعة الأدان
يصيبو الجنان
بياكل ويبلع
يِقُولَّك جَعَانْ
وكام صنف محشي
بياكل ويحشي
في بط وحمام
لا فَرْضَكْ تِصَلِّي
ونايم تمللي
مِرَكِزْ دماغك
في مشوي ومَقْلِي
وتاكل كنافه
وقطايف تِحَلِّلي
وإيه اللي باقي
ياعم إنت قُولِّلي
حقيقي إنت عايز
بجد الفطام
وتلقا الشكاوي
في بطنك بلاوي
وبِدَّكْ لبطنك
طبيبك يداوي
وتاكل كُرُنْبْ
وتِضْرَبْ في بُمْبْ
وعايز تنام
وأنا جاي بَقُولَّك
نصيحه واَدِلَّك
نهارك تصومو
وليلك تقومو
وتقرا في مصحف
تِوّاصَلْ ختامو
لحد النهايه
دا أجمل ختام

حلو الكلام؟؟؟



09/10/2006م

سماح كمال
06-08-2007, 02:35 AM
همسات وقت السحر
كلمات : أسامة علي
يا رب إنت الرحيم
وبحالي إنت عليم
والذنب بكاني
***
بِتُّوه كتير خطوتي
تبعدني عن سكتي
وأرجع إليك تاني
***
ياما غلطت يا رب
وميزان ذنوبي طَبْ
والدنيا وخداني
***
ضحك عليَّ الشيطان
وعصيت كمان وكمان
وشبابي غَوَّانِي
***
واقف ما بين إيدك
والقلب بيريدك
يا رب تهديني
***
جايلك وانا باكي
والدمع ليك شاكي
من ضعفي وهواني
***
لو يوم أجيك واتوب
تغفرلي أي ذنوب
جهلي وعصياني
***
تفرح يارب بتوبتي
وتزيد معاها فرحتي
والرحمة تغشاني
***
يا رب يا قيوم
دايم ولا في نوم
وما عداك فاني
***
إنته العليم بيَّا
في الجهر والنيه
إغفرلي نسياني
***
وأرزقنا في رمضان
تعتقنا م النيران
يا رب نجيني
***
إجمعنا ويَّا النبي
وهو دا مطلبي
حبو في وجداني
***
إسقينا من إيدو
أنا قلبي بيريدو
والسُنَّه عنواني
***
موجود في كل وجود
نعمك دي مالها حدود
أغفرلي نكراني
***
عِينِّي على الطاعة
وصلاتي في جماعه
يا رب قويني
***
خليني فاعل خير
وأكون معين للغير
حِصْنِي يكون ديني
***
يارب يوم الحساب
ينطق لساني الجواب
تقللي ميزاني
***
ذكرني يوم أخرتي
أقدر أقول حُجِّتِي
في القبر وحداني

سماح كمال
06-08-2007, 02:39 AM
دعوة للعودة إلى الله طواعية قبل العودة مضطرا
كلمات: أسامة علي

عصيتك يارب
وانا ليك مجرد
ذَرَّة في مُلْكَكْ
صُغَيَّرْ حقير
عصيتك يا خالق
يا رازق يا عاطي
وأمري وحياتي ومماتي بإيديك
عصيتك يا أكبر
من الكون بحالو
وإنت الجليل
ولا نِدْ لِيك أو شبيه أومثيل
وأكبر كبير
عصيتك يا مالك
جميع الممالك
ومُلْكْ الملوك
في بحرك وبَرَّكْ
دا فاني وهالك
وأنت العظيم القوي القدير
عصيتك وتقدر
بأمرك تاخدني
في لحظة إليك
عصيتك وأمري
بين كاف ونون
كن فيكون
عليك شئ يسير
وبعصاك واجاهر
في باطن وظاهر
وتُسْتُر عَلَيَّا
صغيره وكبائر
ولحظة م بندم
بتغفر وترحم
وتصفح لعبدك
ذنوبو الكتير
عصيتك ياربي ومبتنسنيش
ولو عني تغفل
مقدرش أعيش
أنا ملك أمرك
وغيرك مليش
برغم الخطايا
في ساعة البلايا
بقولها يارب
ولو أستغيث مافي غيرك مُجِيرْ
عصيتك وكِرْهِتْ فِعَالِي الجبال
وقالت سماءك وأرضك محال
بياكل في رزقك
ومانع لشكرك
دا موتو حلال
قوام كان كلامك وردك عليهم
وقُولت أتركوهم
لأنك أَحَنْ
علينا ياربي
من حنان أم بولدها الصغير
لا يوم عني تمنع
بذنبي عطاك
ورغم إن عارف
مليش غير سواك
برجع وناسي
وأعود للمعاصي
وبتزيد همومي
وفيها بقاسي
ودايما يا ربي
بحالي بصير
بترزقني دايما
وشكري لغيرك
وبأنسى صلاتي
وهَاجِرْ لنورك
لكنك ياربي
ما تمنعشي خيرك
وأخاف من عبادك
ملامة وعتاب
لو أغلط معاهم
أشوف العذاب
لكنك يا قادر
لذنبي غفور
وكل إم أجيلك
بتقبل رجوعي
وتمسح ذنوبي
بنزلة دموعي
وبلقا الْهِدَايَه
في لحظة ضياعي
ولا تْمِلْ مني
لأنك رحيم
وخالق بخلقك
يا ربي عليم
وتغفر وتغفر
لِنَفَسِي الأخير
وهو الكريم يرد اللي جايلو
برغم المعاصي بيغفر عمايلو
وعارف بإنو ملوش رب تاني
وآخر مطافه إليك المصير

01/09/2006م

سماح كمال
06-08-2007, 02:40 AM
رمضان كريم(أصبر تهون سكتك )
كلمات : أسامة على


ياربي سبحانك
يا مغير الأحوال
مين غيرك المقتدر
يسعد قلوب في الحال
تبات ساعات في نكد
تصبح يروق البال
بعد الضنا فيه يُسْرْ
لو حتى عُسْرَك طال
أُصْبُر تهون سكتك
وإن عدى فيها جبال
دا الصبر فيه الدوا
وكل شئ لزوال

سماح كمال
06-08-2007, 02:41 AM
في ذكرى حرب 6 أكتوبر
كلمات : أسامة علي

سته أكتوبر أكيد
ذكرى غاليه
تاريخ مجيد
يوم ما جيش مصر البطل
خطى القنال
عبر ال قالوا عليه محال
وأسألوا بارليف عليه
وإبن ديان الجبان
م الرمال
عملوا تلال
بس الإراده كات حديد
والكل يومها
هتف وقال
الله أكبر
كلمة بتهد الجبال
عبروا يومها المستحيل
دمروا حصون لإحتلال
وأنهزم جيش إسرائيل
فضلوا ياما يخوفونا
في القنال هيغرقونا
بالنبالم هيحرقونا
بس أبطالنا الجنود
عزمهم دايما شديد
دمهم كان يغلي دايما
في الوريد
أقسموا على الكتاب
لازم يا سينا ترجعي
من مَيَّة النيل ترضعي
يا إما نصر على العدا
أو أكون شهيد
جندك يا مصر
مالوش مثيل
ونصر أكتوبر لنا
أكبر دليل
يوم العبور
يوم م شق الجيش طريقو
خلَّا ليلنا صبح نهار
حَوَّل الضلمه لنور
والهزيمه لإنتصار
هما دول يا مصر ناسك
والجنود قالوها كلمة
م تنحنيش لحد راسك
تفضلي أرض الكنانه
رغم أنف الحاقدين
تتبوأي أعلا مكانه
بين العرب والمسلمين
حامله ف رقبتك أمانه
وإحنا جه دلوقتي دورنا
بالعمل والأجتهاد
وبسواعد الولاد
با لإراده والتحدي
لجل رايتك يا بلدنا
تعلا فوق على كل مَدْنَه
زي م جنودك يا مصر
حرروكي بالسلاح
بالقتال ردوا إعتبارنا
إحنا هنواصل طريقنا
ف كل وادي بالكفاح
لجل ما نحمي إنتصارنا
وإنتي يا مصر ف عنينا
إنتي غالية كتير علينا
وستة أكتوبر أكيد
ربى روح النصر فينا

06/10/2005م

سماح كمال
06-08-2007, 02:42 AM
آهو هَلْ على الدنيا هلالك
كلمات : أسامة علي
م السنة ... للسنة
وأنا بستناك
وحداشر شهر بعيد عني
وأنا مستني
ووحشني كتير
من صُغْرِي زمان
وأنا بردو كبير
ولحبك بلقا القلب الأسير
مشتاق قوي ليك
وأفرح بلقاك
مستني تاخدني من الدنيا
دنيا وفانيه
تغسلني بخيرك وبنورك
دي الراحه معاك
مستني المُفْتِي يقولهالي
أنا وعيالي
ويهل على الدنيا هلالك
والنور في سماك
أفراح في القلب وف الشارع
والنور طالع
من كل مكان
والناس واقفين في إستقبالك
بيغنولك
أهلا رمضان
فرحان قوي قوي إنني تاني
فجرك جاني
يا أعز حبيب
وبَعِدْ الأيام بالساعة
لجل الطاعة
ومواسم رحمة هتغشاني
مش طالب غير بس ياربي
أنعم برضاك
وبشاير فرحه مع قدومك
الكل سعيد
مهو شهر الخير
والخير بيزيد
ونهارك جَدْ وبنصومك
ونقوم الليل
ويَّا التراويح
ذكر وتسابيح
تُهْجُرْ نومك
طاعة لمولاك
موسم رحمه
مش موسم أكل وللحمة
ونهارك مشغول بفطارك
والأكل كمان
أصناف وألوان
والسُفْرَه ملانه ومزدحمه
تبقا الخسران
من عللك قوم يلا أتْخَلَّصْ
الصوم دا دواك
ويا عاصي جالك رمضان
توب وإرجع حالا ندمان
باب توبتك مفتوح ع الآخر
وتصوم وتتوب للرحمن
هتحس ف قلبك بالراحه
والرحمه معاها الغفران
والجايزه الكبرى هتلقاها
الفوز والعتق من النيران
خليها يا مسلم لك عاده
وميلاد لحياتك وولاده
رمضان بيجدد إيمانك
ويكون على طول كده في زيادة
وإشحن قلبك
طاعة لربك
وحَيَاتَكْ تصبح في عباده
وإنسى الماضي
ربك هادي
من غيرو بيملك أمر هُدَاكْ
ولا ترجع تاني أسير لهواك
وأنت الكسبان
وآهو هَلْ على الدنيا هلالك
أهلا رمضان


إلى أخواتي وإخواني الأعزاء أزف إليكم أرق التبريكات
والتهاني بدخول شهر رمضان المبارك أعاده الله علينا جميعا
وقد تغير حالنا إلى ما يرضي الله عنا (إن الله لا يغير ما بقوم حتى يغيروا ما بأنفسهم ) فنحن أحوج ما نكون إلى الرجوع لله تعالى ففي ذلك عزتنا
ومجدنا وهل هناك فرصة للعودة إلى الله تعالى أفضل من شهر
رمضان المبارك جعله الله لنا جميعا شهر رحمة ومغفرة وعتقا من النيران
وكل عام وأنتم جميعا بخير
22/09/2006

سماح كمال
06-08-2007, 02:43 AM
لمين بيشكي اللي إنظلم
كلمات : أسامة علي
مين يشكي مين
ولمين بيشكي ال إنظلم
معقوله غنمه تروح لديب
تشكيلو ديب أكل الغنم
لأ مستحيل
أهل القتيل
يستعطفوا قلب الحجر
عالم غجر
ولا يعرفوا لحظة ندم
دول مش بشر
دول صورة ممسوخه لقرود
دول اليهود
خونة عهود
ولا يعرفوا
صدق الوعود
وغدارين
وبيقتلوا جوه الحرم
ملعون أبوهم في الكتاب
في كل سوره وكل باب
ويقولوا إحنا جنس سامي
والبشر ليهم خدم
أجبن جنود
ويقاتلوا من خلف السدود
وأشد خلق الله عداوة
للعرب والمؤمنين
ولا نَبِي من الأنبياء منهم سِلِمْ
قوام نسيت
مات كام شهيد
في كل بيت
قوام نسيت
إن اليهود دول جزارين
وإسأل في صبرا
وف شاتيلا
ودير ياسين
وإسأل في قانا
ومروحين
وإزاي يكون القتالين
خصم وحكم
وإنت الكبير
بتقول كلام
دايما يِصَحِّي قلوب نيام
وف كلمتك
نصل الحسام
قول إن دي غلطة قلم


هذا العمل كتبته ردا على قصيدة الشاعر الكبير عبد الناصر حجازي رسالة من أم لبنانية إلى جندي إسرائيلي وكتبت وجهة نظري في ذلك
مع كل التقدير لأخي عبد الناصر فله كل التحية

سماح كمال
06-08-2007, 02:43 AM
تصبحوا على خير
كلمات : أسامة علي





ولإمتى هنفضل كده نايمين
ولا بيصحينا صاروخ وإتنين
أو حتى كمان ألفين
والخلق سكوت
وسكوت أشبه بالموت
ولإمتى هنفضل كده ساكتين
وتقع غزة
وتقع بغداد
ولا عاد عِزَّة
ولا دم يفور
ولا حد يثور
والدور الجاي على بيروت
أنا عارف مافي حد هيسمع
لو هرقع ميت مليون صوت
آسف
آسف م الكلمة اللي بقولها
وبتكشف حالنا المستور
راح أطَفِّي النور
تصبحوا على خير
خليكوا نايمين

سماح كمال
06-08-2007, 02:44 AM
يا شاعر قول ولا يهمك
كلمات: أسامه علي
يا شاعر قول ولا يهمك
وفَضْفَضْ للبشر همك
ولا ترجع
ولا تركع
ولو حتى يسيل دمك
وخللي الكلمه زي السيف
تِفَرقْ بين حقيقه وزيف
ونور الكلمة يعلا لفوق
يزيح الضلمه زي الضوء
ودايما حق
آه أو لأ
وقولها بجرأة من قلبك
عشان ولدك
عشان بلدك
يا شاعر قول
كلامك للقلوب موصوف
يِهَدْيِهَا
يطمنها
يشيل الخوف
يواسيها
ينَسْيهَا
يطمن بيها قلب ضعيف
بلاش تجنح
ولا تجرح
وخللي العفة تاج قلمك
يا شاعر قول
وخللي الكلمه تبقى جهاد
وخللي الدم يبقى مداد
وقول الظلم مش دايم
ولا تنافق في يوم حاكم
وإحنا جنود
وواقفين ليكوا بالمرصاد
وإطلقها رصاص وبارود
على محتل أو ظالم
وشيل روحك على كفك
ياشاعر قول ولا تُسْكُتْ
ولا تُصْمُتْ
ولا تهاب يوم من الجبروت
ولا م الموت
ودايما قول وم تخافشي
وأوعى تخاف ولا تقولشي
وأوعى ف مره تبقى جبان
ولا تهرب من الميدان
طب العامي يا شاعر العامي يعمل ايه
وإيه لما يضيع الحق نبكي عليه
وقوم يلا وعللي الصوت
دا صوتك في الحديد هيفوت
ولو كان حتى بس طنين
من الملايين
هيقلق راحة الظالمين
ولا تخاف إلا من ربك
يا شاعر إنته بتجاهد
تعالى بكلمتك ساعد
وحرك في القلوب هِمَه
قلوب من زمان نايمه
دا بيقولك هنعمل إيه
ودا يائس يا حسره عليه
ودا طول النهار قاعد
يا عالم إحنا مش قاعدين على طواله
بناكل تِبْنْ ونُخَاله
وطول اليوم
في لعب ونوم
ولينا مهمة و رساله
تعالوا بكلمه مكتوبه
بلفظ جميل و محبوبه
نصحي الناس
نحرك فيهم الأحساس
ونبني في يوم ولو طوبه
ومش هنعيش على الماضي
ولا هقبل بأي كلام
يقول دي أمة مغلوبه
وبينا نثور
يا كل غيور
على بلادك وعلى دينك
ولا تقبل في يوم ذله
ولا محتل هيهينك
وهندافع بكلمتنا
بأجسادنا وأرواحنا
وهنصون بيها كرامتنا
ولا هنهون في يوم أبدا
وتفضل عالية عزتنا
وأسمى أماني دنيتنا
تكون في الله شهادتنا
وتلبس بدله من دمك
في يوم عرسك
عريس للجنة بنزفك
يا شاعر قول ولا يهمك

سماح كمال
06-08-2007, 02:45 AM
رسالة من شهيد
كلمات: أسامه علي


والدي الغالي
يللي سقيتني محبة بلدي
فاكر كل كلامك لسه
عمري م هنسى
كنت تقوللي
من غلاوتها
بيهون ليها ضنايا وولدي
أصلها ساكنة جوه فؤادي
أنا دلوقتي بقولك تاني
حتى إذا كنت ولد وحداني
موتي عشانها أغلا أمالي
لو يوم جولك
ناس وقالولك
زَفُّولَكْ نبأ إستشهادي
إفرح يابا
وإرفع راسك
قولها لناسك
إبني شهيد لجلك يا بلادي
لجل علمها م يفضل عالي
فوق طوالي
قول على ولدك
ضَحَّى بروحو وصد العادي
طَمِّنْ أمي
إني دفعت المهر بدمي
لعروسه من الحور العين
عمري ما شوفتش ليها مثال
أو يشبه لجمالها جمال
واقفه قصادي
صوتها ندالي
وال بيفصل بيني وبينها
أستشهد في سبيل الله
وأصون أرضي وأحمي حدودي
وأنا بَتْهَنَّا
معاها ف جَنَّة
قولها لكل شباب الأمة
شدو الهمه
فرَّحْ كل الناس وإصحابي
وأحكيلهم عني وعن حالي
وسلام مني يا والدي الغالي

سماح كمال
06-08-2007, 02:46 AM
لبنان
كلمات : أسامة علي


لبنان
مش عارف أقولك إيه
خجلان
من طفل صُغَيَّرْ
مِتْعَوَّرْ
وعْنَيَّا جات في عنيه
على شاشة تليفزيون
وولاد
تحت الأنقاض
وكلاب حواليه
وكمان دبابه
جواها ديابه
عماله بتنهش فيه
صرخاتو ف ودني سمعها
بتنادي
عمال بيمد إيديه
والكفره عليه إتْلَمُّو
بيقول إلحقني يا عَمُّو
والآخر شوفتو بعيني
سايح دَمُّو
ودموعي تشق خدودي
والنار في وريدي
وأنا ببكيه
لبنان
مش عارف أقولك إيه
خجلان
من صمتي المفروض
وقيود
وحديد
في الرجلين والإيد
وأنا خايف
إن الصمت يزيد
والديب السايب يلحقني
ويدمر بيتي وغيطي
في بلادي
ويِسَيَّحْ دم ولادي
ولا أقدر أردو بعيد
والخوف مقدرشي أداريه
لبنان
مش عارف أقولك إيه
خجلان
من نفسي ومنك
ووجودي بعيد عنك
مش أخويا شقيق !!
والأخ بيلقا الأخ ف وقت الديق
لكن إخوانك نايمين
من ياما سنين
مش عايزه تفوق
ولا فيهم حد جرئ
ولا واحد تقدر تناديه
لبنان
مش عارف أقولك إيه
بس يا لبنان
عندك شجعان
ورجال أبطال
يحموا الأوطان
أقسموا بالله
يا شهادة يا إما النصر
قدام فرعون العصر
الواحد منهم
بيساوي مليون
ويا باغي يا طاغي
مهما بصواريخك هتدمر
راح تلقا سواعد رجاله
وبتشمر
وهترجع تاني تعمر
ويا حسن نصرالله
بكرامة رفعت الراس
ومعاك
مش ممكن يوم تنداس
يا أسد حزب الله
وجنودك بردو أسود
والوعد الصادق ممدود
والنصر الموعود
لجنود الله
أتوكل على مولاك
متبصش تاني وراك
وبشاير نصرك هَلَّه
وساعتها يالبنان
تنسى الأحزان
وتهز عروش الطغيان

سماح كمال
06-08-2007, 02:46 AM
قصة أبو الأبطال فارس عودة
كلمات : أسامة علي

إسمعوا يا ولادي
يا أحفادي
هحكيلكم قصة
وأحكوها لكل الناس
من كل الأجناس
عن طفل صُغَيَّرْ
والسن
عمرو ما بيزيد
عن أصابيع الإيد
بيعيد للأمة تاريخها
وإيمان بالعودة أكيد
وبيصنع فجر جديد
طال ليلو علينا
وسواد من صنع إيدينا
لكن!!!
راح يرجع تاني الضَيِّ
ببطولة فارس عوده
النصر قريباً جَيِّ
مهو فارس نوع م الأبطال
نادر تلقاه
ولا تلقالو زَيِّ
الهيئة هيئة طفل
لكن جواه
مارد جبار
رافض يتهان
من ندل جبان
ولا عمرو يسيب التار
فارس مش صنع بلاد بره
مش صيني
أو في مشاة البحريه
ولا حتى ياباني
فارس من طيني
بذرة فلسطيني
مفطوم على ذكر الله
مهي أصل البذره أصيله
وقبيله من قلب قبيله
والجد صلاح الدين
فاكرين!!!
اليوم أهو زي إمبارح
والجذر ما ماتشي
وبيرجع تاني طارح
ونشم روايح
غزوة حطين
فارس
كان زيكوا يا ولادي
بيحب اللعب
وسط أصحابو وأحبابو
وف حوش مدرستو
على ضهرو يشيل شنطته
وف جيبها كتبو وكراستو
لكن في الجيب التاني
تلقاه مليان بحجاره
في الشارع
أو في الحاره
كان يلقا العسكر جاي
عاملين غارة
يضربوا في الشعب الأعزل
ويطاردوهم بقنابل
ومدافع وبطياره
وبرغم دا كلو
فارس كان عندو جساره
ولا بيخاف م الموت
وف قلب الصعب يفوت
وسلاحو الطوبه
شاف الأعداء
وديابه
نيمالوا ف قلب الدبابه
أتقدم فارس ولا همو
وبيلعن ابو صهيون
وبينده جندي جبان
ويهدد
راح أضرب في المليان
أتقدم فارس أكتر
ولا بالتهديد إتأثر
فارس مش كلب بيعوي
بيخاف من صوتو الديب
لكن فارس له قلب حديد
وأشد صلابه
وبيملك عزم شديد
أكتر بكتير
من أسد الغابه
لايخاف ولا عمرو يهيب
الجندي الخايف جوه الدبابه
مرعوب من طوبة فارس
وجه مدفع دبابتو
وبكل غرابه
إنهال بالقصف عليه
أتاريه
شايفو مارد وكبير
وسلاح الطوبه خطير
وأستشهد فارس
أتْفَجَّرْ
ورفاقه تِكَبَّرْ
ولأول مره رفاقوا تشوفو بيضحك
والوش منور
والعود الأخضر
خرجت منو
مليون مليون بذره
في الأرض الطاهره
تزرع وتْعَمَّرْ
ودي روحو الطاهره تنادي
أصمدي يا بلادي
ربنا وياك
وهيطلع مليون مليون فارس
الكل فداك
ويا أم كل شهيد
إفرحي زغرطي
إوعي تولولي
كبري هللي
بقدوم العيد
مين فيكو يحب يكون فارس
لبلادو الحارس
ويقدم روحو رخيصه
لجل م تعلا راية الدين
وإدني يا مآذن
على كل جوامع بلدي
إدني للفجر ال هيرجع
وهيطلع
بشهادة ولدي
وأندهي جيش الأحرار
واولدي ثوار
هللي كبري
وأصبري
عمرنا ما هننسا التار
والحق لأهلوا يعود
سامعين يا يهود
يابشر ممسوخه قرود
راجعين
وكتاب الله راجعين
ودا عندي يقين
ولا عندي ذرة شك
والقدس هيرجع تاني
بآلاف الشهدا
أو عشرات الملايين
لكننا مش خايفين
وتهون الدنيا
لجل الجنة تهون
لجل القدس تهون
لجلك يا فلسطين


أمة تمتلك أطفال مثل فارس عودة لن تهزم بإذن الله
وبالصبر تبلغ ما تريد

01/07/2006م

سماح كمال
06-08-2007, 02:48 AM
قهوة ساده
كلمات : محب

قهوة بلدي
ولاَّ ساده
ولاَّ سكرها زياده
هاتلي يبني أي حاجه
مش هتفرق
قبل ما أغرق
قبل م أبدأ رحلتي
ويا الهموم
والنهارده
زي أمس
زي بكره
زي أي كل يوم
ياما كنت زمان بفكر
إني أَغَيَّرْ
يمكن أقدر أكون شعاع
طالع مابين
كوم الضياع
بس للأسف يا ساده
الفساد بقى فينا عاده
م الصُغَيَّرْ للكبير
شئ تشوفو
بنن عينك
عند باشا
أو غفير
الفساد مش بس فوق
في القياده
بُصْ تحت في أي حته
هتلاقيه مالي الشقوق
بين ولد ويا أبوه
ولاَّ بين أخ وأخوه
حتى بين الجار وجارو
ع الأصول
الخلق جارو
كُلُّو بيقول يلا نفسي
والشعار المصلحه
مهما كان
بسببها ناس مِتْجَرَّحَه
واللي صابنا
والهوان اللي إحنا فيه
كلُّو مِنَّا وبسببنا
قوم يا شعب
يلا فوق
يلا غَيَّرْ من عاداتك
لما تِصْلِح إنت ذاتك
لما تتغير صفاتك
تمتلك دايما قرارك
والمدد من عند ربك
لمَّا يبقى الدين شعارك
شرع ربك
ليك كرامه
وشرع غيرو
فيه ندامه
ولما نبقى طيبين
يبقا قائدنا الأمين
زي ما إحنا نكون نلاقي
يعني هيكون جاي منين
قوم يا شعب
يلا فوق
وأرفع الرايه لفوق
راية الإسلام وعزك
فيها فخرك
فيها مجدك
مش هَتِخْسَرْ حتى دُنْيَا
والنجاة يوم القيامه
و اللي واجب تعملو
حسن العباده
أو خلاص بقى مبدأك
خليك في حالك
والشعور آخر بلاده
لحظة يبني
جِبْهَا ساده

سماح كمال
06-08-2007, 02:53 AM
علمني حبك سيدتي ( 3 )

كلمات: أسامة علي



علمني حبك سيدتي

أهوى الطيران

أسبح بفضاءك وأغني

لحبيبة قلبي

وأفوق بصوتي الكروان

أتخطى حدود المعقول

واللا معقول

يَلْبِسُنِي حبك كالجان

يأتيني عبيرك في صدري

أنفاس تجري

وتداعب أنفي

كالمسك وعطر الريحان

تحملني موجات هواءك

كبساط سحري

يطوف الأكوان

أدنو من سطح القمر

أسلك غابات الْشَعْرِ

يأخذني طريقي إلى الثغر

وأمر بكل الوديان

وسهول وهضاب

تأخذ بالألباب

وعيون تحرسها الأهداب

وجمال في كل مكان

وحرير ناعم

وربيع دائم

للجنة يحملني

أقطف زهر البستان

يبهرني النور

يسطع في عيني

كبنات الحور

عزري فتان

فالحب شعور

لا يشبهه على الأرض شعور

يهدأ ويثور

مثل البركان

إنْ طرق الباب

يدخل من غير إستئذان

سماح كمال
06-08-2007, 02:54 AM
آسف حقيقي

كلمات: أسامة علي



آسف حقيقي

إذا قلت كلمة بتجرحك

قلبي خدعني وغشني

فهمني إن الكلمه دي هتفرحك

وحكالي ياما كتير قلوب

تعشق حروفها تحبها

م الكلمه دي تسهر تدوب

والنوم يطير من فرحها

وأنا يا حبيبتي بقولها ليك

بستسمحك

سامحيني على كل اللي كان

واللي جرى مني زمان

ودي غلطة ممكن تتغفر

أنا مش ملاك

لكن بشر

قلبي الصغير خدني ليكي وشدني

وجريت معاه ولا همني

صدقتو ليه ؟؟

دي غلطتي

من فرحتي جريت عليه

مقدرش أعاند في القدر

وصدقيني

مش هقولها مرة تاني

ومن كلامي هَرَيَّحِكْ

يا قلبي قوم

كفايه نوم

من حلم بإيديك تصنعو

حبك سراب

جاك الجواب

قوم يلا بينا نودعو

شئ مش غريب

مَحْنَا يا عين

متعودين على السفر

وعلى الوداع

ونفوت حبيب ورا حبيب

بس الغريب

شئ مني ضاع

يعني إفترقنا من هنا

هبعد أنا

وخليك مكانك .. مطرحك

آسف بجد

على كلمة مني بتجرحك

سماح كمال
06-08-2007, 02:55 AM
موال أهديه للشاعر الكبير أحمد الشربيني

كلمات : أسامة علي



أنا بقول كلام ع الرجال

قَرًبْ يا نور عيني

رجال كلامها درر

في الشعر يرويني

تقراه وتسمع وتتمتع

تقوللو من تاني

أول م عيني تشوفو

في بيتي ويجيني

وألمح قصايدوا وحروفو

وبفنو يشجيني

يبان عليا الفرح

وأهجر دواويني

طبيب الحكمه والكلمه

بيها يداويني

فارس مجاهد وحارس

بسلاحو يحميني

وسلاحو ورقه وقلم

على أرض ميداني

عرفتوا مين البطل

وللا أقول تاني

أظهر يا شاعر وبان

شرفتنا يا أستاذ

يا نجم يا فنان

يا أحمد يا شربيني



*****



ياحلو ريحتك فيك

والفن رباني

بتقول كلام فيه دُرَرْ

ع الحب رباني

وكلام ملوهشي مثيل

للدنيا نَسْانِي

لو قلت هم يا جمل

في وفاءو إنساني

وإن طفت ع المتاريس

تركن وتنساني

وإن كنت في المفترق

سيرتك على لساني

وفي العشاء الأخير

اللذة واخداني

وإقرالو حضن المرضعه

في حب أوطاني

شاعر وشعرو جميل

وف عشقو خلاني

أسير لفنو وكلامو

مزيكا ومعاني

وبقول بأعلا صوت

والدنيا سامعاني

فنان وفنو أصيل

يتغنى في أغاني

أصلي هويتك وحبيتك

يا أحمد يا شربيني

سماح كمال
06-08-2007, 02:58 AM
يا أيام العمر قوليلي

كلمات : أسامة علي





يا أيام العمر قوليلي

ليه عماله بتجري وليه فايتاني

ليه بتمدي الخطوة

وللأحزان سيباني

كل م أقول آهي بكرة هتيجي صفحة جديده

جايبه معاها البسمه ولحظة سعيده

ألقا الصفحة أِتْعَبِتْ زي إمبارح تاني

يا ما حلمت زمان وأنا كنت صُغَيَّرْ

وأستعجل أيام العمر وعايز أكبر

بدي تعدي بسرعه قوام

وأجري معاها للأحلام

لكن كل ما كات بتعدي بتصعب أكتر

ليه يا أيامي بسرعه مشيتي وصدقتيني

فين أيام العمر الأخضر

أمي وأبويا كانوا شايلين الهم بدالي

واللي شاغلهم يسعدوا حالي

وأنا ولا هنا ولا شئ على بالي

كنت بطير زي العصفاير

ولا فيه بال مشغول بيفكر

لما تمر عليه ف بالي

أو في خيالي

أو يحكيها صحابي ف قعده

أو أتذكر

ألقا دموعي غصبن عني

نزلت مني

وأنا بَتْحَسَّرْ

إهدي شويه يا خطوة عليه

أنا مش ناقص حالي مكدر

ليه انا كده مش زي الناس

ولاَّ الناس كلها بتعاني

الدنيا مليانه مآسي !!!

أو مآسيها بس ف راسي ؟؟

حد يقوللي ويطمني

إحساسكم من حال إحساسي ؟؟؟

بدي حكيم للحالة يِفَسَّرْ

ليه انا كده مهموم بهمومي وهم الناس

واللي بيحصل لِيََّا وغيري بيه بتأثر

حِنِّي عَليَّا ف يوم وتعالي

بخبر يمكن يسعد حالي

أمواج حلمي تيجي على شطك ليه وتتكسر

ياما قالولي بدك تبقا سعيد من وسط الناس

تلقا الدنيا تِرُخْ عليك بدهب أو ماس

لازم حبه يا صاحبي توطي فيها الراس

أوعى في يوم تتلفظ حتى بكلمة حق

وأوعاك مرة ف يوم تنطقها قُولِة لأ

وإنسى إنك يوم كان عندك فيه إحساس

يعني أعيش على ضهر الدنيا ميت حي

وتعيش فيها حمار وخلاص

ودا مش ممكن يحصل أبدا

الموت أهون

من دي العيشه ولا عمر أقدر

مهمن كانت كل آلامي

هو طريق واحد قدامي

لجل أكمل أنا و أتحمل

لازم أصبر

وف كل الأحوال أنا هدعي

وأسأل ربي وأحمد وأشكر



النشر الأول





26/03/2006م

سماح كمال
06-08-2007, 03:00 AM
فداك نفسي يا رسول الله

كلمات : أسامة علي



مهما قالوا عليك يا طه

يا ختام المرسلين

إنت جوه قلوبنا ساكن

رغم أنف الحاقدين

ذكر إسمك فوق مِدَوًي

ع المآذن من سنين

ذكر إسمك في السما

رَفَعُو رب العالمين

حتى في عصر الجهاله

لقبوك صادق أمين

وإما جات ليك الرسالة

إبتدا الحقد الدفين

رغم إنك جاي هداية

رحمة للناس أجمعين

بس نار الحقد باقيه

في قلوب الكافرين

كلب فاسق

أو منافق

م الكلاب المسعورين

م اللي هايم

كالبهايم

لا لهم ملة ودين

خاضوا في سيرتك يا طه

يا إمام المتقين

إنبحوا يا كلاب يا ضاله

صحوا يللا المسلمين

فَوًقُونَا من ثُبَاتنا

عرفونا أنتو مين

إنتوا جيش الغدر راجع

بالصليب متسلحين

وإنتي يا أمة محمد

ردي جاوبي إنتي فين

قومي دافعي عن نبيك

ردي ظلم الظالمين

إحنا أمة لسه باقية

فيه حياة مش ميتين

يا شباب الأمة لازم

تثأروا م الكذابين

دمنا ف عروقنا يرخص

للرسول طه الأمين

ومهما زاد الغرب حقدو

وبحضارة الدعارة غرقانين

إحنا بالإسلام هنفضل

بالنبي وبسنتو متمسكين

وإنت سيد الخلق طه

عشق نفسي ومنتهاها

سيد جميع المرسلين





صلى الله عليك وسلم سيدي وحبيبي ونور عيني وجلاء همي وذهاب غمي

والهادي البشير والسراج المنير المبعوث رحمة للعالمين في الأولين والآخرين وفي الملأ الأعلا إلى يوم الدين

سماح كمال
06-08-2007, 03:00 AM
الوفا هوه الوفا

كلمات : أسامة علي



الوفا هوه الوفا

عمرو ما كان علة

موجود ما بين الناس

والصحبه والشله

ممكن يكون بيقل

ما بين صديق أو خل

لكنو يوم بيعود

يرجع بنورو يطل

وبنعشق الطله

وإن خانك إنت صديق

فاتك في لحظة ضيق

إنته تكون وافي

بكلامك الدافي

وتلتمسلو العذر

يمكن يكون في الأمر

فيه شئ عليك خافي

لا فيه غلط بيدوم

ولا حد فيه معصوم

م تخليهاش ذِلة

وإن يوم تلاقي جحود

بين البشر بيسود

بين الولد وأبوه

والأخ يكره أخوه

والصدق م بينصان

بالكدب والنكران

يبقا عليه العوض

الجتة صابها المرض

ويضيع معاها الوفا

بين البشر خِلًة

والدين كمان بيضيع

ولا يبقا فيه مِلًة

أما الوفا ف شرعنا

عمرو ما كان علة



ملحوظة : هذا العمل أخذت فكرته من عمل أخي أحمد إبراهيم ولو صوت الأنين يطلع فله أوجه التحية

سماح كمال
06-08-2007, 03:03 AM
أيوه أنا حبيتك إنتي

كلمات : أسامة علي



أيوه أنا حبيتك إنتي

لما شوفتك

جوه قلبي إنتي سكنتي

وما أكون وياك أحس

بشئ غريب

إنني زي العليل

وإنتي الطبيب

أصل قالو الحب ساحر

يسحرك والحب قادر

يمحي كل الحزن فيك

يزرع البسمه ف عنيك

حتى إسْمِكْ

وللا سِيرْتِكْ

أو أشوف

في خيالي صورتِكْ

ألقا دنيا

غيرها تانيه

والهموم هربت ف ثانيه

وهيه دي وياكي حالتي

وللا لما أقرا ف كلامك

أنسى كل الدنيا جنبي

وألقا قلبي

جوه منو نار غرامك

واللي زود نارو حبي

هوه إنتي

جيتي للدنيا عشاني

نص يسعد نص تاني

م إحنا واحد

في الحقيقه والمعاني

لما قلبي يدق عندك

راح تزيد حُمْرِة خدودك

وإما يعلا عندي نبضك

دمي راح يجري في وريدك

يا مليكتي

إيوه إنتي بتسحريني

لو تغيبي يزيد جنوني

اللي قرب قلبي ليكي

دنيتي ما بين إيديكي

حتى وإنتي بعيده عني

إنتي أقرب حد مني

والسعاده متكتملشي إلا بيكي

يا حبيبتي

حب يجمع بين قلوب

بين غريبه وبين غريب

نظرة يمكن

أو ببسمة

أو تخش القلب كلمة

هو أمر الحب فعلا

شئ عجيب

وإنتي للعاشق ملكتي

كل شئ أمرو يهون

حتى وسط النار أكون

لو طلبتي

أيوه أنا حبيتك إنتي



17/01/2006م

سماح كمال
06-08-2007, 03:05 AM
وحبيبتي بين إيديا

كلمات : أسامة علي



وحبيبتي بين إيديا

وعنيها بصه فيا

قالت لي يا حبيبي

يا دنيتي ونصيبي

اللي بتمنى أنولو

أفضل عمري بطولو

ساكنه ما بين إيديك

وتضمني بحنانك

وأفضل معاك زمانك

وأسمع صوتك ينادي

وبإسمي يقول تعالي

ويرد عليك فؤادي

وبكل الشوق يجيك

وأتمنى يكون مماتي

وتنتهي حياتي

وأنا بين حضنك يا غالي

وآخر كلمه أقولها

أنا.. مليون بحبك

طهرني ببوسه منك

في شفايفي من شفايفك

ماتْسَبِلٍيشْ عيوني

سيبهم بصين عليك

وضمني لِسِدْرَكْ

تغسلني دموع عنيك

وكفنني بتوبك

داريني بكل جسمك

قبري ما بين حيطانك

وأدفني جوه قلبك

دوبني تاني فيك

لقيت بركان حنان

جوايا بيحتويها

ولحضني باخدها جامد

وبشوق خايف عليها

والدمع جوه عيني

متزوديش شجوني

يا حبيبتي أنا كلي ليك

وإنشالله يارب دايما

معايا طول سنيني

وتنوري حياتي

ولا تبكي عليكي عيني

وأديك عمري هديه

وبالغالي أشتريك

م أنا ليكي وإنتي ليا

وإيه في الدنيا باقي

لو غبتي عن عنيا

ومعاكي اليوم سنين

والدنيا تهون عليا



4/01/2006م

سماح كمال
06-08-2007, 02:43 PM
أخواني وأخواتي الأفاضل كل عام وأنتم بخير بحلول عيد الفطر المبارك ومن العايدين الفائزين


خليك قوي
كلمات : أسامة علي



خليك قوي

مع القوي

وأتحدى ضعفك بالإيمان

وبصبر وشهامه وإباء

خللي الرضا

ونور الهدى

دايما معاك متجمعين

مع اليقين

هيكونوا ليك أكبر وجاء

ولا ترضى لحظة بالهوان

مهما كان

واللي حصل في يوم زمان

بكره تلاقيه

ذكرى وما كان

زي الزبد بيروح جفاء

كل وقت قول يارب

طاعة من قلبك بحب

أهو دا الكلام اللي يقولوا الأقوياء
يتحدى أحداث الزمن
مهمن تقابلو فيه محن
متوكلين على ربهم
رب السماء
أما الضعيف
راجل خفيف
بتهزو ريح وتطوحو
تلقاه في لحظة تشوفوا فوق
وف ثانيه غير مطرحو
مش مستقر ف أي حال
حبه يمين
حبه شمال
والدنيا سهل تمرجحو
كاره حياتو ودنيتو
فقد الأمان في سكتو
واليأس ممكن يدبحو
طب ليه وأنا عندي الحلول
الصبر درعك في الحياة
ويا العمل لازم معاه
كل اللي تتمناه تنول
وبالأمل مع الرجاء
وتناجي ربك بالدعاء
تبقا عرفت الحل فين
ربك كبير
بيلبي دعوة مستجير
سبحانو بعبادو بصير
من غيرو يرفع عننا
سوءالبلاء

ومع الحبيب

خليك قريب

هتهون عليك كل الخطوب

دا كلاموا ليك

بلسم وطيب

من نبعو أشرب وأرتوي

وخليك قوي
وآهو دا الكلام اللي يقولو الأقوياء

سماح كمال
08-09-2007, 12:53 PM
ويا حوَّا أنا آدم

كلمات : أسامة علي

مَنِيش طمعان

أنا ف مَالِكْ
ولا طمعان أكون مالك
وعَنْدِي كتير من الأطيان

أكون واحد من الأعيان
أنا طمعان أكون مَالِكْ
لقلبك بَسْ
ولا حلمي أكون سلطان
وعَنْدِي مِنْ النعيم ألوان
أكون حاكم على الدنيا
أنا حلمي في يوم قَلْبِكْ
بقلبي يِحِسْ
وهُوَّه الكون دا غير كونك
وأنا العاشق ومجنونك
ونظرة حب ف عيونك
كَدَوَّامَة بتبلعني
وفي بحرك أنا الغرقان
وانا الحاكم وأنا المحكوم
وأنا إمامك
وأنا المأموم
أنا الراهب في محرابك
وأنا في معبدك ناسك
وأنا شعبك
وأنا ناسك
أنا العسكر وحُرَّاسِكْ
على حدودك أنا السهران
وأنا الجاني
ومَجْنِي عليه
وأنا المسجون
وسجني إختارتو بين إيدك
مدى عمري
أكون عايش مع السجان
أنا نسمة هوا تجري في أنفاسك
أنا اللمسه في إحساسك
وإنتي الساكنه في عيوني
وإنتي الملكه على كوني
وقلبي التاج على راسك
وانا وَنَسِكْ
وأنا البركان
وأنا قِصَّة
وأنا حكايه
بقولهالك
يروق بالك
وأنا الضحكه في ليل أحزان
أنا غُصْن إنزرع فيكي
وأنا النهر اللي يرويكي
ويسقيكي
وِبِيّزَهَّرْلِكْ البستان
وأنا الموصوفلي إبريقك
لقطرة شهد من ريقك
أنا العطشان
أنا المشتاق
بيجذبني سنا نورك
ومين غيرك
يِهَدِّي الحب والأشواق
بِضَمِّةْ شوق وحِنِّيَه
تداويني من الحرمان
أنا ال بَحِنْ للماضي
وللذكرى
تاخدني فكره ورا فكره
وترجعلي ليالي زمان
أنا ليلك
أنا نهارك
أنا عِشِّكْ
أنا دارك
أنا الهمسه
أنا اللمسه ال بتدوبني فيك دوبان
أنا الضحكه ال بتكركر
أنا السكر
أنا ال بَحَلِّلي أَيَّامِكْ
وأحلامك
أنا طِيبِكْ
أنا مسكك وأنا الْعَنْبَرْ
وأنا الروقان
ويا حَوَّا أنا آدم
ومهما أبعد بعيد عنك
تشديني
وبالفطرة بميل ليكي
بأدوب فيكي
سكن إحساسي وشجوني
وأنا إنسان
وغير قلبك
وغير حبك
منيش طمعان

4/9/2007م

سماح كمال
08-09-2007, 12:53 PM
النهارده بقا جايبلكوا حكايه إنما إيه
كان ياما كان في سالف العصر والأوان
قصة راجل ومراتو معكننة عيشتو وحياتو
تيجوا نسمع الحكايه ونقولها من البدايه

عم رخاوي
راجل غاوي
عاشق لعب الكوره وهاوي
بيشجع مدرسة الفن
من يومو وهوه زملكاوي
جاي يحكيلي
وبيشكيلي
قالِّلي مراتي وسط صحابي
جَايَه تندهلي
وبصوت عالي تقوللِّي ياخويا
راحه بيت أهلي
عندها عاده

ف كل ولادة أي هلال
عايشه معايا على دا الحال
قولت طب أعمل إيه يا جماعه
رد كيوان
قالِّلي نصيحه
دُغْرِي صريحه
لو تهرب م البيت لو ساعه
روح أطلبها في بيت الطاعه
على السودان
قالت لأ إلاَّ السودان
أَهْوَنْلِي أشرب زرنيخ
وللاَّ أروح حتى المريخ
بَكْرَهْ لإسود
وأَكْرَهْ لأزرق
وبحب حَمَارْ البطيخ
ولا أروحشي في يوم السودان
على طول بالفم المليان
ردُّوا إصحابي
إيه يا رخاوي
على ايه ناوي
روحت عاطيها تلاته يمين
تاهت مني ف غمضة عين
ولا نطقت صوت ولاَّ صوتين
ردوا عليها
قالوا تستاهلي
علشان تتحرمي من تاني
ترفعي صوتك
يوم على جوزك
أو تقوليلو أروح بيت أهلي
وتخليك هنا في الخلفاوي
ودي كات قصة عم رخاوي
وإن كان فيه في العمر بقيه
راح أحكيلكو أحلا حكاوي

:(119):
:(6):
:(21):

سماح كمال
08-09-2007, 12:54 PM
إيه يا عم أحمد( رد على قصيدة أستاذي أحمد الشربيني إلى آمال وطيبة )
كلمات : أسامة علي
إيه يا عم أحمد
جرى إيه مالك
بِتْطَوَّحْ بيمين وشمالك
مقهور ليه يا كبير العيلة
فاير دَمَّك
من قرايبكوا وولاد عَمَّك
وزمالك وإخواتك بَرْضُو
بَقَا معقوله
كده بسهوله
تزعل قوي كده من أَمُّولًه
يادي العيبه
والله بجد دي حاجه غريبه
لأ وكمان زعلان من طيبه
وأنا بستغرب
ليه دا بيغضب
م الحريفه واللعيبه
شوفتي يا طبطب
إمال بقا لو خسرو بطوله
شايفين حالكو
وكل أحوالكو كده بالقوه
وال أنا بِدِّي أقولولك هَوَّه
عمر ما كان أبدا لأمال
لها سيد يوم كان إسمو الأهلي
سيدها يا عم الحج هلال
أصلو سوداني
ليعيب جدا
رجليه شوله
ليعيب كان بالفطره تمللي
لعبو تجللي
ويصهلل على أي نجيله
واللي فاكرها الذات العاليه
طلعت فاضيه ياعم وخاليه
عاملين جُوَّه علينا أسود
واما يلاعبوا الناس السود
تتزلزل على طول مفاصلهم
والشياطين تهرب م الغوله
قوللي يا صاحبي
ليه زعلان من أخوك زيدان
كنت في حكمك دايما عادل
هنا وهناك وف أي مكان
فيه إيه فاضل
دلوقتي مش طايق عادل (السندباد)
حتى أسامه أخوك الغلبان
دي قلوب بيضه
عمر صفارها ف يوم ما يبان
ماشي ياعم أحمد مقبوله
ومهما يكون محبوبنا في ورطه
ترتيبو مش أول في الخارطه
أو حتى بيكسب بالتيله
وقميصنا الأبيض دا شعارنا
مش هتنازل أبدا عنو
لو أحوالو بستين نيله
راح نتحمل ضغط وسكر
يمكن أكتر
وف يوم راح تصحى الرجاله
نتخلص من كل الخونة
واللي عددهم بس كماله
قولي يا طبطب
بيب بيب
وإنتي كمان قولي يا أموله
بيب بيب
غني لفنان مصر الأول
الموهوب كابتن شيكابالا
كل الناس تشهدلو بِفَنُّو
واللي بينكر
أبو عين حوله
تلميذك جاي وبيناغشك
أستاذي وكبير العيله


(وزمالك وإخواتك برضو) المقصود وزمايلك وحزفت الياء للتفخيم
:(119):

سماح كمال
08-09-2007, 12:55 PM
البنت أم عيون سرحانه
كلمات: أسامة علي

البنت أم عيون سرحانه
لو بَصِّيتْ لحدودها
دايما مَسْتُورَه
ولا بتشوف لها عُورَه
وتْحِسْ ف وشْهَا طيبه
وإنها شَقْيَانَه
وتلاقي الْحُمْرَة على خدودها
وكسوف
بيزيد الشوق جُوَّاكْ
ويخليك ملهوف
على نظرة بِطَرْف عنيها
وتبان دايما خجلانه
تِلْمَحْهَا
والْشَقَا رَاسِمْ ملامحها
وغبار في نهار
بيداري بياض الوش
من غير أحمر ولا أخضر
ولا تعرف أبدا غش
وتحس إنها غلبانه
وف نص الليل
قلقان م النوم
من حَبِّة حَرْ
شغلاني هموم
وصداع في الراس
من تعب اليوم
قُلْت أخرج أَلِّفْ شِوَيَّه
ومشيت
بصيت قدامي لقيتها
هِيَّه ؟
مش هِيَّه ؟
بَسْ أنا حافظ مَشِّيتْهَا
لكن فَكِّتْ ضفايرها
وسواد الليل في شعورها
وخطوط ألوان
ع الخد وحوالين عينها
راسمينها
والضحكه ترن في نص الليل
بجنان
بِتْسَمَّعْ كل مكان
وبْتُمْدُغْ في لبانه
قَلَعِتْ توبها اللِّي سَتِرْهَا
لِبْسِتْ فستان غيرها
وتْهِبْ عليها الْنِسْمَة قَويَّه
ترفع فُسْتَانْهَا
تظهر مفاتنها
وتبان عريانه
وأنا بضرب كَفْ بِكَفْ
وأستغرب ليه سهرانه!!
مِشْ دي لإمْبَارِحْ
في نهار اليوم
الشقا راسم ملامحها
و تعبانه
مع كل أدان بِتْكَبَّرْ
وتْمِدْ إيديها ف قلب النهر
لجل ما تتوضا وتِتْطَهَّرْ
والناس عِرْفِتْهَا
و عِفْتها
عنوان للطُهْر
طول عمرها
محروسه ومنصانه
وقَلَعّتْ هدومي
عشان أداريها
و أغطيها
دارت وِشَّهَا مِنِّي
وبعدت عَنِّي
مع إني شاريها
وسابتني ومِشْيِّتْ
وفاتتني للأغراب
وجريت ورا منها
لكن بَصَّتْلِي بَصَّة غريبه
وبتُصْغُرْلِي بعينها
وكأنها كرهاني
عملت مش عارفاني
ندهتلي العسكر
حاوطوني
وخدوني على الزنزانه
وأنا كان قصدي
لو هَتْعَرَّى
لجل أسترها
واللي تعبني وتوه فكري
إيه غيرها ؟؟
والأفكار في دماغي حيرانه
م البنت أم عيون سهرانه

سماح كمال
01-11-2007, 05:09 PM
وراجع ليها من تاني
كلمات : أسامة علي
وقُولتْ خلاص مَهِيشْ رَاجْعَه
خَدِتْ وَيَّاهَا أحزاني
طلاق مِنْهَا بدون رَجْعَه
لكن بِبْرُودْهَا عاشقاني
وبعد سنين بعيد عَنْهَا
ما بين أهلي وخِِلاني
بتندهلي
أسيب أهلي
وطلباني
لانا هاوي النكد فيكي
وقسوة ساكنة في عنيكي
ولا دايب في كَعْبِكْ دوب
ورهن إشارة بإيديكي
ولا ساحره وسحراني
كرهت الإسم والسيره
وكل أيامي وياكي
سنينك عشتها ف حيره
ماشوفتش فيها يوم وِدِّكْ
وصَدَّانِي
نسيتي عملتي إيه فِيَّه
وياما ليالي قَضِّتْهَا
يبات الدمع في عْنَيَّه
وطبعك قاسي بكاني
صحيح جِتْلِكْ وأنا شاري
وسِبْتْ الدنيا علشانك
وعلشانك بَسِيبْ داري
وضَحِّيتْ لَجْلْ أكون جَنْبِكْ
وتِعْبِتْ فيكي أفكاري
وفي الآخر يكون حظي
معاكي تِقِلِّي مقداري
ونكراني
ومهما أكون قريب مِنِّكْ
أنا ف عُرْفِكْ غريب عَنِّكْ
ومهما أضحي علشانك
بتنسي العشرة في ثواني
مليش غير شنطتي ف إيدي
مِحَضَّرْهَا بجنب الباب
ويوم بُعْدِكْ دا يوم عِيدِي
أَوَدَّعْ فيكي كل عذاب
وودع فيكي حرماني
ولو أرتاح معاكي في يوم
تجيني أيام ما أدوق النوم
وحِلّوِكْ مُرْ
وأيامك لا بِتْعَدِّي ولا بِتْمُرْ
هموم في هموم وتعباني
جميله صحيح في تفاصيلك
ولما القلب بيجيلك
ونَدْهِة شوق من الوحشة
تناديلك
أشوفك جِتَّه من غير روح
صنم - تمثال
ويملاني الوجع مِنِّكْ
يِهِدْ جِبَال
وأَكْرَه فيكي أي جمال
وأبات في سريري وحداني
وأَتْقَلِّبْ يمين وشمال
على جَمْر الفراق والشوق
وذكرى ف ماضي شَدَّانِي
وأتألم
بدون ما أنطق ولا أتكلم
وكل ما فِيَّا بيعاني
ومَجْنِي عَلَيَّا وتقولي
بجبروتك أنا الجاني
وأنا راضي
إذا كُنْتِي قدر مكتوب
وصبري عليكي هَيّكَفَّرْ
ذنوب وذنوب
أنا راضي
وأنا راضي إذا كان التمن بسمة
وضحكه في قلب أولادي
أنا راضي
وأنا راضي وهَمِّي يهون
ولو هَمِّي بحجم الكون
مدام هَيّشِيِل هموم غيري
أنا راضي
وأنا راضي على حالك
أكون شمعه في ليل حالك
أنَوَّرْ ضلمتو بنوري
وانا راضي يكون عَرَقِي
عيون تروي
وتسقي زرع بستاني
مَهِيشْ خطوة بَحِنِّلْهَا
ودي قسمه وقَابِلّهْا
وبالمقسوم أنا راضي
مَهِي الغربة بتشتاقلي
ومش ناسيه وفكراني
ومهما أبعد وأنساها
ما بِتْضَيَّعْشِي عنواني
خدتني لغربتي قسمة
وراجع ليها من تاني
وقولت خلاص مهيش راجعه
لكن يا غربه عشقاني


أولى قصائدي في الغربة

أولى قصائدي في الغربة

سماح كمال
05-12-2007, 06:43 AM
إنتي دايما توحشيني
كلمات: أسامة علي

جايه تاني بتسأليني
بَوّحَشَكْ لمَّا تسافر أو تغيب ؟؟
آآآآآه يارَبِّي !!
دا سؤال بالله عليكي
للي دايب حب فيكي
وال كُلُّلو بيك مِعَبِّي
إسألي القلق اللي ساكن بين جفوني
إسألي النوم اللي غايب
في بعادك عن عيوني
إسألي حتى الحيطان
والبيبان
وإسألي مْخَدِّة سريري
لأ بلاش أحسن تغيري
وإسألي كل المكان
لو بينطق
كان بكالك وإشتكالك
م اللي شافو كتير ليالي
لمَّا كنت أسهر لوحدي
بشكي لهفة شوق ندالي
وإسألي سطور الكلام
اللي عَبِّتْهَا غرام
راح تقولك
إنك أقرب حد ليَّا
واللي بتمناه بقربي
د إنتي كنتي بتوحشيني
يا نن عيني
لوّ قصادي
وف بعادي
حتى برضو وإنتي جنبي
وإنْ بعدتي
رغم صبري
ببقا حاسس ليك بشوق
نار بتجري في العروق
يِنْفِجِرْ بركان في قلبي
كنتأبص عليك وأشوفك
لما ألمح ضل طيفك
وأبقا مشتاق ليكي جدا
وإنْ بعدتي لحظة بَحْزَنْ
وأبقا مش عارفبداري
ليه شعوري
جُوَّه منِّي ليه وأخَبِّي
حتى من غير ما تناديني
بتوحشيني
وأما أسمع همسصوتك
من حنيني
كُنْت أقول حاضر وأَلَبِّي
وإن في رَدِّي قولت لأَّه
ببقا في حالة جنوني
كل خوفي تصدقيني
من ملامحي تِحِسِّيكِدْبِي
وإن نسيتي
وإن قِسِيتِي
وإن ما هَمِّكْ حتى حالي
وإن حِلِفْت بِإِنيِّخالي
وإن داريت عَنِّكْ مشاعري
طَبْ أداري إزاي في حُبِّي
وإنتي دايما توحشيني
حتى برضو وإنتي جنبي



تنويه هذه القصيدة تواصل مع قصيدة الشاعرة المبدعه والرائعه د/ آمال ما وحشتكش فلها اقدم التحية

سماح كمال
05-12-2007, 06:44 AM
إنتي بخيله ولاَّ إيه

كلمات: أسامة علي
حبيبتي ليه القسوة دي
ولا جه في بالك تسألي
مشتاق لصوتك أسمعه
ومش ضروري تطولي
أو رنة بس تفكريني
وأشوف حروف إسمك قصادي
وتقفلي
إنتي بخيله ولاَّ إيه
دا البخل لو في الحب يوم يقضي عليه
إن يوم حبيبتي تبخلي
عارفه إحتياجي لكلمتك
والشوق واخدني لدنيتك
وآه ولما يروق مزاجك ناحيتي
بتدخليني ف جنتك
والمح في عينك شئ غريب بيشدني
في وقفتك
في مشيتك تتفنني
يطلع كلامك بالغنا
وتتسلطني
نجمة في ليلة حبنا
وتلعلعي وبتنجلي
م أنا وإنتي زي المغناطيس
قطبين ومختلفين سوا
ولما يجمعنا الهوا
تنجذبي ليا وأنجذب
وأتدارى فيك
ما بين إيديك
والحب طاقه تشدنا
لبعضنا
وتشب نارك
جوه مني تصهللي
وإن يوم حبيبتي بنفترق
وتجف أنهار الكلام
ينشف خضار شجر الغرام
شمسك تغيب
والكون يغطيه الضلام
وبرود مشاعرنا يزيد
يكسي عواطفنا الجليد

فبلاش حبيبتي تتقلي

سماح كمال
05-12-2007, 06:45 AM
أول ميلاد يا حبيبتي ليك
كلمات : أسامة علي
http://www.tibason.com/vb/attachment.php?attachmentid=85&stc=1&d=1194034890
أول ميلاد يا حبيبتي ليك
ويّمُرْ من عُمْرِكْ سنة
مش هَحْمِلِكْ
ولا أسألك
أنا مين أنا
وتقولي بابا مِتَعْتَعَه
لكن حقيقي مُمْتِعَه
تطلع نَغَمْ مِتْلِحَّنَه
أول ميلاد يا حبيبتي ليك
ويمر من عمرك سنة
وأنا مش معاك
وخدتني منك غربتي
يا مهجتي
يا نور مِنَوَّرْ دنيتي
مخلوق وأَشْبَه بالملاك
ومين أَعَزْ مِن الْضَنَا
يمكن أنا ما وَحَشْتِكِيشْ
لكن إنْتِي وحشاني قوي
ووحشني أضمك بين إِيدَيَّه
وأبوس خدودك وأحضنك
وأشرب حنانك وأرتوي
يا زهرتي يا سوسنه
لو كان بإيدي يا حبيبتي ما سِبْتِكِيشْ
لكن حبيبتي عشان نعيش
نبعد ساعات
تِفْرِقْ ما بِينَّا الأمْكِنَه
نِتْعَبْ ساعات
وتَعَبْ حبيبتي ما يِنْتِهِيشْ
والدنيا دي دُنْيِةْ عَنَا
ممكن تقولي الدنيا عَنِّكْ
لو دقيقة ما تِغْنِيِنيشْ
لكن الحقيقه مش كِدَه
طبع الحياه من دا ودا
وأنا زَيّكُمْ
بَشْتَاق لكم
ووجودي دايما جنبكم
يا حبيبتي دا يوم الْمُنَا
فاكره قصيدتي يوم ميلادك لَمَّا قُلتْ
وحشني صوت الْوَقْوَقَه
خلاص كِبِرْنَا يا سُنْدُسَه
ع الوقوقه
وبقت زعيق وصريخ بَقَا
ضِحْكِكْ غُنَا
طالع من القلب الجميل
ضحكه بريئة مِرَوَّقَه
وكلام بسيط مع دَنْدَنَه
وأنا من مكاني من هِنَا
بَدْعِي وأقول يا ربنا
إحفظ حبيبتي سُنْدُسَه
تكبر .. تروح المدرسه
تبقا طبيبة للنسا
أو حتى تبقا مهندسه
وتعيش حياتها بالهنا
ويّلِفَّهَا توب الحياء
في طبعها كل الوفاء
بَارَّه بأبوها وأمها
وِمُؤمِنَه
يارب سندس تكبري
وتنوري
وبيوم ميلادك كل عام
نِفْرَحْ معاك
والْفَرْح تاني يِلِمِّنَا
واليوم حبيبتي يا سندسه
بِيّمُرْ من عُمْرِكْ سنة

20/10/2007م

سماح كمال
31-01-2008, 05:29 PM
بتظلم ليه ؟؟؟
كلمات : أسامة علي
أنا إنسان
وتكوينك وتكويني
بنفس الطينه والبنيان
ولاد آدم
ولاد حوا
عباد للواحد الرحمن
ما يفرق أي شئ بينا
لا أصل وجاه
ومال وياه
ولا حتى كمان سلطان
ولا طولك
ولا عرضك
ولا طينك
ولا أرضك
ولا الألوان
لا شكلي أخترتو أو لوني
ولا الْعِلَّة بأبداني
ولا الأرزاق
بإيد مخلوق
وليه بيها يعايروني
دي خلقة خالق الأكوان
وأنا زيك كمان إنسان
يا ظالم للبشر قوللي
بتظلم ليه ؟؟
غني وعندك كتير أموال
ولا بيفرق معاك قرشك
حرام في الأصل ولاَّ حلال
وبعد غناك بتتكبر
وبتبعتر يمين وشمال
ولا بتساعد المسكين
ولا بتمد إيدك ليه
تبات شبعان
وكرش ملان
ولا تحسش بأي جعان
مهو زيك كمان إنسان
يا سيدنا البيه
بتظلم ليه ؟؟
كبير في القدر ومقامك
بيعلا بغش وبتزييف
وبتبيع اللي قدامك
وظلم الناس بقالك كيف
وتعمل ميت حساب وحساب
لأي كبير
وفي نفاقك بقيت حريف
وكبرك ليه في وش ضعيف
قوام بيبان
مهو زيك كمان إنسان
وتاكل في حقوق الناس
وذمة خلاص
ولا إحساس
بقيت ليه غول
بتنهب كل شئ بتطول
وتكنز في الدهب والماس
تقول نفسي
وغيرك سايبو للطوفان
مهو زيك كمان إنسان
وبالقُدْرَة بتتجبر
على الغلبان بتتشطر
نسيت ربك عليك يقدر
وحتى إنْ كنت ملك الجان
مهو زيك كمان إنسان
ما شوفتش في الحياة قبلك
قصص ياما؟؟
غبي .... جاهل
وتستاهل
تكون عبرة لمين بعدك
وفينو قارون
وفين فرعون
بلاش تتغر في الدنيا
وفوق حبه من التوهان
طباعنا فاقت الغابه
وعايشين عيشه كدابه
دا فاكرنفسه مَلَكْ الكون
عشان في رصيدو كام مليون
ودا مغرور قوي بحالو
عشان مركز كبير نالو
يرد بكبر ويقولك
ما تعرفنيش أنا أبقا مين
ولا يعرف طريق عيبه
ودا مْحَوَّطْ على الدنيا
ومابيقنعش
ولا بيشبعش
وفاكر الدنيا دي سيبه
بلاش خيبه
يا عالم دا الأسد في الغابه لو يشبع
خلاص يقنع
يسيب باقي الفريسه لغيرو م الجيران
وياكل منها ميت حيوان
وفي طباعك محصلتوهشي يا إنسان
نسيت إنك في يوم هتموت
ولا هيكون معاك مالك
ولا مُلْكَكْ
ولا الكرسي
ولا الجبروت
ينادي منادي في المخاليق
لمين الملك يا عباي
يكون الرد بس سكوت
يرد بنفسو عن نفسو
لله الواحد الديان
نصيحة بقولها للظالم
تعالى وتوب
كفايه ذنوب
وقوم كفر في ذلاتك
وزود يلاَّ حسناتك
وخللي القلب فيه شفقه
وفيه إحسان
وحس شويه بإخواتك
وبالإنسان
دا مهمن كنت مين هوه
لا حول ليك ولا قوه
وبس لسان
وربك عدلو في الميزان
ما بيميز ما بين خلقوا
بغير التقوى والإيمان
وأنا إنسان

سماح كمال
18-02-2008, 05:34 PM
هيصوا يا عيال
كلمات: اسامة علي
http://tibason.com/vb/attachment.php?attachmentid=112&stc=1&d=1202424981
هيصوا يا عيال
وإفرحوا يا عيال
إنتوا رجال من ضهر رجال
اليوم فرحه وأكبر فرحة
لحمنا مر
ودمنا حر
ونسور جارحه
وقت الجد
تلقا رجوله تزيد ع الحد
ولا بيهمنا أيها حد
حتى إذا كنا في الأدغال
لما تشوفنا أسود الغابه
تجري وتهرب
جوه الملعب يبقوا غلابه
وبنركب حتى الأفيال
بالأربعه إضرب ما يهمك
لجل بلدنا رايتها ما تعلا
ضحي بروحك
ضحي بدمك
في الكاميرون وف ساحل العاج
قول للدنيا إحنا الأبطال
واليوم فرحه وأكبر فرحه
علشان كده هيصوا يا عيال

سماح كمال
18-02-2008, 05:35 PM
رايح جاي
كلمات : أسامة علي

رايح جاي
كايرو وأكرا
خليك فاكره يا كل الدنيا
كاس إفريقيا
رايح جاي
والكاميرون وقعت في الْخَيَّه
وسط الأبطال المصريه
رايح جاي
إحنا يا إفريقيا الأبطال
وسط أسود
أو وسط افيال
وقت الجد يا دنيا المصري
ملوشي مثال
شوفتوا إزاي
روح أكتوبر
في فريق سوبر
قول يا شحاته يا وطني يا مصري
إنته مدرب رائع ...عصري
وبتتكلم بلسان عربي
الوطنيه ف دمك تسري
حضري ومتعب
شوقي وسيد وأبو تريكه
فرقة بتعزف لنا مزيكا
وآدي فتح الله وهاني وجمعه
وكمان متعب
مين يغلبهم جوه الملعب
شوفوا زيدان
واد فنان
هاوي يعذب في الأجوان
وأحمد إبن حسن أستاذ
حقق لنا أكبر إنجاز
وأحمد فتحي وحسني ومنصف
كل اللعيبه الأفزاز
جبتوا لمصر الغاليه الكاس
فَرَّحْتُوا بإنجازكو الناس
وإنتوا جميلكوا يا أبطال مصر
جوه عنينا وفوق الراس
علشان كده للصبح هنسهر
فرق ع المعازيم شربات
وكزوزه وشاي
وإنتوا يا مصريين يا حبايبي
غنوا معاي
رايح جاي
كايو وأكرا
خليك فاكره يا كل الدنيا
كاس إفريقيا
رايح جاي

آمال محمود كحيل
14-04-2008, 10:16 PM
أنا محتاجلك الليله
كلمات : أسامة علي

أنا محتاجلك الليله
تِحِبِّيِنِي
خلاص مَلِّليت من الواجب
وحُبْ ما بِينَّا روتيني
أنا محتاج أكون إنسان
أنام وأَصْحَى على حِجْرِكْ
وأَفَضْفَضْلِكْ... بمكنوني
وأحكيلك
وتحكيلي
واحب يطول معاك ليلي
مدام حُبِّكْ مِدَفِّينِي
ويبقا خروجي من حُضْنِكْ
تهون عَنُّو خروج الروح
مَهِي الْجَنَّة ما بين إيدك
ولمسة حُبْ تحييني
على شَطِّكْ مشيت ياما
ولا أَتْبَلِّيْت
ولا راح العطش مِنِّي
ولا كاسك بيرويني
ولا نهرك غسلني ف يوم
ولا بَلَعِتْنِي دَوّامَه
في أغوارك تِخَبِّيِنِي
وفين الْرِقَّه راحت فين
شقاوتك كات بتملا العين
ويا خساره
مفيش غمزه
ولا لمزه
ولا إشاره
ولا بْدَلَعِكْ بتغريني
وزاد حرماني في لقاكي
ونار الحب مَطْفِيَّه
وفين هِيَّه ليالي الصيف
مفيش غير الشتا فيكي
ولا نارك بتكويني
تعالي الليله نتعاهد
ونتواعد
نكون الليله شئ تاني
نِصَحِّي الحب من نومو
يعود لينا
وترجع أحلا أيامو
تِدَفِّينَا
وبين إيدك تضميني
تعود الشمس بعد غروب
بنارها التلج بِينَّا يدوب
في أحضاني
وِحِسِّينِي
وداويني من الحرمان
دا عين العقل
لحظة حُبْ نقضيها
بكل جنان
تهون الدنيا وغيومها
ولهمومها تِنَسِّيِنِي
ونسمة حُبْ
لَمَّا تْهِبْ
تِتْمَايِلْ على هَبِّتْهَا أغصاني
وأنا محتاجلك الليلة
تِحِبِّيِنِي





للإستماع



http://www.4shared.com/file/43783831/89a17068/___.html

آمال محمود كحيل
14-04-2008, 10:17 PM
حَسِّيت في يوم رُوحَكْ بِتُهْجُر جِتِّتَكْ ؟؟

كلمات: أسامة علي

حَسِّيِتْ في يوم
رُوحَكْ بِتُهْجُر جِتِّتَكْ ؟؟
حَسِّيت في يوم
روحك بِتِغْلِي جُوَّه مِنَّكْ
رافضه تِمْشِي ف سِكِّتَكْ
حسيت في يوم
إنك وحيد
والروح بعيد
مِشْ طَايّقَه تبعد لَوّ ثواني
عن حبايب دُنْيِتَكْ
جُوَّاكْ ألَمْ
حالة ضياع
حالة عدم
عَمَّالْ تِدَارِي ف دمعتك
لكن الدموع من غير حدود
بتفيض وبِتْخَطِّي السدود
وبْتِنْدِبِحْ فيك بسمتك
عمال بقوة تشدها
لَكِنَّهَا
متشعلقه ف روح الولد
متشعلقه ف طين البلد
وناس كتير ملهاش عدد
رافضة تماشي خطوتك
حسيتها أنا
لحظة فراقي للمكان
لحظة فراقي للضنا
يوم السفر
علشان ما تِلْقَا لُقْمِتَكْ
الروح بتبكي والبكا
بِيّبَكِّي وَيَّاه الحجر
عايز تسيب ليه أرضنا
هَفْضَلْ هِنَا
ومش هطاوع كلمتك
حَتَّى الولد
على صِدر أمو تِهَدِّي فيه
بيقول لها
يا ماما بابا سايبنا ليه؟؟
ردت عليه
علشان يجيبلك لعبتك
من غير تردد قام وقال
فيه مِنَّهَا ياما عندنا
ما شوفتهاش بذمتك !!
وبسرعه كَمِّلْ في الكلام
رايح يا بابا عشان فلوس؟؟
أستاذنا قال
وخَدْنَا بردو في الدروس
إن السعادة مش فلوس
ولا عُمْرَها بتسعد بشر
أو بالأمان جُوَّه النفوس
طَبْ قول يا بابا بتبكي ليه ؟؟
لو حلوة أيام غربتك

آمال محمود كحيل
14-04-2008, 10:19 PM
إلى كل شاعر عامي
كلمات : أسامة علي

قالوا الكلام موهبة
والفن فيه صنعه
مش شرط صاحب الكلام
خارج من الجامعه
ساعات بتسمع درر
وكلام يِبَكِّي الحجر
وفي العينين دمعه
وساعات تقول الله
ع الفن يا محلاه
والخلق له سامعه
بيقولها واحد ضعيف
لكن طبعو شريف
تسمع كلامو تهلل
وف صنعتو حريف
والموهبة والْعَه
بقصيدة مِتْحَبِّكَه
وبيوتها متشبكه
مليانه ضحك وبُكَا
ومن الشعور طالعه
يللي إنته شاعر وشاعر
بالهم في قلوبنا
إكتب كلامك مقامك
عارفينو يا حبيبنا
لو يوزنوك بالدهب
يللي كلام طرب
يطلع كلامك حكم
غالي وفيه العجب
درر تفوق الماس
تهدي ال تاه في الطريق
وِتْطَيِّبْ الإحساس
والحق في كلمتك
حاسس بكل الناس
وتْصَحِّي فينا الأمل
وتقيد لنا شمعه
وِسْمِعْنَا في الأمثال
قالوا الكلام صنعه

آمال محمود كحيل
14-04-2008, 10:20 PM
مش هيموت الحب ف قلبي
كلمات : أسامة علي

حبيتك وبَحِبِّكْ لِسَّه
ولا عمري لِحُبِّكْ يوم هَنْسَى
وهشيلك حلم وأُمْنِيَّه
طول يومي وأيامي الْجَيَّه
وإن حُبِّي ف قلبك غاب شَمْسُه
وفَايِتْلِي البرد في لَيَالِيَّه
مش هيموت الحب ف قلبي
جُوَّه عروقي
بينبض شوقي
ولِسَّه حرارة حُبِّكْ فِيَّه
هَتْنَسِّيِتِي
وتْدَفِّيِنِي
وإن شَدِّنِي في الوحده حنيني
هتكوني لأحلامي المرسى

آمال محمود كحيل
14-04-2008, 10:23 PM
والنبي يا أمال كده خدي بالك
كلمات : أسامة علي

والنبي يا أمال كده خدي بالك
وكفايه يا أختي اللي جرالك
ليه مستعجله كده على رزقك
الصحه هيه البقيالك
لا الشاي هيطير من قدامك
والسكر دايب في غرامك
على إيه طب كان إستعجالك
دا الشاي محتاج الروقان
بالراحه وِتِمْلِي الفنجان
وتروحي بجنب أبومحمد
مهو جنبو الشرب بيهنالك
وجرحتي إيديك من غير لازمه
والدم خرج وعمل أزمه
ودا م الشيطان إبن الجزمه
بيلخبط حالنا وأحوالك
وآهو دمك سال ع الكبايه
والشاي بقا قصتو دا حكايه
لولا الستار سترو معاكي
وكمان كات أمك دعيالك
ودا كللو ف قدرك ونصيبك
واللي مكتوبلك هيصيبك
وأنا عايزك م العجله تسيبك
واتأني شويه ف أعمالك
كلنا عايزينك بسلامه
ودي دعوة من أخوكي أسامه
يحفظك الرحمن لعيالك

آمال محمود كحيل
14-04-2008, 10:24 PM
إمتى يا أمة هتغضبي ؟؟؟
كلمات : أسامة علي


مش ببكي ع الطفل اللي مات
ولا ع البراءه ال بقساوة بتندبح
ولا ببكي من صوت الألم
على ألف واحد ينجرح
مهو كل يوم
فيه كام شهيد
والقايمه يوم عن يوم تزيد
نَسُّونَا فيه طعم الفرح
أنا ببكي بدل الدمع دم
من حال يغم
على أمه زي الجثه نايمه في السرير
لا تْهِشْ ولا بِتْنِشْ طِير
كانت زمان خير الأمم
ببكي على الْحِسْ اللي مات
لا في أي فعل
أو رد فعل
وكلامنا ليه
قتلو السكات
حتى الكلاب بقا دمها
أغلا كتير من دمنا
والرفق بيها ف شرعهم
أكتر كتير قوي مننا
قالوا نفايات م البشر
والعيشه دي مش حقنا
وسقونا م الذل الكاسات
ملايين تموت
في أرض لبنان والعراق
ومسرحية
كل يوم على أرض غزه بتتعرض
وعنينا شايفه ع الشاشات
وننام على الدم اللي سايل
في الجداول
ننتظر دورنا ال جي
لجل عرض المسرحيه ما يتوقف
والعرض حَيّ
على فين يا أمه هتهربي
غَمِّي عنيك
سِدِّي الودان
أصل الكلاب سَبَّوا النبي
مش مَرَّه بَسْ
دا كتير قوي
وإنتي يا أمه بتلعبي
وأنا بسألك
إمتى يا أمة هتغضبي
إمتى يا أمه هتغضبي
إمتى يا أمه هتغضبي
إمتى يا أمه هتغضبي
إمتى يا أمه هتغضبي
إمتى يا أمه هتغضبي
إمتى يا أمه هتغضبي

آمال محمود كحيل
14-04-2008, 10:26 PM
ست الحبايب .... وحشاني

كلمات : أسامه علي

وحشاني يا أمي
محتاجلك
مشتاقلك
تخديني في حضنك
وتضميني لصدرك
اللي سقاني
واللي رواني
واللي اداني سنين من عمرك
مهما كبرت يا أمي أنا ابنك
إدعيلي
من غيرك يحمل همي
إن كنت صغير ولاَّ كبير
من قلبك تتمنيلي الخير
وياما قاسيتي وضحيتي
علشاني كتير
من كل مخاطر تحميني
وبأغلى ما عندك تديني
وبكل حياتك تفديني
مين زيك في الدنيا يا امي
وحشاني يا أمي
محتاج لدعاك
بأتمنى رضاك
محتاج لو لحظة أكون وياك
زي زمان محتاجلك وأكتر
وأنا قدامك طفل صغير
مش هتغير
وعلى بعادك ما أقدرش أصبر
فاكره ياأمي؟؟
لما كنتي بتبعدي عني
ألقا حنانك لِيَّا واخدني
وأفضل ابكي لحد ما تيجي
ولما بتسمعي صوتي بتجري
وبتخديني ف حضنك دُغري
فاكره ياأمي
لما كنتي تنادي عَلَيَّا
واد يا أسامه
صوتك لسه معشش فِيَّه
أنا وحشاني الكلمه دَهِّيَا
طبعا فاكره
مين في الدنيا بينسى ضناه
ياما آسيتي مني الآه
ياما طيرت النوم من عينك
ياما عذبتك
ياما بَكِّيتك
مين هيكافأك غير الله
فاكره يا أمي يا أعظم أم
دايما كنتي تشيلي الهم
وياما شقيتي
وياما عانيتي
وياما سهرتك
أنا دلوقتي كتير محتاجلك
محتاج تدعيلي من قلبك
وأنتي يا غالية
حبك أكبر حب يا أمي
حبك جوه عروقي ف دمي
عمري ما شوفت حنان في حنانك
أو أحضان تشبه أحضانك
وأنا بين إيدك
حاسس كل الدنيا أمان
تعرفي يَمَّه
كل الدنيا عندي ف كفه
وإنتي لوحدك بس ف كفه
عمري ماهنسى تعبك يمه
من وأنا كنت رضيع في اللفَّه
وأنا من شوقي بحس بلهفه
ولما أقولك يَمَّه إدعيلي
كنتي تقولي
أنا من قلبي يا واد دعيالك
يكتر رزقك
يسترها وياك في طريقك
تلقا أهل الخير واقفينلك
لحظة ديقك
تتهنى وتربي عيالك
حتى لما بتيجي في خيالي
أو على بالي
القى دموعي
نزلت مني
غصبن عني
ماانتي يا امي أحب الناس
عايز ابوس الإيد والراس
أنا بتمنى تراب رجليك
وبعمري وحياتي أفديك
وكتير جدا مشتاق ليك
وأضُمِّك لِيَّا ف أحضاني
و انتي بجد كتير وحشاني

آمال محمود كحيل
14-04-2008, 10:29 PM
عيناك مدرستي
كلمات : أسامة علي

عيناك مدرستي التي
أتقنت فيها حرفتي وفنوني
وجلست في صف الهوى
متتلمذ فسحرها أغواني
من نظرة خفق الفؤاد لسحرها
سكنت لُبَابَ القلب
وسَهْمُهَا أرداني
كانت عُيونَكِ مقصدي
وهواً تغلغل في الفؤاد
من قبل أن تلقاني
ورأيت طيفك في سمائي عابرا
فشددت رحلي كي تراك عيوني
وأنخت ركبي في رياضك طالبا
من نبعك الرقراق أن تسقيني
فالماء في عينيك بحر ثائر
وحدائقي عطشا لنبع حنان
وأتت جيوشك صوب أرضي غازيه
عبرت بدون مقاومه
واستوطنت بكياني
فتهللت فرحا مدائن موطني
واستقبلتها الأرض بالأحضان
حتى إذا جاء الرحيل وغادرت
بعض الجنود لموطني وكياني
صافحت جندك بالسلام ودمعتي
وقت الوداع تضج بالأحزان
وملأت عيني من محياك الذي
لم تفترق عنه العيون ثواني
والقلم تذكار يخط بصفحتي
في الرأس والكراس والوجدان
وقصائد بالحب تشكو لوعتي
ويبثها شعرا بعذب بيان
فهل يا ترى سوف تجمعني
بك الأقدار ذات يوم
وألقاك و تلقاني
أم في جفاء البعد مقبرة
تُدْفَنُ فيها ذِكْرَايَ وتنساني

آمال محمود كحيل
14-04-2008, 10:31 PM
رحماك.. رفقا بالحبيب
كلمات: أسامة علي

أنا من أكون !!
إن لم تكون بدنيتي
فالكون أنت
والحياة حبيبتي
أرضي ومملكتي أنا
وأنت فيها مليكتي
إن تأمري سمعا وطاعة
وإليك كل مودتي
أسقيك مائي
وفيك تنبت زهرتي
أنت الحياة بحلوها
إن غبت غابت بسمتي
وأعيش بين ركامها
أعاني فيها وحدتي
رحماك رفقا بالحبيب
في البعد تربو حسرتي
وإذا خلت منك الدروب
قامت عليَّ قيامتي
فالشمس تشرق من سناك
تزيح عتمة ظلمتي
نورا ونارا تحتويني
تستعر منها جذوتي
إني سئمت البعد عنك
فإليك ترنو هجرتي
فلتعلمين بأنك
سلوى الفؤاد بخلوتي
والشوق يأخذني إليك
ما لي سواك عشيقتي
فالعشق حب مُستعر
والحب يسكن مهجتي
في أيك حبي تسكني
وتحتويك عباءتي
فيها أدخلي وتمتعي
بين الْرُبَا بحديقتي
وتنسمي عطر الزهور
فالزهر ملك فراشتي
لن أنسى قلبا ضمني
وإليه سارت خطوتي
وأظل أحلم باللقاء
ففي اللقاء سعادتي
فصورة القمر الجميل
ستظل تسكن مقلتي

آمال محمود كحيل
14-04-2008, 10:33 PM
هيا حبيبتي أقبلي
كلمات أسامة علي

هيا حبيبتي أقبلي
فأنا إمامك في الصلاه
فالشوق فاض بداخلي
بلغ الوعاء لمنتهاه
والقدر يغلي ماءه
وتناثرت منه المياه
لا خل في ليلي ولا
قمر ينير ليَّ الحياه
والقلب يشكو وحشة
والجوف تسكن فيه آه
أمواج حبك جارفه
هيا ارم لي طوق النجاه
فظلال حبك وارفه
وأسير وحدي في فلاه
من ثغرك العذب أسقن
لا يرون ثغر سواه
أشتقت للماء الذي
في ضفتي تلك الشفاه
فأغيثي لهفة عاشق
في قلبه شوق ضناه

آمال محمود كحيل
14-04-2008, 10:36 PM
علمني حبك سيدتي ( 3 )

كلمات: أسامة علي



علمني حبك سيدتي

أهوى الطيران

أسبح بفضاءك وأغني

لحبيبة قلبي

وأفوق بصوتي الكروان

أتخطى حدود المعقول

واللا معقول

يَلْبِسُنِي حبك كالجان

يأتيني عبيرك في صدري

أنفاس تجري

وتداعب أنفي

كالمسك وعطر الريحان

تحملني موجات هواءك

كبساط سحري

يطوف الأكوان

أدنو من سطح القمر

أسلك غابات الْشَعْرِ

يأخذني طريقي إلى الثغر

وأمر بكل الوديان

وسهول وهضاب

تأخذ بالألباب

وعيون تحرسها الأهداب

وجمال في كل مكان

وحرير ناعم

وربيع دائم

للجنة يحملني

أقطف زهر البستان

يبهرني النور

يسطع في عيني

كبنات الحور

عزري فتان

فالحب شعور

لا يشبهه على الأرض شعور

يهدأ ويثور

مثل البركان

إنْ طرق الباب

يدخل من غير إستئذان

آمال محمود كحيل
22-04-2008, 10:40 PM
أنا الذي


كلمات :أسامة علي


أنا الذي
راحت فلوسي ومركزي
خَدِّنِي هواك
وجريت وراك

وأتمنى يوم ألمس قفاكوتعذبيني
في كل حِتَّه تِلَفْفِيِنِي
وبالعذاب تتلذذي
وإنتي التي
خطفت في ليله فرحتي
كان حلمي أشوفك جنب مني
ولْغَرامي بتشحتي
وأحِنْ ليك
وأدِّيِكِي كام بوسه ف إيديك
وأمسح عُمَاصك من عنيك
واقول يا هبله إركزي
وأنا الذي
رَسَمْت ياما ضحكتك
على خلقتك
لجلن يا حلوه تفرحي
وفَتَحْت ليك
مٌدٌنْ ملاهي
للتلاهي
جُوَّه قلبي
عملتي قلبي لعبتك
وف قلبي قاعده تِجْرَحِي
وإن قلت آي
أو حتى جاي
بتكشري وتْبَوَّزِي
وأنا الذي
وإنتي التي
طَلَّعْتِي عيني ومِلِّتِي
وأقول حرام
دا مش غرام
ياقطتي
تِتْوَحَّشِي
وتْعَضِّي إيدي وجِتِّتِي
محرومه م اللحمه يا ناس
بسنانك ال حاميين قوي
قَطَعْتِي كل هدمتي
وتسهريني
ما أشوف بعيني
النوم ف ليلي
تهدي حيلي ما تسكتي
وأبقا عجينة بين إيديك
وتقطعيني وتخبزي
ولو في يوم الطبع هاج
ويجيبني ليك حبة مزاج
القاك قوام تتعززي
وأنا التي
وإنتي الذي
إلحق يا أمن يا مركزي
الإرهابيه
المفتريه
عايزه تاخد مركزي
أِتْهَدِّي يختي وأقعدي
هوه إنتي إيه
ما بتعجزي
وأنا الذي

تنويه

كل الشكر للأستاذ الكبير ومدرسة الشعر
أحمد الشربيني
فمن قصيدته الأم ولدت قصيدتي

آمال محمود كحيل
07-05-2008, 06:51 PM
عيد الربيع
كلمات : أسامة علي

الْلَمَّة فين والصحبه فين
وإيدين بتهديني الزهور
وأغاني يوم عيد الربيع
ماليه حياتي بالسرور
وسط الغيطان
وسط الجنان
وسط الأحبه بتوع زمان
فسيخ ورنجه مملحه
وريحتها طالعه مفحفحه
وزهور جميله مفتحه
وعسل وجبنه بالفطير
والبيض ملون للعيال
أشكالوا إيه آخر جمال
في وداني شقشقة الطيور
والقعده على شطك يا نيل
وَيَّا الجميل
يكمل معاها فرحنا
مشتاق أنا
لِلَّمَه وللحظة سمر
في يوم بديع
عيد الربيع
ولا يحلا يوم شَمْ النسيم
إلا ما بين الأهل وما بين البشر
وسط الحضور

آمال محمود كحيل
12-05-2008, 12:13 AM
ويا عيب الشوم
(عن المأساة اللبنانية )

كلمات : أسامة علي


ويا عيب الشوم
إخوان إمبارح
أعداء اليوم
حَدْ يِفَوَّقْنِي
ويصحيني
ويقول إن أنا غلطان
إن أنا موهوم
بقا معقول
أبقا القاتل والمقتول
وأبقا الجاني ومجني عليه
طيِّب ليه
فوقوا يا أخْوَانَّا وصحُّوا النوم
يَللِّي رفعتوا راس الأمة
بقا بالْذِمَّه
كده بسهوله
تمسحوا ليكو كل بطوله
مين هيكون الفايز فيكوا
ومين مهزوم
إنته عَدُوَّكْ مش لبناني
مش من جلدك
مش من عرضك
إنت عدوك سالب أرضك
ولا فيش غيرو
الأمريكي مع الصهيوني
ودا واضح لينا ومعلوم
وأعرف لو صَحِّيْت الفتنه
وأِتْفَجَّرْ تاني البركان
مش هَيّدَمَّرْ غير لبنان
فَكَّرْ حَبَّه شويه وفوق
دا اللي إمبارح ساكن بيتك
واللي شاركتو
حتى ف قوتك
لما ضربتوا المثل الأعلى
لكل الدنيا
كل شعوب الأرض الْحُرَّه
بتهتف ليكوا
تعيش لبنان
كنت قصاد أعاديكوا رجوله
بكل بطوله
ضد عداها
أسود شجعان
ليه تِنْدَارْ
تضرب نفسك كده بالنار
وإنته اللي أتعلمت بطبعك
إن النار لحماية الدار
بيها تذود
عن أغلا حدود
ضد الشياطين والأشرار
إيدكم واحده
لبنان بجنوبو وشمالو
لبنان بسهولوا وجبالوا
لبنان بنساءوا ورجالوا
الحاكم ويا المحكوم
ليه بتبيعوا النصر بلاش
للأوباش
اللي ما قدروا عليكو بحرب
وبيتباهوا بأعظم جيش
أتْكَسَّرْ على أرض بلدكوا
وطلع فالصو
فشوش في فشوش
حطمتوا أكبر أسطوره
جُوَّه الوحل دفنتو الصوره
خليك فاكر
ومتنساش
أنا لبناني
وإنته كمان برضك لبناني
لما تعاني
من غير شكوى أو تتكلم
من غير تبكي أو تتالم
أوجاعك تصبح وجعاني
ولا فيه ظالم
ولا مظلوم
يلاَّ يا أخويا
إيدي ف إيدك
نبني ..نعمر لبنان تاني
ونخليها أجمل ساحه
ترجع واحه
زي زمان
ومتنساش
إحنا ضربنا المثل الأول
كيف طوايفنا تكون إخوان
كَفْ مسيحي ف كف السني
وإن الشيعي أخويا ومِنِّي
وأنا تكويني
درزي ماروني
لما أنتفض الشعب بحالو
لَمْلِمْ جرحو
ضحا بروحو وضحا بمالو
وأنا بصراحه
م اللي بيحصل دا مصدوم
عايزين ننسى خصامنا شويه
أصل الموجه علينا عَفِيَّه
لما هتيجي هتجرف كللو
وساعتها ما هينفع لوم
ويا عيب الشوم
لما نشوف إخوان إمبارح
أعداء اليوم

آمال محمود كحيل
03-06-2008, 10:13 AM
بيظلموك
لو شبهوك يوم بالقمر
كلمات : أسامة علي

زَيّ الملاك
ولا غلطه فيك
مش م البشر
وبيظلموك لو شَبَّهُوك
يوم بالقمر
حِنِّيِتِكْ ، رِقِّة كلامك ، طَلِّتِكْ
وأَمَّا تِهِلِّلي بضحكتك
بتحركي حَتَّى الحجر
ومن الدلال
أنا قلبي مال
عاشق بيتمنى الوصال
والحب خدني ف سكتك
ضُمِّيِنِي لِيِكْ
ما بين إيديك
ضُمِّي قوي قلبي شاريك
والروح يا روحي
دايبه فيك
عطشان وعايز يرتوي
يللي بكلمه ، أو بهمسه
أو بنظرة من عنيك
لو جات في عيني بتسحري
د أنا بالساعات
بَسْتَنَّى مِنِّك
لو إشاره ، أو أَمَارَه
وف سمايا تنوري
شمسي أنا ، حبي أنا
إنتي المنى
عاشق وحَبِّكْ وأِتْسَحَرْ
إذا كان دا حلم
م َتْصَحِّنِيِشْ
وإذا كان دا علم
خَلِّيِنِي أعيش
وأحضن حقيقة حُبِّنَا
يحلالي وياكي السهر
وبيظلموك
لو شبهوك
يوم يا حبيبتي بالقمر

آمال محمود كحيل
03-06-2008, 10:16 AM
في عيد ميلاد القمر
كلمات : أسامة علي



بحزيران في اليوم التاني
هَلْ قمر ع الكون خلاني
أَدْعِي واكَبَّرْ
الله أكبر
أصل قمرنا جمال رباني
يوم مولدها هَلْ النور
لَمَّا الماما
جَاتْ بسلامه
وف أحضانها أجمل ريما
صانك ربي يا بدر بدور
خرجت من صُلبْ الأطهار
لما تشوفها
تلاقي عفافها
زَيّ الشمس ف قلب نهار
مَهُو مَنْبَتْهَا
سلامة بِيتْهَا
أَبْ كريم والأم كريمه
من نسل الناس الأحرار
وإنتي يا ريما
بجد عظيمه
كُلِّكْ رِقَّه وكُلِّك ذوق
لَمَّا تْطُلِّي علينا بِطَلَّه
المهموم م الْهَمْ يروق
وعلى شفايفك
أجمل بسمه
مرسومه رسمه
حتى الضلمه بتهرب مِنِّك
لما تشوفك وقت شروق
رِقِّة قلبك قَلبْ حمامه
إيدوا شموع العيد الليله
عَلَّقُوا زينه اِعْمِلُوا هُولِّيلَه
عايزين نفرح
عايزين نمرح
عايزين نعمل ليله جميله
ليله بجد عليها القيمه
فيها نِهَنِّي ، فيها نِغَنِّي
نرقص نفرح يوم عيد ريما
فيها نشارك ، فيها نبارك
نتمنالك كل سلامه
وبندعيلك ، الله يزيدك
يسعد قلبك وسط ولادك
يحسن ليك في العمر خِتَامَه
تِبْقَا العيشه معاكي هَنِيَّه
ويّطُول عُمْرِك حَدْ الْمِيَّه
ولايوم لحظة يا غاليه تعاني
وتحية من قلب أسامه
لقمرنا الغالي اللبناني

آمال محمود كحيل
03-06-2008, 10:21 AM
مين اللِّي غَيَّر دَقِّتَكْ
كلمات: أسامة علي


يا قلبي مالك قول في إيه ؟
دَقَّكْ غريب ، معرفشي ليه
مين اللِّي غَيَّر دَقِّتَكْ
بَلْقَاكْ ساعات وَخْدَاكْ حالات
تِسْهَرْ كتير ، تِسْرَحْ كتير
أحكيلي قول إيه قِصِّتَكْ ؟
إيه غَيَّرْك ، ومْحَيَّرَكْ
طول الليالي مْسَهَّرَكْ
راسم ملامح فرحتك
ياما قابلت قلوب كتير
بَسْ إِنْتِي غِيِر
مِنْ غير ميعاد كان الُّلقا
وجمعني بيك أجمل قدر
ولا كان في بالي أعشقك
شوفتك أنا زَيّ القمر
وف رقتك ، حنيتك
أَرَقْ من ورق الشجر
ولقيتني عاشق خطوتك
جُوَّاكْ صفا
بِيّصَفِّي كوني ودنيتي
جُوَّاكْ دَفَا
دَفَّا برودة وحدتي
جُوَّاكْ حَنَانْ
حُضْنِكْ أمان
زَرَعْ في قلبي مَحَبِّتِكْ
نظرة عنيك ، بتاخدني ليك
دَوَّامَه فيك بِتْشِدِّنِي
وأحلم معاك
وأسكن هواك
ما بين إيديك بيضمني
وادوب أدوب من ضَمِّتِكْ
معذور يا قلبي ف دَقِتَكْ
معذور وحُبَّكْ دنيتك
معذور تِسَلِّمْ لِلْهَوَا
لو جات رياحو ف سكتك
وإنته الهوا ، ليك الدوا
هُوَّه المداوي لعِلِّتَكْ
ويدق نبض الحب فيك
لما تجيلك قسمتك
ويا قلبي مالك قول في إيه ؟
مين اللِّي غَيَّرْ دَقِّتَكْ ؟

آمال محمود كحيل
19-08-2008, 01:41 AM
أنا منكم
كلمات : اسامة علي


أنا منكم
سعادة قلبي مع روحي
هنا بينكم
هنا إخواتي واخواني
هنا الصحبه وخلاني
وتهرب راحتي لو أبعد
في يوم عنكم
و أنا منكم
***
ياناس الحب في قلوبها
على وشوشها الصفا بيبان
وصدق الصحبه مطلوبها
وطيبة قلبها عنوان
ولو حالتي مهيش هيه
ولو قلبي ملان أحزان
بتسعد قلبي طلتكم
وأنا منكم
***
أنا منكم يا أحبابي
يا ناسي وأهلي وصحابي
يا أقرب م القريب ليا
وفرحة عمري وشبابي
سعادة الدنيا بتجيني
في دقتكم على بابي
وأملي أنول محبتكم
وأنا منكم
***
أنا بينكم بقيت إنسان
همومكم هيه دي همومي
وصحبتكم في أي مكان
أمل ساكن في أحلامي
تِهَوِّنْ غربة الدنيا
وتصفا ليا أيامي
وأتضلل بضلتكم
و أنا منكم
***
تعالوا نطرد الفرقه
تعالوا نحب بعضينا
دا نار البعد نار حارقه
تبكي القلب وعنينا
يا عم الدنيا مش فارقه
دا لقمه بملح تكفينا
ونظرة حب في عيونكم
و أنا منكم
***
ومهما الخطوة بيا تطوف
وأتغرب وألف وأشوف
ومهما الدنيا تغريني
وأقرا ف أي حته حروف
تدب الرجل من تاني
وأعود ليكم هنا ملهوف
أحن بقلبي لحروفكم
وأنا منكم

آمال محمود كحيل
07-09-2008, 12:57 AM
لَعَمْري ما عشقت سواك
كلمات : أسامة علي

من قال أَنِّي قد هجرت سماك
كَذِبٌ وإفك ما سمعت حبيبتي
فأنا لَعَمْرِي ما عشقت سواك
من ذا يُحَرِّكُ غير رسمك مهجتي
من ذا بِرِقَّةِ صوتها يأتيني
وكلامها لًهَبٌ يؤجج ثورتي
من ذا الذي يحتل كل الذاكره
وطيفها هو الأنيس لوحدتي
أنت المنى
أنت التي أنساني حبك
كل أيام العذاب بدنيتي
أنت السكن
أنت الوطن
ومرفأي لسفينتي
أنت الحبيبة والصديق
ومن تشاركني الطريق
في رحلتي
أنت التي يأتيني طيفك بالمساء
ويصب في قلبي الحنان بلا إنتهاء
بصفاءه
ونقاءه
وتشاركيني خلوتي
أنت التي
عزفت لها أوتار قلبي
نغما يخلد قصتي
وملاك شعري
من تحركه سواك
ومن سواك أخاطبه بمقالتي
فدعي الشكوك ومن يقول بفرية
مكذوبةٍ
ليس لها من صحةِ
لكنها الأيام تفعل فعلها
فمناخها متقلب
تصفو ليالٍ
وليال تملأها الغيوم
فتغيب عنك رؤيتي
فتأكدي أن الحبيب متيم
وأهيم شوقا للقاء
ومغرم وسعادتي
أن نَلْتَقِ بالحب نروي أرضنا
وتحتويك عباءتي
فجذور حبك قد نَمَتْ
وَتَشَعَّبَتْ
وَتَغَلْغَلَتْ في تُرْبَتِي
كالروح تمنحني الحياه
كالماء يُحْيِي زهرتي

آمال محمود كحيل
07-09-2008, 01:00 AM
أهلا رمضان

كلمات : اسامة علي

يا واحشني كتير
يسعدني لقاء
وبقالي شهور
هنا بستناك
مشتاق قوي ليك و سعيد فرحان
وف أول ما يهل هلالك
بيهل النور
وتهاني الناس في إستقبالك
والكون تلاقيه داير ما يدور
عندنا وهناك
سهران وياك
وف كل مكان
بتهل يهل معاك الخير
وتمللي كريم
ولا تنسى بكرمك أي فقير
ويفيض خيرك
من غير تبذير
يا بو قلب ملان
رحمة وغفران
عايشين لياليك
ولا بينا خصام
والناس ترضيك
والخلق صيام
ولا منكر فيك
ولا أي حرام
ولا فيه عاصي
ولا بينا شيطان
والحب ف قلب الناس بيزيد
ويباركوا لبعض بيوم العيد
وتشوف أحضان
بين الخلان
ولا تلقا ف قلب تشوف أحزان
شَرَّفتْ الكون
أهلا رمضان

آمال محمود كحيل
07-09-2008, 01:15 AM
يا حتة مني
كلمات : اسامة علي

يا حتة مني
يا ضي عيني
من النهارده
هتوحشيني
وف يوم نصيبك
مع حبيبك
فرحان ولكن
زادت شجوني
سنين طويله
أنده حبيبتي
بسرعه أشوفك
قوام تجيني
وأجري عليكي
وبين إيديكي
وبأحلا ضَمَّه
بتحضنيني
وتنادي ... بابا
وأدوب صبابا
وأقول حبيبتي
خلاص كبرتي
وهتسبيني
من النهارده
يا أحلا ورده
زرعتها إيدي
ريحتك هتبقا
لحد تاني
لكن مكانك
في القلب ساكن
وف قلبك إنتي
كمان مكاني
من قلبي قلبي
بدعي يا ربي
أرزقها دايما
من فضل خيرك
وسجودها عمرو
ما يكون لغيرك
ولا يوم ياربي
ابدا تعاني
وأحفظ حبيبتي
وصون لي بنتي
مهجة فؤادي
وضي عيني

آمال محمود كحيل
08-10-2008, 08:10 AM
من العايدين
كلمات : أسامة علي


يا اعَزْ الناس وأغلاهم على قلبي
يا أختي وأخويا ويا صاحبي
هنا ف طيبه
ويا عيلتي
ويا أهلي وأحبابي
من العايدين
من الفايزين
تعيشوا العمر بالبهجة
سنين وسنين
تهاني القلب بأرسلها
وروحي بَاعْتَه مراسيلها
وقلبي سعيد
بأهنيكو بيوم العيد
وألف تحيه وتحيه
وبتمنى يهل اليوم
بفجر جديد
ونور في قلوبكم الطاهره
تمللي يزيد
وأمنيه
لكل الناس بعمر مديد
وبالصحه مع الفرحه
جناين سعدكم طارحه
بكل جديد
وتتحقق أمانيكم
بصحبتكم زراريكم
وشمع الحب بينا يقيد
يِنَوَّرْ سكة الإيمان
وقلب عمار
بذكر وطاعة الرحمن
وصوم مقبول
معاه بتنول
في آخره العتق م النيران
ودي الفرحة الكبيره أكيد
ويا اصحابي وأحبابي
بهنيكو بيوم العيد

آمال محمود كحيل
08-10-2008, 08:12 AM
في يوم العيد لمين هتغني أشعارك
كلمات : أسامة علي

يا عيد هلليت بأنوارك
وتهليلك وتكبيرك
وفرحة ف قلب كل الناس
وماليه الدنيا أخبارك
وعصافير طايره بتزقزق
تقول أناشيد
وصوت زمامير
وخلق كتير
بأحلا شكل بتشوفها
ولابسه جديد
كما البستان
ملان ألوان بأزهارك
دا بيهني
ودا فرحان وبيغني
وقلبو سعيد
ودا ماشي مع اصحابوا
وأحبابوا
عشان اليوم دا يوم العيد
وكل الأهل بتزورك
وهلليله
تشوف اللمه و العيله
وبتبارك لكل الناس
وبتسلم على جارك
مشاعر حب
جوه القلب
مع قدومك يا أجمل عيد
ومفتوحه بيبان دارك
في كل مكان
مفيش أحزان
وفرحة في القلوب بتزيد
مغطي الكل من خيرك
لكن حاسس بإني اليوم
حقيقي وحيد
وإحساسي بإني غريب
لا جنبي حبيب
يصحيني
يهنيني
بكلمة جميله أو بوسه
على جبيني
وتايهه يا قلبي أفكارك
ولا أحضان وإيد بتلم
وصدر يقربك منو
برقه يضم
يطفي يا قلبي لك نارك
على كتافوا تنام راسك
تنام الآه
على كتافك تنام راسو
جمال الدنيا بس معاه
ومن صدقو
وإحساسو
ملوش أبدا حبيب غيرك
ينسيني هموم الأمس
يعود بينا الكلام والهمس
وتجري تاني أنهارك
تخضر أرضك الناشفه
تورق تاني أشجارك
وقوللي يا قلبي يوم العيد
بدون أحباب
تدق الباب
لمين هتغني أشعارك




للإستماع للقصيدة والتحميل



أضغط هنا (http://www.4shared.com/file/65001023/d62ef008/_____.html)

آمال محمود كحيل
08-10-2008, 08:16 AM
أصعب فراق
كلمات : أسامة علي

http://www.tibason.com/vb/attachment.php?attachmentid=194&stc=1&d=1221602759

أصعب فراق
مش بين صديق أو بين قريب
أصعب فراق
لما الحبيب يهجر حبيب
يبقا البكا مش بالعنين
هجر الحبيب تبكيه قلوب
ودموعها دَمْ
مهو حبهم مش بالإيدين
جواك أنين
ترجع تعاني ف وحدتك
وتعيش في هَمْ
وتحس إنك وسط ملايين البشر
عايش غريب
ولا أي حد يحس بيك
مين ال م الوحشه يداويك
غير هُوَّه بَسْ
اللي في قربو أو في بعدو
بيك يحس
هوه المداوي لعلتك
هوه الطبيب
ليلك ضلام
من غير قمر
وسماك بيكسيها الغيام
شمسك تغيب
روحك بتهجر جتتك
طايره سوى
مع روح حبيبك في الهوا
رغم الخطر
رافضين لأحكام القدر
دمعك بيطفي شمعتك
إحساس رهيب
حتى الكلام
حرفو إشتكا
مليان بُكَا
هيجيب منين
دموع تِرَطَّبْ ع العنين
ومين يواسي فينا مين
ما خلاص
ما غاب عَنَّا الحنين
راح اللي كان من نظرة بس يحسني
راح اللي كان صدرو الحنين
بالحنان بيضمني
بين الإيدين
كل الجروح وياه تطيب
يا بكره شايل إيه معاك
ومخبي إيه
كُنَّا سوى دايما بنرسم حلمنا
تيجي يا بكره بأحلا حلم تضمنا
دلوقتي ليه
قاسي قوي
قبل الفطام
فرقت روح عن قلبها
وحرمت قلبي ال أنكوى
من حبها
مكتوب عَلَيَّه ف دنيتي
إن الفراق من قسمتي
وشمسي عاشقه للغروب
مكتوب عليه يا خطوتي
تاخديني وياكي لعذابي ف وحدتي
من غير ذنوب
قطر السعاده ليه يعدي محطتي
ومكاني في قطر الفراق
وإن قلت ليه
مليش مكان
الرد حافظو من زمان
قسمة ونصيب
وأصعب فراق
مش بين صديق أو بين قريب
أصعب فراق
لما الحبيب يهجر حبيب

للإستماع والتحميل



أضغط هنا (http://www.4shared.com/file/62742584/8bf948d2/__online.html)

آمال محمود كحيل
10-10-2008, 10:51 PM
أحلام ورديه (1)
كلمات :
أسامة علي


قولت أخرج م الفقر شويه
وأحلم أحلامي الورديه
وأحلم إني ملكت الكون
ومعايا كده يجي كام مليون
رحت مغمض عيني ونايم
وف أحلامي سرحت وهايم
وأعيش حبه ف دنيا هنيه
أول حاجه أفكر فيها
أنسى حياتي واللي جابوها
أنسى أصحابي
وأنسى أحبابي
وأقلع توبي وأغَيَّرْ حالي
وأنسى كمان حتى أم عيالي
وصوتها العالي
وأتجوز سوزي على بهيه
أصل بهيه لسانها طويل
وف عز الضهر توريني
نجوم الليل
ولا أشوف نوم
حتى هدومها بريحة التوم
صحة سليمة وست قويه
ولا تعرف حتى الأتيكيت
ولا بترتب عفش البيت
جوه المطبخ
دايما تطبخ
وطبيخها دايما بالزيت
وأنا بصراحة كده مليت
ولا تطبخ غير الملوخيه
وإن جيت مره ف يوم أدلعها
وكلامي الحلو أسمعها
فجأة بتطلع
زي المدفع
إيه دا يا عايب
بص لراسك
شعرك شايب
مش خايف لا ولادك تسمع
وأنا أتحايل إهدي شويه
إنما سوزي
آه يا سلام
حاجه باريزي
بجد مدام
ست رشيقه عليها قوام
لما تشوفها تحلم بيها جوه منام
وقوامها يغري البشريه
ولما بتتكلم ... يا خرابي
صوتها يجنن
بيرجعني قوام لشبابي
وأنسى سنيني
وصحة تجيني
وأرجع فارس
أصلها فرسه بجد عفيه
بتقول ليَّا أحلا كلام
بالعين والحاجب تتكلم
وتسمعني غرام في غرام
وف ضحكتها
يخربيتها
بتسيب ليها مفاصل رُكَبِي
من حلاوتها
وتاخدني معاها لدنيتها
ولا في مثالها في الحنيه
وتْحُطِّلي أجدع برفان
جاكومو وبيير كردان
صنع باريس
وتخليني بجد عريس
وف جنتها أغرق وأهيص
من بعد العشا للصبحيه
ومن النوم تيجي تصحيني
صحي النوم يا حبيبي وعيني
وألقا فطاري
وأنا ف سريري
وبرقتها تَمَلِّي تجيني
وتخليني معاها أمير وتكونلي حوريه
كم أسبوع وأتغير حالها
ولا عارف إيه اللي جرالها
قلبت لي ع الوش التاني
وأما أتكلم مش سمعاني
طول اليوم ماسكه التليفون
وبتتكلم قوي بدلاعه
وأنا بتزيد جويا ظنون
وتزيد وياها العصبيه
وأما بتخرج
لابسه محزق
قوي وملزق
والشعر السايح والنايح
م الهوا طايح
والبصه للجاي والرايح
وبتتعاجب قوي بجمالها
وبتعمللي يا خلق فضايح
وتْسَبَّبْلِي بجد أَزِّيَه
والمكياج على سنجة عشره
والبرفان جامد وشديد
قالبه الدنيا
والريحه فايحه
لو أسأل يا مدام فين رايحه
بتبصلي من طرف عنيها
وتبرألي
تفتح صوتها بعلو ما فيها
إيه يا روح أُمَّك
فوق على دمك
اتْلَمْ لأجيب حد يلِمَّكْ
والشعر السايح منكوش
ولا تشبه أبدا إنسيه
ولقيت نَفَسِي كمان محبوس
أستر يا ستار دا كابوس
فجأه صحيت من نومي لقيت
جنبي بهيه
ست البيت
ست اصيله
وبردو جميله
قولت بهيه كفايه عَلَيَّا
وأتوضيت شكر وصليت
على إن ال أنا شوفتو ف نومي
بس مجرد حلم غتيت
تاني تعود ريمه لطبيعتها
وأرجع لطبيخها أبو تقليه
ودا كان طبعا حلمي الأول
من أحلام آل إيه ورديه

آمال محمود كحيل
10-10-2008, 10:54 PM
تحت ضلاية زمان
كلمات : أسامة علي


الحياة كانت جميله
تحت ضلاية زمان
كات تساعي ألف عيله
تلقا بينهم فيه محبه
فيه مَوَدَّة وفيه أمان
فيه لكل رجل فايته
تلقا حِتَّه
كللوا بيوسع مكان
لو في بقك لقمة تطلع
للي يسأل
لو جعان
والغريب لوجه قَصَدْنَا
تتفتح كل البيبان
حتى داري
بيت لجاري
وإحنا في بيت الجيران
القساوة ال ف زَمَنَّا
فكرتني باللي كان
عيني تدمع
لما بارجع
وأفتكر ضلة زمان

آمال محمود كحيل
23-10-2008, 04:33 AM
عصفور


كلمات : أسامة علي



عصفور


لَكِنِّي بِقَلْبِكِ مأسور


وغنائي لك وَحْدَكِ أنت


أشدو بألحاني وأنغامي


فأنا بجمالك مسحور


وهجرت سمائي


وفضائي


والطيران


ووقوفي فوق الأغصان


وتركت الْعُشْ


والنوم على أعواد القش


لأنام وأصحو بين يديك


لتكوني سجني


والسجان


سكني


وطني


والعنوان


وتكوني لي


أجمل زهرة في البستان


تذبحني همساتك


نظراتك


ودمائي تسير بأوديتك


أو فوق ترابك منحور


أحببت الأسر


بين يديك وفوق الصدر


ألتمس النور


أحببت الأسر


في عينيك


وعلى شفتيك


ألتقط الْحُبْ المنثور


أحببت الأسر


بين القضبان بأقفاصك


تلفحني نسائم أنفاسك


فتنام جفوني


وتقر عيوني


ألتحف الليل بإحساسك


فأنا ماذقت الراحة منذ شهور


فالجنة أنت وأنت النار


وهدوئي وسكن الأسرار


وأنا بركان في أرضك


يهدأ ويثور


آسرتي


ساحرتي


أضناني الشوق إليك


واسافر في عينيك


تسحبني دوامات العشق


فالعشق في عينيك بحور


ماذا أفعل


عشقك قدري


من يملك رَدْ المقدور

آمال محمود كحيل
23-10-2008, 04:36 AM
متغربين
كلمات: أسامة علي

يا قلبي ليه مالك حزين
والْدَقَّه لِيِه
مِشْ عاليه ليه
جُوَّاكْ بيطلع صوت أنين
صعبان عليك تاني الفراق
والدمع نازل م العنين
صعبان عليك
حلمك يموت قدام عنيك
ولا حد سامع أَنِّتَكْ
ولا حَسْ بيك
م الطيبين
صعبان عليك بِإديه بيخنق فرحتك
وِنِسِي اللي كان
بينكم زمان
وإحنا اللي دايما كُنَّا لُه
على طول يا قلبي قُرَيّبِيِنْ
صعبان عليك
وسط الجراح
فاتك وراح
ولا وَدَّعَكْ آخر وداع
ولا حَنْ قلبه بكلمتين
عارفك يا قلبي
قد إيه بتحيها
دايب قوي
وتموت يا قلبي ف عشقها
وإحنا لها
على طول يا قلبي مشتاقين
طب يلاَّ قوم
بِدِّي أحضنك
بين الإيدين
عايز أطفي نارك
من عيوني بدمعتين
وأنا بوعدك
مش هسجنك
في قلب تاني بعدها
ونسيب طريق العاشقين
إهدا يا قلبي مش كده
وبلاش هموم
هيه الحياه من دا ودا
مش حلوة دايما كل يوم
فاتك حبيب؟؟
وَدَّعتْ وَيَّاه الحنين
إيه العجيب؟؟
ع الحال دا كُنَّا من سنين
أنا وإنته في دنيا الهوى
عايشين سوى
متغربين

للإستماع للقصيدة والتحميل

أضغط هنا (http://www.4shared.com/file/67932425/ddc1683e/_online.html)


22/10/2008م

آمال محمود كحيل
05-11-2008, 10:10 PM
بحبك يا إيما


كلمات: أسامة علي



في قربك في بعدك


بحبك يا إيما


بقيتي حياتي


هوايا وقوتي


وأجمل حالاتي ودنية أسامة


بَحِبِّك بَحِّبِكْ


بحبك يا إيما


****


بحبك حقيقه


وضحكه بريئه


بحبك حبيبة وصديقه وعشيقه


بَحِبِّكْ في حُبِّكْ رقيقه وجريئه


بحبك في غضبك


وأحبك حليمه


بَحِبِّك بَحِّبِكْ


بحبك يا إيما


****


بحبك لأنك


في قلبي وعيوني


منايا وهنايا


ولحظة جنوني


وفَرْحِي وجَرْحِي ومنبع حناني


في حبك بِتِدِّي ولا يوم تِهَدِّي


ودايما في حُبِّكْ تمللي عظيمه


بَحِبِّك بَحِّبِكْ


بحبك يا إيما


****


بحبك تِحِنِّي


ولا يوم تِضِنِّي


لأنك بقيتي خلاص حِتَّه مِنِّي


وروحي بتغضب


لو غبتي عني


يا أجمل ملاك


بدوب في هواك


وحبك حبيبتي يزيدني وسامه


بَحِبِّك بَحِّبِكْ


بحبك يا إيما


****


ولو فرقتنا حبيبتي الليالي


هتفضلي دايما تمللي في بالي


في قلبي في عقلي


في روحي وكياني


وأغلا الأماني معاكي وصالي


لأنك حبيبتي وأغلا الحبايب


وحبك معلم في قلبي علامه


بَحِبِّك بَحِّبِكْ


بحبك يا إيما

آمال محمود كحيل
09-11-2008, 08:05 AM
يارب خليهم لنا يارب خليهم لنا

كلمات:

أسامة علي


يارب خليهم لنا
يارب خليهم لنا
نسمة هوانا وحبنا
الفاتنات
الساحرات
ألطف جميع الكائنات
نعمه إدهالنا ربنا
يارب خليهم لنا
***
من غيرك أنا عمري ما أكون
ولا يوم تهوني ولا أهون
وأن تَوَّهِتْنِي خطوتي
عارفه طريقك سكتي
في حضنك الدافي الحنون
اللي بحنانو يضمنا
يارب خليهم لنا
***
الجنه من غيركم جحيم
ولا اطقشي أقعد فيها يوم
وإن يوم سافرت ف يوم بعيد
في رجعتي أنسى الهموم
يوم الرجوع يبقالي عيد
يوم السعاده والهنا
يارب خليهم لنا
***
يا أحن من نسمة هوى
لما بيجمعنا الهوى
إنتي المودة والسكن
لما حبيبتي نكون سوى
ومهما يحصل من زعل
ملناش غنا عن بعضنا
يارب خليهم لنا
***
علشان راحتنا بتتعبي
ولا تشكي يوم أو تهربي
وبتسهري
وبتصبري
على همي أو على مطلبي
حامله قرفنا وهمنا
يارب خليهم لنا
***
وصى عليكوا المصطفى
من ظلم واحد او جفا
واللي بيظلمكم لئيم
واللي بيكرمكم كريم
واللي يخون ضرب الوفا
يبقا أكيد مش مننا
يا رب خليهم لنا
***
يا ظالمين الست ليه
هو الضعيف بتجور عليه
لو كنت إنته الست يوم
ترضا بظلمك دا يا بيه
شاطر في طبعك بس لوم
والحاله عندك مزمنه
يارب خليهم لنا
***
يا منصفين العدل فين
ستاتنا دول مش خدامين
أم البنات
وأم البنين
شيلها وصونها ف نن عين
نِوُّهِبْهَا كل حبنا
يارب خليهم لنا

آمال محمود كحيل
25-11-2008, 09:04 AM
إهداء لكل من نوى الحج هذا العام تقبل الله طاعتكم

يا مْلَبِّيِيِن الندا لحج بيت الله

كلمات : أسامة علي

يا مْلَبِّيِيِن الندا
لحج بيت الله
يوم المنى والرضا
نُور الهدى تلقاه
نَوَّرْ بصيرتك وقلبك
لما أهتديت لهداه
تمم عليك نعمتو
بالحج نُلتْ رضاه
صَفِّيِلُو قوم نِيِّتَكْ
إياك تحب سواه
وف كل خطوة وطريق
خليك تمللي معاه
وأما تشوف البيت
هلل وقول الله
طوف يلاَّ وأسعا وكبر
من حَجْ طاب مسعاه
صَلِّلي في حِجْر إسماعيل
بركعتين جُوَّاه
وأدعي في يوم عرفات
خليك تمللي معاه
وأبكي على ذنبك
وأطلب من الله رضاه
مين غيرو نُورْ القلب
يهديه في يوم لو تاه
وبَحذرَكْ إياك
تشغل هواك بسواه
وإلعن أبو إبليس
والرجم يبقا جزاه
والْهَدْيّ بعد الرجم
تكفيك يا حاج الشاه
وتطوف طواف الإفاضه
في القلب تلقا صفاه
والراحه ويا السكينه
ورحمتو تغشاه
وإنته هناك في الحرم
كَتَّرْ في ساحتو صلاه
الركعه تسوى ألوف
زيد في القلوب تقواه
دا خير زادك في دنيا
في آخرتك تلقاه
وَيَّا النبي صُحْبِتَك
في الْجَنَّه تبقا معاه
أمانه صون نعمته
وإياك في يوم تعصاه
دا الحج لو مبرور
كل القلوب رايداه
ترجع كما المولود
يوم أمه كات والداه
ووصيه مني السلام
على حبيب الله

آمال محمود كحيل
25-11-2008, 09:07 AM
مش هغير



كلمات : أسامة علي



مش هغير

مش هغير

قولتهالك ألف مره مشهغير



حتى لو فيه ألف عاشق
وقفوا ليكي في الطابور
مش هغير
مقطع متكرر
***
مش راح أتوسل إليكي
ولاَّ يوم أترجى فيكي
ترجعيلي
تضوي ليلي
ولاَّ ابوس حتى ف إيديكي
أصل أنا في بلاط سموك
مش أسير
مش هغير
***
لِمِّي كل الناس عليكي
إجذبيهم و إشغليهم
دوبيهم يا ملاكي
بإبتسامه
أو بضحكه
أو بغمزه من عنيكي
خللي عقل الناس يطير
مش هغير
***
مين دا قالك إني مشتاق ليكي جداً
وأما أشوفك ويَّا غيري
راح تزيد جوايا ناري وقلبي يحزن
حتى لو دمعي ف عيوني
ولاَّ زاد تعبي وشجوني
أو بهجرك تهجريني
هجر بِيّطَوِّلْ شهور
مش هغير
***
مش هغير يا غنوة ياما حلمت بيها
مش هغير يا دنيا حلوه دبت فيها
حتى لو كنتي هنايا
والقمر في ليل سمايا
في الجمال بدر البدور
مش هغير
***
بس إوعي تحلفيني
أو تقولي عنيك في عيني
عيني لمَّا تشوف عيونك
يشكوا مِنِّي ويفضحوني
تحكي عن شوقي المخبي
جوه قلبي
ومداريه في قلب بير
كنت أداري فيه شعوري
خايف إنو يفيض في عينك
تعرفي كدبي الكبير
وإنِّي أيوه عليك ياعمري
قد حبي ليك بغير

آمال محمود كحيل
25-11-2008, 09:02 PM
يا لؤلؤة البحر لك قلبي محار
كلمات : أسامة علي

يا لؤلؤة البحر
لك قلبي محار
من أجلك أتقنت الغوص
في الأعماق
تغرقني الأشواق
ألتمس إليك مسار
تتقاذفني أمواج العشق
وعواصف حب عاتية
تأتيني
ترديني
وأنا البحار
وأصارع دوامات الرهبة
والرغبة
أسبح ضد التيار
فحنيني إليك
لا يُجْدِي معه الصبر
لا يطفئ لهب النار
يا قبلة قلبي
وأنا الناسك في محرابك
وعلى أعتابك
أتعلق بالأستار
وتراتيل الحب النازف من أوردتي
من شرياني
من هذياني
من أول سفر التكوين
حتى آخر حرف دُوِّنَ بالأسفار
تتجه إليك أحاسيسي
في صلوات العشق الساكن
في تكويني
ليل نهار
أتوسد صدر حروفك
والكلمات
وأداعبها
وألاعبها
تصهرني تلك الآهات
وتحاصرني أشد حصار
تغزوني
ترفع ألوية النصر
فوق كياني
تستعمرني استعمار
ويثور الجند النائم في مخبئه
منتصب الهامة
كجذوع الأشجار
لكن رياحك عاتية
آتية كالإعصار
لا أملك ردا
لا أملك صدا
غير الاستسلام
هو خير قرار
ووفاق
وعناق
ومعاهدة لتكوني
سيدة الدار

آمال محمود كحيل
01-12-2008, 02:47 AM
أنا بحسد الفستان عليك

كلمات : أسامة علي

لو تلبسي أجمل دهب
واحلا فساتين السهر
وِمْطَرَّزِينْهَا بالقصب
إنتي بجمالك بِتْزِيِنِيه
ويبان عليه
الرقه فيه من رِقِّتِكْ
وإن حد شاف فيه الجمال
على طول وقال
الله عليه فستان جميل
علشانك إنتي يا غزال
سحر الجمال ف مشيتك
حتى فساتين الفرح
ترقص عليكي من الفرح
على صوت وِرِنِّة خطوتك
بدر التمام
مفيش كلام
بياض وبياحصرو السواد
في وسط ليل
والعاشقين
عشقوا السواد وقت السهر
لجل القمر
صافي وجميل
يا أرق حتى من القمر
اللي حلاوته
خَدْهَا من لون بشرتك
بدر البدور
وف أي فستان تظهري
بتنوري
مَهُو ربي زانك بالجمال
وإنتي بجمالك تسحري
لَمَّا تِطُلِّي بِطَلِّتِكْ
وأنا مهما أقول
واقول كمان
واوصف في حسنك اللي بان
ولاَّ الموده والحنان
مش هقدر أوفيكي الكلام
مهو رقتك في كلمتك
والطيبه ويَّا
خفة الدم اللي فيك
وجمال عنيك
تسعد قلوب
على طول تدوب من نظرتك
وأنا بحسد الفستان عليك
علشان بيلمس جِتْتِكْ


حكاية القصيدة : رأيت سيدة جميله ترتدي فستان سواريه أسود جذاب
وكان وجهها شديد البياض مع شعر أسود مختلط بخصيلات شقراء والأبتسامه لا تغادر هذا الوجه الجميل
تخيلتها القمر في ليلة إكتماله في وسط الليل فأوحت إلي بهذه الكلمات

آمال محمود كحيل
12-12-2008, 03:19 AM
يا صباح الحب مني
كلمات :
أسامة علي

يا صباح الحب مني
يا صباح النور عليكوا
يا صباح الطير يغني
يسعد القلب وعنيكوا
يا صباح القشطه واللبن الحليب
للي جنبي
واللي غايب
واللي شايلو جوه قلبي
والحبيبه والحبيب
إيدي ممدوده بسلم
سلموا يلا بإيديكوا
يا حبايبنا ال جونا
إحنا شايلنكوا ف عنينا
طيبة عيله
وناس اصيله
طيبه فرحانه بقدومكوا
يلا بينا
ننشر الحب في ربوعها
واللي باعها
عمرو يوم ما يهون علينا
طيبة قلب الأم دافي
لو تجافي
الحنان جوَّاها صافي
حضن دايما بيساعيكوا
يا نجوم ماليه سمانا
أمتعونا
بالمشاعر والمعاني
بالنوادر والأغاني
رجعوا لطيبه زمان الأصفهاني
نلقا شوقي تاني فيكوا
جيت اصبح
للحبايب مني كلمه
زي نسمة الصباح
جيت أصبح
للقلوب الصافيه جدا والملاح
جيت أصبح في ليالي العيد واقول
عيد سعيد عليك يا طيبه
عيد سعيد على كل ناسك
اللي فيكي لسه ناسك
واللي باعك
ولاَّ داسك
برضو مهما كانوا هُمَّا
ضهر ليكي وقت غُمَّه
جوه قلبك
جوه راسك
طيبة تتنفس هَوَاكُوا

آمال محمود كحيل
12-12-2008, 04:36 AM
طب أنساكي يا حوا كيف
كلمات أسامة علي

وكِيِف أنسى
يا مخلوقه عشاني كِيِف
وكيف أنسى
وعشقك جُوَّه قلبي كِيِف
ومدمن واضح الإدمان
وفيكي بِيِكْتَرْ السرحان
وواخداني
وِلَفَّانِي
وبحبالك محوطاني
بنظرة بس أو بسمه
وغمزه حتى أو كلمه
يا أستاذه في فن اللف والتكتيف
وكيف أنسى
وإنتي حقيقه قدامي
في أيامي
في أحلامي
بدون تجميل ولا تزييف
نسيتي إنتي إتخلقتي منين
يا نور العين
ومن ضلعي خرجتيلي
ومهما تغيبي بتجيلي
ومهما أكون معاك قاسي
تِحِنِّيِلي
بعشق عفيف
هقولهالك من الآخر
مفيش بينا يا حلوه هروب
خلاص إنسي
دا شئ مكتوب
عشان إنتي مدام آدم
وخَدَّامَتي
وأنا ليكي كمان خَادِمْ
ولو يوم مرَّه أكون قاسي
بأعود من تاني ليك نادم
ومعرفشي
بكون قدام دموعك ليه
يا حوا ضعيف
وحبي ليكي أو حبك
مهوش بالإيد
ومنقوش نقش جوه قلوب
ومهما حبيبتي نتخانق
بنرجع تاني نتعانق
ويكويني لهيب نارك
ومن نارك
أقول يا لطيف
مهو إنتي الجنه وإنتي النار
وإنتي الساكنه في الأفكار
وإنتي يا حوا ست الدار
وأنا عندك حبيبتي ضيف
وأنا المطحون
بَلِفْ الكون
عشان خاطرك واراضيكي
ومهما يا حوا أغيب عَنِّكْ
بعود ليكي
وأراضيكي
وأجيبلك حته م النجمه
تكون ملكك وف إيديكي
وكللو يهون
في ضَمَّه بكل حِنِّيَه
لِصِدْر حنون
وأشوف الكُحْلَه في عنيكي
وتاخديني
تضميني
وأدوب فيكي
وأتوه فيكي
وأضيعي فيكي
طب أنساكي يا حوا كيف

آمال محمود كحيل
12-12-2008, 04:38 AM
يا حلم قوم
كلمات أسامة علي

طول ما فيه لِسَّه نَفَسْ
مِشْ هسجنك جُوَّه القفص
يا حلم قوم
إحلم وخُدْ حُرِّيتك
طير في الفضا
غَنِِّي ورَجَّعْلِي بغناك
تاني الصدا
الكون دا ليك
إسبح وطيرلأبعد مدى
ولا تنخرس
خفف آلامي ف دنيتي
أرض الجمال دي دنيتك
ولا يوم في عمري تنحبس
إحلم بكل شئ جميل
وإن جه نهار
وهَدُّو ليل
مش هبكي ع اليوم اللي راح
وأفضل أقول
دا مستحيل
فيه يوم جديد راح يتولد
ويجيني فيه تاني الْوَنَسْ
كم مرة زَلِّتْ خطوتك
في سكتك
كم مرة ضاقت يوم معاك
وساعتها نزلت دمعتك
لآكنها كات سِلِّمَه
تطلع عليها لِفَرْحِتَك
وتبان ملامح بسمتك
بُرْعُمْ سعادة بيتولد
يكبر وتعلا ضحكتك
تحصد أماني ممكنه
وكتير فرص
الأرض مش دايما سهول
كل ال تتمناه تطول
لكنها فيها التلال
فيها الجبال
فيها الْحُفَرْ
وتلاقي أصناف م البشر
إبن اللئيم
وإبن الأصول
ودا طبعه بين الناس دميم
وتلاقي ناس آخر جمال
أصبر تنول
إياك تِسَلم للألم
وتكونِ ْأسير في دنيتو
وجنودوا دايما ليك حرس
هيوصلوك أخر الطريق
واليأس هيكونلك رفيق
يلغي العقول
دا اليأس غول
وغول شَرِسْ
ويا حلم قوم
مِشْ هسجنك جُوَّه القفص

02/05/2007م

آمال محمود كحيل
12-12-2008, 04:40 AM
أرض الكنانة
كلمات : أسامة علي

من عهد هاجر
وعهد سارة
إسمك يا بلدي
في الكون أماره
عاش فوق ترابك
سَيِّدْنَا موسى
وسِيِدْنَا يوسف
ومر فيها
عيسى الرسول
وفيكي بردو
سِيِدْنَا الحسين
والست زينب
بنت البتول
أرضك يا مصر
أرض الطهارة
شعبك بيعشق
إسمك ورسمك
عشق بغزاره
وإنتي الحقيقه
في قلوبنا عايشه
لآخر دقيقه
هواها.. نيلها
نهارها .. ليلها
غنوة نقولها
على القيثاره
مصر البشر
في كل شارع
وكل حارة
مصر اللي نورها
للدنيا كانت
دايما مناره
مصر اللي إسمك
يا أرض جنة
مذكور بحرفك
قرآن وسنة
عنك إشارة
إبنك وجندك
في الأرض هما
أفضل مهارة
وفلاحينك
رافعين جبينك
من أرض طينك
واخد سماره
يشهد تاريخك
على شموخك
يشهد بإنك
ثابت رسوخك
تاريخ مِنَوَّرْ
ومش مِزَوَّرْ
مكتوب في دفتر
وع الحجارة
أرض الكنانة
صاحبة مكانة
طول التاريخ
وأم الحضاره
28/05/2007م

آمال محمود كحيل
12-12-2008, 04:41 AM
وبعد سنين كتير عدت

كلمات : أسامة علي

وبعد سنين كتير عَدِّتْ
وطالت بِينَّا غُرْبِتْنَا
وجُوَّانَا الجذور شَدِّتْ
وهَمْ العمر مِتْعَلِّمْ
خطوطو ع الوشوش مَدِّتْ
نسينا كل شئ بِينَّا
مع الأيام بقت ماضي
بقت ذكرى
بفاس الْفُرْقَه وأتْهَدِّتْ
قابلتك قلت مش هِيَّه
لقيت قلبي
بِدَقَّه شديده وقَوِيَّه
يِسَمَّعْنِي
يقول هِيَّه
وشايف ضحكه ف عنيها
وبَصَّالِي
لقيت رَجْفَه في أوصالي
ولَفِّتْنِي بِدَوَّامَه
بتبلعني
ونفس الضحكه حَسِّتْهَا
ورَنَّة صوتها ما نسيتها
صداه لِسَّه بيسْكُنِّي
وجَاتْلِي وقَرَّبِتْ مِنِّي
ومَدِّتْ إيدها بِتْسَلِّمْ
لقيت فَرحة وشوق وحنين
في سجن الذكريات نايمه
بقالها سنين
بدون م أنطق بتتكلم
كأن الساعة كات واقفه
على آخر لُقَا بِينَّا
وزَيّ البرق في ثواني
رجعنا للشباب تاني
رجعنا لثانوي والجامعه
وللكرنيش
وأحلام كات بتجمعنا
سوى هنعيش
رجعنا لأحلا أيامنا
جنون الحب وغرامنا
ولحظة طيش
ونزلت م العيون دَمْعَه
حضنت إيديها بين إيدي
وأكبر بسمة في الدنيا
على وشوشنا
بحجم الكون
وحُمْرَه كاسيه لخدودها
وباينه كمان على خدودي
وآهَه طالعه من جوفنا
بتنهيدها وتنهيدي
هِرِبْ مِنَّا الكلام حَبَّه
وكان بس الكلام بالعين
نَطَقْنَا في نفس واحد
وَحِشْنِي وإنتي وَحْشَانِي
ورَدِّينَا بضحكتنا
بصوت شَقْ السكون فينا
صداه جوانا يتردد
نسينا الدنيا حوالينا
وعشنا عمرنا ف لحظة
رجع فيها الحنين لينا
وشوق جارف بيخطفنا
من الدنيا اللي واخدانا
وحسيت ندهة بتنادي
تهز بعنف وجداني
داريني حبيبي بين حضنك
وخبيني
وسيبني بين إيدك لحظة
تنسيني
سنين عدت من الحرمان
وداويني
وفجأه سمعت صوت تاني
يناديها
ولسه إيِدَيَّا في إيديها
قالتلي خلاص أنا همشي
وبسألها هنتقابل
وبعنيها تودعني
ولا رَدِّتْ
خدت روحي
خدت قلبي
وكل ما فيا يوجعني
وفكري تاه ومتشتت
وقِفْت مكاني مِتْسَمَّرْ
وبعيوني ببصلها
تبص وراها وتشوفني
لحد ما طيفها غاب عني
وعقلي يقوللي يلا إمشي
خلاص بعدت
ساعتها لقيت زِعِلْ قلبي
ونفسو للحياه إتْسَدِّتْ



17/04/2007م

آمال محمود كحيل
12-12-2008, 04:43 AM
وحشتيني
كلمات : أسامة علي
يا أم الدنيا يا غاليه
وحشتيني
يا ساكنه عقلي وكياني
ومشتاقلك وشوقي كبير
ونفسي أطير والاقيكي
في قلب الحضن وخداني
ما أنا ابنك
ومن طينك
ولحمي ودمي من خيرك
وإمتى يا بلدي أرجعلك
وأشم هواكي من تاني
وَحَشْنِي كمان قوي ليلك
وأنا بَتْمَشَّى على نيلك
وبُعْدِكْ والله بكاني
وبشتاقلك
وأغنيلك
وحافظ كل مواويلك
وجاي ملهوف
لكل ذرة من أرضك
لكل حبايبي من أهلك
وأطل وأشوف
على بلادي اللي بأعشقها
وهي برضو عشقاني
وأنا بسمع لست الكل
لقيت الدمع من عيني
قوام بِيّطَُلْ
وِوَيَّا غُنَاهَا شَدِّتْنِي
قَعَدت أسمعها وخدتني
لأرض الحب وَدِّتْنِي
لعشقي وروحي
لبلادي
هناك عمري وأولادي
هناك أهلي وخلاني
واحشني غيطانك الخضره
وبشرة أهلك السمره
وطين أرضك
وأشم العطر من وردك
وحشني الناس
وحشني الرقه في قلوبهم
وصدق الكلمه والإحساس
ما أنا شايلك هنا ف قلبي
وفوق الراس
يا غاليه يا مصر
وأغلا من الدهب والماس
خريطتك في العيون ساكنه
ولا عمرك فارقتيني
وإسمك وشم على قلبي
ومكتوبه على جبيني
وبَتْشَرَّفْ أنا بيكي
ومصر ف قلب تكويني
وحبك في العروق يسري
ومهما أبعد
بشوفك ضِلْ وَيَّايَا
لأنك ساكنه وجداني
ويا أغلا البلاد إنتي
وحشتيني

آمال محمود كحيل
12-12-2008, 04:44 AM
بمناسبة الألفية السابعة عشر لسيدة البيان



يا أجمل وردة في جنينة


كلمات : أسامة علي



سبعتاشر من الألوفات


يا ياسمينة


يا أجمل ورده في جنينه


وزينة أحلا منتديات


هنا ف طيبة


قلوب الكل بتحبك


عشان قلبك


ملان بالرقه والطيبه


وليكي يا غاليه أحلا صفات


سبعتاشر من الألوفات


بتسحرنا بأحلى بيان


يا موهوبة


وفنانه


كلامك يطرب الآذان


بيمتعنا ويشجينا


كما الألحان


يا نجمة عاليه في سمانا


تقولشي الست ولاَّ نجاة


سبعتاشر من الالوفات


بتروينا


وتسعد روحنا وعنينا


وتحملنا في قصايدها


في رحله ف بحر في سفينه


بنسمه عليله تحيينا


تخلينا في أحلا حالات


سبعتاشر من الألوفات


في كل مكان بنلقاكي


جمال الشعر في بحورك


نجوم منثوره في سماكي


وليلنا يِنَوَّرُو نورك


ربيع الشعر وياكي


نسايمو تهل بعطورك


تهب برقه كالنسمات


بتسحرنا


وتأسرنا


ونقضي معاكي احلا ساعات


سبعتاشر من الألوفات


تهل قوام


باحلا كلام


رشاقتو تقول كأنو غزال


بتسعدنا وتشجينا


مع حروفها تحس الحرف من حسنو


بيتغندر ويتمايل بكل دلال


ومين غيرها


هنا نورها


قمر بيهل في سمانا


يا أحلا إسم بنشوفوا


يا ست أمال


يا قسمة حلوه مقسومه


ومهضومه


من الرجاله والستات


ونلقا البسمة مرسومه


بخفة دمها الشربات


على أحلا كلام نصحى


بشعر العامي أو فصحى


على أجمل كلام بنبات


وأنا جايلك بهنيكي


يا ياسمينه


يا أحلا ورده في جنينه


وزينة أحلا منتديات

آمال محمود كحيل
12-12-2008, 04:45 AM
إلاَّ الْبُكَا ....إلاَّ الدموع
كلمات : أسامة علي


إلاَّ الْبُكَا
إلاَّ الدموع
يا حلم نَوَّرْ دنيتي
يا ساكنة قلبي ومهجتي
بين الضلوع
دمعك دا غالي
وف غلاوتو ما يتوصف
وَصْفُو في قلبي ملوش مثال
وإن مَرَّه يوم ع الخد سال
هَمِّي يزيد
يصبح جبال
ويبان عَلَيَّه وأتعرف
وسط الجموع
إلاَّ الْبُكَا
إلاَّ الدموع
قلبك رقيق وف رِقِّتُو
زَيّ الندى
ينز ل على القلب الحجر
تزيد وتعلا دقتو
يا قلب طير
وعشقت جدا طَلِّتُو
وأسرح وأطير
وبقيت أسير في دُنْيِتُو
وإن نِنْ عِيِنِكْ
مَرَّة نِزْلِتْ دَمْعِتُو
الحزن يملا سكتي
والوش تهرب بسمتو
وأتوه وأضيع
إلاَّ الْبُكَا
إلاَّ الدموع
إنتي وأنا
ملناش غِنَا عن بعضنا
لَوّ تحزني
القا الوجع بيهزني
وإن يوم قاسيت
ولاَّ بكيت
بتكوني حضن يضمني
وما بين إيديك
تهرب غيومي
وتنكشف زُرْقِة سمايا
تبان نجومي ملألأه
شمسك دفاها يلفني
وقت السطوع
إلاَّ الْبُكَا
إلاَّ الدموع
خلاص حبيبتي مفيش خريف
ولا حتى صيف
أيامنا هتكون كلها
دايما ربيع
بستان زهوره مِنَوَّرَه
ومْخَضَّرَه كل الربوع
بيشدنا لبعض الحنين
وِبْحُبْ دايما سهرانين
نسهر على ضَيّ الشموع
م إحنا بقينا إتنين سوا
دايبين وَدَوِّبْنَا الهوا
وبقولها ليك لو هَتْحِرق
ابدا حبيبتي ما نفترق
عشقك خلاص
ما فيهوش رجوع

آمال محمود كحيل
12-12-2008, 04:54 AM
يارب في رمضان تعتقنا م النيران
كلمات : أسامة علي

يا رب إنته الرحيم
وبحالي إنته عليم
والذنب بكاني
***
بتوه كتير خطوتي
تبعدني عن سكتي
وأرجع إليك تاني
***
ياما غلطت يا رب
وميزان ذنوبي طب
والدنيا وخداني
***
ضحك عليه الشيطان
وعصيت كمان وكمان
وشبابي غواني
***
واقف ما بين إيدك
والقلب بيريدك
يا رب تهديني
***
جايلك وانا باكي
والدمع ليك شاكي
من ضعفي وهواني
***
لو يوم أجيك واتوب
تغفرلي أي ذنوب
جهلي وعصياني
***
تفرح يارب بتوبتي
وتزيد معاها فرحتي
والرحمة تغشاني
***
يا رب يا قيوم
دايم ولا في نوم
وما عداك فاني
***
إنته العليم بيه
في الجهر والنيه
إغفرلي نسياني
***
وأرزقنا في رمضان
تعتقنا م النيران
يا رب نجيني
***
إجمعنا ويا النبي
وهو دا مطلبي
حبو في وجداني
***
إسقينا من إيدو
أنا قلبي بيريدو
والسُنْه عنواني
***
موجود في كل وجود
نعمك دي مالها حدود
أغفرلي نكراني
***
عِينْي على الطاعة
وصلاتي في جماعه
يا رب قويني
***
خليني فاعل خير
وأكون معين للغير
حِصْنِي يكون ديني
***
يارب يوم الحساب
ينطق لساني الجواب
تقللي ميزاني
***
ذكرني يوم أخرتي
أقدر أقول حجتي
في القبر وحداني

آمال محمود كحيل
12-12-2008, 04:54 AM
ومين غيرك هيسمعني
كلمات : أسامة علي
في عز الليل
وكل الخلق كات نايمه
وأنا سهران
تِقَوّمْنِي الهموم كوابيس
أعاني كتمة الأنفاس
وبتنفس كما الغرقان
في صدري ضيق
وبأستنجد بفاعل خير
وأقول ياناس
ما لاقي صديق
ولا عابر سبيل فايت
يِمِدْ بإيدو للإنسان
صحيت مشعوف
ودقة قلبي بزيادة
ملاني الخوف
وقولت أَنْدَه
وحَدْ يجيني م الجيران
لكين جاني
صدى صوتي
وجاي مكتوم
وبيعاتب
وبيلومني
ومين بَسْ اللي يصحالك
في عز النوم
رفعت إيديَّا للخالق
وقلت يا حيّ ياقيوم
ومين غيرك هيسمعني
يطمن قلب كللو هموم
ومين غيرك في كل مكان
ومين غيرك قريب مني
مجيب للداعي مهمن كان
ومين غيرك
بيغفر مهما كان ذنبي
ومين غيرك بيرحمني
مع العصيان
لقيت نِزْلتِ دمعوع عيني
كما الطوفان
في سِكِّتْهَا
خدت هَمِّي
وشالت غَمِّي والأحزان
وداب خوفي
مع تلاوتي
لأول حرف م القرآن
وحَسِّيتْ الْوَنَسْ جَانِي
من الوحدة
ومن تاني
في قلبي سكينة وإطمئنان
شَكَرْت بقلبي ولساني
وسجدة شكر للرحمن
وقولت الحمد ياربي
على نعمك وع الإيمان

5 رمضان 1428هـ

آمال محمود كحيل
12-12-2008, 04:59 AM
مالك يا بت يا أموله
كلمات : أسامة علي

صوتك بيضرب في وداني
مالك يا بت يا أموله
رجعتوا للخناقات تاني
بالذمة دي تبقا رجوله
البت زي القشطه معاك
ودايبه خالص دوب في هواك
طيبه ورقه وعسوله
ياما قالولي بلاش مِنٌّو
دا واد لَبَطْ وبتاع خناقات
وحكولي ياما كتير عَنُّو
وسمعنا عنو كتير حكايات
وآهي النتيجه خلاص بانت
لَمَّا مراتو عليه هانت
قال إيه وعايز يضربها
إِيَّاكْ مِفَكَّرْهَا بطوله
إيه الحكايه طب إحكولي
يا بنتي يلاَّ قوام قولي
يا بابا يخرج على سَهْوَه
ليلاتي يسهر ع القهوة
ويجيلي دايما آخر الليل
دماغو تايهه ومسطوله
ولا عمرو قاللي كلام طَيِّبْ
ويقول بَحِبِّكْ ويّطَيِّبْ
يحكيلي وأحكيلو همومي
ويكون من القلب قُرَيِّبْ
وطباعو دي مش مقبوله
وإن جيت أحاسبو أو اتكلم
يدخل عليه ولا يسلم
وتمللي ساكت ومبلم
ويقول عليه أنا مهبوله
صحيح كلامها يا شربيني
فيها يا ابني إيه أما تجيني
نصلح ما بينكم بسهوله
يا عمي ابدا ما حصلشي
أمال دي نايمه هنا ف قلبي
لكن الحقيقه ما بتقولشي
طب قولها يابني وريحني
نفسي في كلمة تفرحني
هقول وطبعا م بخافشي
يا عمي إنته ما تعرفشي
أمال صحيح رِقَّه وخِفَّه
لكن ساعات بيجيها هَفَّه
وأشوف عنيها فيها الْرَفَّه
على طول وتقلب في الْدَفَّة
وشايله مني ومغلوله
ولو ألوم تبقا حريقه
تبكي وتعمللي بريئه
والبيت يولع في دقيقه
ودماغها ضربه ومخلوله
وتمللي قاعده مع الجاره
عاملين سوى دايما غاره
شابكين نهارهم مع ليلهم
ويوماتي طبخالي بصاره
ومع الجيران رايقه وتضحك
ومعايا دايما مقفوله
ولو أنادي عليها تقول
يا راجل إنته تمللي عجول
أصبر شوية أنا مشغوله
طب مين يا عمي بقا الغلطان
مش هيه برضو المسؤوله
يا لهوتيني يادي النيله
تفضحني قدام العيله
يا بابا متصدقش أحمد
أنا برضو بنتك أموله
يا ولاد خلاص أصبروا حبه
كل المسائل محلوله
هلاقيها بس منين ومنين
من أخوكي ولا من جوزك
على طول تمللي متخانقين
وراجعه لاويالي ف بوزك
وتغضبي على طول في البيت
وترجعيلو إم يعوزك
دي عيشة دي مش معقوله
قوم يلا يا أحمد وحياتك
ما ليكش بركه إلا مراتك
خدها في حضنك وصالحها
هيه حبيبتك وحياتك
وبلاش خناق نفسي في ليله

****************
الألوان : الأزرق بابا أمال
الأخضر : أمال
البني : الشربيني

آمال محمود كحيل
12-12-2008, 05:02 AM
وهُوَّه بإيدي حبيتك !!!

كلمات: أسامة علي


ومين قال إنْ أنا نسيتك!!
وهُوَّه بإيدي حَبِّيتِكْ
عشان أقدر على النسيان
يا ريت دا كان
ما كانوا إتعذبوا الْعُشَّاقْ
وداقوا الْمُرْ في الأشواق
ولا التنهيد
دا نسيانك
وهجرانك
ولهفة روحي لمكانك
مهوش بالإيد
قدر مكتوب
يدق قلوب
ونار بِتْقِيِدْ
وقلبك لِيَّا بقا بيتي
وقلبي ليك بقا بيتك
وياريتك
تِحِسِّي لَوّعِتِي ف بُعْدِكْ
دا بُعْدِكْ كان على عيني
ويلاَّ قوام تعالي إجري
دا بيتك بابو مفتوحلك
على الآخر
ومن بدري
ومِسْتَنِّي
عليه تِحِنِّي
أنا اللي ف قلبي حَطِّيتِكْ
أنا ال بَحِنْ ليك دايما
وفي وداني نَغَمْ صُوتِك
وبفرح لَمَّا اشوف طيفك
هِنَا جاني
وبَسْرَحْ فيكي يا حبيبتي
وطال وياكي سرحاني
وأنا مْصَدَّقْ
بإن الحلم وياكي هيتحقق
ونتلاقى
ونتشاقى
وفي بحر الغرام نغرق
دا حُبِّكْ سُوطْ بِيِلْسَعْني
ويوجعني لهيب سوطك
بقولهالك
وبَتْمَنَّى يروق بالك
أنا فاكرك ومش ناسي
وقلبي يا روحي مش قاسي
دا انا عمري ما شوفت حنين
في نظرة عين
بتلمسني
بتحرسني من الحاسدين
خدت عيني لناحيتها
وشدتني
وضَمِّتْنِي لِدُنْيتْهَا
وضَمِّيتِكْ
في نن عْنَيَّه حَطِّيتِكْ
وقلبي زاد في دقاتو
على بابك
وسهم الحب من عينك
صداه صَابِكْ
ومن يومها لانا قادر على النسيان
وبَشْكِي لَوّعِة الحرمان
ولَوّ مَدَّه إيديك لِيَّا
أنا روحي ال مَدَّالِكْ
ورافضه تعيش كمان فِيَّا
وسَايّبَه الكون وجَيَّالِكْ
خديها ف حُضْنِكْ الدافي
دي عاشقه عطر أنفاسك
وبِلِّلي عطشها من رِيقِكْ
وإيه يرويها غير كاسك
وضُمِّيهَا بحنان ليكي
على صِدْرِكْ تنام حَبَّه
ما بين القلب وإديكي
وتِتْوَنِّسْ بصوت نَبْضِكْ
دا روحي دايبه دوب فيكي
وشوق بِيّحِنْ لوصالك
يِقَرَّبْنَا
يِرَجَّعْنَا
وأحِنْ لوقت يجمعنا
وأَعَوَّضْ كل يوم فاتك
وأكون نِسْمِة هَوَا ومَيَّه
وأكون قُوتِك
وأكون لِعْبَه في ليل حُبِّكْ
وِتَسْلِيتِكْ
وإوعي تصدقي ظَنِّكْ
ولا الوسواس
ولا حتى كلام الناس
بِإنِّي ف يوم أنا نسيتك
وهُوَّه الْحُبْ يا حبيبتي
بإيدي يوم ما حَبِّيتِكْ !!




تنويه هذه القصيدة كتبتها بعد قراءتي لقصيدة سيدة البيان
والشاعره المبدعه الذي أكن لها كل حب وتقدير
( حقيقي قدرت تنساني)
فكانت كلماتها هي الرحم الذي ولدت منه كلماتي فلها أوجه التحية

آمال محمود كحيل
12-12-2008, 05:04 AM
زغروطه حلوة عشان ندى

كلمات : أسامة علي




عقبال عندك يللي تزغرطي



يللي هنا في المنتدى
زغروطه حلوة عشان ندى
يوم عرسها
يوم سعدها
والنور على جبينها بدا
يللي هنا في المنتدى
زغروطه حلوة عشان ندى
***
لايقه عليك ست البنات
ولايقلها
زي القمر سكر نبات
يا علاء سكنت ف قلبها
بنت الأصول
لإبن الأصول
وبعيد وأقول
شيلها ف عنيك
وخللي بالك منها
حظك ياعم
مقسومه ليك م المبتدى
يللي هنا في المنتدى
صغروطه حلوه عشان ندى
***
يا نن عين بابا وأمال
منهم يا ناس واخده الجمال
وف حسنها
مين زيها
عفه وأدب ملهوش مثال
ويوم الهنا
ويوم المنا
لما علاء طلب الوصال
نال القبول ويّا الرضا
يللي هنا في المنتدى
زغروطه حلوة عشان ندى
***
غنولها يلا وهيصوا
وعلاء عريسنا رقصو
دقوا الطبول
حُطوا الزينات
رشوا اللملبس
والعصاير في الكاسات
ويا هندسه
قلب الحبيبه هندسو
إدعوا لندى
وعريسنا ربي يحرسو
نَوَّرْ طريقهم بالهدى
يللي هنا في المنتدى
صغروطه حلوه عشان ندى
***
ويا ربنا يا ربنا
بارك يارب في عرسنا
ويكونوا دايما محروسين
من كل عين
وف عين حسود
يِنْدَبْ عود
والفرح يفضل عندنا
ندى القمر
خدها الهلال
إجمع ما بينهم في الحلال
يفضل على طول المدى
يللي هنا في المنتدى
زغروطه حلوة عشان ندى

هذه الأغنية أهديها إلى أختي الفاضله آمال محمود كحيل
بمناسبة خطبة كريمتها ندى
كل الدعاء للعروسين بتمام السعادة لهما بإذن الله

آمال محمود كحيل
12-12-2008, 05:07 AM
تتصوري !!!
كلمات : أسامة علي


تتصوري
على قد قد ما تقدري
أنا قلبي حبك قد إيه
تتصوري
حبك جنين
شيلتو السنين
في قلب قلبي بخاف عليه
دلوقتي ليه
قلقانه ليه
تعبانه ليه
وبتسأليني سؤال غريب
وعنيك بتنطق بالجواب
بتحبني ؟؟
طب قربي ف حضني إسكني
أيوه بحبك من زمان
من يوم ما حبك مسني
وهقولها تاني
وأقول كمان
يلا إسمعيني وطرطقي
حبه الودان
لو شقٌّو قلبي
هيلاقوكي نايمه فيه
وبتنهي فيه وبتأمري
تتصوري
حبك دا كان أجمل قدر
خلاني أطول حتى النجوم
بإديا أحضن في القمر
ومشيت برجلي ع السحاب
قوتي الحنان
ريقك شراب
والقلب فاردلك إيديه
وإنتي بجمالك تسحري
وأنا حبي ليك
رسم إترسم
وشم إتوشم
ختم إتختم
وختمت بيه عمري اللي راح
واللي هييجي من الزمن
حبك كبير
بتنفسه ويَّا الأثير
في عروقي وف دمي يسير
وأكتر كتير ما تفكري
تتصوري ؟؟

آمال محمود كحيل
12-12-2008, 05:09 AM
طَيّبَة ( إهداء إلى سيدة الهدايا سماح )
كلمات : أسامة علي


طَيّبَة
حقيقي إنتي طَيّبَه
ومن قلوبنا قُرَيّبَه
طبع الملاح
فيك يا سماح
قلبك كبير
دايما براح
بيساعي م الأحباب كتير
وقلوب كتير بيك معجبه
يا طَيّبَة
مين زَيّ قلبك في صفاه
فنانه آه
والفن نعمه من الإله
ومن الخيال
بنحس إيه معنى الجمال
وعيون بتعشق طَلِّتُو
وف دنيتو
تسرح معاه
بس ال أجمل فيك أصيله مؤدبه
يا طَيّبَة
تِهْدِي الجميع
داخل إطار
أجمل شعار
توقيع بديع
أو عيد ميلاد
نلاقيكي في نفس الميعاد
بتخلِّلِي أيامنا ربيع
هداياك بِتِنْزِلْ سَرْسَبَه
يا طَيّبَة
يلاَّ إرسمي
وإتنسمي
عطر الصباح
لما تهلِّلي ف حينا
تشرق معاكي شمسنا
والصبح لاح
مهو دول حبايبك كلهم
وألوف بفنك معجبه
يا طَيّبَة
وإنتي هنا
مين زَيّنَا
طبعك وفا
شمسك دفا طول السنه
مين غيرك إنتي يا قمر
تكتب إيديكي شعرنا
ولإبتسامه
تبان علامه ف وشنا
نهتف نقول
أهلا يا غالية مَرْحَبَا
يا طَيّبَة


06/01/2007م
أول أعمالي في عام 2007م


دائما ما تعطي وتجود بوقتها وفنها على الجميع
وما من أحد إلا ولها أيادي بيضاء عليه فأقل ما يجب علينا تجاهها
هو إهدائها ولو كلمات بسيطه إنها سماح سيدة الهدايا

آمال محمود كحيل
12-12-2008, 05:12 AM
ياااااااااااااااااه

كلمات: أسامة علي


يا ااااه
لما تجيني الفكره
ويخرج مني كلام
مَلْضُوم في أمال
وأشوفها ف أفكاري
بتخللي نهاري
مع بُكْرَه ال أنا بستناه
مليان بالبسمه
ويشيل م الجوف الآه
مع ميت أُمْنِيَّه وأمنيه
ولَمَّا أقراه
بتبان الضحكه ف نِنْ عِنَيَّه
وأسرح
لما الفكره ألاقيها
وأَسَبَّحْ
على سِبْحِة أمانيها
والشمس تنورلي السكه
ومصحباني
مش عايزه تْرَوَّحْ
وإن سافرت
ماتسبنيش في الليل وحداني
تبعتلي قمرها
ويجيني
هنا جنبي لحد مكاني
أجمل حاجه
لما يا صاحبي تصاحب هَمَّكْ
هيروق دَمَّكْ
أَمَّا إن كان فيه بينكو خصام
مش هَيّسِيبَكْ
ولا تعرف مِنُّو تنام
مش ناقصه يا عم
على إيه هتشيل الْهَمْ
أو تضايق
إضحك
تلقا الدنيا بتضحك ليك
ومزاجك يفضل رايق
جهزللي يا عم حميده طبق الفول
مع حبة طرشي الله يخليك
وعودين جرجير
معدتي محتاجه لِحَبِّة مسامير
إوعا تفكر
إن الحظ معاندك
أو متعكر
وإحمد ربك
لوشوفت بلاوي الغير
هتشوف نفسك
أفضل من خلق كتير
وتبوس إيدك وش وضَهْر
على طول
هيروح إحساس القهر
قوم يلاَّ أتوضا
من نهر توكالك ع الفتاح
وبمية طُهْر
قوم صللي الْضُهْر
و إدعي يارب تدوم
إدعي
هتلاقي الستر غطاك
ومعاك
اللي عيونو ما بتنام
واللي بيسمع دب النمله ف قلب الجحر
واللي بيرزق حتى الطير
والخير
عندو ملوش أول ولا آخر
والرزق عليه
ووعدنا ووعدو الحق
إننا أبدا
مش هنجوع
طب تقلق ليه
دا الرزق كتير
بس أشكر
وعليه النعمه
بالشكر تزيد النعمه
وإن ضاقت حبة ف يوم
أصبر
ما تكونشي عجول
دا ال الإستعجال للنعمه
بيخللي النعمه تزول
وبلاش تشكي
ع الفاضي وع المليان
هتنام وتقوم تعبان
طب ليه بإيديك
بتجيب حبل المشنقه حواليك
مش برضو جنان
ما تبصش دايما تحتك
لمكان رجليك
وعشان خاطري الله يخليك
إوعا تسيب العقل الفالت
يتحكم فيك
وبقولهالك تاني وتالت
إضحك
خللي الضحكه تنور وشك
صدقني
اللي يقول غير كده بيغشك
وأتعلم م العصافير
إزاي بتطير
لو بطل حبه جناحها يهفهف
ما يشيلهاش الهوا ولا ثانيه
مين هيخالف
لقانون الدنيا
واجمع قشك
وبإيدك تبني ف عشك
وإذا كان إمبارح
كان جارح
إنساه
ليه عايش على طول وياه
فيه اليوم
أشغل عقلك حبه بفكره
تصنع بكره
وتمللي تبص لقدام

آمال محمود كحيل
12-12-2008, 05:15 AM
لونك بقا ليه رمادي

كلمات : أسامة علي

ليه بشوفك النهارده
عاشقه للون الرمادي
لَمَّا بَبْعِدْ أو أَقَرَّبْ
أو يغيب عَنِّكْ وِدَادِي
حتى لَمَّا كَمَانْ بَلاعْبِكْ
أو أَضَاحْكِكْ ولاَّ أَدَادِي
بِالْغَزَلْ وكلام بَدَاعْبِكْ
لَمَّا شُوقِي لِيك ينادي
شايف إِنْ الأمر عَنْدِكْ
مِشْ بيفرق
كُلُّلو عادي
مش دا طبعك
والملامح دي غريبه
عن ملامحك
رُدِّي
.. جاوبي
قولي ..سامعك
يلاَّ مَتْصَحِّيش عنادي
كنت أشوفك
فيه كتير ألوان في طيفك
واللي زايد حَبَّه فيكي
هُوَّه لاحمر
جنب مِنُّو تلاقي لاصفر
حَبَّه شوق
على حَبَّه غيره
سوط حنانك كان بِيلْسَعْ
كان يطرقع فوق جَوَادِي
كُنْتِي أيوة وردة حَمْرَة
نار وجَمْرَة
جُوَّه مِنِّكْ تصهريني
كُنْتِي بُرْكَان
كُنْتِي ثَوّرَة
لو أَقَرَّبْ تحرقيني
كُنْتِي حَسَّه بِيَّا أكتر
لما شوقي يبان ويظهر
وَيَّا صمتي بتسمعيني
وف إيديكي زمام زنادي
فاكره وإنتي بتقوليلي
إنته تاج راسي يا سيدي
دَوّبِتْنِي الكلمة دِيَّه
قولتلك من تاني عيدي
وَيَّا رَنَّة ْصوت تِدَوِّبْ
أي قلب ولَوّ حديدي
صوت بيشبه صوت كَمَنْجَه
وإنتي منجه
لابسه توبها
م الحرير البرتقالي
زغللت عيني بجمالها
والجمال فوق إحتمالي
جالي صوتك بيناديلي
ويا صوتك
شَبِّتْ النار جُوَّه مِنِّي
وف وريدي
زاد حصارك
وبإيديكي بتاخدي إيدي
آآآه يا عمدة
الْلِيلادي
كات حياه حلوه وجميله
وكل ليله ع الْحَلادِي
النهارده إيه جرالك
إيه مِغَيَّرْ فيكي حالك
عاشقه للون الرمادي
محتارين
بين شمال
أو بين يمين
مبدأك بقا ليه حيادي
كنت عاشق فيك وضوحك
ولصراحتك
ولجموحك
هو دا كان فيك مرادي
كنت عاشق فيك دلالك
ولشقاوتك
ولجمالك
ليه يكون هجرك حصادي
زَادْ بُرُودِكْ
كان نتيجتو زاد برودي
وإنتهينا يا حبيبتي
كل واحد ليه في وادي
موش دي إنتي
يا حبيبتي
اللي شعلل نار فؤادي
أصل طبع الحب فِيَّا
عمرو ما بْيِلْفِتْ عِنَيَّا
لو يكون الحب هادي

آمال محمود كحيل
12-12-2008, 05:17 AM
آه بحبك
كلمات :أسامة علي
آه بحبك
قولتهالك ألف مَرَّة
وكل مَرَّة تقولي تاني
طب قوليها إنتي مره
ليه أنا ف حبك أعاني
قولتلك أيوه بحبك
بُصِّي شوفي
صورتي ساكنه جوه قلبك
غمضي عيونك تلاقي
راح تحسي بإشتياقي
راح تشوفي طيفي جنبك
اللي قدامك وباقي
وإنتي حته من كياني
عايزه إيه طيب قوليلي
لما تبقي ضي ليلي
لو مشيت سكه بلاقي
نورك إنتي يكون دليلي
مش دا يبقا
حب ولاَّ
وما أشوفك فرحه هله
ولاَّ أشوفك شمس طله
ردي جاوبي
فهميني
عايزه أقولها من شفايفي
يوم منايا
يا هوايا تبقي جنبي
وإنتي جنبي يبقا كل الكون معايا
روحي فيكي
حتى لما أحضن إديكي
ببقا عايش جوه منك
نبض قلبك جوه مني
يلاَّ حِنِّي
مدي لِيَّا وقربيلي
لأه أكتر
مش بحب عزول ما بِينَّا
حتى لو كات نسمة طايفه
تبقا شايفه
إيه ما بين قلبك وبيني
كل حته فِيَّا عايزه تقولها ليكي
عيني مشتاقه لعنيكي
فكري سارح
والجوارح بتناديكي
كلها بتقول بحبك
طمنيها بلمسه منك
طبطبي بإيديك وضمي
وريحيني
دا البعاد بين الحبايب
صعب جدا
صدقيني
آه بحبك قولتهالك
آه بحبك وإسمعيني

تنويه
هذه القصيدة كتبتها تواصلا مع قصيدة المبدعة الشاعرة د/آمال
قولها لِيَّا آه بحبك
فلها أوجه التحية

آمال محمود كحيل
12-12-2008, 05:20 AM
عيد الربيع
كلمات : أسامة علي

الْلَمَّة فين والصحبه فين
وإيدين بتهديني الزهور
وأغاني يوم عيد الربيع
ماليه حياتي بالسرور
وسط الغيطان
وسط الجنان
وسط الأحبه بتوع زمان
فسيخ ورنجه مملحه
وريحتها طالعه مفحفحه
وزهور جميله مفتحه
وعسل وجبنه بالفطير
والبيض ملون للعيال
أشكالوا إيه آخر جمال
في وداني شقشقة الطيور
والقعده على شطك يا نيل
وَيَّا الجميل
يكمل معاها فرحنا
مشتاق أنا
لِلَّمَه وللحظة سمر
في يوم بديع
عيد الربيع
ولا يحلا يوم شَمْ النسيم
إلا ما بين الأهل وما بين البشر
وسط الحضور

آمال محمود كحيل
12-12-2008, 05:24 AM
م بلاش تماحيك بقا يا حجازي
كلمات: اسامة علي


دا فاكرني عليه قوي مدلوقه
أو جُوَّه ف قلبي لك شوقه
لأ إصحى وفوق يا حبيب قلبي


والنبي دا أنا منك مَبْقُوقَه
وكلامك ليه دايما جارح
***
بِيّشَوَّه صورتي وأخلاقي
وفاضحني وناشر أوراقي
مع إنُّو في الراحه والجايه
بيغازل قلبي واشواقي
وتمللي مشغول بي وسارح
***
طب ليه على طول ماشي ورايا
ولازقلي في الراحه والجايه
يخبطني ويقول مش شايف
يضربلي ناموسه على قفايا
قدام الجاي ويَّا الرايح
****
دا أنا قشطه والأجر على الله
وقوام ملفوف زي الْقُلَّه
خطوتي بِتْقَوِّمْ زلزال
قمر 14 في الْطَلَّه
وأرق من السمن السايح
وبلاش تماحيك بقا ياحجازي
دا أنا برضو السنيوره روايح

آمال محمود كحيل
12-12-2008, 05:30 AM
عاشق في صَمْتِكْ حُبِّنَا
كلمات : أسامة علي

وإن بَعَّدِتْ بينا الظروف والأمْكِنَه
وإن فَرَّقِتْ بِينَّا الليالي الْمُحْزِنَه
هتفضلي في القلب نبضه
في جميع الأزْمِنَه
ما يهمنيش
قولتي بَحِبَّكْ
وللاَّ حتى ما قولتيهاش
مايهمنيش
لو إن مرسال الغرام
سافر ما جاش
حاجه وحيده تهمني
إنِّي في يوم حُبِّكْ حقيقي مَسِّنِي
طِرْنَا سَوّا فوق السحاب
حُبِّكْ وأَنَا
كان السحاب فَرْشَه لِنَا
وغطانا كان لحظة هنا
والكون جميل
ولا كُنَّا حَاسِّيِنْ بالزمن
إن كان نهار
أو كان في ليل
والحب كان
توب م الحرير بِيّلِفِّنَا
حتى الهوا
كانت نسايمو مَعَطَّرَه
أقمار في ليلنا مِنَوَّرَه
لابْسَه فساتين الفرح
وطيور مَحَبَّة تْزِفِّنَا
أحاسيس كتيرة عشتها
صَدَّقْتَهَا
علشان قلوب العاشقين
أطفال وصادقه في حبها
والحب بيت بيضمنا
وإن يوم بِعِدْتِي عن طريقي وِسِكِّتِي
يكفيني طيفك كل ليله
جاي يوَنِّسْ وحدتي
وأنا وهُوَّه لوحدنا
وإن كُنْتِي مِخْتَارَه السكوت
وبتكتمي للحب صوت
مايهمنيش
مَهُو قلبي مِتْعَوِّدْ يعيش
عاشق في صَمْتِكْ حُبِّنَا

آمال محمود كحيل
12-12-2008, 05:31 AM
َلوّ نشفت الأشجار
كلمات : أسامة علي

لَوّ نشفت الأشجار
ودِبْلِتْ الأزهار
وراح عبير الورد
ولا عَدْشِي أي خضار
بقلمي هَرْسِم شجر
فيه الورق أخضر
وأرسم عليه الزهر
من دَمِّي لون أحمر
وأداوي جرحي ببسمتي
وعلى الألم أصبر
وأعيش جمال دنيتي
لو حتى في الأفكار
وافضل أشيل رايتي
ولا أقولشي دي نهايتي
وأشوف حياتي أمل
مرسوم على مرايتي
قدامي ليل ونهار
والضحكه لو باهته
ومن الألم طالعه
هَضْحَكْهَا مش هَسْكُتْ
لو فِيَّا نار والعه
وأبْدُر كلامي غناوي
يمكن في يوم يِطْرَحْ
أمل لغيري يداوي
وف دنيتو يفرح
العُسّرْ بعدو يُسّرْ
والكون ملان أسرار
ونظرة الإنسان
متشوفشي غير أمتار
ربك مهوش ظالم
وبكل شئ عالم
وعدلو في الأقدار
عالم بإيه يسعدك
في الدنيا وف أخرتك
إرضا ونول الرضا
دا اليأس للكفار
بعد الجفاف والعطش
راح تنزل الأمطار
يِخْضَرّ تاني الزرع
وتنور الأزهار
يكفيك يا صابر طريقك
في آخرتو جنة
وتكون مع الأبرار
واللي رفض قسمتو
عذابو في دنيتو
والآخرة يلقا النار

آمال محمود كحيل
12-12-2008, 05:33 AM
ولو تنزف قلوبنا الحب


كلمات: أسامة علي






شعور الحب جُوَّانَا

بِيِحْيِّينَا

وزي الدم في الشريان
ولو جَرْحَكْ نزف دَمُّو
يطيب الجرح
يِتْخَيَّطْ وبِنْلِمُّو
كأنو ما كان
ولو تنزف قلوبنا الحب
تموت الرحمة جوه القلب
ولا تْحِسْشْ بأي حنان
وتتجمد عواطفنا
وموج القسوة يحدفنا
ولا نلقالو بر أمان
ونلقا برود
ما بينا يسود
ما بين الأهل والخلان
ولا عاشق ولا معشوق
ولا قلوب لسه فيها الشوق
ودايبه في الحبيب دوبان
ولا نلقا حنان موجود
ما بين الأم والمولود
ولا شفقه ولا إحسان





يجف الدمع ف عنينا

تموت فينا

معانينا
وتتحول مشاعرنا
حجر صَوَّانْ
نكون مخلوق غريب تاني
بشع يمكن
وعدواني
ما يتقالشي عليه إنسان
ومسكين اللي ما حَبِّشْ
ولا أتْحَبِّشْ
يعيش تعبان
يعيش طول عمرو في الدنيا
يعاني الوحده والحرمان
شعور الحب أعظم نعمة أنعمها





على عبدو

إله واحد

كريم مَنَّانْ

آمال محمود كحيل
12-12-2008, 05:37 AM
وفُتْ الدنيا يا حبيبنا يا عم حسين
كلمات : أسامة علي


وفُتْ الدنيا يا حبيبنا يا عم حسين
وفُتْ ف قلبنا شوقنا
لبسمة كنت تصنعها
بتسعد بيها قلب حزين
فراقك صعب ع الأحباب
وع الأصحاب
وأحبابك كتير ملايين
من المشرق إلى المغرب
لِفَنَّكْ ياما فيه عاشقين
بتزرع سكتك بالْفُلْ
والرياحين
بتبكيك يا حبيب الكل
على خدودها دموع العين
هنيالك
قلوب طاهره بتدعيلك
بتهديلك
ثواب سورة من القرآن
هنيالك لقا ربك في شهر الصوم
دا شهر الرحمة والغفران
هنيالك
بشهر العتق م النيران
ودي بشاره يا عم حسين
ومين منا قيامتو ف يوم
مهيش قايمه
ومين في الدنيا كان عايش
حياة دايمه
وراحل يوم مع الراحلين
قدر مكتوب
مفيش منو يا خلق هروب
وقبل نهاية الرحلة
تعالوا نتوب
دا كاس الكل له شاربين
يارب يرحمك ربي
يا عم حسين
ودي دعوة بقولهالك

ومن قلبي بقول آمين

آمال محمود كحيل
12-12-2008, 05:38 AM
يا وطن
كلمات : أسامة علي
يا وطن
مرسوم خريطتك في العيون
عشقك حياة
عشقك شرف
عشقك جنون
حبك في قلبي ف دمي يسري
من ملامحي
لو يشوفني أي واحد
بيناديني يقول يا مصري
لو في أي مكان أكون
ويوم خروجي للحياه
إدنوا وقاموا الصلاة
ورضعوني الحب شربة
ميه من نهرك ونيلك
نقشوا إسمك ع الجبين
يا وطن قدام عِنَيَّا
طول نهاري
ولما ييجي الليل بداري
عليك برمشي والجفون
لو تنادي
ندهتك تسكن فؤادي
كل شئ لجلك يهون
واما ببعد
روحي تهرب مني ليك
قايمه نايمه ساكنه فيك
لو تطوف لحظة بخيالي
ألقا دمعي يشكي حالي
وفوق ترابك
بس تكمل فرحتي
وأشتاق إليك
شوقي لأمي وحضنها الدافي الحنون

آمال محمود كحيل
12-12-2008, 05:39 AM
جيتلك يا ربي وأنا واقف على بابك
كلمات : أسامة علي

جيتلك يا ربي وأنا واقف على بابك
باكي وطالب رحمتك مستني لحسابك
سترتني ف دنيتي وف أخرتي المستور
باين لكل الناس على الملأ منشور
وتقوللي مد الإيدين .. شوف وإقرا في كتابك
بعدت ليه ع الهدايه
وغرقت ليه في المعاصي
ومشيت في سكة غوايه
وللهدى ناسي
دلوقتي يوم الحساب
دا يوم فضيحتك يا عاصي
في وسط أهلك وناسك ..ووسط أحبابك
إياك تلوم صاحب سحبك على العصيان
وتجيب عليه الذنب
وتقول غواني الشيطان
ما تلومشي غير نفسك
ليك عقل يا إنسان
من الغلط يحميك .. يهديك لصوابك
كم مرة فيها غلطت.. وقلت لازم أتوب
عمال تطاوع هواك
وتشيل آثام و ذنوب
مستني إيه ما تقول .. قوم هم بالطاعه
صللي فروض ربك .. في بيتو في جماعه
إذا كنت لسه شباب.. أو كنت راجل كبير
الموت يا خلق الله.. أبدا ما لوش ساعه
وتنطوي صفحتك ويبتدي حسابك
ما دام في صدرك نفس قدامك المهله
جاهد هواك والشيطان
طاعتك تكون سهله
وإطلب هداية الكريم
يهديك لتوبة نصوحه ويمحي في ذنوبك
إدعي وزيد في الدعا من غيرو يسمع دعاك
مين غيرو أمرك بإيدو ..مين غيرو يملك هداك
خللي دموع الندم تجري على خدك
ما ليش يارب سواك .. خالق وأنا عبدك
وصَفِّي له نيتك
عالم بإيه قصدك
تنزل عليك الهدايه.. تلقا الهدى صابك
ويارب جيتك وأنا واقف على بابك

آمال محمود كحيل
12-12-2008, 05:42 AM
لسانك حصانك

كلمات: أسامةعلي


لسانك حصانك يا سيد الكلام
عشان تبقا فارس عليك باللَّجَامْ
وتُحْكُمْ عِقَالُو
في قولنا وقالوا
في ساعة رضا
أو في ساعة خصام
وحاسب حصانك يِزِلْ القدم
ساعتها بتظلم
وترجع وتندم
وبعد القضا إيه يفيد الندم
وتسمع بودنك من الناس ملام
وآسف تقولها لباشا وغفير
وواقف صُغَيَّرْ وقلبك كسير
وزَلَّة حصانك بتترك أثار
يِبُصُّوا الخلايق
عليك بإحتقار
ويبقا ما بينك وبينهم خصام
لسانك حصانك تحافظ عليه
وصُرْعَك في إيدك وماسك الزمام
يجاوبك بسرعة لَمَّا تناديه
وحاكمو بأمرك وآخر تمام
تلاقي اللي ماشي
يقولك يا بيه
يقابلك يعاملك بكل إحترام
تصونو يصونك
وساعة جنونك
بِيحْرَنْ عليك
ويمكن يخونك
يِشَلَّتْ
يِرَفَّصْ
في وسط الزحام
لسانك حصانك بلاش يبقا سايب
يِلَبَّخْ.. يِخَرَّمْ.
في حَيّ الحبايب
ساعتها نقولك
يافارس يا خايب
وتضعف قصادو
يجيبلك مصايب
يسيب الْمِنَوَّرْ ويمشي ف ضلام
لايعرف أدب أو بيعرف نظام
ولوكان حصانك كتير الخطايا
يعاكسك
يعاندك
يجيبلك بلايا
دواه يبقا عايز
ياصاحبي الفطام
وتفرض عليه غصب عنو الصيام
وقبل إم تركب يا فارس حصانك
عايزلك يا فارس شوية علام

آمال محمود كحيل
12-12-2008, 05:43 AM
يا عالم حرام
كلمات: اسامة علي

زمالك زمالك
يا نادي المهالك
نهارك مضلم
وليلك دا حالك
يا عالم حرام
يا كاسر خاطرنا
ودايما قاهرنا
في ليلنا ونهارنا
قلبت إنتصارنا
لحالة إنهزام
إدارتك فاتوك
ولعنوا ف ابوك
ولا يهمهمشي
غير يحلبوك
ولا فين تاريخك
ولا فين ماضيك
ويمشوا بسلام

يا لعيبه كسر
ولا ليكو لزمة
إدارة ضعيفه
ولا تفك أزمة
ولا تحل عقدة
رباط حتى جزمه
وعالم نيام
بتخسر في أرضك
وجمهور في عرضك
تكشر وتغضب
لو حد عارضك
كرامتك تاريخك
ما تفرقشي عندك
وهيبتك خلاص
مجرد كلام
في نادي في ملعب
لا شايفك بتلعب
وناس عايزه راحة
ومش عايزة تتعب
وياخدوا فلوسنا
ويهبش وينهب
وآخر إنسجام
لا شايف رجوله
تجيب البطوله
ولا روح بتجمع
قلوبكم في عيله
وتخرب في داهية
تضيع القبيله
ولا بتطقوشي
من الناس ملام
يا ناس أرحمونا
خلاص أستوينا
بلاش تتعبونا
وحسُّوا شوية
ومَرَّة إفرحونا
يا عالم حرام

آمال محمود كحيل
12-12-2008, 05:45 AM
د حمارك دا بيتدلع
كلمات / أسامة علي


دا حمارك دا بيتدلع
فافي وماشي بيتقمع
من حبة برد يا عيني
بدو يروح الشفخانه
وكمان مش عاجبو بلادو
عندو في محل ميلادو
محتاج شفخانه ف كايرو
آه منو وآه يا جبايرو
أبو عين نايمه وسهتانه
ياما شوفنا غيرو كتير
زَيُّو بردك وحمير
عايشه على طول تعبانة
لا بتشكي ولا بتتكلم
شغاله ولا بتتألم
والضرب عليها معلم
تصبح وتبات عيانه
وكمان مطلوب يتحمل
وف كل حلاتو يكمل
لو حب يروح لطبيب
الحال ما يُّسُرْ حبيب
على باب المشفى بيرجع
وكلام يِتْقَالُّو بيوجع
على ضَهْرُو عصايه تطرقع
والرد أصلها مليانه
وآهو صابر غصبن عنو
كاتم في نِهِيقُو وزَنُّو
مِسْتَنِّي تقوم الساعه
ويوَدُّوه ع الجَبَّانَه
صَوَّتُوا يل إنتو حدانا

آمال محمود كحيل
12-12-2008, 05:47 AM
تايهه مني أفكاري
كلمات : أسامة علي
كتبت كتير
وقولت كتير في أشعاري
وكان قلمي
رفيق لِيَّا في أسفاري
ساعات بِيشِدِّني لديني
وأحيانَاً لأوطاني
وكلمة حُبْ من قلبي
مشاعري ليها وخداني
وكلمة خفيفه أحيانَاً
بترسم بسمه مع ضحكه
لناس م الْهَمْ بتعاني
وأغنيها على لحني بقيثاري
لَكِنِّي بحس دلوقتي
ومع صمتي
بخنقه وحاله م العصيان
ووحدي بامشي مشواري
ومش مرتاح في أي مكان
أحاسيسي بتتفَجَّرْ
كما البركان
ونفسي ليه معانداني
وتايهه مِنِّي أفكاري
وقولت أهرب
وأتْدَارَى ف قلوب الناس
وأعيش في قلب مِتْداري
م أنا إنسان
بَحِنْ ف طبعي للإنسان
مفيش قلب إنفتح لِيَّا
يكون داري
قلوب الخلق مسدوده
ولا حتى لقيت أحضان
ولا إيدين لِيَّا ممدوده
وقلب صحيح يكون شاري
ولو غلطة أنفتحلك حُضْن
تحس ف قلبو ببروده
ولا يّضُمَّكْ
ولا يّلِمَّكْ
ولا يشيل مِنَّك الأحزان
ولو عطشان
لَهُو بيسقي
ولا بيروي
ولا يّطَفِّي في يوم ناري
مفيش غير الكلام بلسان
وأنا اللي قلبي طول عمرو
ملوهشي بيبان
وهَدِّيتْ كل أسواري
فتحت حدودي للأغراب
وللأحباب
بدون إحم ولا دستور
تقابلهم هالات النور
ودَقِّة قلبي بِتْطَبِّل
وإسعادهم دا كان كاري
ومش ندمان
على اللي كان
ولا هبكي ليالي زمان
ولا هغضب
على ناكر في يوم خيري
تعالى يا قلبي هات إيدك
وخد إيدي
م دام الدم فيك ساري
نروح لبعيد سوى نرتاح
نداوي جَرْحِنَا بجراح
وإيه يعني
هنتحمل
هييجي البخت ونكمل
وتطلع شمس لنهاري

05/07/2007م

آمال محمود كحيل
12-12-2008, 05:48 AM
إلعب يا أهلي إلعب

كلمات : أسامه علي



إلعب يا أهلي إلعب

ليلتنا فللي

إلعب ورينا فنك

وأتسلطن وأنجلي

رَفَعْتْ راس بلادك

عاليه بإيدين ولادك

ويا جماهير يا حلوة

للصبح صهللي

الكاس الأفريقيه

على ملعب الحربيه

بتقولك أنا ليك

وإنته كمان إِلِي

بالفن والرجوله

أحرزتلنا البطوله

والليله دي أحلا ليله

يا مصر هللي

لعيبه بدم حامي

إياكي ف يوم تنامي

تهجم ولا سونامي

في فرقة التوانسه

عماله بتنخلي

على واحدة ونص فات

متعب وأخوه بركات

وحزموا التوانسه

ورونا أحلا رقصه

ف إيديهم الصاجات

ويا فرقة طبلي

واسامه حسني العجيب

وأبو تريكه الرهيب

دكوا الحصون في ثانية

خلوها حاجه تانيه

وشباك كانت عزارا

لطمت بعد الخساره

إيه يختي بتعملي

يا فرقه إحكي ف بلادك

في الكوره دول سيادك

مش بالخناق بنكسب

بالفن جوه ملعب

ودا نادي القرن طبعا

وإياكي تزعلي

وآهو رجعم بالتلاته

مش كبر ولا شماته

أهداف ولا في الخيال

فن وآخر جمال

في النجم الساحلي

ويا فوكوياما ياما

الأهلي جاي حمامه

ممثل الأفارقه

مصري وآخر أيامه

بالكوره يقول أغاني

يفهمها الأمريكاني

والكوري و اليباني

ومودع بالسلامه

مش للعدد كماله

جاي يلعب للبطوله

قومي يلا أستقبلي

وانا للعبادي هاوي

بشجع الزمالك

ومن يومي زملكاوي

وبقدم التحية

للناس الأهلويه

من مصري وإبن مصري

أسامه بن علي

آمال محمود كحيل
12-12-2008, 05:49 AM
بنحبها ومش بالإيدين
كلمات : أسامة علي

بِنْحِبَّهَا ومِشْ بالإيدين
دا الْعِشْق مكتوب ع الجبين
مقسومه ليك
مع إنها بِتِتْقَل عليك
تجري وراها تِسْبَقَكْ
وتروح بعيد
شايفاك وحيد
والدمع ساكن في العينين
لا بْتُسْتُرَكْ
وتْحَيَّرَكْ
تضحك معاك حَبِّة ساعات
وليالي بتسيبك حزين
ويَامَا غِيرَكْ ناس كتير
فَرَشِتْلُهُمْ سِكَّه حرير
ولَمَّا آمّنُو لِمَكْرَها
وأطَّمْنِولْهَا بْحُبِْهَا
قَلَبِتْ لُهُمْ ضَهْر الْمِجَنْ
وحاجات تِجِنْ
وداقوا منها غدرها
والآخره رجعوا خسرانين
خُدْهَا نصيحه بَقُولّهَا ليك
إلْعَنْ أبوها وسِبَّهَا
وإديها كل عفشها
وإرمي عليها ميت يمين
صَدَّقْنِي تاني هتعشقك
وتجيك وراكعه ع الإيدين
هِيَّه كده
تجري وراها تعذبك
تتقل عليها تطلبك
وإياك يكون
في القلب ساكن حُبَّها وليها إشتياق
آخرتها دايما فيه فراق
عمرك سنة وللاَّ مِتِينْ
فَارِقْهَا وإنْتَ بِعِزِّتَكْ
عَرَّفْهَا إنَّكْ مش ضعيف
إِرْفَعْ لفوق قوي جبهتك
ولا فيه في قلبك أي خوف
ولا تخدعك
ولا تبقا واحد من كتير ناس مخدوعين
ومهما طالت السنين
أنا بسألك
قُولِّلي في يوم
دامت لمين ؟

آمال محمود كحيل
12-12-2008, 05:50 AM
في زمان العولمه
كلمات : أسامة علي
في زمان العولمه
الدنيا عتمة مضلمه
والحقيقه زيفوها
لبسوها وقلعوها
اللي بيضه
سودوها
واللي سوده
بيضوها
والخلايق بس واقفه مِبَلِّمَه
في زمان العولمة
العادات
اللي عاشت جُوَّه مِنَّا سنين طويله
في القبيله
نَيَّمُوها في ثبات
رَبُّو أجيالنا الجديده
ع الميوعه ولإختلاط
حتى لهجتنا ال بِينَّا
اللي نعرف بيها دينَّا
لهجة بلدي
قالك إيه عايزين لغات
يرطم الواد بالفرنسي ولإنجليزي
يس ونو
وهاي يا زيزي
والسلاموعليكو راحت
لو تقولها
تبقا دَقَّه قديمة طبعا
يا عزيزي
لو تِفَهّمْ أي واحد مش هيفهم
راح يقولك
هاي يا مان
هاتلي ميلك
بعد نص الليل أجيلك
نبقا نتفاهم في شات
والعقول متنومه

في زمان العولمه
إوعا تغلط أو تقول
أو تفكر في الأصول
راح زمانها
مش أوانها
مهما هتدق الطبول
المؤدب قالوا عنو ده معقد
شخص خايب
واللي يكدب
واللي ينصب
واد مفتح
مش عجايب !!!!
لو سألتو من الفضول
راح يقولك قصر ديل
والفجور بقا في العلن
والتهور
ده تطور
في حضارة الزمن
والشعوب مستسلمه
في زمان العولمه
إيه بيحصل
هوه دا بردو التَحَوُّل
بس للأسف يا سادة
للي سئ مش لأفضل
كان زمان
حتى في الغابه قانون
الأسد هوه الملك
كُلُّلو يعرف فين مكانو
وفين يكون
وف زمان العولمه
الكلاب
لما شبعت أكل لحمة
عن نباحو يقول زئير
وسط غابه
وبغرابه
قال يا عالم
مين هنا غيري الكبير
ضاع وفاءوا
حتى قلبو مفهشي رحمة
ولا تواصي بِمَرّحَمَه
في زمان العولمة
طلعت أمم
ظلمت أمم
علشان م بتقولشي نعم
شايفه الشعوب
قطعان غنم
لازم تطاوع أمرهم
تمشي ورا وف ضلهم
وتقول أمين
للظالمين
واللي يقول لأ ينفرم
وبلادو تبقا مقسمه
في زمان العولمه
فيه القوي
يشرب في دم المطحونين
وطريقو دايما ملتوي
واكل حقوق الشقيانين
يكبر لفوق
ولفوق قوي
يظلم قوي
ولمين هتشكي المظلمة
آهو ده زمان العولمه

05/03/2007م

آمال محمود كحيل
12-12-2008, 05:54 AM
مِشْ بَحِبَّكْ !!!
كلمات : أسامة علي

مِشْ بَحِبَّكْ!!!
وبساطه بتقوليها
طَبْ دُمُوعِكْ نازله ليه؟
حَطَّه وشِّكْ بين إيديك


ليه يا روحي بتداريه؟
إنفعال لحظة غَضَبْ
من غير سبب
حُكْم باطل
كل شئ مقدور عليه
إلاَّ بُعْدِكْ
إلاَّ حُبِّكْ
لَوُّ يروح يِفْضَللِّي إيه
حُبِّي ليكي
زي كل شئ بِيمْرَضْ
ليه نسيبو يموت قصادنا
وبْعِنَادْنَا
مين دا غيرنا هيداويه
مش راح أزعل

أو راح أغضب بردو منك
لو تقولي ألف مرة
مش بحبك
مش هَصَدَّقْ
إنها من قلب قلبك
دي مجرد كلمة بس من لسانك
حتى قلبي
اللي عمرو ف يوم م خانك
مش بيسمع غير لنبضك
وإسأليه
أيوة قابل بيك ياروحي
مهما هتزيدي جروحي
تِبْقِي خِصْمِي والْحَكَمْ
بردو عادي
وإنْ حَكَمْتِي
وإن ظلمتي
قلبي راضي
م انتي عارفه
المشاعر عندي جارفه
لو بنارك تحرقيني
هتلاقيني
شمع دايب
فيكي يا أغلا الحبايب
يلِّلي نارك جنتي
وإن غِلِطْت
سامحي إنتي
مش حكايه
حتى لو في يوم غلطتي
راح أسامحك
ليه نخليها النهايه
مش حبيبك
وإنتي بردو كمان حبيبتي
ليه نسيتي حُبْ بِينَّا
كنت منك لما أَقَرَّبْ
نِنْ عينك كان يِغَرَّبْ
والكلام مِنِّي ومِنِّكْ
كان بيهرب
وإنتي تخديني ف حنانك
أيوه حَسِّكْ محتجاني
حضن دافي
تِهْرَبِي م الْقَسْوَة ِليَّا
ولحناني
والليالي الحلوه بِينَّا
لِسَّه جَايَه
واَمَّا هَتْبُصِّي ف عيوني
مهما كان بينك وبيني
راح تقولي بردو تاني
مش بحبك .. مش بحبك
وبإيديكي تضربيني
وإنتي نايمه فوق كِتَافِي
يا قلب صافي
بس من قلبك يا روحي
بتنصفيني
دا ال بِينَّا
ألف جِسْر من المحبه
لو وقِعْ جسرين تَلاتَه
وللاَّ أكتر
مش قََضِّيَه
أو نهاية الدنيا دِيَّا
خَلِّلي قَلْبِكْ بردو يغفر
نِبْنِي غيرهم
أو يزيد
حبك إنتي
دم ماشي في الوريد
عمرو يوم م بِيسْتَخَبَّه
يلَّلا عودي
وإرجعيلي
ضَوِّي أنوارك في ليلي
يلِّلي من غيرك حياتي
تبقا ضلمه
وف نهارها زي ليلها
راح أحس بإن نُورها
بردو عتمة
يَلَّلا إيدي مَفْتُوحَالِكْ
ليلي مُشْتَاقْ نور هلالك
مِدِّي وإِجْرِي
أفردي إيديكي وتعالي
وأحضنيني
أسْكُنِيني
جوه مني
بين إيدَيَّا
يا نور عِنَيَّا
ونن عيني
دا ال حَبِّكْ مش ناسيكي
طِيرْ وسَابِحْ في هواكي
كُلْ همُّو يكون بِقُرْبِكْ
يبقا جنبك
مش هصدق مره تاني
لو غِلِطِّتِي
في يوم وقُلْتِي

مش بَحِبَّكْ


ملحوظة : هذا العمل كتبته عندما قرأت القصيدة الرائعة
للمبدعه د/ آمال ما بقيتش أحبك
فلها أوجه التحية

آمال محمود كحيل
23-12-2008, 06:06 AM
يللي حاجه البيت وجايه
ألف ميت مليون سلامه
كلمات : أسامة علي

إهداء للحاجه ريما بمناسبة عودتها من أداء فريضة الحج سالمة غانمة بإذن الله

يللي حاجه البيت وجايه
ألف ميت مليون سلامة
بان عليك نور الهدايه
لمَّا حَجِّيتِي يا ريما
والطواف والسعي بان
فوق ملامحك
نوَّر الوش الإيمان
حُبْ ربك
جُوَّه قلبك
والسكينه والأمان
والمراد
ويَّا العباد
تبقي من أهل الجنان
والفريضه ليك وسيله
لأحلا غايه
النجاه يوم القيامه
يللي حاجه البيت وجايه
ألف ميت مليون سلامه
بان عليك نور الإيمان
لما حجيتي يا ريما
جيتي نورتي المكان
ال كل حته فيه كات مشتقالك
ليكي وحشه من زمان
يوم رجعتي لينا ورجعتي لعيالك
راجعه لينا تقول ملاك
وأتولدتي من جديد
للهدى رَبِّي هداك
يوم رجوعك أحلا عيد
لما حققتي آمالك
وبزيارة الرسول
والعباده
المحبه والقبول
وأحلا حاله
طاعه للمولى تعالى
والسعاده
فيك علامه
يللي حاجه البيت وجايه
ألف ميت مليون سلامه
بان عليك نور الإيمان
لما حجيتي يا ريما

آمال محمود كحيل
23-02-2009, 10:31 AM
إياكي مني تغضبي
كلمات
أسامة علي

لو تقدري ع البعد أنا
ما أقدرشي ساعة أتحمله
دا الساعه في غيابك سنة
وطريقي ما أقدر أكمله
إنتي الحنان
وإنتي الأمان
لغربة القلب اللي تايه من زمان
وأتمنى كنتي تبدأيه
يا حياتي جنبي ف أوله
لا و ألف لا
عايزك تمللي تِقَرَّبِي
إياكي مني تغضبي
أو تهربي
بعدك جنان
فوق لإحتمال
وإنتي الحقيقه والخيال
وإنتي السؤال
اللي بقلبي بسأله
بتحبني ؟؟
وِبَرُدْ على قلبي الجواب
أيوه وأنا
بعشق حروف إسمك قوي
دايب قوي
عطشان وعايز يرتوي
حنيِّتك ملهاش مثيل
قلبك جميل
فبلاش حبيبتي إنتي وقلبك
تتقلوا
دا الساعه في غيابك سنه
وطريقي ما أقدر أكمله

آمال محمود كحيل
23-02-2009, 10:33 AM
ومن تاني
كلمات : أسامة علي

ومن تاني
ما بين أهلي وخلاني
أنا بينكم
لأغلا الناس وأحبابي
لإخواتي وأصحابي
لأجمل ضَمَّه واللمَّه
لأحضانكم
يا عِشْرِة عُمْر حَبِّتْهَا
بحِنِّلْكم
ولمَّا تنادي لَحْظِتْهَا
أقول شُبِّيِك
وأمد الإيد
بحب شديد
ولا أبعد في يوم عنكم
خطاوي ساعات بنمشيها
تفرقنا
وتبعدنا
نعود تاني لموعدنا
ونتلاقا
تعود الفرحه لقلوبنا
بصحبتكم
نفوت احباب
نلاقي احباب
تدق الباب
بشوق القلب وحنينكم
ومن تاني
ما بين أهلي وخلاني
أنا بينكم

آمال محمود كحيل
23-02-2009, 10:36 AM
يا اهل غزه
كلمات : أسامة علي


مين يصدق عينو يوم هتشوف شهيد
لسه نونو جُوَّه لَفَّه أو بَيّحْبِي أو وليد
ولاَّ طفل في لإبتدائي
جُوَّه مدرسته بيدرس
ولاَّ شيخ في قلب مسجد
في الصلاة وقت السجود
مين يِصَدَّقْ الشهادة
تِبْقَا عادة
للصُغَار قبل الْكُبَار
تبقا لُقْمَه تسد جوفهم
تمحي خوفهم
وقت غاره أو حصار
تبقا زادهم للحياه بعد الحياه
وسط جنَّه ودا الأكيد
وعد ربي
اللي ما بيخلفشي وعدو
وآه يا سعدو
للي بينولها ويدخل
جَنِّةْ المولى المجيد
كل دا ممكن يا ساده
وببساطه
عند أحفاد القرود
اللي قتلوا الأنبيا
والأوليا
واللي خانوا كتير عهود
يَا هْلْ غزة
شِدُّوا حيلكم
دوسوا فوق كل الجراح
أصبروا دا الصبر زادكم
والسلاح
والنهايه النصر قادم
والفلاح
أو شهادة
واللي خانكم
واللي ما مَدِّشْ إليكم أيّ إيد
بالخيانه
و المهانه
والمذله له الوعيد
يا هل غزة
يللي تاج العزة تاجكم
الملايكه جنب منكم
بتساندكم
الكرامة بجد غاليه
والحياة بدونها ما تسوى
خللوا فوق الهمه عاليه
عزمكم دايما شديد
دا الإيمان
عمرو ما يسكن في يوم
قلب الجبان
نورو يوم عن يوم يزيد
خللوا نور الحق يسطع
تاني يلمع من جديد
يا هل غزة
إيدوا شمعه
وسط ضَلْمِةْ كُفر عالم
تِهْدِي تَايِّهْ
جنب أقصانا تإيد


04/01/2009

آمال محمود كحيل
23-02-2009, 10:40 AM
رسالة من شهيد
كلمات: أسامه علي


والدي الغالي
يللي سقيتني محبة بلدي
فاكر كل كلامك لسه
عمري م هنسى
كنت تقوللي
من غلاوتها
بيهون ليها ضنايا وولدي
أصلها ساكنة جوه فؤادي
أنا دلوقتي بقولك تاني
حتى إذا كنت ولد وحداني
موتي عشانها أغلا أمالي
لو يوم جولك
ناس وقالولك
زَفُّولَكْ نبأ إستشهادي
إفرح يابا
وإرفع راسك
قولها لناسك
إبني شهيد لجلك يا بلادي
لجل علمها م يفضل عالي
فوق طوالي
قول على ولدك
ضَحَّى بروحو وصد العادي
طَمِّنْ أمي
إني دفعت المهر بدمي
لعروسه من الحور العين
عمري ما شوفتش ليها مثال
أو يشبه لجمالها جمال
واقفه قصادي
صوتها ندالي
وال بيفصل بيني وبينها
أستشهد في سبيل الله
وأصون أرضي وأحمي حدودي
وأنا بَتْهَنَّا
معاها ف جَنَّة
قولها لكل شباب الأمة
شدو الهمه
فرَّحْ كل الناس وإصحابي
وأحكيلهم عني وعن حالي
وسلام مني يا والدي الغالي

آمال محمود كحيل
23-02-2009, 10:42 AM
طب أنساكي يا حوا كيف
كلمات أسامة علي

وكِيِف أنسى
يا مخلوقه عشاني كِيِف
وكيف أنسى
وعشقك جُوَّه قلبي كِيِف
ومدمن واضح الإدمان
وفيكي بِيِكْتَرْ السرحان
وواخداني
وِلَفَّانِي
وبحبالك محوطاني
بنظرة بس أو بسمه
وغمزه حتى أو كلمه
يا أستاذه في فن اللف والتكتيف
وكيف أنسى
وإنتي حقيقه قدامي
في أيامي
في أحلامي
بدون تجميل ولا تزييف
نسيتي إنتي إتخلقتي منين
يا نور العين
ومن ضلعي خرجتيلي
ومهما تغيبي بتجيلي
ومهما أكون معاك قاسي
تِحِنِّيِلي
بعشق عفيف
هقولهالك من الآخر
مفيش بينا يا حلوه هروب
خلاص إنسي
دا شئ مكتوب
عشان إنتي مدام آدم
وخَدَّامَتي
وأنا ليكي كمان خَادِمْ
ولو يوم مرَّه أكون قاسي
بأعود من تاني ليك نادم
ومعرفشي
بكون قدام دموعك ليه
يا حوا ضعيف
وحبي ليكي أو حبك
مهوش بالإيد
ومنقوش نقش جوه قلوب
ومهما حبيبتي نتخانق
بنرجع تاني نتعانق
ويكويني لهيب نارك
ومن نارك
أقول يا لطيف
مهو إنتي الجنه وإنتي النار
وإنتي الساكنه في الأفكار
وإنتي يا حوا ست الدار
وأنا عندك حبيبتي ضيف
وأنا المطحون
بَلِفْ الكون
عشان خاطرك واراضيكي
ومهما يا حوا أغيب عَنِّكْ
بعود ليكي
وأراضيكي
وأجيبلك حته م النجمه
تكون ملكك وف إيديكي
وكللو يهون
في ضَمَّه بكل حِنِّيَه
لِصِدْر حنون
وأشوف الكُحْلَه في عنيكي
وتاخديني
تضميني
وأدوب فيكي
وأتوه فيكي
وأضيعي فيكي
طب أنساكي يا حوا كيف

آمال محمود كحيل
23-03-2009, 05:48 AM
أوعدك والوعد دين
(في رثاء والدي يرحمه الله)
بقلم أسامة علي

لما بُسْت إيديك وراسك
كان منايا أبوس مداسك
كان منايا أفضل في حضنك
بين إيديك
يبقا وقتي في السعادي
في الليلادي
جنب منك
بس ليك
وإنته تِنْدَهْ والأنين
نبرة الصوت الحزين
قوم يا ولدي
لم حالك
شوف عيالك
والألم باين عليك
مش مصدق
إن دا آخر سلام
مش مصدق
إني كنت بودعك آخر وداع
وإنتهى بِيِنَّا الكلام
وإن عيني من النهارده
تاني مش هتشوف عنيك
كنت شايل كل هَمِّي
إنته وأمي
والولاد عايشين في حضنك
زَيِّي وأكتر
لو يقول بابا يلاقيك
يا أحن من الحنان
عمر يوم ما قلت لأه
لجلنا دُقْت الهوان
مهما كات حجم الْمَشَقَّه
لجل ما تشوفنا رجال
لو تاكلها بعيش ودُقَّه
والله كان خيرو غانيك
رحلتك رحلة كفاح
والنهايه كات فلاح
والكفاح سُنَّة ماضيك
كنت م الفجريه تصحى
زي كل الصالحين
بعد فرضك
ذكر ربك
تقرا م القرآن ياسين
والإيمان دايما ماليك
راح حبيبي
اللي كان بيخاف عَلَيَّه
واللي كان في كل ركعه
وف سجوده يدعي لِيَّه
والإيمان كان له عقيده
وكان سلوك
راح حبيبي
اللي لما أشكيلو حالي
والليالي
كان كفايه بَسْ كلمه من كلامه
تمحي كل الحزن فِيَّه
بَعّدْ مِنَّكْ
روحي تايهه بتناديك
طبت حي
وطبت ميت
مش هننساك ما حيينا
اللي مات هوه الجسد
بس روحك عايشه فينا
والحنين دايما إليك
عهد مني
طول وجودي
في صلاتي
وف سجودي
كل خير زَرَعْتُه فِيَّه
الحصاد اليوم يِجِيِك
زَيّ ما كنت ف حياتك
إبنك اللِّي تحت رجلك
أوعدك والوعد دين
إِنِّي هفضل بَارْ بيك

آمال محمود كحيل
03-04-2009, 01:24 PM
بيطمني وجودك جنبي
كلمات:
أسامة علي

علشان قَدْرِكْ عندي كبير
ما يِوَفِّيِه أبدا تعبير
وسط حنان قلبك خَدْتِيِني
تَوَّهْتِيِنِي
وبقيت نقطة مَيَّه ف بير
رغم الحزن الساكن فِيَّه
رغم دموع قلبي وعْنَيَّه
بالحنيه قدرتي تداوي
قلب كَسِيِر
زي القمره لما تجيلي
ف ضلمة ليلي
تقلب ضلمة ليلي لنور
صوت رباني
جِهْ في وداني
زي أدان الفجر يِنَوَّرْ
لَمَّا يِكَبَّرْ
الله أكبر
يملا القلب بْرِضَا وسرور
بيطمني وجودك جنبي
وألقا في قلبي
نبض الحب بيسعد حالي
قوام طوالي
وأشوف قلبي كما العصفور
وبيتنطط
قوي ومزقطط
ولأحضانك نفسه يطير
ودا خلاكي
وأنا وياكي
فرحه بتملا القلب معاكي
وبقيت ليكي يا روحي أسير
كل حروفي مش هَتْكَفِّي
ولا هَتْوَفِّي
وصف مشاعري
ولا ميت ألف قصيده بشعري
ال في قلبي يا غاليه كتير
شئ يِتْحَسْ
بنظره وِبَسْ
جُوَّه ف عيني بحور وبحور
يللي جمالك مش في الصوره
بَسْ وِوِشْ
إنتي جمالك قلبك أبيض
زَيّ الْفُلَّه ما يعرف غِشْ
كُلِّك طيبه
كُلِّكْ رِقَّه وأحلا شعور
وبأخلاقك إنتي عظيمه
قلب سليم والْنِيَّه سليمه
وأرق .. من قلب الطير
واللي شافوكي
كتير وصفوكي
قلب ملاك والروح رايداكي
حتى بنات حوا أمَّا تشوفك
من أوصافك كُلُّه يِغِيِرْ

آمال محمود كحيل
07-04-2009, 02:00 AM
شمس النهار

كلمات : أسامة علي

شمس النهار
ف جبين حبيبتي الطيبه
زي الفنار
بتدلني على سكتي
لو تَوَّهِتْنِي غُربتي
بلقاها نور
يشْرُقْ في قلبي ضَيَّها
م أنا أصلي عاشق شمسها
وبْحُبَهَا
قلبي عمار
شمس النهار
كاسيه جنينتي بالدفا
منها الحنان
مني الوفا
وجنينتي عاشقه للشروق
من نورها يملاها الخضار
شمس النهار
ع الشط فارده شعرها
والموج بييجي على الشعور
زي الفيونكه يضمها
صافيه و صفاها زي نيل
واللون جميل
دهبي ومايل للصفار
شمس النهار
نورها شعاع
بيدلني ف عتمة طريق
خِلْ وصديق
وألقاها مِنِّي قُرَيَّبَه
مهي دي حبيبتي الطيبه
من حسنها
الناس تغار
شمس النهار
طالعه مع طلوع الصباح
ست الملاح
تلمحها بعيونك تميل
تنسى اللي راح
حتى الجراح
وتحس وإنت جنبها
مولود جديد
دايما سعيد
وعطرها من الزعفران
في الجو فاح
وعُقْدَها
ملضوم بأصداف المحار
شمس النهار
شالها الحرير
م الخيوط المرمريه
مطرزينوا بالدُرَرْ
لايق على
أجمل صبيه
وقلبها
نبضو موج البحر وأبيض
وف دلالها مِسْتِحِيَّه
لو تقول مهما تقول
برضو صافيه
مُشْرِقَه ف كل الفصول
عشقها في القلب غِيَّه
قلبي سابني وليها طار
شمس النهار

آمال محمود كحيل
22-04-2009, 06:09 PM
معرفشي ليه بعشقك !!!

كلمات

أسامة علي


م اعرفش ليه بعشقك
دايب قوي فيكي
يا ساكنه جُوَّه العين
والقلب مرساكي
عاشق تراب رجليك
يا عمري يا ملاكي
نارك بَقَتْ جَنِّتِي
لو أنشوي فيكي
لو فرقتنا سنين
مقدرشي أنساكي
وإن غبتي عني يوم
بشتاق قوي ليكي
لكن يا ست الكل
إيه ال خلاكي
مش طايقه ريحتي ليه
فَرَّطْتِي في ضناكي
وِمْوَرِّيَانِي الْمُرْ
والشر في عنيكي
ملعون أبو دَا عشق
وَقَّعْنِي في هواكي
أسهر في ليل وحدتي
بالدمع أبكيكي
و اشوف في أرضك غريب
مِتْهَنِّي بِلُقَاكِي
مشتاق لِحِنِّيِتِكْ
لِضَمَّه بإديكي
وألمس حنانك يوم
الله يخليكي
لو قلتي يوم الآه
مين غيري يداويكي
أنا ال شَارِّيِكْ أنا
وهُمَّا باعوكي
وأنا اللي فيكي عمار
عَمَّرتْ صحاريكي
وأنا ال بَحْرُسْ حدودك
وبْدَمِّي افديكي
وأنا اللي وقت الجد
تشوفيني حواليكي
وأنا ال رهن الإشاره
وأتمنى أرضيكي
وأنا ال عرق الجبين
بيروي أراضيكي
وأنا ال زارعك خضار
وفاسي عزقاكي
وأحصد أنا الْصَبَّارْ
دَا عدل يرضيكي !!

آمال محمود كحيل
22-04-2009, 06:11 PM
يا صباح الحب مني
كلمات
أسامة علي


يا صباح الحب مني
يا صباح النور عليكوا
يا صباح الطير يغني
يسعد القلب وعنيكوا
يا صباح القشطه واللبن الحليب
للي جنبي
واللي غايب
واللي شايلو جوه قلبي
والحبيبه والحبيب
إيدي ممدوده بسلم
سلموا يلا بإيديكوا
يا حبايبنا ال جونا
إحنا شايلنكوا ف عنينا
طيبة عيله
وناس اصيله
طيبه فرحانه بقدومكوا
يلا بينا
ننشر الحب في ربوعها
واللي باعها
عمرو يوم ما يهون علينا
طيبة قلب الأم دافي
لو تجافي
الحنان جوَّاها صافي
حضن دايما بيساعيكوا
يا نجوم ماليه سمانا
أمتعونا
بالمشاعر والمعاني
بالنوادر والأغاني
رجعوا لطيبه زمان الأصفهاني
نلقا شوقي تاني فيكوا
جيت اصبح
للحبايب مني كلمه
زي نسمة الصباح
جيت أصبح
للقلوب الصافيه جدا والملاح
جيت أصبح في ليالي العيد واقول
عيد سعيد عليك يا طيبه
عيد سعيد على كل ناسك
اللي فيكي لسه ناسك
واللي باعك
ولاَّ داسك
برضو مهما كانوا هُمَّا
ضهر ليكي وقت غُمَّه
جوه قلبك
جوه راسك
طيبة تتنفس هَوَاكُوا
يا صباح الحب مني
يا صباح النور عليكوا

آمال محمود كحيل
22-04-2009, 06:13 PM
بودعك آخر وداع



كلمات:

أسامة علي





دِلْوَقْتِي بَسْ بَوَدَّعِكْ



وف عِزْ شُوقِي ولَهْفِتِي



وأتمنى أشوفك وأسمعك



حَسِّيِتْ بإني بَقِيِتْ غريب



ولا لِيِش مكان



في القلب أو لِيِكْ الحبيب



وإن كنت مِيِتْ مُشْتَاق إليك



وإن كنت دايب فيك قوي



بحياتي وبعمري شاريك



شَايفِكْ سراب



بَجْرِي وراك



وِ بْتِهْرَبِي



وأتمنى لحظة أَحَصَّلِك



أنا ال ياما سِهِرْتِلِكْ



وَغَزَلْتِلِكْ



من شوقي شال تِتْدَفِّي بِيِه



أنا ال ياما فَرَشْتِلِكْ



من بُكْرَه حِلْم تعيشي لِيِه



ومسحت دَمْعِك بالإيدين



ورسمت ضحكه في العنين



والشوق في قلبي كل لحظه بيناديك



كُنْت ساكنه جٌوَّه قلبي



وِفْ عِنَيَّه



حِلْمِي أسكن بين إيديك



حَتَّى ليل الهجر جاني بدون قمر



طال السهر



لكن مع الحزن ال غَيَّرْ ضِحْكِتِي



أنا ال كُنْت بِمَيِّتِي



بَرْوِي بساتين فَرْحِتِكْ



دِلْوَقْتِي جايه بِمَيِّتِكْ



تِطْفِي بها نَارْ فَرْحِتِي



مِسْتَكْتَرَه



طيفك يجيني ف ليل يِوَنِّسْ وحدتي



مِسْتَخْسَرَه



نورك يِنَوَّرْ لِيَّه ضَلْمِة سِكِّتِي



يا دموعي بَسْ



مش راح يفيد لو تِبْكِي دَهْر



وتفيضي حَتَّى وتِمْلِي نَهْر



يا نبض قلبي بتجري ليه



قلب الحبيبه خلاص نِسِي



مش حَاسَّه بِيِك



عارفك بتعشق ضِلَّهَا



حتى حروفها وإسمها



ساكنين عنيك



مَهُو حُبَّهَا



ما كانشي بس في يوم كلام



جُوَّه القصيدة بيتكتب



أو مُلْهِمَه



تِلْهِبْ مشاعري الْمُغْرَمَه



حُبِّكْ غرام



عِشْقِكْ هيام



ساكن في قلبي ومهجتي



ومحبتك



جُوَّايَا لِسَّه مَعَشِّشَه



ولا حتى بسأل غير عليك



مَعْرَفْشِي ليه حاسس بخوف



يمكن تكون آخر حروف



بكتبها ليك



شمس الغروب



فوق القلوب فَارْدَه الشراع



قلبي اللي دايب بس فيك



حاسس بحاله من الضياع



ومعاك بَسِيِبْ ليل الْهَنَا



وما بين قلوبنا المظلومين



تَاهِتْ حقيقة حُبِّنَا



مين أشترى ومين فينا باع



ودي قسمتي



تهرب معاكي بسمتي



وِبَوَدَّعِكْ آخر وداع

آمال محمود كحيل
30-04-2009, 02:32 PM
شمس النهار

كلمات : أسامة علي

شمس النهار
ف جبين حبيبتي الطيبه
زي الفنار
بتدلني على سكتي
لو تَوَّهِتْنِي غُربتي
بلقاها نور
يشْرُقْ في قلبي ضَيَّها
م أنا أصلي عاشق شمسها
وبْحُبَهَا
قلبي عمار
شمس النهار
كاسيه جنينتي بالدفا
منها الحنان
مني الوفا
وجنينتي عاشقه للشروق
من نورها يملاها الخضار
شمس النهار
ع الشط فارده شعرها
والموج بييجي على الشعور
زي الفيونكه يضمها
صافيه و صفاها زي نيل
واللون جميل
دهبي ومايل للصفار
شمس النهار
نورها شعاع
بيدلني ف عتمة طريق
خِلْ وصديق
وألقاها مِنِّي قُرَيَّبَه
مهي دي حبيبتي الطيبه
من حسنها
الناس تغار
شمس النهار
طالعه مع طلوع الصباح
ست الملاح
تلمحها بعيونك تميل
تنسى اللي راح
حتى الجراح
وتحس وإنت جنبها
مولود جديد
دايما سعيد
وعطرها من الزعفران
في الجو فاح
وعُقْدَها
ملضوم بأصداف المحار
شمس النهار
شالها الحرير
م الخيوط المرمريه
مطرزينوا بالدُرَرْ
لايق على
أجمل صبيه
وقلبها
نبضو موج البحر وأبيض
وف دلالها مِسْتِحِيَّه
لو تقول مهما تقول
برضو صافيه
مُشْرِقَه ف كل الفصول
عشقها في القلب غِيَّه
قلبي سابني وليها طار
شمس النهار

آمال محمود كحيل
21-09-2009, 06:33 PM
من العايدين .. من الفايزين
كلمات :
أسامة علي


يا اعَزْ الناس وأغلاهم على قلبي
يا أختي وأخويا ويا صاحبي
هنا طيبة بتجمعنا
بقت لينا المكان والدار
بأحلا كلام تِسَمَّعْنَا
كلام غالي وله معنى
ويا عيلتي
ويا أهلي وأحبابي
من العايدين
من الفايزين
تعيشوا العمر بالبهجة
سنين وسنين
تهاني القلب بأرسلها
وروحي بَاعْتَه مراسيلها
وقلبي سعيد
بَهَنِّيكُوا بيوم العيد
وألف تحيه وتحيه
وبَتْمَنَّى يِهِلْ اليوم
بفجر جديد
ونور في قلوبكم الطاهره
تمللي يزيد
وأمنيه
لكل الناس بعمر مديد
وبالصحه مع الفرحه
جناين سعدكم طارحه
بكل جديد
وتتحقق أم****م
بصحبتكم زراريكم
وشمع الحب بينا يقيد
يِنَوَّرْ سكة الإيمان
وقلب عمار
بذكر وطاعة الرحمن
وصوم مقبول
معاه بتنول
في آخره العتق م النيران
ودي الفرحة الكبيره أكيد
ويا اصحابي وأحبابي
بهنيكو بيوم العيد

آمال محمود كحيل
22-09-2009, 05:24 AM
همسات وقت السحر
كلمات :
أسامة علي

يا رب إنت الرحيم
وبحالي إنت عليم
والذنب بكاني
***
بِتُّوه كتير خطوتي
تبعدني عن سكتي
وأرجع إليك تاني
***
ياما غلطت يا رب
وميزان ذنوبي طَبْ
والدنيا وخداني
***
ضحك عليَّ الشيطان
وعصيت كمان وكمان
وشبابي غَوَّانِي
***
واقف ما بين إيدك
والقلب بيريدك
يا رب تهديني
***
جايلك وانا باكي
والدمع ليك شاكي
من ضعفي وهواني
***
لو يوم أجيك واتوب
تغفرلي أي ذنوب
جهلي وعصياني
***
تفرح يارب بتوبتي
وتزيد معاها فرحتي
والرحمة تغشاني
***
يا رب يا قيوم
دايم ولا في نوم
وما عداك فاني
***
إنته العليم بيَّا
في الجهر والنيه
إغفرلي نسياني
***
وأرزقنا في رمضان
تعتقنا م النيران
يا رب نجيني
***
إجمعنا ويَّا النبي
وهو دا مطلبي
حبو في وجداني
***
إسقينا من إيدو
أنا قلبي بيريدو
والسُنَّه عنواني
***
موجود في كل وجود
نعمك دي مالها حدود
أغفرلي نكراني
***
عِينِّي على الطاعة
وصلاتي في جماعه
يا رب قويني
***
خليني فاعل خير
وأكون معين للغير
حِصْنِي يكون ديني
***
يارب يوم الحساب
ينطق لساني الجواب
تقللي ميزاني
***
ذكرني يوم أخرتي
أقدر أقول حُجِّتِي
في القبر وحداني

آمال محمود كحيل
22-09-2009, 05:27 AM
عمي برعم الحداسي
كلمات :
أسامة علي

عمي برعم الحداثي
جابلي والله صداع في راسي
رحت مره أشتكيلو
عم برعم
اللي راضي ليه بقليلو
البلاوي ليه تجيلو
طلق الدنيا بمتاعها
قام وباعها
رغم ذلك
المهالك
فوق دماغو والمآسي
بص لِيَّه بنص عين
والحواجب مرفوعين
قاللي طيب كام مقاسك ؟؟
قلت والضيق فوق ملامحي
عم برعم
راعي حالي
مش دا قصدي عن مقاسي ؟
قال يا غالي
حبه أصبر
قلت أصبر يمكن أقدر
ألقا كلمه أفهمها منه
أو بكلمه ألاقيه يواسي
ياما قالوا الخلق عنه
دا تلاقيه في كل حِتَّه
يابني فَلْتَه
يقلب القميص جاكته
يقلب التوك توك كارته
مين مثيلو
بس راسو حَبَّه شَتَّه
قلت عادي طب ومالو
راح ملعبك كل حاجه
حبه يطلع فوق عماره
حبه يمشي وسط حاره
حبه طاير
حبه هادي وحبه فاير
حبه داخل في مغاره
دَخَّل النهار في ليلي
والنجوم في عز الضهر ورهالي
بهلوان آخر مهاره
يمشي حتى على الكراسي
رحت قايل وبسزاجه
من حماسي
إنته مبدع عم برعم
بس أنا مش قادر أفهم
ولاَّ ناسي
ولا يمكن أكون غريب
في وسط ناسي
ولا عقلي زي مركب
ليه يا عالم
وسط موج البحر تايه
مش لاقيلو ليه مراسي

آمال محمود كحيل
22-09-2009, 05:28 AM
يا طيبة إنتي وحشتيني

كلمات :

أسامة علي




وَاَتْغَرَّبْ بعيد عَنِّكْ



يرجَّعْنِي الحنين تاني



وأعاني قسوة الغربة



وأعاني الشوق في وجداني



وأحس النبضه جُوَّايَا



بِتِوّجَعْنِي



ومين في الغربة يسمعني



يِرَجَّعْنِي لأوطاني



أنا أِتْرَبِّيِتْ على أرضك



ومن نبضك



غزلت الشوق في أشعاري



حضنتك حلم في ضلوعي



وأفكاري



شربت الحب من وِدِّكْ



وليك شاري



يا أرض الخير



هنا داري



ما غِبْتِي لحظة عن عيني



ولا بتغيبي عن بالي



يا موالي وأحلا نشيد



أنا كللي إليك مشدود



ولو بينا يا غاليه سدود



وألف حدود



بحس بلهفة لوصالك



وليكي الخطوة وخداني



وأقولها بجد وصراحة



بعيد عنك مفيش راحة



ومن قلبي بقولهالك



يا طيبة إنتي وحشتيني



وأتغرب بعيد عنك



يرجعني الحنين تاني

آمال محمود كحيل
24-09-2009, 02:53 AM
تخاريف
كلمات :
أسامة علي
**********
أنا طبعي رومانسي
معجون بالحب
جوايا النبض
متشرب
متغرب
عاشق ... معشوق
مليان بحنين وبشوق
ساكن في القلب
وساعات بلقاني بَحِنْ
وحنيني طوفان
بركان
والنار جويا تشب
وساعات طاير
وساعات غلبان
وساعات مجنون
والطبع جنان
وساعات هادي
وساعات قلقان
وماليني الغلب
ما أنا زَيّ الناس
أحاسيسي ومشاعري
أحاسيس إنسان
بتصرف دايما بطبيعتي
وبعفويه
وأضحك من قلبي
والضحكه عَفِيَّه
ضحكة طفل صُغَيَّرْ
ضحكه تهز الكون
يشوفوني الناس
بيقولوا مجنون
وأنا !!!!!
ولا على بالي
ما يقولوا
إيه يعني ال هيجرالي
من إمتى الناس
رضيت عن بعضيها
من غير مصلحه بينها وبينك
وتحس الحب
في قلوبها ماليها
تطلع من قلبه الكلمة لوجه الله
صافيه
دافيه
زي الحضن بتاخدك نواحيها
لكن الكل خلاص
بقا محتاس
وبيجري ورا القرش
مش شايف غير نفسه وبس
لو كل الدنيا أتهدت حوالين منه
لهو داري بيها ولا بيحس
ودا شئ في زمنا أصبح عادي
ولذلك كل ال هاممني
وأنا رايح أنام في سريري
أكون راضي
وبرجلي أدب مكان ما أحب
مين قالك إني ملاك
ولا برضو شيطان
بغلط
أيوه أنا بغلط حتى كتير
لكن عندي ضمير
وأرجع وبتوب
طب حد يقوللي
مين فيكوا ما عملشي ذنوب؟
طبعا لو قال
هيكون مليون كداب
يبني
دا اللي خلقنا وسوانا
واللي لنورو بيهدينا
أنزلها في أغلا كتاب
كل البني آدمين
خطاءين
فبلاش فذلكه وحياة أبوك
وتعقدني في عيشتي
وتخليها هباب
في الطالعه وف النازله تسب
لا البحر بيفضل هادي
ولا موج بيدوم
ولا حتى الجو ربيع على طول اليوم
وكتير الريح بتهب
أنا عايز أعيش في سلام
بيني وبين نفسي
وبين مخاليق الله
وإن قلت الآه
ألاقيك جنبي
وإن شفتك يوم مهموم
يخاصمني النوم
ليه بينا تقوم الحرب
قوم بينا يا أخويا إنته وهوه
ونجرب مره نكون
إيد واحده
بلا شرقي وغربي
وشمال ويمين
وخناق بالنبوت
آخرتها يا صاحبي الموت
قوم يلا وسيب الملك لصاحبه
نتوكل سوى ع الرب
دا عيوب النفس البشريه
ملهاش دوى عند الطب

آمال محمود كحيل
23-10-2009, 04:29 PM
إتقابلنا ع السطور
كلمات : اسامه علي

أيوه فاكر
إتقابلنا ع السطور
لما حرفي في الطريق
شَدُّو حِنِّيِة حروفك
قولت أشوفك
بين سطورك
شُفْت نور
شُفْت سين ولا أي سين
شوفت جيم ولا أي جيم
شوفت عين الشوق ماليها
دبت فيها من الحنين
موجها خدني
وغرقتني في البحور
شوفت لَمَّه
شوفت كَسْرَه
قولت حَسْرَه
بس فجأه لقيتها فاتحه
بين إيديها أحلا ضَمَّه
طالعه من صدق الشعور
وأمَّاكان الشوق يجيني
من حنيني
كنت أحضن كل كلمه
برمش عيني
والحروف كانت بتنطق
صوتها بِيّرِنْ ف وداني
زي شقشقة الطيور
وإزاي أنسى
أحلا همسه
والكلام كات إيد تطبطب
تلمس الإحساس بلمسه
حزني وياها بيهرب
يسكن القلب السرور
أيوه فاكر
إننا يوم م اتقابلنا
كان لقانا ع السطور

آمال محمود كحيل
21-11-2009, 03:27 PM
فُضُّوهَا سيره دِي أُخْت كبيره
كلمات :
أسامة علي


علمناك العربي يا شاطر
وكمان علمناك الدين
ولا فوتناك أبدا يا جزاير
ضد فلول المحتلين
كتف بكتف المصري معاك
ناصر قالها المصري فداك
لو هتطول الغمه سنين
شيلنا هموم الوطن العربي
ضحيت فيها بولدي وقوتي
بعد غِنَانَا
شفت بعيني الفقر وموتي
وجاهدنا لجل فلسطين
ورفعنا علم القوميه
وعملنا جامعه عربيه
علشان نصبح متحدين
خضنا حروب علشان الأمه
شيلنا الرايه
رفعنا الهمه
ودافعنا بأموالنا وروحنا
ورغم جروحنا
بيتهمونا إننا خاينين
ودي آخرتها
نسيوا تاريخنا ونسيوا ماضينا
علشان كوره فقعوا عنينا
سابوا اللعب ونشروا الرعب
هنا وهناك إرهاب حوالينا
وأتحملنا وقولنا ومالو
بكره الجاهل يفهم غلطو
يِعْدِلْ حالو
وفضلنا عليهم صابرين
لكن بقا للصبر حدود
حرقوا علمنا
قالوا علينا إن احنا يهود
وإحنا بنلعب
جابوا جماهير في الأصل جنود
مع مساجين
علشان يكسب نازل يضرب
جُوَّاه غِلْ وحقد دفين
واللي قَاهِرْنَا ورا جماهيرنا
جريوا وراهم بالسكاكين
بقا بالذمه يا عالم قولوا
دول إخوان
فاكرين دِيَّه يا هِبْل بطوله
ما أنا أقدر وبكل سهوله
نبعت ليكوا ديابه تاكلكوا كما الخرفان
لكن إحنا يا ناس عاقلين
وإحنا خلاص يا حكومه مَلِّينَا
من أغانينا
وِفُضُّوهَا سيره دِي أُخْت كبيره
لازم يبقا السن بسن
وتبقا كمان العين بالعين

آمال محمود كحيل
21-11-2009, 03:49 PM
طُلِّي يَلَّا بأحلا طَلَّه

كلمات :
أسامة علي


طُلِّي يَلَّا بأحلا طَلَّه

إنتي ورده إنتي فُلَّه

أصلك إنتي يا بنتي زينه

غاليه والله كتير علينا

من حلاوتك

من غلاوتك

غاليه زَيّ نور عنينا

إنتي ذوق الذوق يا ذوق

قلبك المليان بشوق

نسمه بتطير بينا فوق

وبطباعك تإسرينا

وإسمعينا

الجمال مش بس فيكي

في الحلا وجمال عنيكي

الجمال عندك خصال

رِقَّه زايده في الدلال

والأدب زينة الجمال

دا حصاد أمك وابوكي

أغلا عيله

علموكي وكبروكي

وأدبوكي على الفضيله
ألف شكر بجد ليهم

اللي جابوا أرق زينه

إنتي فرحه

إنتي شجرة حُبْ طارحه

تحت منها تضللينا

أحلا ضِلَّه

واَمَّا نورك يا قمرنا

في سمانا جَيّ يزورنا

نلتقيكي برقه هَلَّه

أيوه إنتي يا حبيبتي

القمر بين أي شِلَّه

وإنتي ورده وإنتي فله

طُلِّي يَلَّا بأحلا طَلَّه

آمال محمود كحيل
15-01-2010, 04:01 AM
وقُلتْ أرسم
كلمات الشاعر
أسامة علي

وقُلتْ أرسم
وافَرَّغ هَمِّي في رسمي
وأكون نفسي
واعَبَّرْ عن معاناتي
وعن ذاتي
بحريه
وعفويه
وانسى كل شئ رسمي
وأطير وأسْبَحْ
وطِيِر يِصْدَحْ في بروازي
حدودي الكون
ساعات عاقل
ساعات مجنون
ولوحه بإيدي بَرْسِمْهَا
وعاشق كل معالمها
وأعيش الوقت وياها
تكلمني وأكلمها
وبإشاره
بدون ظِيِطَه ولا غاره
بتفهمني وبفهمها
كرهت قيود محوطاني
ومنعاني من التعبير
وسِكَّه كُلَّهَا محاذير
نسيت فيها إني مخلوق حُرْ
بدون ما أَضُرْ
وكلمه عاديه تِتْحَوَّرْ
وتِتْدَوَّرْ
وبِتْخَلِّفْ معاني كتير
بدون القصد والْنِيَّه
بَقَا خصمي
ومسجون بين حيطان عاده
مَدَى عمري
ومسجون بين حروف إسمي
مفيش غيرك يا ألواني
أَلَوِّنْ بيكي أحزاني
وأرسم ضحكه في الصوره
تبان على بنت أموره
تمد إيديها وتطبطب
على جسمي
وتمسح دمعتي السايله
على البرواز
وافَرَّغ هَمِّي في رسمي

آمال محمود كحيل
15-01-2010, 05:18 PM
أنت حنان أنت مودة
كلمات :
أسامة علي

يا معشوقة قلبي الأنقى
يا درة أحلامي الأرقى
أنت حنان
أنت مودة
أنت القمر وأنت ضياء
أنت من الزلات وجاء
أنت السترة أنت رداء
يستر عوراتي الممتدة
أنت الأرض وأنت سمائي
أنت منايا وأنت رجائي
أنت خلاصي وقت الشدة
أنت إيماني
أنت يقيني
أنت الوطن ومن يؤويني
أنت ملاذي زمن الردة
أنت شهيقي وأنت زفيري
أنت الطيب وأنت عبيري
في بستان حياتي أنت
أجمل ورده
أنت رفيقة دربي وأنت
من يأتيني في أحلامي
أنت الراحة وقت عنائي
بعد شقائي في أيامي
في معركة حياتي أنت
كل عتادي وأنت الْعُدَّة

تغريد سامى
07-01-2011, 12:39 PM
لَمَّا بَتْصَوَّرْ بِإنِّي بين إيديكي
كلمات : أسامةعلي

لَمَّا بَتْصَوَّرْ بِإنِّي بين إيديكي
جُوَّه حُضْنِكْ
شوق بيندهلي ف عِنِيكِي
نبض قلبك دَقْ فِيَّه
كل حِتَّه بتناديكي
وإنتي ساكنه بين إِيدَيَّه
حُضْن حُبِّي بِيداريكي
بَنْسَى كلالكون بحالو إلا إنتي
يا حبيبتي
وأنسى كل الدنيا وأنسى
إِنِّي فوق الأرض بمشي
إنِّي طاير في سماكي
وأنسى يومي
وأنسى نفسي
وأنسى بكره
وأنسىأمسي
وأبقا بتكلم بهمسي
وأبقا كللي ملك ليكي
وأبقا مش عايز أسيبك
مش حبيبك !!!
حاسس إنِّي بدون شعور
نار ونور



فوق رُبَاكِي
في سهولك
في جبالك
في هضابك
في تلالك
في كهوفك تهت فيكي
كل دا مجرد خيال
طب قوليلي لو حقيقه
مين يِرَجَّع عقلي تاني
من جنون العشق بيكي
لما أكون جنبك وثاير
مين يروضني ف هواكي؟؟

تغريد سامى
07-01-2011, 01:36 PM
وينزف عشقنا فينا
كلمات : أسامة علي

هنا جينا
لنار العشق من تاني
بتحدفنا أمانينا

و في قلوبنا
حبايبنا
كلام الحب يروينا
تِبَعَّدْنَا
تِقَرَّبْنَاتِغَرَّبْنَا ليالينا
يحن النبض في الشريان
كما الطوفان
وتِتْحرك أمانينا
وتخطفنا ليالي الشوق
تاخدنا لفوق
لأبعد من خيال شوقنا
تِوَدِّيِنَا
ونطلب م الزمن تاني
يِرَجَّعْنَا
ويِجْمَعْنَا
في جنتنا لوحدينا
أكون آدم
وبتكوني كمان حَوَّا
وتِسْكِرْنَا
مشاعرنا
لا ورقة توت بتسترنا
ولا عزال تمررنا
ولا حُسَّادْ حوالينا
وكل الدنيا دنيتنا
مكان ما نْحُطْ حتتنا
وفرشتنا تراب الأرض
سمانا تكون غطا لينا
نكون واحد
كيان واحد
خيال واحد
وتتشبك آيادينا
نموت في الحب وجنونو
و ليل العشق يحيينا
على نارو بنتقلب شمال ويمين
بشوق وحنين
وأكون جِنِّي
وأناديلك يا نار حِنِّي
وزيدي النار بآهاتك
بِأَنَّاتِكْ
بصرخة عشق ضُمِّينَا
وأتوه من نظره بعنيكي
وتزرعني إيديك فيكي
تكونيلي
وأكون ليكي
وينزف عشقنا فينا
وأِتْشَرَّبْ حنان كاسك
وأتونس ساعات ليلي
بإحساسك
تضميني ما بين إيدك
تدفيني بأنفاسك
يفيض العشق في عنينا
ولو صبحت رماد نارنا
لهيب جمرك يصحينا

تغريد سامى
07-01-2011, 01:37 PM
هـُـــــــــــوَّه & وهِيَّــــــــــــه

هُــــوه
يا ريتك نن ف عيوني
وما تغيبي عليه ف يوم
ولا ساعه ولا ثانيه
ولا في النوم
وأغطيكي وأدفيكي
برمش عنيه وجفوني
وأشوفك دوم
قصاد مِنِّي
وف الْنِنِّي
حبيب مقسوم
وزي م إنتي ف عْنَيَّه
وأكون ليكي
وبتكوني كمان لِيَّه
ونبقا حمام ف بِنِّيَه
وتوب سَتْرِكْ ولبساني
وحبك والله خلاني
أعيشك حلم وحقيقه
بشوفك لِيَّه سجاده
وفرشة طاعه وعباده
وبتوضيني من طهرك
بنظرة حب وسعاده
وقبلة قلبي وعنيه
في صبح وضهر
وطول اليوم بقت عاده
ودعوه لِيَّا بأدعيها
لربي الواحد القيوم
هــيه
وأنا زيك بقولهالك
ومن قلبي ودعيالك
يا ريتك فجر ف عيوني
وصوت نادي وبينادي
يرن ف قلبي ووداني
بأحلا كلام يصحيني
تخدني لدنيا عشقاها
وحلم العمر وياها
حبيب وطبيب يداويني
وآدي إِيدَيَّا فَرْدَاهَا
لحضن حبيبي مَدَّاهَا
وبتنادي عليك قَرَّبْ
تعالى أسكن أوام فيها
بقاسي برد أيامي
ومين غيرك يدفيني
دا انا الأرض اللي مشتاقه
لسيل حبك وأمطارك
وتطرح فيها أشجارك
تِخَضَّرْ بيها بستاني
وأشوف نسمة هواك جَيَّه
أوام تسكن أوام فِيَّا
نغم بيرن ف وداني
تبان الدمعه ف عِنَيَّه
وتتمايل على ألحانها أغصاني
وِزَيّ م إِنْتَه حَطِّطْنِي في عينك نِنْ
بَحُطَّكْ جُوَّه نِنْ الْنِنْ
وأشوف الدنيا بعيونك
وأشوف شوقك لقلبي يِحِنْ
وأسقيك حبي وحناني

تغريد سامى
07-01-2011, 01:39 PM
الصوت بخمسين يا ولا
كلمات : أسامه علي
ما بقالنا ياما سنين كتير في المهزله
من عهد فرعون الخسيس
العيشه صعبه مقَنْدِله
الشعب مَحْنِي في القوام
ولسيدو يضرب ميت تمام
شاطر وراه في الهروله
لا يوم غِضِبْ
ولا حتى كلمه من الْعَتَبْ
الناس هنا آخر أدب
تقول يمين
يقول آمين
وتْقُولُّه هِسْ
الكل هُسْ
مطيع وآخر مرجله
عاملين مَنَاحَه ليه بَأَه ؟
مهو كل شئ ماشي ف بلدنا سفلأه
رغم إننا
فيه عندنا
أَجْعَصْ قانون
وقانون مُخِيفْ
لَكِنُّو فوق قلب الضعيف
أما القوي
كل الأمور مِتْسَهَلَه
وآهي فرصه جات في الإنتخاب
للشقيانين
للرزق باب
فَتَّحْ عنيك
تاكل كباب
وأفتح إيديك
الصوت بخمسين يا ولا
أو كيلو لحمه بِدَمَّهَا
للمحرومين من أكلها
ما تعقدوش المسأله
واللي على وشوشهم تشوف خارطة شقا
ريحة التعب جوه النفوس
مِتْعَتَّقَه
مش مشكله
طَبْ مين يثور
اللي صبح م الفجر واقف في الطابور
علشان يجيبلو كام رغيف
وزميلو يمضيلو الحضور
وبيشتكي مُرْ الغَلا
ولا اللي شغال ليل نهار
والعيشه نار
بيخاف قوي م البهدله
يا عم فوق
يا سيدي روق
بلدنا لجنه ف كل شئ مِتْقَفِّلَه

تغريد سامى
07-01-2011, 01:40 PM
أغاني وتهاني الإنتخابات


كلمات : أسامة علي


أنا جبت الطبل البلدي ... وعزمت البلديات


وعملت زينات وكهارب... شغلنا الميكرفونات


وخطب رنانه نقولها .. وعملنا المؤتمرات


وشربنا القهوة الساده ... وشربنا المُرْ كاسات


رقصت فيفي صباحي ... على روح الحريات


ع التعديل الدستوري ... ناديه غنت سلامات


***


غطيني يا صفيه يا أختي


متحسر أنا على بختي


وأرقعي بالصوت على أخوكي


وقوليلهم طق ومات


***


أما بتوع الملوخيه والكوسه والحركات


شربوا سكر بلمون ... وكمان شربم شربات


وملبس م المستورد ... من أحلا الحلويات


وجيوبهم صبحت وارمه ... مليانه بالألوفات


ووسايط جامده قويه ... بتحل أتخن أزمات


وهدايا وأحلا وظايف ... دي مكافئة لإنتخابات


***


ويا شعب يا لايص رَوًْحْ


في الزفه مفيش لك مطرح


ع الفول وعلى الطعميه


أطفح وتنام في سكات


***

بتعيشواعلىالأوهام .. وحياتكو كلام في كلام
وف ساعة الجد تنام .. تحلموا بالإنتصارات
***
والآخره بتجروا عليهم .. وتبوسوا كمان في إيديهم
تدعوا ربي يخليهم .. علشان حبة خدمات


***


والتعلب دخل العشه


آل إيه داخل يتمشى


يفطر وكمان يتعشا


والديب جنب الغنمات


***


خليكوا نايمين في عسلكم


غنوا ظلموه بموالكم


بكره هتبيعوا في عزالكم


والفرشة هتبقا بلاط

تغريد سامى
15-05-2011, 11:33 PM
الوطن مش أرض بس بتتسكن
كلمات : أسامة علي


لما كنت زمان صغير
لسه طفل بقلب أخضر
قبل شعري يشيب وأكبر
لسه كان إحساس وليد
وإحنا في فصول الدراسه
كنت أحس بالوطن بس ف نشيد
كان مدرس الرياضه
كل يوم الصبح عاده
كلنا ف نَفَسْ شديد
نقول تحية العلم
لمصرنا أم الأمم
وكْبِرتْ والأحساس كِبِرْ
وأتغيرت كل المعاني
والوطن مبقاش نشيد
حُبِي ليه بقا شكل تاني
كل يوم عن يوم يزيد
حته مني وف كياني
الوطن مش أرض بس بتتسكن
الوطن دا كتاب حياتي
عمري كلو وذكرياتي
ذكريات أيام طفوله
ذكرى حلوة
وذكرى مره
من طفولتي للكهوله
الوطن مش أرض بس بتتسكن
ناس تخاف على بعضها
لحظة ألم بتلمها
الوطن عم ابراهيم
والأسطي سيد
والمعلم عب رحيم
وجارنا بطرس
والشيخ سليم
على أحلا أرض شوفتها
الوطن خالتي أم سيد
اللي بتبيع الخضار
اللي شقيانه تمللي ليل نهار
لجل م تربي ولادها ف حضنها
الوطن هما الغلابه الشقيانين
مقطف وفاس وشرشره متسلحين
اللي عرقهم طول نهارهم ع الجبين
هُمَّ دول الفلاحين
في كل شبر بيزرعوا ومخضرين
أرضك جناين
في الغيطان طول الليالي سهرانين
تبص ف وشوشهم تشوف
سمار بلادي
والخشونه والرجوله في الأيادي
ضهرو محني ليك با بلدي
يزرع الحبه في أرضك
والعمار في كل وادي
عشان نعيش في عزها
الوطن مش بس أرض بتتسكن
الوطن تاريخ وسيره
وإحنا أحفاد الجدود
اللي أفضالهم كتيره
صانوا بالدم الحدود
واللي خلو إسم بلدي
إسم عالي في الوجود
بنوا لبلدنا مجدها
الوطن مش بس أرض بتتسكن
الوطن
في قلب زوجه يلمني
بحنان وحب يضمني
وأحبها وتحبني
هوه الولاد
الوطن
كل شئ فيه نبض ينبض
هُمَّا دول كل الوطن
والأرض جزء مِنٌهُمْ
سقوها مرة بالعرق
وسقوها مرة بدمهم
كتبوا التاريخ على أرضها
محفور عليها إسمهم
مهودول ولادها وهيه طبعا أمهم
وأُمِنَا مش أي أم
هيه أم الدنيا مصر
وإحنا ناسها وشعبها
وحٌبَهَا
جوه العروق في دمنا
عاشقين ترابنا و أرضنا
حتى إبنك اللي سابك
عمريوم ما كان في ظنو
إنو يبعد عن ترابك
بُعْدُو عنك غصب عنو
بس حبك يا عظيمه
شايلو كنز جوه منو
شعبنا دايما ودود
ولما بيزورنا الغريب
في وسطنا بيكون لنا
أخ وحبيب
وأحلى شئ فيكي يا بلدي
مش سياحه أو أثار
أحلى شئ ع الأرض ناسك
قلبهم دايما عمار
عمرو يوم ما كان حقود
لوفي حاقد جاب في سيرتك
نبقا على أرضك أسود
وبدمنا
وبنفسنا عنك نزود
وإنتي إنتي يا أمنا
مهما شوفتي من المحن
هتفضلي في قلبنا
طول الزمن
أغلى وطن

تغريد سامى
15-05-2011, 11:35 PM
النهاردة مصر حرة
كلمات : اسامة علي

يا سليمان
قولها تاني
عايز أسمعها بوداني
قولها حتى ألف مَرَّه
النهارده مصر حُرَّه
بعد تلاتين عام مَذَلَّه
في الهوان
كُنَّا ديل للأمريكان
مصر رجعت لينا تاني
بالشباب وأغلا ثوره
ثورة على ظلم العباد
والتخلف والفساد
ثوره ع القهر ال ساد
والوسايط
والرشاوي
واللي نهبوا في البلاد
رَجَّعُوا مصر لمكانها
ولْوَطَنْهَا
كل شئ للأصل عاد
القياده
والرياده
مصر بلدي أغلا دُرَّه
مصر بلدي مش هَفِيَّه
مش مَطِيَّه لأي ظالم
أو وِسِيَّه للي حاكم
أيوه شعبك يا بلدنا كتير صبور
حتى لو كَاتْ عيشه مُرَّه
وأسألوا التاريخ علينا
الجهاد مكتوب علينا
رايته شايلنها بعنينا
هو دا حظك وقدرك
ليكي يا أرض الكنانه
واللي يستهتر بشعبك
راح نقوللو يَلَّا بَرَّه

النص هنا

http://www.teebason.com/vb/showthread.php?t=17571

تغريد سامى
15-05-2011, 11:40 PM
قاسي يا حب



كلمات : اسامة علي


كُنتْ بترسم لِيَّا سعادتي

كنت حكايتي

كنت لقلبي الهوا والْمَيَّه

كُنْت بَعِيشَكْ إحساس راقي

مع أشواقي

وألقاك وحدك وسط حياتي



إنْتَه الباقي

ضَمِّةْ إيد وشعور حِنِّيَه

كنت البسمه ف ليلي وحزني

لَمَّا يِطَوِّلْ

ومْن الأول ولْدِلْوَقْتِي

واخد كل حنيني ووقتي

زي الوشم ومطبوع فِيَّه

أملي وفرحي

بلسم جرحي

لَمْعِةْ عيني

وقت حَنِينِي

فرحة كل الكون حَوَالَيَّه

يللي بدأت معايا طريقي

وصفك صعب بجد حقيقي

شئ يتحس

بِقَلْبَي وبَسْ

وأما يِمِسَّني بَسْ بْلَمْسَه

بلقا الدنيا غير الدنيا فجأة ف ثانيه

وأقدر أطول السما بِإدَيَّه

أنا دلوقتي بخاف ليه مِنَّكْ

وأبعد عَنَّكْ

رَغْم بْإنَّكْ ساكن قلبي

وجُوَّه عِنَيَّه

أَيّوَه بخاف مِنَّكْ تِجْرَحْنِي

أو تفضحني عيوني ف قُرْبَكْ

لا أقدر أداري شعوري وأخبي

وبْتِعْلِنْهَا بكل بَرَاءَه

وكل جَرَاءَه

لَمَّا يا حُبْ تِدُقْ ف قَلْبِي

وألقاك قاسي يا حُبْ عَلَيَّه


النص هنا

http://www.teebason.com/vb/showthread.php?t=17773

تغريد سامى
15-05-2011, 11:41 PM
الوطن في الشدة دين


كلمات : أسامة علي



الشدايد


زي نار تِصْهر قلوبنا ف بَوّتَقَه


وقتها


تلاقينا قِبْط ومسلمين


وحده واحده ف شرنقه


لا شمال ولا يمين


الوطن في الشدة دين


هيه دي مصر الحبيبه عِشْقِنَا


واللي ماشيه في دَمِنَا


وإحنا قلوبنا في عشقها


مِتْشَعْلَقَه


مصري بلدي النهارده


أحلا وَرْدَه


إتْرَوِتْ دم بشبابها


فتحوا للحريه بابها


رجعوكي عروسه تاني


لابسه توب حُرِّيِتِكْ


مِتْزَوَّقَه


مصر بلدي


المهاره


الكنانه والجساره


الكنيسه جنب جامع


مصر عنوان الحضاره


في التاريخ مِتْعَتَّقَه


خَلُّوا بالكوا


صحصحوا في إيه جرالكوا


لِسَّه للفاسدين ديول


رَيَّحُونَا وأقطعوها


اللي عايزين يشعلوها


يجعلوها مَحْرَقَه


إبعدوا غربان زمان


عن طريقنا والميدان


اللي كارهينك يا مصر


لِسَّه بِيّكِيدُوا المكايد


بَسْ لأَّهـ


العينين متفنجلين ومْبَحْلَقَه


واللي يرفع راسو منهم


مش هيلقى مِنَّا تاني


غير حبال المشنقه


النص هنا


http://www.teebason.com/vb/showthread.php?t=17791

تغريد سامى
15-05-2011, 11:43 PM
عمرك يا مصر ما هتهوني
كلمات : أسامة علي

صباح الحب يا بلدي

يا أم الدنيا

حبك في قلبي حاجه تانيه

إسمك يا مصر على جبيني

يا مصر يا أحلا عروسه

يا المحروسه

شايلك أنا جُوَّه عيوني

وإن ألف حاقد حواليكي

كارهين ليكي

تِتْخَلَّصِي من سجانك

أرواح ولادك تفديكي

هتعودي لمكانك تاني

يا قاهره لكل عداكي

قلبي معاكي

ولا عمر معتدي خلاكي

تركعي أبدا

عمرك يا مصر ما هتهوني

يا مصر يا أول دوله عرفها الإنسان

عمرك أولوفات

وخمس مرات

مذكوره إسمك في القرآن

عشقك ديني

طول عمرنا من أجدادنا

فيك يا بلدنا

مسلم مسيحي إيد واحده

عايشين وِحْدَه

وبنينا بإدينا أمجادنا

ومن الأول

صوت الجرس فوق بيجلجل

وآدان بيدن ع المدنه

والأُلْفَة دايما عنواني

أم العرب هاجر مِنِّكْ

المصريه

وأم إبراهيم القبطيه

دا شرف لِيَّه

مين في التاريخ ده يدانيني

عيسى الرسول مَرْ ف عَرْضِكْ

زَهَّرْ وَرْدِكْ

وآل محمد يا بلدنا زينة أرضك

وأزهرك قبلة دينك

علم يزينك

بالوسطيه

الدنيا كلها عارفاني

وإن كان في حبة همجيه

شئ مش هيطول

عشان دا مش طبعنا أبدا

و أكيد هتزول

دا الثورة قامت يابلدنا

بإدين شبابنا وأولادنا

وبُكْرَه جَيّ وراجعلنا يا أم الدنيا

تاج لزماني

النص هنا

http://www.teebason.com/vb/showthread.php?t=18417

تغريد سامى
29-09-2011, 09:39 PM
عاشق جمال الورد

http://i34.tinypic.com/zx6t1u.jpg

عاشق جمال الورد
وبحس له بحنين
***
يللي معاكوا الورد
الورد أجيبو منين
***
من كل شكل ولون
ألوان تُسُرْ العين
بلون جميل وردي
أِدُّونِي مِنُّو إتنين
***
مِنُّو العبير بيفوح
بهديها للغاليين
***
وشيلوا منو الشوك
ليجرح الحلوين
مِنِّي لأغلى الناس

يِتْحَطَّوا ع الخدين
***

بيقولوا إن الورد

يجمع ما بين قلبين
***

وِيّرَجَّعْ الأحباب

من تاني لو غايبين
أنا ال ليلي ونهاري
بسأل حبيبي فين
***
حبيبي راح لبعيد
فاتني لوحدي حزين
***
فاتني وناري تقيد
وناسي ليه العناوين
النبض جُوَّه القلب
طالع كأنو أنين
***
كرهت طعم البعد
وملامة اللايمين
***

أمانه لو تشوفوه

وَصُّووه على المسكين
ييجي يزورو ف يوم
ويطل لو ساعتين
***
من قلبي بدعيلو
يعيش سنين وسنين
***
مستور وهاني البال
دايما يا رب أمين


شعر
أسامة علي


http://teebason.com/vb/showthread.php?t=19100

تغريد سامى
29-09-2011, 09:41 PM
حِنِِّي بَقَا

حِنِِّي بَقَا


سايباني وحدي للشقا


لا نهار بيسعد خطوتي


ولا حد يمسح دمعتي


ولا ليل بيوعد باللقا


بجري عليك


وأترجى فيك


أنا كل حته بتناديك


وروحي فيك متشعلقه


يا قلب حبيتو بصحيح


قلبي جريح


محتاج دواك


حضنك دفاك


دا الشوق سهامو ف جتتي


في كل حته مرشقه


ليه بتتقلي؟؟


ولا تسألي ؟؟


ولا رد يسعد مهجتي


وأما تشوفيني تهللي


دا انا لما اشوفك ببقا طير


لجلك بحب الشقشقه


وبغني ليك


وأكتب قصايد عشق فيك


وبين إيديك


نظرة عيوني مرقرقه


وف أحلا صوره برسمك


وبَسَلِّمِكْ


قلبي يا روحي وهمستي


ومحبتي


ترقص على نبض القلوب


ومشاعري ليك متزوقه


لا كان بإيدي أعشقك


ولا قلبي مد إديه في قلبك يسرقك


ولا شغله كات متلفقه


دا كان قدر


وأنا ماشي في ليل وحدتي


وعنيه فيكي مبحلقه


شوفتك قمر


مع بسمتك


حبك أمر


وبقيت أنا من قسمتك


وكل دقه ف قلبي ليك متشوقه


عايز أشوفك جنب مني ف حتتي


ومنورالي دنيتي


ومروقه


نشرب سوى


خمر الهوى


وكاس محبه معتقه


نسكر ندوب


من غير ذنوب


حوريتي وأنا فرشتك

واقطف في رمان جنتك

يا شمس عمري المشرقه

شعر
أسامة علي
25/09/2011


http://teebason.com/vb/showthread.php?t=19319